Ku Kombisa Nkhathalelo Eka Maphayona
1 Vanhu va Xikwembu va tiviwa hi ku hlanganyela ka vona entirhweni hi ku hiseka. Hambi leswi ku nga riki hinkwavo lava swiyimo swa vona swi va pfumelelaka ku phayona, hi fanele hi lwela ku kurisa moya wa vuphayona, hi tinyiketela eka leswi hi swi endlaka. Hi swin’we na vona naswona hi khutaza vo tala lava swi kotaka ku nghenela ntirho wa vuphayona.
2 Ku va phayona ni ku tshama u ri phayona i ntirho lowukulu. Maphayona ma rhwala xiyenge lexikulu xa ntirho wo chumayela ni wo dyondzisa. Leswi a swi endliwi handle ka matshalatshala lamakulu ni ku tinyikela. Xana van’wana va nga seketela ni ku khutaza malandza lawa ya nkarhi hinkwawo hi ndlela yihi?
3 Leswi Swi Nga Endliwaka: Maphayona ma lava nseketelo wa vakulu. Xikhutazo lexikulu xa nyikeriwa loko vakulu va tirha swin’we ni maphayona. Vakulu vo tala va ringeta ku tirha ni phayona rin’wana ni rin’wana ebandlheni, kumbexana kan’we hi lembe. Hi ndlela leyi vakulu va swi kota ku nyikela xibumabumelo xa leswi maphayona ma swi endlaka ivi va va pfuna leswaku va endla nhluvuko lowu engetelekeke. Maphayona ma nga ha lava ku lulamisa swiyimiso swa wona leswaku va va entirhweni hi nkarhi lowu vakulu va kumekaka ha wona. Nakambe, vakulu va fanele va tiyiseka leswaku yi kona nsimu leyi eneleke ya mintlawa. Mintirho yin’wana ya ntirho wa nsimu yi nga hleriwa ni ndzhenga kumbe ni madyambu leswaku maphayona ma kota ku tirhisa swiyimiso swa wona. Leswi ngopfu-ngopfu swi ta va tano hi nkarhi wa tin’hweti leti ku nga ni maphayona yo tala ya nkarhinyana.—Esa. 40:11.
4 Malandza ya vutirheli ma le xiyin’weni lexinene xo pfuna maphayona hi ku ma seketela evutirhelini ni hi ku khathalela malunghiselelo ya bandlha hi ku gingiriteka. Vamakwerhu va xisati lava nga maphayona va swi tsakela ku va ni vamakwerhu va xinuna va rhangela eku hleleni ka mintlawa ya ntirho wa nsimu. Lava tamelaka tibuku ni timagazini va nga tiyisekisa leswaku ku ni mimphakelo leyi eneleke. Ku khathalela swilo swo tano swi endla leswaku maphayona ma languta vutirheli bya wona.
5 Un’wana Ni Un’wana A Nga Pfuna: Vahuweleri va nga pfuna hi ku tiendla va hamba va kumeka leswaku va tirha ni maphayona. Maphayona ma tsakela ku famba ni vahuweleri van’wana ku seketeriwa hi vona. Kumbexana u nga hlela ku tirha ni maphayona kan’we hi vhiki kumbe kambirhi. Swilo leswi vonakaka swi nga averiwa maphayona, naswona ku hanana loku ka tlangeriwa swinene hi maphayona.—Vafil. 4:14-19.
6 Mindyangu yi nga endla swo tala ku pfuna swirho swa wona leswi phayonaka. Hakanyingi, swintirhwana swa le kaya swi nga hleriwa hi vuntshwa leswaku ku pfumeleriwa xirho xin’we xa ndyangu kumbe ku tlula leswaku xi phayona. Makwerhu un’wana wa xisati la nga ni vana vanharhu u tirha masiku mambirhi hi vhiki. Vafana va yena va pfuna hi ku ya exitolo ni ku endla ntirho wa le kaya. Kasi nhwanyana yena u pfuna hi ku basisa ni ku sweka. Ku sukela loko a thwasile, na yena u sungule ku phayona, va cincana masiku yo tirha ni mana wakwe. Ntirhisano wo tano exikarhi ka ndyangu wu endla leswaku vo tala va swi kota ku phayona naswona wu tisa mikateko endyangwini.
7 Maphayona lama gingiritekaka ma tikomba ma ri nkateko ebandlheni hi tindlela to tala. Ku chivirika ni xikombiso xa wona swi khutaza vo tala leswaku va endla leswi engetelekeke entirhweni. Hakunene, hi fanele hi tsakela ku endla leswi hi nga swi endlaka leswaku hi va pfuna. Matshalatshala yo tano ya vun’we ma tisela hinkwavo ntsako naswona ma dzunisa Yehova.