Mikateko Ya Ntirho Wa Vuphayona
“Mikateko ya Yehova yi fuwisa munhu, a nga ṅwi engeteli mikaralo.”—SWIVURISO 10:22.
1, 2. (a) Xana phayona rin’wana ri ku phofule njhani ku titwa ka rona malunghana ni vutirheli bya nkarhi hinkwawo? (b) Hikwalaho ka yini maphayona ma ri exiyin’weni xo kuma ntsako lowukulu eku endleni ka vadyondzisiwa?
“XANA wu kona ntsako lowukulu ku tlula ku vona munhu loyi u n’wi dyondziseke a va mudzunisi wa Yehovha la gingiritekaka? Swa tsakisa ni ku tiyisa ripfumelo, ku vona ndlela leyi matimba lawa Rito ra Xikwembu ri nga na wona, ma susumetelaka vanhu ha yona leswaku va cinca vutomi bya vona leswaku va tsakisa Yehovha.” Sweswo swi tsale hi phayona ra le Canada leri veke entirhweni wa nkarhi hinkwawo ku tlula 32 wa malembe. Malunghana ni vutirheli byakwe bya vuphayona u ri: “A ndzi anakanyi hi ku endla ntirho wun’wana. Entiyisweni a ndzi nge anakanyi hi nchumu wun’wana lowu nga tisaka ntsako lowu fanaka.”
2 Xana wa pfumela leswaku swi tisa ntsako lowukulu ku pfuna munhu leswaku a nghena endleleni leyi yaka evuton’wini? Kavula, maphayona a hi wona ma ri woxe lama vaka ni ntsako wo tano. Malandza ya Yehovha hinkwawo ma le hansi ka xileriso xo “endla vadyondzisiwa,” naswona ma tikarhatela ku endla tano. (Matewu 28:19) Hambiswiritano, tanihi leswi maphayona ma kotaka ku heta tiawara to tala evutirhelini bya nsimu, ma tala ku va exiyin’weni lexinene xo kuma ntsako lowukulu eku endleni ka vadyondzisiwa. Kambe, vuphayona byi tlhela byi va ni vuyelo byin’wana. Vulavula ni maphayona, ma ta ku byela leswaku ku phayona i ndlela leyi xiyekaka yo vona ‘mikateko ya Yehovha leyi fuwisaka munhu.’—Swivuriso 10:22.
3. I yini lexi nga ta hi khutaza loko hi ri karhi hi hambeta hi tirhela Yehovha?
3 Sweswinyana, maphayona lama humaka eswiphen’wini swo hambana-hambana swa misava ma komberiwe leswaku ma hlamusela mikateko leyi ma yi kumeke evutirhelini bya nkarhi hinkwawo. A hi xiyeni leswi ma swi vulaka. Kambe u nga heli matimba loko ntirho wa wena wu kavanyeteka hikwalaho ka rihanyo leri nga nyawuriki, ku dyuhala kumbe swiyimo swin’wana. Tsundzuka leswaku nchumu wa nkoka i ku tirhela Yehovha hi mbilu hinkwayo, ku nga khathariseki xiyimo lexi u n’wi tirhelaka u ri eka xona. Kumbexana ku twa tinhlamuselo ta wona swi ta engetela ku navela ka wena ku nghenela ntirho lowu lowu vuyerisaka, loko swi koteka.
Ku Eneriseka Ni Ntsako
4, 5. (a) Hikwalaho ka yini ku avelana ni van’wana mahungu lamanene ku ri ntokoto lowu vuyerisaka? (b) Xana maphayona ma titwa njhani hi ku hlanganyela evutirhelini bya nkarhi hinkwawo?
4 Yesu u te: “Ku nyika i nkateko lowu tlulaka ku nyikiwa.” (Mintirho 20:35) Ina, ku nyika loku nga riki ka vutianakanyi ku ni mimbuyelo ya kona. (Swivuriso 11:25) Leswi swi tano ngopfu-ngopfu loko swi ta eka ku avelana mahungu lamanene ni van’wana. Entiyisweni, hi yihi nyiko leyi nga yikulu leyi hi nga yi nyikaka munhu-kulorhi ku tlula ku n’wi pfuna leswaku a kuma vutivi bya Xikwembu, lebyi yisaka evuton’wini lebyi nga heriki?—Yohane 17:3.
5 Ku pfumelelana ni sweswo, lava hlanganyelaka evutirhelini bya nkarhi hinkwawo va tala ku vulavula hi ntsako ni ku eneriseka loku va ku kumaka evutirhelini bya vona. “Ndza swi tiva leswaku ku hava ntirho wun’wana lowu a wu ta va wu ndzi tisele ku eneriseka loku ndzi ku kumeke hi ku avelana ntiyiso ni van’wana,” ku vula phayona ra le Britain leri nga ni malembe ya 64 hi vukhale. Noni yin’wana ya le Zaire yi phofule leswi ku phayona a swi vula swona eka yona: “Ntirho wa vuphayona wu ve nchavelelo wa xiviri eka mina endzhaku ka loko ndzi loveriwe hi nuna wa mina la rhandzekaka. Loko ndzi hamba ndzi ya ensin’wini leswaku ndzi ya pfuna van’wana, ku vava loku ndzi ku twaka hikwalaho ka ku lahlekeriwa ku ya ku antswa. Ndzi veka ripfumelo ra mina eka switshembiso swa Yehovha kutani ndzi anakanya swinene hi ndlela leyi ndzi nga pfunaka van’wana lava ndzi dyondzaka na vona, leswaku va hundzula vutomi bya vona. Emakun’wini ya siku rin’wana ni rin’wana, ndzi etlela vurhongo byo nandziha, naswona mbilu ya mina yi tala hi ntsako.”
6. Hi wihi ntsako wo hlawuleka lowu maphayona man’wana ma veke na wona?
6 Van’wana lava a va ri karhi va phayona hi makume ya malembe va ve ni ntsako lowu hlawulekeke wo tirha etindhawini leti nga toxe, va simeka mavandlha, lawa hi ku famba ka nkarhi ma vumbeke swifundzha. Hi xikombiso, le Abashiri, eHokkaido (exihlaleni xa le n’walungu-lungu wa Japani), ku ni makwerhu wa xisati loyi a ri karhi a phayona kwalaho ku ringana malembe ya 33. U tsundzuka leswaku loko a ya ro sungula enhlengeletanweni ya xifundzha—laha a ku hlangane hinkwavo vanhu va le Hokkaido—a ko va ni vanhu vo ringana 70 ntsena. Sweswi ke? Ku ni swifundzha swo ringana 12 exihlaleni xexo, ni vahuweleri vo tlula 12 000. Anakanya ndlela leyi mbilu yakwe yi khapaka ntsako ha yona, loko a hlangana ni mintshungu ya vahuweleri-kulobye va Mfumo etinhlengeletanweni ni le mintsombanweni exihlaleni xexo!
7, 8. Hi wihi ntsako lowu maphayona lama nga ni nkarhi wo leha ma veke na wona?
7 Maphayona man’wana lama nga ni nkarhi wo leha ma ve ni ntsako wo vona swichudeni swa Bibele swi khuvuriwa kutani swi fikelela malunghelo lama engetelekeke ya ntirho. EJapani makwerhu un’wana wa xisati loyi a tirheke eswiavelweni swa kaye swa vuphayona ku sukela hi 1957, u tsundzuka loko a fambisela wanhwana un’wana loyi a a tirha ebankini magazini wa Xalamuka! Ku nga si hela tin’hweti ta kaye wanhwana loyi u khuvuriwile. Endzhaku u tekiwile, naswona yena ni nuna wakwe va ve maphayona yo hlawuleka. Vona ntsako lowu makwerhu loyi wa xisati la nga phayona a veke na wona, loko a ri exiavelweni xakwe xa vunharhu, vandlha ra ka vona ri endzeriwe hi mulanguteri wa rona wa xifundzha lontshwa ni nsati wakwe—khale ka xichudeni xakwe xa Bibele!
8 A swi hlamarisi leswi lava endleke ntirho wa vuphayona wu va ntirho-vutomi wa vona va wu langutaka wu ri “lunghelo ra risima leri faneleke ku tlangeriwa,” hilaha phayona rin’wana leri nga ni malembe ya 22 ri swi phofuleke hakona!
Vumbhoni Bya Nkhathalelo Wa Yehovha
9. Tanihi Muwundli Lonkulu, i yini leswi Yehovha a swi tshembisaka malandza ya yena, naswona leswi swi vula yini eka hina?
9 Yehovha, Muwundli Lonkulu, u tshembisa ku hlayisa malandza ya yena, ku ma khathalela hi tlhelo ra moya na hi swilo swa nyama. Hosi Davhida wa le minkarhini ya khale u swi kotile ku vula a ku: “A nḍi ri lo’ntŝha, kutani nḍi dyuharile, kambe a nḍi v̌onanga l’a lulameke a ṭhikiwa, ni v̌ana v̌a yena v̌a kombele v̌uŝa bya v̌ona.” (Pisalema 37:25) Kavula, xitiyisekiso lexi xa Xikwembu a xi hi ntshuxi eka vutihlamuleri byo wundla mindyangu ya hina, naswona a xi hi nyiki mpfumelelo wo titshega hi malwandla lawa vamakwerhu va Vukreste va hi kombisaka wona. (1 Vatesalonika 4:11, 12; 1 Timotiya 5:8) Kambe, loko hi nyiketa vutomi bya hina hi ku tirhandzela leswaku hi tirhela Yehovha hi xitalo, a nge hi cukumeti nikatsongo.—Matewu 6:33.
10, 11. Hi ku ya hi leswi ma swi voneke, xana maphayona yo tala ma tiva yini hi vuswikoti bya Yehovha byo wundla?
10 Maphayona lama nga kona emisaveni hinkwayo ma swi tiva kahle leswaku Yehovha wa va hlayisa lava tshembelaka eka yena, hi ku ya hi leswi ma tshameke ma swi vona. Xiya mpatswa lowu nga maphayona lowu rhurheleke exidorobanini xin’wana laha a ku ri ni xilaveko lexikulu xa vachumayeri va Mfumo. Endzhaku ka tin’hweti ti nga ri tingani, mintirho yi sungule ku kala, naswona a wu nga ha ri na mali. Kutani wu ve ni xikweleti xa ndzindza-khombo wa movha xo ringana R359. Makwerhu wa xinuna wa hlamusela: “A hi ri hava ndlela leyi a hi fanele hi xi hakelela ha yona, vusiku byebyo hi khongele swinene.” Siku leri tlhandlamaka, va kume khadi leri humaka endyangwini lowu na wona a wu kayakaya hi tlhelo ra timali. Ndyangu lowu wu kume mali ya xibalo leyi wu tlheriseriweke yona, naswona tanihi leswi a yi tele ku tlula leyi a wu yi languterile, wu lave ku pambulela mpatswa lowu wa maphayona. Va rhumele cheke yo ringana R359! Makwerhu loyi wa xinuna la nga phayona wa hlamusela: “A hi nge ri rivali siku rero—a ndzi tsake ngopfu! Hi ma tlangele ngopfu malwandla ya ndyangu lowu.” Yehovha na yena wa ti tlangela tintswalo to tano, ku nga moya wa malwandla, lowu a khutazaka malandza yakwe leswaku ma va na wona.—Swivuriso 19:17; Vaheveru 13:16.
11 Maphayona yo tala ma nga nyikela mintokoto leyi fanaka. Ma vutise, kutani ma ta ku byela leswaku a ma si tshama ma “ṭhikiwa.” Loko ri languta endzhaku emalembeni ya 55 ri ri evutirhelini bya nkarhi hinkwawo, phayona leri nga ni malembe ya 72 hi vukhale ri ri: “Yehovha a nga si tshama a ndzi cukumeta.”—Vaheveru 13:5, 6.
“Ndlela Leyinene Ngopfu Yo Tshinela Eka Yehovha”
12. Hikwalaho ka yini ntirho wo twarisa mahungu lamanene ku ri lunghelo lerikulu swonghasi?
12 Leswi Yehovha a hi kombeleke leswaku hi twarisa mahungu lamanene ya Mfumo wakwe, sweswo hi swoxe i lunghelo. U hi languta—hambileswi hi nga vanhu lava nga hetisekangiki—tanihi ‘vatirhi-kulobye’ na yena entirhweni lowu lowu ponisaka vutomi. (1 Vakorinto 3:9; 1 Timotiya 4:16) Loko hi ri karhi hi chumayela van’wana hi Mfumo wa Xikwembu, hi ri karhi hi twarisa ku herisiwa ka vubihi, hi ri karhi hi hlamusela vanhu hi rirhandzu ra xona ro hlamarisa hi ku nyikela nkutsulo, hi ri karhi hi pfula Rito ra xona leri hanyaka ni ku dyondzisa vanhu va timbilu letinene leswi ri swi tameleke, sweswo hi swoxe swi hi tshineta ekusuhi ni Muvumbi wa hina, Yehovha.—Pisalema 145:11; Yohane 3:16; Vaheveru 4:12.
13. Xana van’wana va ri yini hi vuyelo lebyi vaka kona evutirhelini bya vona malunghana ni vuxaka bya vona na Yehovha?
13 Maphayona ma swi kota ku heta nkarhi wo tala n’hweti na n’hweti ma ri karhi ma dyondza ni ku dyondzisa hi ta Yehovha. Xana ma titwisa ku yini leswi leswi, swi khumbaka vuxaka bya wona ni Xikwembu? “Ku phayona i ndlela leyinene ngopfu yo tshinela eka Yehovha,” ku hlamula nkulu wa le Furwa la veke phayona ku tlula khume ra malembe. Phayona rin’wana etikweni rero, leri heteke malembe ya 18 evutirhelini bya nkarhi hinkwawo, ri ri: “Ntirho wa vuphayona wu hi pfumelela leswaku hi ‘nantswa ni ku vona leswaku Yehovha hi lonene,’ siku na siku hi aka vuxaka lebyi tiyeke ni Muvumbi wa hina.” (Pisalema 34:8) Makwerhu un’wana wa xisati wa le Britain loyi a veke phayona ku tlula 30 wa malembe u titwa hi ndlela leyi fanaka. U ri: “Ku titshineta ekusuhi ni moya wa Yehovha leswaku wu ndzi pfuna evutirhelini bya mina swi ndzi tshineta ekusuhi na yena. Ndzi swi vone kahle leswaku hakanyingi moya wa Yehovha wu ndzi kongomise endyangwini wo karhi hi nkarhi lowu faneleke.”—Ringanisa Mintirho 16:6-10.
14. Xana maphayona ma pfuneka njhani hi ku tirhisa Bibele ni tibuku leti sekeriweke eBibeleni siku na siku leswaku ma dyondzisa van’wana?
14 Maphayona yo tala ma kuma leswaku ku tirhisa Bibele ni tibuku leti sekeriweke eBibeleni siku na siku leswaku ma hlamusela ni ku dyondzisa mintiyiso ya Matsalwa, swi ma pfuna leswaku ma ya ma tiva Rito ra Xikwembu. Makwerhu un’wana wa xinuna wa le Spain la nga ni malembe ya 85 hi vukhale, loyi a veke phayona ku ringana malembe ya 31, wa hlamusela: “Ku phayona swi ndzi pfunile leswaku ndzi kuma vutivi bya Bibele lebyi enteke, vutivi lebyi ndzi byi tirhiseke ku pfuna vanhu vo tala leswaku va kuma vutivi bya Yehovha ni ku tiva swikongomelo swa yena.” Makwerhu un’wana wa xisati wa le Britain loyi a a ri karhi a phayona ku ringana malembe ya 23 u ri: “Vutirheli bya nkarhi hinkwawo byi ndzi pfunile leswaku ndzi tshama ndzi ri karhi ndzi navela swakudya swa moya.” Ku hlamusela van’wana “ku tshemba loku [u] nga na kona,” swi nga tiyisa mintshembo ya wena malunghana ni tidyondzo leti u ti namarhelaka. (1 Petro 3:15) Phayona leri humaka eAustralia ri ri: “Ku phayona swi antswisa ripfumelo ra mina loko ndzi ri karhi ndzi tiphofula eka van’wana.”
15. I yini leswi vo tala a va ri karhi va swi endla leswaku va kota ku nghenela ntirho wa vuphayona kutani va namarhela eka byona, naswona hikwalaho ka yini?
15 Entiyisweni, vatirheli lava lava nga maphayona va khorwiseka leswaku va hlawule ntirho lowu wu va tiselaka mikateko ya ntsandza-vahlayi, leyi humaka eka Yehovha. A swi hlamarisi leswi vo tala va endleke mindzulamiso evuton’wini bya vona, hambi ku ri ku tshika ntirho-vutomi wa nyama ni rifuwo ra swilo leswi vonakaka, leswaku va nghenela vutirheli bya vuphayona ni ku tshama eka byona!—Swivuriso 28:20.
Xana Mbilu Ya Wena Yi Navela Ku Endla Leswi Engetelekeke?
16, 17. (a) Loko u nga tiyiseki leswaku u nga swi kota ku phayona, i yini leswi u faneleke u swi endla? (b) Xana van’wana va titwa njhani loko va nga swi koti ku phayona?
16 Endzhaku ko xiya leswi maphayona ma swi vulaka malunghana ni mikateko ya vutirheli bya vuphayona, kumbexana wa tivutisa loko swi nga koteka leswaku wena u phayona. Loko swi ri tano, hikwalaho ka yini u nga vulavuli ni phayona leri humeleleke evutirhelini bya nkarhi hinkwawo? Nakambe u nga ha pfuneka loko wo vulavula ni un’wana wa vakulu evandlheni, loyi a ku tivaka—loyi a tivaka xiyimo xa rihanyo ra wena, swipimelo swa wena ni vutihlamuleri bya wena bya ndyangu. (Swivuriso 15:22) Swiringanyeto leswinene swo huma eka van’wana swi nga ha ku pfuna leswaku u kambisisa hi vukheta, ku vona loko u nga swi kota ku phayona. (Ringanisa Luka 14:28.) Loko u ta swi kota ku phayona, hakunene u ta kuma mikateko yo tala.—Malakiya 3:10.
17 Kambe, ku vuriwa yini hi vahuweleri vo tala lava tshembekeke va Mfumo lava nga riki exiyin’weni xo phayona, hambiloko va swi lava ku endla leswi engetelekeke evutirhelini? Hi xikombiso, xiya ndlela leyi makwerhu un’wana wa xisati wa Mukreste loyi a tikarhatelaka ku kurisa vana va yena va mune a ri yexe a titwaka ha yona. U ri: “Ndza karhateka, hikuva a ndzi ri phayona ra nkarhi hinkwawo, kambe sweswi hikwalaho ka swiyimo swa mina, a ndzi swi koti ku ya entirhweni wa nsimu hilaha a ndzi hamba ndzi endla hakona.” Makwerhu loyi wa xisati u va rhandza swinene vana vakwe naswona u lava ku va wundla. Hi nkarhi lowu fanaka, u navela swinene ku endla leswi engetelekeke entirhweni wo chumayela. Wa hlamusela: “Ndzi rhandza vutirheli.” Vakreste van’wana lava tinyiketeleke lava rirhandzu ra vona ro rhandza Xikwembu ri va susumetelaka ku lava ku tirhela Yehovha ‘hi mbilu hinkwayo’ va titwa hi ndlela leyi fanaka.—Pisalema 86:12.
18. (a) I yini leswi Yehovha a swi langutelaka eka hina? (b) Hikwalaho ka yini hi nga fanelanga hi hela matimba loko swiyimo swi nga hi pfumeleli ku endla leswi hi navelaka ku swi endla?
18 Tsundzuka leswaku leswi Yehovha a swi langutelaka eka hina i ntirho wa mbilu hinkwayo. Wu nga ha hambana hi ku ya hi vanhu. Van’wana va swi kota ku endla mindzulamiso etimhakeni ta vona leswaku va va maphayona ya nkarhi hikwawo. Van’wana vo tala va tsarisa leswaku va va maphayona ya nkarhinyana nkarhi na nkarhi kumbe hilaha ku hambetaka, va heta 60 wa tiawara n’hweti na n’hweti evutirhelini. Hambiswiritano, nhlayo leyikulu ya vanhu va Yehovha va tinyiketela entirhweni wa ku chumayela ni ku dyondzisa hi mbilu hinkwayo tanihi vahuweleri emavandlheni. Kutani loko hakunene u siveriwa hi rihanyo, ku dyuhala, vutihlamuleri bya ndyangu, kumbe swiyimo swin’wana, u nga heli mbilu. Ntsena loko u nyikela hi leswi u nga na swona, ntirho wa wena i wa ntikelo emahlweni ka Xikwembu, hi laha lowu wa lava nga evutirhelini bya nkarhi hinkwawo wu nga wa ntikelo hakona!
Hinkwerhu Ka Hina Hi Nga Wu Kombisa Moya Wa Vuphayona
19. Xana moya wa vuphayona i yini?
19 Hambiloko u nga swi koti ku tsarisa tanihi phayona, u nga swi kota ku kombisa moya wa vuphayona. Xana moya wa vuphayona i yini? Nkandziyiso wa Vutirheli Bya Hina Bya Mfumo bya July 1988 wu te: “Wu nga ha hlamuseriwa tanihi ku va ni langutelo lerinene ehenhleni ka xileriso xo chumayela ni ku endla vadyondzisiwa, ku tinyiketela hi xitalo eku kombiseni ka rirhandzu ni ku khathalela vanhu, ku va la tikarhataka, ku tsakela ku landzelela N’wini swinene ni ku tsakela swilo swa moya, hayi swa nyama.” Xana u nga wu kombisa njhani moya wa vuphayona?
20. Xana vatswari va nga wu kombisa njhani moya wa vuphayona?
20 Loko u ri mutswari la nga ni vana lavatsongo, u nga va khutaza hi mbilu hinkwayo leswaku va nghenela ntirho-vutomi wo va maphayona. Langutelo ra wena lerinene hi vutirheli ri nga ha endla leswaku va languta ntirho wa Yehovha wu ri wa nkoka swinene evuton’wini bya vona. U nga ha rhamba maphayona ni valanguteri lava famba-fambaka ni vasati va vona ekaya ra wena leswaku vana va wena va ta vuyeriwa hi swikombiso swa lava tsakelaka ntirho wa nkarhi hinkwawo. (Ringanisa Vaheveru 13:7.) Hambi ku ri emindyangwini leyi hambaneke hi vukhongeri, hi ku vulavula ni hi ku va xikombiso lexinene, vatswari lava nga vapfumeri va nga swi kota ku pfuna vana va vona leswaku va endla vutirheli bya nkarhi hinkwawo byi va pakani ya vona evuton’wini.—2 Timotiya 1:5; 3:15.
21. (a) Xana hina hinkwerhu hi nga va seketela njhani lava phayonaka? (b) I yini leswi vakulu va nga swi endlaka leswaku va khutaza maphayona?
21 Evandlheni, hinkwerhu hi nga va seketela hi mbilu hinkwayo lava kotaka ku phayona. Hi xikombiso, xana u nga endla matshalatshala yo tirha ni phayona evutirhelini, ngopfu-ngopfu minkarhi leyi phayona ri nga ha vaka ri tirha roxe? U nga kuma leswaku ku ni ku “tiyisana swin’we.” (Varhoma 1:11, 12) Loko u ri nkulu, u nga endla leswi engetelekeke leswaku u khutaza maphayona. Loko huvo ya vakulu yi hlangana, nkarhi na nkarhi yi fanele yi kambisisa swilaveko swa maphayona. Loko phayona ri hetiwe matimba kumbe ri tikeriwa, u nga hatliseli ku vula leswaku ri fanele ri tshika vuphayona. Hambileswi ku endla xibumabumelo xexo swi nga ha vaka swi fanerile eka swiyimo swin’wana, u nga rivali leswaku vuphayona i lunghelo ra risima leri nandza wa nkarhi hinkwawo a ri tlangelaka swinene. Ku nga ha va ku laveka xikhutazonyana ni ndzayo leyi tirhaka kumbe mpfuno wo karhi. Rhavi ra Sosayiti ra le Spain ra tsala: “Loko vakulu va ri karhi va khutaza vuphayona, va sekela maphayona evutirhelini bya nsimu, ni ku ma risa nkarhi na nkarhi, maphayona ma va ni ntsako lowukulu, ma titwa ma tirhisiwa naswona ma navela ku ya emahlweni ku nga khathariseki swihinga leswi nga ha vaka kona.”
22. Enkarhini lowu wo nonon’hwa ematin’wini ya vanhu, i yini leswi hi faneleke hi tiyimisela ku swi endla?
22 Hi hanya enkarhini wo nonon’hwa ematin’wini ya vanhu. Yehovha u hi nyike ntirho lowu ponisaka vutomi leswaku hi wu endla. (Varhoma 10:13, 14) Hambi ha swi kota ku hlanganyela entirhweni lowu wa nkarhi hinkwawo hi ri maphayona kumbe e-e, a hi kombiseni moya wa vuphayona. A hi veni ni langutelo ra xihatla ni ku va ni moya wa ku tinyiketela. A hi tiyimiseleni ku nyika Yehovha leswi a swi kombelaka eka hina—ntirho wa mbilu hinkwayo. Naswona a hi tsundzukeni leswaku loko hi nyikela hinkwaswo leswi hi nga kotaka ku swi nyikela, hambi swi fana ni swingwece leswitsongo swa noni kumbe mafurha ya Mariya layo durha ngopfu, ntirho wa hina i wa mbilu hinkwayo, naswona Yehovha wa wu tlangela ntirho wa hina wa mbilu hinkwayo!
Wa Tsundzuka Xana?
◻ Hikwalaho ka yini vutirheli bya nkarhi hinkwawo byi endla munhu a eneriseka ni ku va ni ntsako?
◻ Hi ku ya hi leswi ma swi voneke, i yini leswi maphayona yo tala ma swi tivaka malunghana ni vuswikoti bya Yehovha byo khathalela malandza yakwe?
◻ Maphayona ma vona ntirho wa wona wu ma endlela vuxaka byihi na Yehovha?
◻ Xana u nga wu kombisa njhani moya wa vuphayona?
[Xifaniso lexi nga eka tluka 23]
Maphayona ma kuma ntsako lowukulu hi ku endla vadyondzisiwa
[Xifaniso lexi nga eka tluka 23]
Vana va wena va nga pfuneka hi ku tolovelana ni vahuweleri va Mfumo va nkarhi hinkwawo
[Xifaniso lexi nga eka tluka 23]
Vakulu va nga khutaza maphayona evutirhelini bya wona bya nsimu