Hi Nga Yi Endla Mintirho Leyikulu
1 Vutirheli bya Yesu Kreste a byi tiviwa hi mintirho leyi hlamarisaka. Hi singita u phamele vanhu va magidi, u hanyise vo tala naswona u pfuxe van’wana eku feni. (Mat. 8:1-17; 14:14-21; Yoh. 11:38-44) Mintirho yakwe yi hlamarise tiko hinkwaro. Kambe, madyambu man’wana yo hetelela a nga si fa, u byele valandzeri vakwe lavo tshembeka a ku: “Loyi a kombisaka ripfumelo eka mina, na yena u ta endla mintirho leyi ndzi yi endlaka; naswona u ta endla mintirho leyikulu ku tlula leyi.” (Yoh. 14:12) Xana hi nga yi endlisa ku yini mintirho “leyikulu”?
2 Hi Ku Tirha Nsimu Leyikulu: Ndhawu leyi Yesu a tirhela eka yona a ku ri ePalestina ntsena, kasi vadyondzisiwa vakwe lavo sungula va byeriwe ku nyikela vumbhoni “ku ya fika exiphen’wini xa le kule swinene xa misava,” ekule swinene ku tlula laha Yesu hi byakwe a chumayeleke kona. (Mint. 1:8) Ntirho wo chumayela lowu a wu sunguleke wu endliwa emisaveni hinkwayo sweswi, wu hlanganisa matiko ya 232. (Mat. 24:14) Xana u hlanganyela hi xitalo ensin’wini leyi averiweke vandlha ra ka n’wina?
3 Hi Ku Fikelela Vanhu Vo Tala: Yesu u siye vadyondzisiwa va nga ri vangani leswaku va yisa ntirho wa ku chumayela emahlweni. Hambiswiritano, hikwalaho ka ku nyikela ka vona vumbhoni hi ku gingiriteka hi Pentekosta ya 33 C.E., lava amukeleke ntiyiso ni ku tlhela va khuvuriwa siku rero a va ri mimoya-xiviri ya kwalomu ka magidi manharhu. (Mint. 2:1-11, 37-41) Ku hlengeletiwa ka lava “a va ri ni mboyamelo lowunene eka vutomi lebyi nga heriki” ku hambete ku ya fikela enkarhini wa hina, laha hi khuvulaka vanhu va 1000 hi siku hi avhareji. (Mint. 13:48) Xana u endla hinkwaswo leswi u nga swi kotaka leswaku u fikelela vanhu va timbilu letinene hinkwako-nkwako lomu va nga kumekaka kona ni ku tlhelela eka lava tsakelaka hi ku hatlisa hilaha swi nga kotekaka hakona?
4 Hi Ku Chumayela Nkarhi Wo Leha: Vutirheli bya Yesu bya laha misaveni a byi ri bya malembe manharhu ni hafu ntsena. Vo tala va hina a hi ri karhi hi chumayela nkarhi wo leha ku tlula wolowo. Ku nga khathariseki leswaku hi ta pfumeleriwa ku hambeta ni ntirho lowu ku fikela kwihi, ha tsaka leswi hi pfunaka mudyondzisiwa un’wana ni un’wana lontshwa leswaku a nghena endleleni leyi yisaka evuton’wini. (Mat. 7:14) Xana u ni swo tala swo swi endla n’hweti yin’wana ni yin’wana entirhweni wa Hosi?—1 Kor. 15:58.
5 Ha tiyiseka leswaku hi ku seketeriwa hi Yesu, ha ha ta endla mintirho leyikulu tanihi vadyondzisiwa vakwe va ntiyiso.—Mat. 28:19, 20.