Hinkwavo A Va Tive Leswaku Nsirhelelo Wa Misava Hinkwayo Wu Tshinele
1 Ku nga ri khale, “Hosana ya ku Rhula” yi ta simeka ku rhula ka ntiyiso ni nsirhelelo emisaveni hinkwayo. Ripfumelo ra hina eka xitshembiso lexi xa Bibele ri fanele ri hi susumetela ku xi avela van’wana. (Esa. 9:6, 7; Mik. 4:3, 4) Etin’hwetini ta January na February, hi ta va hi nyikela yin’wana ni yin’wana ya tibuku leti landzelaka ta matluka ya 192 hi nxavo lowu hungutiweke wa R1,00 yin’we: Xana Vutomi Lebyi Byo Va Na Sweswi Ntsena? na Ntiyiso Lowu Yisaka eVuton’wini Lebyi Nga Heriki.
2 Eka tluka 4 ra nkandziyiso lowu wa Vutirheli Bya Hina Bya Mfumo, hi nyikele swingheniso swo talanyana leswi u nga ta lava ku swi tirhisa evutirhelini hi January. Tindlela tinharhu leti nga ha pfunaka ku yisa nyingiso wa vini va miti eka buku ya Ntiyiso ta ringanyetiwa eka tindzimana leti landzelaka.
3 Ndlela No. 1: Endzhaku ko hlaya Esaya 9:6, 7, pfula eka tluka 6 kutani u hlaya ndzimana 4. Kutani vutisa: “Xana wa swi tshemba leswi? Xana u anakanya leswaku Xikwembu xi ta xi hetisisa xitshembiso xa xona xo herisa vuhomboloki?” Yimela nhlamulo, kutani u ya emahlweni, u ku: “Buku leyi yi wu hlamusela kahle ntshembo wa hina lowu nga woxe wa ku rhula ka ntiyiso ni nsirhelelo ni ndlela leyi ‘Hosana ya ku Rhula’ yi nga ta ku tisa ha yona ku rhula ka misava hinkwayo emisaveni, enkarhini wa hina. Xana wa swi tsakela ku hlaya ha wona, naswona xana u nga swi tsakela ku hlaya swo tala hi ta misava leyintshwa leyi tshembisiweke?”
4 Ndlela No. 2: Endzhaku ko hlaya Mikea 4:3, 4, pfula eka tluka 4 ivi u vutisa n’wini wa muti: “I swiyimo swihi swa ku rhula leswi u swi vonaka exifanisweni lexi?” Yimela nhlamulo, kutani u ya emahlweni, u ku: “Ku na ku rhula exikarhi ka vanhu ni ku rhula exikarhi ka swiharhi. Van’wana va nga ha anakanya leswaku tihulumendhe ta vanhu ti ta tisa ku rhula ko tano. Kambe ku rhula ka ntiyiso ni nsirhelelo hi laha swi vhumbiweke ha kona eBibeleni swi fanele swi endliwa hi Xikwembu, ku nga ri munhu. Xana wa swi pfumela?” Yimela nhlamulo, kutani u hlaya ndzimana 1 eka tluka 102 ivi u hlamusela leswaku buku leyi yi hlamula swivutiso swo tala ehenhleni ka Mfumo ni ku rhula emisaveni. Hlamusela n’wini wa muti leswaku u nga tsakela ku n’wi siyela buku leyi hi munyikelo wa R1,00.
5 Ndlela No. 3: Etindhawini leti vanhu va talaka ku kavanyeta naswona va nga ku pfumeleli leswaku u heta mhaka ya wena, u nga ha tirhisa ku tshinelela loku: “Ndzi kombela ku ku vutisa xivutiso?” Loko n’wini wa muti a pfumela, yana emahlweni u ku: “Yesu u hi dyondzise ku khongelela Mfumo wa Xikwembu leswaku wu ta ni leswaku ku rhandza ka xona ku endliwa emisaveni tanihi le tilweni. Xana u anakanya leswaku xikhongelo lexi xi ta hlamuriwa lerova ku rhandza ka Xikwembu hakunene ku endliwa emisaveni? Hi yihi mianakanyo ya wena?” Yimela nhlamulo, ivi u ku: “Nhlamulo ya Bibele ya xivutiso xexo yi kumeka laha eka tluka 8.” Kutani hlaya ndzimana 6 eka tluka 8, ivi u kombisa ndlela leyi matsalwa lama kombisiweke ebukwini leyi ma hlamulaka xivutiso xexo ni swin’wana swo tala ehenhleni ka ku rhula ni nsirhelelo wa misava hinkwayo.
6 U nga ha va u hlawule xingheniso lexi u xi lavaka eka tluka 8 ra Vutirheli Bya Hina Bya Mfumo. Endzhaku ko pfuxeta tindlela leti nga eka xihloko lexi, u nga ha kuma yin’we leyi ngopfu-ngopfu u nga ta tsakela ku yi tirhisa. Tinyike nkarhi wo titoloveta xingheniso ni ndlela leyi u nga yi tirhisaka u nga si ya entirhweni wa nsimu. Ku lunghiselela ka wena ni ku tiyiseka ka wena n’wini ka leswaku ku rhula ka ntiyiso ni nsirhelelo ku ta tisiwa hi “Hosana ya ku Rhula” ni Mfumo wa yona swi ta engetela ku chivirika ni ku hiseka ka wena eku nyikeleni ka buku ya Ntiyiso.