Ku Tirha Na Yehova Hi Ku Tshembeka
“Oho Šikwembu! u nḍi dyonḍisile ku sungula v̌utŝheni bya mina, kutani ku fika ŝeŝi, nḍi ṭhama nḍi v̌ula ŝihlamariso ŝa wena.”—PSALMA 71:17.
1. Ha yini hi nga vulaka leswaku ntirho i nyiko leyi humaka eka Yehova?
NTIRHO i yin’wana ya tinyiko ta Xikwembu eka munhu. Eka vatswari va hina vo sungula, Adamu na Evha, Yehova u te: “Mi tata misav̌a, mi yi fuma.” Xexo a xi ri xiavelo xa ntirho lowu tlhontlhaka kambe a xi ri lexinene eka vuswikoti bya vona. Matshalatshala lama lavekaka ya miri ni miehleketo a ma ta engetela ntsako wa vona wa ku hanya, ku tlula xin’wana ni xin’wana lexi tokotiwaka hi swiharhi leswi a swi ri kona ekaya ra vona ra laha misaveni.—Genesa 1:28.
2, 3. (a) Xana ntirho wu ve yini eka vo tala namuntlha, naswona ha yini? (b) I nkarhi wihi wo endla ntirho wo hlawuleka lowu hi faneleke ku wu xiya?
2 Hambi ku ri eka xiyimo xa hina xa ku pfumala ku hetiseka, ‘ntirho wa ku tikarhata’ lowu hetelelaka hi ‘leswinene’ i “ku nyika ka Šikwembu,” hi laha wanuna wo tlhariha Solomoni a tsaleke ha kona. (Eklesiasta 3:13) Munhu wa ha lava ku tirhisa tinyiko ta yena ta miehleketo ni miri. Ku va u nga ri entirhweni swi tisa gome. Hambi swi ri tano, a hi hinkwayo mintirho leyi nga yinene kumbe leyi lulameke. Eka vo tala, ntirho i ku karhateka, i ku tirhela mbhongolo yo fa.
3 Hambi swi ri tano, ku ni ntirho lowu vuyerisaka hakunene lowu un’wana ni un’wana a rhambiwaka ku hlanganyela eka wona. Kambe ku ni vakaneti ni swiphiqo swo tala leswi faneleke ku hluriwa eka lava va hlanganyelaka eka wona. Ha yini swi ri swa nkoka leswaku hi fanelekela ntirho lowu? Hi swi endla hi ndlela yihi sweswo? Hi nga si hlamula swivutiso leswi, a hi xiyeni leswi ku sungula:
I Mani Loyi Hi Tirhelaka Yena?
4. I ntirho wa njhani lowu nyikeke Yesu ntsako ni ku aneriseka?
4 Yesu Kriste u te: “Swakudya swa mina i ku endla ku rhandza ka Loyi a ndzi rhumeke, ni ku heta ntirho wa yena swinene.” (Yohane 4:34) Ku tirhela Yehova hi ku tshembeka swi tisele Yesu ntsako lowukulu ni ku aneriseka. Swi n’wi nyike xikongomelo evuton’wini, naswona eku heleni ka vutirheli bya yena bya malembe manharhu ni hafu, entiyisweni a a ta vula eka Tatana wa yena wa le matilweni a ku: “Ndzi ku dzunisile laha misaveni, hi ku heta ntirho lowu u ndzi nyikeke wona leswaku ndzi wu tirha.” (Yohane 17:4) Tanihi leswi swakudya swa nyama swi nyikaka matimba, swi tano hi ntirho wa mpimo wa swa moya. Yesu u tshikilele leswi eka xiendlakalo xin’wana loko a tshinya: “Mi nga tirheleni swakudya leswi bolaka, kambe tirhelani swakudya leswi nga boriki.” (Yohane 6:27) Ku hambana ni sweswo, ntirho lowu nga humesiki mihandzu hi tlhelo ra moya wu yisa eku tsaneni ni rifu.
5. I vamani lava kaneteke ntirho lowunene lowu Yesu a wu endleke, naswona ha yini?
5 “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.” Yesu u vule marito lawa eka Vayuda lava a va n’wi sola hikuva hi siku ra Savata u horise wanuna loyi a vabyeke malembe ya 38. (Yohane 5:5-17) Hambi leswi Yesu a a endla ntirho wa Yehova, vakaneti va vukhongeri va ale ku pfumela mhaka yoleyo naswona va endle xin’wana ni xin’wana lexi va nga xi kotaka ku n’wi tshikisa. Ha yini? Hikuva a va huma ka tata wa vona, Sathana Diyavulosi, loyi minkarhi hinkwayo a kaneteke ntirho wa Yehova. (Yohane 8:44) Tanihi leswi Sathana a nga ‘tihundzulaka a va ntsumi ya ku vonakala,’ a tirhisa “tindlela hinkwato leto biha ta vuxisi,” hi lava ku twisisa ka moya ni ku anakanya lokunene ku xiya mintirho ya yena leswaku yi njhani. Loko swi nga ri tano, hi nga tikuma hi tirha hi ku kanetana na Yehova.—2 Vakorinto 11:14; 2 Vatesalonika 2:9, 10.
Vakaneti Va Gingiriteka
6. Hikwalaho ka yini vagwinehi va ri “vatirhi lava xisaka”? Kombisa.
6 Ku fana ni vagwinehi van’wana namuntlha, van’wana, hi ku nga tshembeki va tirha tanihi vayimeri va Sathana ku kandziyela ripfumelo ra swirho leswa ha ku sungulaka ku hlanganyela swa bandlha ra Vukriste. (2 Vakorinto 11:13) Ematshan’wini yo tirhisa Bibele ntsena tanihi xisekelo xa tidyondzo ta ntiyiso; va yisa mianakanyo eku ringeteni ka ku sola New World Translation of the Holy Scriptures, onge hi loko Timbhoni ta Yehova ti titshege hi ku helela eka yona leswaku ti seketeriwa. Kambe leswi a swi tano. Eka xiphemu lexikulu xa lembe xidzana leri, Timbhoni ngopfu-ngopfu ti tirhise King James Version, Douay Version ya Rhoma Khatoliki, kumbe ku hundzuluxela kwihi na kwihi loku a ku kumeka hi ririmi ra tona, leswaku ti dyondza ntiyiso hi Yehova ni swikongomelo swa yena. Naswona va tirhise ku hundzuluxela loku ka khale eku huweleleni ka ntiyiso hi mayelana ni xiyimo xa vafi, vuxaka exikarhi ka Xikwembu ni N’wana wa xona, ni leswaku ha yini ku ya ntlhambinyana ntsena etilweni. Vanhu lava nga ni vutivi nakambe va swi vona leswaku Timbhoni ta Yehova ti hambeta ti tirhisa ku hundzuluxela ko tala ka Tibibele eka ntirho wa vona wo nyikela evhangeli emisaveni hinkwayo. Hambi swi ri tano, ku sukela hi 1961, hi laha ku engetelekeke va tsakele ku tirhisa New World Translation, yi ri ni ku hundzuluxeriwa loku nga enkarhini, loku pakanisaka ni ku hlayeka lokunene.
7. (a) Hikwalaho ka yini Yesu a landzula vo tala lava tivulaka lava nga ni ripfumelo eka yena? (b) Ha yini swi ri swa nkoka ku yingisa ndzayo leyi nga eka 1 Yohane 4:1?
7 Yesu u vule leswaku u ta landzula vo tala lava tivulaka leswaku va ni ripfumelo eka yena. U pfumerile leswaku va nga profeta, va hlongola mademona, ni ku ‘endla mahlori layo tala’ hi vito ra yena. Hambi swi ri tano, u xiya leswi tanihi mintirho leyo “homboloka.” (Matewu 7:21-23) Ha yini? Hikuva a va endli ku rhandza ka Tata wa yena wa le matilweni naswona a va pfuni nchumu malunghana na Yehova Xikwembu. Mintirho leyi nga tolovelekangiki ni leyi vonakaka yi ri ya masingita ni namuntlha yi nga ha sunguriwa hi mukanganyisi lonkulu, Sathana. Muapostola Yohane, loko a tsala papila ra yena ro sungula leri tolovelekeke ku tlula malembe ya 60 endzhaku ka ku fa ni ku pfuka ka Yesu, u tsundzuxe leswaku Vakriste va fanele ‘va nga pfumeli nhlamuselo yihi na yihi leyi huhuteriweke, kambe va kambisisa tinhlamuselo leti huhuteriweke ku vona loko ti sunguriwe hi Xikwembu.” Hi fanele ku endla leswi fanaka.—1 Yohane 4:1.
Mintirho Leyi Nga Vuyerisiki
8. Hi fanele ku titwa hi ndlela yihi hi mintirho ya nyama?
8 Hambi loko hi nga hlanganyeli eka ntirho lowu sivelaka ku tswala, mihandzu, mintirho ya hina a yi nchumu loko yi hambeta yi seketela ku navela ka nyama leyi tsaneke. Muapostola Petro u vule leswaku hi hete nkarhi lowu leheke hi laha ku aneleke hi ri karhi hi tirha “leswi tsakeriwaka hi vamatiko . . . hi ku endla swa manyala, hi ku navela ku titsakisa, hi ku pyopyiwa, ni makolo, ni ku va swilovekelo, ni ku gandzela swikwembu swa hava leswi nga lavekiki.” (1 Petro 4:3, 4) Kavula, leswi a swi vuli swona leswaku hinkwavo lava sweswi va nga Vakriste lava tinyiketeleke va hlanganyerile emintirhweni yo tano, kambe swi vula leswaku langutelo ra lava va nga endla tano a ri fanele ri hundzukile hi xihatla loko xivono xa vona xa moya xi hluvuka. Misava yi ta vulavula hi ndlela yo biha hi vona hikwalaho ka ku hundzuka ka vona; sweswo swi fanele ku languteriwa. Hambi swi ri tano, va fanele ku hundzuka loko va ta va vatirhi lava tshembekaka entirhweni wa Yehova.—1 Vakorinto 6:9-11.
9. Xana i yini leswi hi swi dyondzaka eka ntokoto wa Mbhoni leyi yi sungueleke ku dyondza tanihi muyimbeleri wa ntlangu?
9 Yehova u hi nyike tinyiko to tala leswaku hi ti tsakela, vuyimbeleri byi ri exikarhi ka tano. Hambi swi ri tano, leswi ‘misava hinkwayo yi nga ehansi ka matimba ya lowo biha,’ Sathana Diyavulosi, xana leswi a swi katsi vuyimbeleri bya misava? (1 Yohane 5:19) Ina, vuyimbeleri ku nga va ntlhamu wa mano, hi laha Sylvana a swi kumeke ha kona. U ve na nkarhi wo dyondza eFurwa tanihi muyimbeleri wa ntlangu. U hlamusela a ku: “A ndza ha ri na ku navela lokukulu ko tirhela Yehova.” A ndzi tsakela vuphayona bya nkarhinyana naswona a ndzi tiyimisele ku hlanganisa swilo leswi swimbirhi evuton’wini bya mina. Kambe xiphiqo xo sungula lexi a ndzi fanele ku hlangavetana na xona eku landzeleleni ka ntirho-vutomi wa mina a ku ri vunghwavava. Eku sunguleni, vanghana va mina a va ndzi languta tanihi loyi a nga riki na ntokoto loko ndzi nga fambisani ni timhaka ni xikombiso xa vona xa vunghwavava. Endzhakunyana, mbango lowu onhakeke wu sungule ku ndzi tlanyata, wu ndzi endla ndzi tiyiselela swilo leswi Yehova a swi vengaka. Un’wana wa vadyondzisi va mina u hambete a ndzi khutaza ku endla vuyimbeleri bya mina byi va bya vukhongeri, naswona ndzi dyondzisiwe ku tivona exitejini ni ku ehleketa leswaku a ndzi antswa ku tlula van’wana. Hinkwaswo leswi a swi ndzi vilerisa ngopfu. Eku heteleleni, a ndzi fanele ku lunghiselela ku kamberiwa ka vuyimbeleri loku hlawulekeke. Ndzi khongele eka Yehova leswaku a swi endla swi va erivaleni leswaku ndzi fanele ku teka ndlela yihi. Hambi leswi ndzi yimbeleleke kahle ni ku titshemba, a ndzi nga ri exikarhi ka lava va hlawuriweke. Endzhaku, ndzi dyondzile leswaku ha yini—vuyelo byi lulamisiwe exihundleni ka ha ri emahlweni swinene ka mphikizano. Kambe ndzi ve na nhlamulo ya le rivaleni ya xikhongelo xa mina naswona ndzi anakanye ku tshika vuyimbeleri bya le xitejini ndzi ya dyondzisa ku yimbelela ekaya.” Makwerhu loyi wa xisati endzhaku u tekane ni nkulu wa bandlha ra Vukriste, laha sweswi ha vambirhi va tirhaka hi ku tshembeka leswaku va yisa swilaveko swa Mfumo emahlweni.
10. Xana i makumu wahi lawa u ma fikelelaka eka marito ya Yesu lama nga eka Yohane 3:19-21?
10 Yesu u te: “Un’wana ni un’wana la endlaka leswo biha, ú venga ku vonakala, kutani a nga ti eku vonakaleni, hi ku chava leswaku mintirho ya yena yi nga ta humela erivaleni.” Hi tlhelo rin’wana, “loyi a hanyaka entiyisweni, wa ta eku vonakaleni, leswaku mintirho ya yena yi ta vonaka yi ri leyi endliweke hi ku yingisa Xikwembu.” (Yohane 3:19-21) Mawaku nkateko lowu ku nga wona ku tirha hi ku pfumelelana ni ku rhandza ni xikongomelo xa Yehova! Kambe ku swi endla hi laha ku humelelaka, hi fanele hi minkarhi hinkwayo hi pfumelela mintirho ya hina yi kambisisiwa hi ku voniga ka Rito ra Xikwembu. A hi dyuhalanga ngopfu naswona a hi siyiwanga hi nkarhi ngopfu leswaku hi hundzula ndlela ya hina ya vutomi ni ku amukela xirhambo xo teka ntirho lowu nga ni ntikelo wa Yehova.
Ku Endla “Mintirho Leyinene” Namuntlha
11. Xana i yini leswi vo tala va swi landzelaka tanihi “mintirho leyinene,” naswona ha yini sweswo swi nga yisaka eku heleni ka matimba?
11 Ntirho lowu nga ni ntikelo namuntlha wu fanele ku kombisa xihatla xa minkarhi ya hina. Vanhu vo tala lava tshembekaka va pfumela naswona va khomekile hi mintirho leyi hi xitalo yi hlamuseriwaka tanihi “mintirho leyinene,” leyi endleriwaka ku pfuna vanhu hi ntolovelo kumbe hinkwalaho ka xivangelo xo karhi lexi kongomeke. Hambi swi ri tano, ntirho lowu wu nga va lowu nga hetaka matimba swonghasi! EBritain, CAFOD (Catholic Fund for Overseas Development), loko yi vika eka tsima ra yona ra ku herisa ndlala, yi te: “Eka malembe manharhu lama hundzeke . . . timiliyoni ta tirhandi ti tlakusiwile leswaku ku endliwa mpfuno wa xilamulela-mhangu. Magidi ya vutomi ma ponisiwile. Sweswi vutomi byebyo byi le khombyeni nakambe . . . Kambe ha yini? I yini leswi nga fambangiki kahle?” Loko yi ya emahlweni ni mhaka ya yona, CAFOD Journal yi hlamusela leswaku swiphiqo swa nkarhi wo leha a swi kalanga swi lulamisiwa ni leswaku “tindlela to ntlhantlha swiphiqo, leti a ti laveka ngopfu ku hluvukisa vanhu ti tirhiseriwe ku vanga dzolonga [nyimpi ya xin’wana-manana]” Handle ko kanakana, u twe mintlhaveko leyi fanaka yi phindhiwa hi tinhlengeletano leti katsekeke entirhweni lowu fanaka.
12. Hi yihi nhlamulo leyi nga yona eka swiphiqo leswi langutanaka ni misava namuntlha?
12 Ndlala i xiphiqo xa xihatla. Hambi swi ri tano, i vamani lava xiyaka makhombo ya namuntlha ya ndlala ni nyimpi tanihi lama hetisisaka vuprofeta bya Yesu Kriste, lebyi kombetelaka eku heleni ka mafambiselo ya namuntlha ya swilo? (Matewu 24:3, 7) I vamani lava humeseke vumbhoni lebyi hlanganisaka swiendlakalo leswi ni ku gada ka vakhandziyi va tihanci lava hlamuseriweke hi vuenti ebukwini ya Bibele ya Nhlavutelo, ndzima 6? Nkarhi hinkwawo, Timbhoni ta Yehova ti endle tano hi ku tshembeka eka magazini lowu. Ha yini? Ku kombisa leswaku a swi koteki eka munhu ku humesa ntlhantlho wihi na wihi wa nkarhi wo leha. Leswi a swi vuli swona leswaku Vakriste a va na mhaka ni swiphiqo swa misava. A swi tano nikantsongo. Va ni ntwela-vusiwana naswona va ta endla hinkwaswo leswi va nga swi kotaka leswaku va hunguta ku xaniseka. Hambi swi ri tano, va langutane hi xiviri ni mhaka ya leswaku handle ko nghenelela ka Xikwembu swiphiqo swa misava swi nge tshuki swi tlhatlhekile. Ku fana ni swisiwana, swiphiqo leswi swi ta tshama swa ha ri kona ntsendze loko Sathana a ha pfumeleriwe ku hambeta tanihi mufumi wa misava leyi.—Marka 14:7, Yohane 12:31.
Ntirho Wa Nkoka Lowukulu
13. Hi wihi ntirho wa xihatla ngopfu namuntlha, naswona i vamani lava wu endlaka?
13 Xilaveko xa xihatla swinene namuntlha i ku chumayela mahungu lamanene ya leswaku Mfumo wa Yehova Xikwembu wu ta siva tihulumendhe hinkwato ta misava ku nga ri khale naswona yi ta tisa ntshunxeko lowu vanhu lava chavaka Xikwembu va wu navelaka. (Daniel 2:44; Matewu 24:14) Yesu Kriste u endle ku huwelela ka Mfumo wa le matilweni ku va xikongomelo xa yena lexikulu evuton’wini, hambi leswi ku chumayela ka yena a ku hikeriwe etikweni ra Palestina. Namuntlha mpimo wa ku chumayela loku wu fike emisaveni hinkwayo, tanihi hi leswi Yesu a vuleke leswaku swi ta va tano. (Yohane 14:12; Mintirho 1:8) Ku va ni xiphemu, hambi ku ri lexintsongo, entirhweni wa Xikwembu i lunghelo leri nga ringanisiwiki. Vavanuna ni vavasati, lavakulu ni lavantsongo hi ku fanana, lava hi nkarhi wun’wana va nga kalangiki va lorha hi ku va vachumayeri va mahungu lamanene va le mahlweni hi ntirho wo veka evhangeli lowu hetisisiwaka hi Timbhoni ta Yehova namuntlha. Tanihi Nowa ni ndyangu wa yena, va endla ntirho wa Xikwembu hi ku tshembeka ehansi ka xileriso lexi humaka eka Yena, naswona hikwalaho ka matimba ya Yena, tanihi manghenelo lama yisaka eku heleni ka mafambiselo lawa ya swilo.—Vafilipiya 4:13; Vaheveru 11:7.
14. Xana ku chumayela swi ponisa vutomi ni ku sirhelela hi nkarhi lowu fanaka hi ndlela yihi?
14 Ntirho wa ku veka vumbhoni hi Timbhoni ta Yehova emasikwini lawa ya makumu wu ponisa vutomi eka lava va yingisaka ni lava va tekaka goza eka mahungu lamanene lama va ma twaka. (Varhoma 10:11-15) Nakambe i xisirhelelo eka lava va chumayelaka. Hi ku va lava hakunene hi tsakelaka ku pfuna vanhu lava va nga ni swiphiqo leswikulu ku tlula swa hina, handle ko kanakana hi nga khathali ngopfu hi swiphiqo leswi hi nga vaka na swona. Ha swi vona leswaku misava leyi ya mimpimanyeto leyi yaka ehansi yi ta lava leswaku hi tixaxameta ni tindlela ta yona. Kutani ku tata miehleketo ya hina hi mianakanyo ya Xikwembu hi nkarhi wa ku chumayela ka hina swi tlula ku tiyisa ripfumelo; i ku khathala ka hina. Tanihi laha Mbhoni yin’wana yi swi vekaka ha kona: “Loko ndzi nga ringeti ku hundzula vanhu lava ndzi hlanganaka na vona, va nga hundzula mina!”—Ringanisa 2 Petro 2:7-9.
Ku Tirha Ni Bandlha
15. I vutihlamuleri byihi lebyi rhwexiwaka varisi-ntsongo namuntlha, naswona swirho swa vavanuna swa bandhla swi fanele ku titwa hi ndlela yihi hi ku ya hi 1 Timotiya 3:1?
15 Loko vanhu lava ha tsakelaka va ta ebandlheni, va ta ehansi ka nkhathalelo wa Murisi Lonkulu, Yehova Xikwembu, ni Murisi wa yena Lonene, Yesu Kriste. (Psalma 23:1; Yohane 10:11) Varisi lava va le tilweni, la misaveni va yimeriwa hi varisi-ntsongo va ntlhambi lava tshembekaka, vavanuna lava vekiweke emabandlheni. (1 Petro 5:2, 3) Ku va ni xikhundla xo tano i lunghelo ra nkoka lowukulu emasikwini lawa ya makumu. Ntirho wa varisi i wa ntikelo, lowu nga katsiki vurhangeri byo dyondzisa ebandlheni ni byo vula evhangeli ntsena, kambe ni ku sirhelela ntlhambi eka vabvanganyeti va moya ni moya lowu hungaka ku kotisa xidzedze wa misava leyi hi hanyaka eka yona. A ka ha ri na ntirho wa ntikelo lowu swirho swa vavanuna swa bandlha swi nga wu fikelelaka ku tlula lowuya wo pfuna ku hlayiseka ka moya ka swirho swa bandlha ra Vukriste leri andzaka.—1 Timotiya 3:1; ringanisa Esaya 32:1, 2.
16. Xana varisi va Vukriste va tatisana hi tindlela tihi?
16 Hambi swi ri tano, a hi fanelanga ku rivala, leswaku varisi vo tano i vanhu, lava nga ni vumunhu lebyi hambanaka ni ku tsana ku fana ni ntlhambi hinkwawo. Hambi leswi un’wana a nga ha endlaka kahle eka mhaka yo karhi ya vurisi, tinyiko ta un’wana ti ta pfuna bandlha hi yinhla leyi hambaneke. Mintirho ya vona tanihi vakulu va Vukriste ya tatisana leswaku yi tiyisa bandlha. (1 Vakorinto 12:4, 5) Moya wa ku phikizana a wu fanelanga wu tshuka wu nghena exikarhi ka vona. Va tirha kun’we leswaku va hlayisa ni ku yisa timhaka ta Mfumo emahlweni, “va [tlakusa] mavoko lama tengeke” hi xikhongelo eka Yehova, va lava ku katekisiwa ni ku kongomisiwa hi yena eku kaneleni ni swiboho swa vona hinkwaswo.—1 Timotiya 2:8.
17. (a) Hi wihi ndzhwalo lowu hi nga na wona? (b) I swilo swihi leswi hi faneleke ku swi papalata loko hi ta hetisisa ndzhwalo wa hina kahle?
17 Ntirho wo chumayela sweswi wu teka xihatla lexi engetelekeke tanihi leswi makumu ya mfumo wa Sathana ma tshinelaka. Tanihi leswi hi nga na ntiyiso wa Rito ra Yehova Xikwembu, tanihi Timbhoni ta yena, hi ni ndzhwalo wo hangalasa mahungu lamanene hi nkarhi wun’wana ni wun’wana. Ntirho lowu hi nga na wona wu anele swinene lerova wu ta hi endla hi tshama hi khomekile, ku ya fika emakumu. Hi nga tshuki hi tipfumelela leswaku hi hambukisiwa hi ku lava ntsako, ku lava ntsako wa vunghwavava kumbe ku tshikileriwa hi swilo leswi vonakaka. A hi fanelanga ku katseka eka miehleketo ya ku mbambela, ku phikisana hi marito, hikuva leswi swi nga tikombisa swi nga pfuni nchumu ni ku heta nkarhi. (2 Timotiya 2:14; Tito 1:10; 3:9) Loko vadyondzisiwa va vutise Yesu, “Hosi, xana hi wona nkarhi lowu u nga ta pfuxa mfumo wa Israyele ke?” Yesu u tlhele a yisa miehleketo ya vona eka ntirho wa nkoka lowu a wu ri kona, a ku: “Mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika makun’wini ya misava.” Xileriso xexo xa ha tirha ni namuntlha.—Mintirho 1:6-8.
18. Hikwalaho ka yini ku tirha na Yehova swi vuyerisa swonghasi?
18 Ku tirha na Yehova, ku chumayela ni bandlha ra yena ra misava hinkwayo namuntlha, swi tisa ntsako, ku aneriseka ni xikongomelo xa ntiyiso evuton’wini bya hina. I nkarhi wa leswaku murhandzi un’wana ni un’wana wa Yehova a kombisa ku tinyiketela ni ku tshembeka eka yena. Ntirho lowu eka timhaka ta wona to tala a wu nge phindhiwi. Hi ntshembo wa vutomi lebyi nga heriki lebyi nga emahlweni hi laha ku nga kanakanisiki, onge hi nga ya emahlweni hi ku tshembeka hi “[gandzela] Xikwembu hi ndlela leyi amukelekaka, hi ku titsongahata ni xichavo,” eku n’wi dzuniseni ni ku ponisiwa ka hina vini.—Vaheveru 12:28.
Hi Yihi Nhlamulo Ya Wena?
◻ Xana hi le ka ntirho wihi laha Yesu a kumeke ntsako ni ku aneriseka?
◻ I vamani lava kanetaka ntirho wa Yehova, naswona hikwalaho ka yini?
◻ Xana “mintirho leyinene” ya misava yi njhani loko yi pimanisiwa ni ku chumayeriwa ka mahungu lamanene ya Mfumo wa Xikwembu?
[Xifaniso lexi nga eka tluka 18]
Yesu u lerise vadyondzisiwa va yena ku ya va ya chumayela