Tiyimisele Ku Tiva Vamakwenu
1 Bibele yi hlamusela munghana wa ntiyiso tanihi munhu la ku namarhelaka ku tlula makwenu, loyi nkarhi na nkarhi a ku rhandzaka ni ku tshembeka eka wena, ni loyi a pfunaka nakulobye loko a ri emaxangwini. (Swiv. 17:17; 18:24) A hi nge va pfumali vanghana vo tano evandlheni loko hi tikarhatela ku tivana ni ku rhandzana.—Yoh. 13:35.
2 Yi kona minkarhi leyinene ya ku tolovelana ni vamakwerhu emahlweni ni le ndzhaku ka minhlangano. Swi nga va njhani loko wo fika ka ha ri ni nkarhi ivi u tshamanyana endzhaku ka minhlangano leswaku u ta hungasa ni vamakwenu? Tihlanganise ni ku burisana ni vamakwerhu vo hambana-hambana, ku katsa ni lavakulu lava nga ni ntokoto ni lavatsongo kumbe lava nga ni tingana.
3 Sungula Mabulo: U nga xewetani ni vamakwerhu swi helela kwalaho ntsena. U nga sungula bulo hi ku va byela ntokoto wa le vutirhelini bya nsimu, yinhla leyi tsakisaka eka magazini wa sweswinyana kumbe nhlamuselo leyi u yi tweke eka nhlangano lowa ha ku helaka. U nga dyondza swo tala eka vamakwenu hi ku va muyingiseri lonene, u va khutaza ku vulavula hi mintokoto ya vona ni swilo leswi va nga eku swi dyondzeni. Ku vutisa ntsena ndlela leyi munhu a n’wi tiveke ha yona Yehovha swi nga paluxa swo tala. Van’wana va hlangavetane ni mintokoto leyi tiyisaka ripfumelo evuton’wini bya vona, kasi van’wana sweswi va tiyisela swiyimo swo tika leswi nga tolovelekangiki. Tanihi vanghana va ntiyiso, loko hi tiva mintokoto leyi va hlangavetaneke na yona swi ta endla leswaku hi va twela vusiwana ni ku xalamukela swilaveko swa vona.
4 Vana Ni Xinghana Eka Un’wana Ni Un’wana: Endzhaku ka rifu ra xinhwanyetana xakwe, makwerhu un’wana wa xisati a swi n’wi nonon’hwela ku yimbelela tinsimu ta Mfumo leti vulavulaka hi ku pfuxiwa ka vafi. U ri: “Siku rin’wana, makwerhu wa xisati loyi a tshame eka layini leyin’wana u ndzi vone ndzi ri karhi ndzi rila. U tile eka mina, a ndzi angarha, a yimbelela risimu leri na mina ri kondza ri hela. Ndzi titwe ndzi va rhandza swinene vamakwerhu va xinuna ni va xisati naswona a ndzi tsake ngopfu leswi hi yeke eminhlanganweni, ndzi swi vonile leswaku laha hi nga pfunekaka kona, hi le Holweni ya Mfumo.” Hi fanele hi va ni xinghana eka vamakwerhu ni ku va tiyisa nhlana loko swi fanerile ni ku va khutaza nkarhi na nkarhi.—Hev. 10:24, 25.
5.Tanihi leswi misava leyi ya khale yi hambetaka yi vanga ntshikilelo, a hi tiyimiseleni ku tivana ku antswa ni vamakwerhu. Ku khutazana loku ka xiviri ku ta vonaka ku ri nkateko eka hinkwavo.—Rhom. 1:11, 12.