Ndzima 1

Ku Rhula Ka Ntiyiso Ni Nsirhelelo Swi Tshinele!

1. I swiyimo swihi leswi endlaka leswaku ku rhula ka ntiyiso ni nsirhelelo swi va leswi navelekaka?

HAKUNENE wena, tanihi vanhu vo tala, u navela ku rhula ni nsirhelelo. Vanhu kwihi na kwihi va karhele hi vugevenga, vukari, nyimpi, ni xalamele lexi xungetaka xa nyutliya. Naswona, vunyingi byi hava mintirho leyinene, tindlu letinene, kumbe swakudya leswi ringaneke. A swi ta va leswi tsakisaka swonghasi loko swirhalanganya swo tano a swo lulamiseka naswona misava leyi a yi ta va leyi tsakisaka, kaya leri sirheletekeke ra vaaki va rona!

2, 3. (a) Loko ku rhula ka ntiyiso ni nsirhelelo kunene swi tshinerile, i swivutiso swihi leswi faneleke ku vutisiwa? (b) Xana xiendlo lexi endliweke hi Nhlangano wa Matiko xi pfumelelana njhani na ku navela ka ku rhula ni nsirhelelo?

² Hi laha ku hlamarisaka, ku ni xivangelo lexinene xo pfumela leswaku ntshunxeko lowu naveriwaka wu tshinele, ni leswaku ku rhula ni nsirhelelo wa misava hinkwayo swi kusuhi ni ku endleka! Kambe i mani la nga ta tisa swilo leswi ke? Xana matiko ya misava leyi ma ta bakanyela ku hambana ka wona etlhelo leswaku ya endla swilo leswi?

³ Vuprofeta lebyi tsakisaka bya Bibele byi vule leswaku nkarhi a a wu ta fika laha varhangeri va misava a va ta huwelela “ku rhula ni nsirhelelo!”a Entiyisweni, loko Nhlangano wa Matiko wu vule leswaku 1986 i “Lembe ra ku Rhula ka Matiko Hinkwawo” wu kombele leswaku kwihi na kwihi ku sukela elembeni rero tinhlengeletano ti endla matshalatshala lama hlawulekeke ku hlohletela pakani ya “ku rhula, nsirhelelo wa matiko hinkwawo ni ntirhisano.”⁠¹

4. Loko lunghiselelo rihi na rihi ra ku rhula ni nsirhelelo ri ta ku pfuna, i swiphiqo swihi leswi faneleke ku lulamisiwa xana?

⁴ Kambe loku a ku ta va “ku rhula ni nsirhelelo wa ntiyiso” xana? Xana a ku ta fika eka vaaki-kuloni na le mutini wa wena ivi ku lulamisa swirhalanganya leswi karhataka wena hi wexe? A ku ta lulamisa swirhalanganya swa vugevenga lebyi kulaka ni ku godzomberiwa hi swidzidzirisi, minxavo leyi tlakukaka ya swakudya, mithelo leyi nonon’hwaka, nthyakiso lowu hangalakaka, ni ku hohloka lokukulu ka swiboho swa ndyangu? Ntsendze loko swihi na swihi swa swiyimo sweswo swi ya emahlweni, swi xungeta ku rhula ni nsirhelelo wa wena n’wini.

5, 6. Hikwalaho ka ntokoto wa wena evuton’wini, xana wa pfumela leswaku vanhu va ta lulamisa swiphiqo sweswo ke?

⁵ I ntiyiso, vanhu va tshemba leswaku va nga ku hlula ku nonon’hwa loku. Va vula leswaku loko va ntshunxekile eka mindzhwalo leyo tika swinene ya swa timali ya nyimpi, va nga yisa rifuwo rero hinkwaro, vulavisisi, ni matimba ya vanhu eku lulamiseni ka swirhalanganya swo tano.

⁶ Xana hakunene wa swi tshemba sweswo ke? Byi kona vumbhoni lebyi tiyeke ku komba leswaku vanhu va nga tisa mintlhantlho leyinene ya swiphiqo leswi? Xana matimu ya komba yini? Kunene, ntokoto wa wena n’wini evuton’wini wu ku byela yini ke?

7, 8. (a) Hi kwihi kun’wana laha hi nga langutaka kona leswaku hi kuma ntlhantlho wa swiphiqo? (b) Xana Bibele i buku leyi xiyekaka hi ndlela yihi?

⁷ U nga ha vutisa: ‘Kambe loko vanhu va nga ri na yona mitlhantlho ya swiphiqo, i yini lexi salaka?’ Ee, ku ni vumbhoni lebyi nga landzulekiki bya leswaku misava ni swilo leswi hanyaka eka yona swi komba nkunguhato wa vutlhari. (Vaheveru 3:4) Xana swa koteka leswaku Loyi a kunguhateke swilo leswi a nghenelela? U ta hoxa voko etimhakeni ta vanhu ke? I Bibele ntsena leyi nyikelaka tinhlamulo ta swivutiso leswi.

⁸ Hikwalaho ka leswi swi nga ekhombyeni, kutani a swi nga ta va swi ri swa nkoka ku kambisisa leswi Bibele yi swi vulaka emhakeni leyi? U nga ha swi xiya leswaku i buku leyi hundzuluxeriweke ni ku hangalasiwa hi ku anama emisaveni. Tibiliyoni ta tikopi ta yona hinkwayo kumbe xiphemu xa yona, ti hangalasiwile hi tindzimi leti tlulaka 1 800.⁠² Kambe a a wu swi tiva leswaku buku leyi ya khale yi hlamusela timhaka ta nkoka lowukulu eka hina eka lembe xidzana leri ra vu-20?

9, 10. (a) Xana Bibele yi ri yini hi ta vumundzuku, na hi tihulumendhe ta vanhu? (b) Xana Mfumo wa Xikwembu i yini, nakona wu ta byi teka rini vulawuri bya tihulumendhe hinkwato ta namuntlha?

⁹ Vo tala va swi tiva leswaku Bibele yi vhumba ‘makumu ya misava.’ Kambe a hi vangani lava tivaka leswi yi swi vulaka hi ta nkarhi lowu sweswo swi nga ta ta ha wona, kumbe leswaku vutomi byi ta va njhani emisaveni endzhaku ka kwalaho. (Matewu 24:21, 22; 2 Petro 3:11-13) Va nga ha khongela Xikhongelo xa Hosi, laha va kombelaka leswaku ‘Mfumo wa Xikwembu wu ta.’ (Matewu 6:9, 10) Kambe i vantsongo lava swi xiyaka leswaku Mfumo wa Xikwembu i hulumendhe ya xiviri leyi nga ta siva mafambiselo hinkwawo lama nga kona ya politiki. Hi laha muprofeta Daniyele a vuleke ha kona: “Eminkarhini ya tihosi leti, Xikwembu xa matilo xi ta pfuxa ku fuma loku nga ta ka ku nga onhaki, ni siku rin’we, . . . Ku ta seletela ni ku herisa ku fuma koloku hinkwako, kambe kona ku ta va kona hi laha ku nga riki na makumu.”—Daniel 2:44.

¹⁰ Hi laha ku tsakisaka, vuprofeta bya Bibele lebyi xiyiweke eku sunguleni hi ta “ku rhula ni nsirhelelo” byi hlanganisa timhaka leti: “Siku vanhu va nga ta ku: ‘Ku rhulile, ku hava xo karhata,’ hi wona nkarhi lowu ku onhaka ku nga ta va wela henhla hi xitshuketa.” (1 Vatesalonika 5:3) Hikwalaho ku rhula kwihi na kwihi ni nsirhelelo leswi varhangeri va vanhu va swi huwelelaka kunene swi ta va swa xinkarhana xo koma. Hikuva vuprofeta byi komba leswaku xikan’we-kan’we endzhaku ka sweswo mimfumo hinkwayo ya vanhu yi ta lovisiwa, yi siviwa hi hulumendhe yin’we ya misava hinkwayo—Mfumo wa Xikwembu.

11, 12. Hi kwihi ku hambana kun’wana ka leswi Bibele yi vulaka leswaku Mfumo wa Xikwembu wu ta swi endla ni leswi varhangeri va vanhu va ringetaka ku swi endla?

¹¹ Ku tlula kwalaho, Bibele yi boxa ku hambana ko tala exikarhi ka ku rhula ni nsirhelelo leswi Mfumo wa Xikwembu wu nga ta swi tisa ni leswi varhangeri va vanhu va swi tshembisaka. Namuntlha vanhu va vulavula hi ku hunguta switlhavani hi mintwanano. Bibele, ku hambana ni sweswo, yi vula leswaku ku nga ri kungani Xikwembu xi ta herisa matlhari hinkwawo hi laha ku heleleke naswona xi ta susa swivangelo leswikulu swa nyimpi. (Psalma 46:9; Esaya 2:2-4) Naswona nsirhelelo lowu Xikwembu xi wu tshembisaka a hi wa nyimpi ya matiko. I wa valala va tinxaka hinkwato, leswaku ku nga vi na un’we loyi a chavaka nakambe—ni nhlekanhi kumbe ni vusiku. (Mikea 4:3, 4) Nakambe, vanhu sweswi va tikarhatela ku lawula vugevenga, kambe xikongomelo lexi vuriweke xa Xikwembu i ku simula hambi ya ri malangutelo ni swiyimo leswi yisaka eka vugevenga.—Psalma 37:8-11; Vagalatiya 5:19-21.

¹² Matiko na wona ma tidzunisa hi nhluvuko wa vulavisisi bya swa mirhi ni ku hlayisiwa loku antswisiweke ka vavabyi ni vadyuhari. Kambe Bibele yi hlamusela ndlela leyi hulumendhe ya Xikwembu yi nga ta tisa rihanyo leri teleke ni ra nkarhi lowo leha ha yona, hambi ku ri ku herisa vudyuhari ni rifu! (Nhlavutelo 21:3, 4) Tlhandla-kambirhi, ehansi ka Mfumo wa Xikwembu ntirho wa munhu wu ta va wa nkoka hakunene, wu va lowu anerisaka hi xiviri. Xana u nga tsakisa ku yini loko ntirho wa wena wu heta matimba kumbe loko u nga xi voni lexi u tirhelaka xona?—Esaya 65:21-23; Varhoma 8:19-21.

13. I swivutiso swihi leswi nga hi pfunaka ku swi kambisisa ke?

¹³ I yini lexi u tshembaka leswaku xi nyika muxaka wa ku rhula ni nsirhelelo leswi nga ta antswisa xiyenge xin’wana ni xin’wana xa vutomi bya wena—switshembiso swa vanhu, kumbe switshembiso swa Xikwembu leswi hetisisiwaka hi hulumendhe ya Mfumo wa xona? Hi ku hlongorisa leswi misava hi yoxe yi swi nyikelaka, xana u kumile leswi hakunene u swi lavaka evuton’wini ke? Ku vuriwa yini hi loko u tipfumelela ku khukhuriwa hi leswi vonakaka swi nghena efexenini, kambe endzhaku u xiya leswaku u yengiwile hi switshembiso leswi hambukisaka, swi ku siya u ri hava ku rhula ka ntiyiso ni nsirhelelo xana? Hi tlhelo rin’wana, u nga tiyiseka leswaku leswi Bibele yi swi tshembisaka swa tshembeka, hi leswi twalaka, ni swa xiviri ke? Entiyisweni, tinhlamulo ta swivutiso swo tano ti lava ku kambisisiwa hi vurhonwani.

[Nhlamuselo ya le hansi]

[Xifaniso lexi tataka tluka hinkwaro lexi nga eka tluka 4]

[Xifaniso lexi nga eka tluka 9]

Ku hava loyi a nga ta chava nakambe—ni nhlekanhi kumbe ni vusiku