Mikateko Leyi Taka Ni Ntirho Wa Vuphayona
1, 2. Hi yihi mikateko leyi tisiwaka hi ntirho wa vuphayona naswona ha yini?
1 Phayona rin’wana ri te: “Ndza swi tiva leswaku a wu kona ntirho wun’wana lowu a wu ta ndzi nyika ku eneriseka loku tisiwaka hi ku avelana ni van’wana ntiyiso.” Kasi rin’wana ri te: “Siku rin’wana ni rin’wana ndzi etlela vurhongo byo nandziha, naswona mbilu ya mina yi va yi tsakile.” Leswi hi swi twaka eka maphayona lawa, swa fana ni leswi nga vuriwaka hi vamakwerhu hinkwavo lava kumeke mikateko leyi taka ni ntirho wa maphayona.—Swiv. 10:22.
2 Ku pfuna van’wana leswaku va kuma vutivi bya Rito ra Xikwembu lebyi ponisaka vutomi, swi tisa ku eneriseka ka xiviri. (Mint. 20:35; 1 Tes. 2:19, 20) U n’wana loyi ku nga khale a ri phayona u te: “Swa tsakisa naswona swi tiyisa ripfumelo ku vona ndlela leyi Rito ra Xikwembu ri nga ni matimba ha yona eku khutazeni ka vanhu leswaku va hundzula vutomi bya vona.” Ina, maphayona ma kuma mikateko yo tanihi leyi hi ku tiendla lava kumekaka leswaku va pfuna vanhu ni ku fambisa tidyondzo ta Bibele.
3, 4. Xana vuphayona byi n’wi dyondzisa njhani munhu leswaku a tiseketela hi Yehovha, naswona byi n’wi pfuna njhani leswaku a kula hi tlhelo ra moya?
3 Ku Tiseketela Hi Xikwembu: Ku tiseketela ka vona hi moya wa Xikwembu siku na siku loko va ri evutirhelini bya vona, swi pfuna maphayona leswaku ma hlakulela “mihandzu ya moya” naswona mihandzu leyi ya va sirhelela. (Gal. 5:16, 22, 23) Ku tlula kwalaho, tanihi leswi ma tirhisaka Rito ra Xikwembu nkarhi na nkarhi, maphayona ma tala ku va ni vutshila eku tirhiseni ka Matsalwa leswaku ma lwela ntiyiso ni ku khutaza van’wana. (2 Tim. 2:15) Makwerhu wa xinuna la phayoneke malembe yo tala u ri: “Vuphayona byi ndzi pfune leswaku ndzi kuma vutivi bya Bibele lebyi enteke, naswona vutivi lebyi ndzi byi tirhisele ku pfuna vanhu vo tala leswaku va tiva Yehovha ni swikongomelo swakwe.” Sweswo swa tsakisa hakunene!
4 Maphayona ya nkarhi hinkwawo na wona ma fanele ma tiseketela hi Yehovha hi tindlela tin’wana. Ripfumelo ra vona ri tiyisiwile hi ku vona ndlela leyi a ma katekisaka ha yona matshalatshala ya vona yo kuma swilaveko swa vutomi. Phayona leri nga ni malembe ya 72 hi vukhale leri veke phayona ra nkarhi hinkwawo ku ringana malembe ya 55 ri hlamusele ri ku: “Yehovha a nga si tshama a ndzi tshika.” Ku tlula kwalaho, hi ku olovisa vutomi bya wona, maphayona ma tisirhelela eka mivilelo yo tala ya vutomi. Xana leswi swa ku tsakisa?—Mat. 6:22; Hev. 13:5, 6.
5. Xana vuphayona byi n’wi pfuna njhani munhu leswaku a tshinela eka Yehovha?
5 Ku Tshinela Eka Yehovha: Vuxaka bya hina na Yehovha i bya risima ku tlula nchumu wihi na wihi lowu hi nga vaka na wona. (Ps. 63:3) Loko hi hlanganyela hi xitalo evutirhelini bya nsimu hikwalaho ko rhandza Yehovha, hi ta va ni vuxaka bya le kusuhi na yena. (Yak. 4:8) Makwerhu loyi se a nga ni malembe ya 18 a ri phayona u te: “Ntirho wa vuphayona wu hi nyika lunghelo ra leswaku hi ‘nantswa hi vona leswaku Yehovha hi lonene,’ siku na siku hi aka vuxaka lebyi tiyeke ni Muvumbi wa hina.”—Ps. 34:8.
6. Hi swihi swilo leswi maphayona ma faneleke ma va na swona naswona i vamani van’wana lava vuyeriwaka handle ka maphayona?
6 Hambiloko swiyimo swi va pfumelela leswaku va phayona, maphayona ma fanele ma va ni ripfumelo leri tiyeke, ma rhandza Xikwembu ni vaakelani hi xiviri ni ku va ni moya wa ku tinyikela. (Mat. 16:24; 17:20; 22:37-39) Kambe, leswi hi swi vonaka exikandzeni xa maphayona, swi kombisa leswaku mikateko leyi fambisanaka ni vuphayona i yikulu. (Mal. 3:10) A hi maphayona ntsena lama kumaka mikateko leyi kambe mindyangu ya vona ni vandlha ra vuyeriwa swinene hi moya lowunene lowu maphayona ma wu kombisaka.—Filp. 4:23.