Tivana Kahle Ni Vamakwenu
1 Vuxaka bya hina ni vagandzeri-kulorhi a byi vuli ku va na vona emihlanganweni eHolweni ya Mfumo ntsena. Hi vaendli va ku rhandza ka Xikwembu, naswona sweswo swi hi endla leswaku hi va ni vuxaka bya moya na Yesu. (Mar. 3:34, 35) Hi ku fanana sweswo swi endla leswaku hi va ni vuxaka bya ndyangu lebyi nga bya moya ni van’wana evandlheni ra Vukreste, ku nga vamakwerhu va moya, lava hi lerisiwaka leswaku hi va rhandza. (Yoh. 13:35) Xisweswo, lava hlanganyelaka ni “ndyangu wa [Xikwembu]” va fanele va tikarhatela ku tivana kahle.—Ef. 2:19.
2 Tiva Vamakwenu Hi Mavito Ya Vona: Xana wa ma tiva mavito ya vamakwerhu va xinuna ni va xisati hinkwavo eDyondzweni ya n’wina ya Buku ya Vandlha? Hakanyingi ntlawa hi lowutsongo, leswi endlaka leswaku swi olova ku tiva mavito ya vo tala kumbe hinkwavo lava nga kona. Loko u nga ma tivi ni mavito ya vona, xana u nga vula leswaku u va tiva kahle?
3 Ku vuriwa yini hi ku tiva van’wana, kun’we ni vana, lava vaka kona eminhlangan’weni eHolweni ya Mfumo? Hi nga ha va na mboyamelo wo tolovelana ni ntlawanyana wa vanghana. Hambi leswi swi nga hoxangiki ku va ni xinghana nkarhi na nkarhi ni vanhu vo karhi, a hi lavi ku kombisa maxewetelo ya hina ya rirhandzu ni mabulo lama akaka eka volavo ntsena. Hi fanele ku ‘pfulelana timbilu,’ hi endla matshalatshala yo tivana ni vamakwerhu hinkwavo va xinuna ni va xisati kahle. (2 Kor. 6:11-13) Entiyisweni sweswo swi ta katsa ni ku va tiva hi mavito ya vona.
4 Vamakwerhu lava fambisaka minhlangano ya vandlha va fanele ku ringeta ku tiva mavito ya hinkwavo lava hlanganyelaka. Ku va vitana hi mavito ya vona u ri eplatifomo swi endla leswaku va swi vona leswaku tinhlamulo ta vona ta tlangeriwa, naswona hi nkarhi lowu fanaka, swi pfuna van’wana leswaku va tiva mavito ya vona. Kavula, nkarhi na nkarhi ku ta va ni vanhu lavantshwa kumbe vaendzi exikarhi ka vayingiseri, ivi swi endla leswaku swi hi nonon’hwela ku tiva vito ra un’wana ni un’wana. Hambi swi ri tano, matshalatshala yo tshembeka lama yaka emahlweni ma khutaza van’wana ni ku kombisa ku tsakela van’wana hi xiviri.—Rhom. 1:11, 12.
5 Tikarhateleni Ku Tivana Kahle: Hakanyingi valanguteri lava famba-fambaka va kota ku tolovelana kahle ni vunyingi bya vamakwerhu va xinuna ni va xisati. Xana leswi va swi endlisa ku yini? Hi tindlela-nkulu tinharhu: (1) Nkarhi na nkarhi va tirha na vona ensin’wini; (2) loko swiyimo swi va pfumelela, va amukela swirhambo swo ya emakaya ya vona; naswona (3) hi vona vo sungula ku xeweta lavakulu ni vana eminhlanganweni.
6 Xana wa ti vona tindlela to ndlandlamuxa nhlayo ya vanhu lava u tolovelaneke na vona ni ku tiva vamakwenu ku antswa? Entiyisweni hi nga ha rhamba van’wana leswaku va famba na hina entirhweni wa nsimu. Ku famba swin’we hi yindlu ni yindlu, ku endla maendzo yo vuyela, ku fambisa tidyondzo ta Bibele kumbe ku nyikela vumbhoni bya le xitarateni hi timagazini, hinkwato i tindlela letinene to kota ku tolovelana kahle. Nakambe i swinene ku rhamba van’wana ekaya ra wena, kumbexana mi ya dya swakudya kumbe swakunwa leswi phyuphyisaka. Ku va wo sungula ku tshinelela lavantshwa kumbe lava nga ni tingana a swo va aka emoyeni ntsena kambe swi tlhela swi tisa vuyelo lebyi fuweke.—Mint. 20:35; 1 Tes. 5:11.
7 Pawulo a a va tiva kahle vamakwavo vakwe. Ku kombetela ka yena eka vo tala hi mavito ya vona emapapileni yakwe, a ku ri vumbhoni bya ku va tsakela ka yena loku nga riki na vutianakanyi, ni rirhandzu ra yena ra xiviri eka vona. (1 Tes. 2:17; 2 Tim. 4:19, 20) Matshalatshala ya hina yo tiva vamakwerhu kahle ma ta vula mikateko eka hinkwerhu.