Langutelo Ra Bibele Hi Ku Rhula Ni Nsirhelelo

Vanhu vo tala hi ku olova va amukela leswi va swi vonaka, leswaku hi swona, swi yisa eka vun’we ni ku rhula ni nsirhelelo lowukulu wa misava. Va tshemba leswaku magoza yo tano ma ta yisa emisaveni leyi antswaka. Kambe Bibele yi kombisa leswaku ku katseka leswi engetelekeke ku tlula leswi nga erivaleni.

NHLOKO-MHAKA ya ku rhula ni nsirhelelo i ya nkoka ngopfu-ngopfu eka Vakriste hikwalaho ka leswi muapostola Pawulo a swi tsaleke hi ku huhuteriwa swi ya eka bandlha ra Vukriste ra lembe xidzana ro sungula. Marito ya yena ya rhekhodiwe eBibeleni eka 1 Vatesalonika 5:3 (NW): “Hi nkarhi lowu va nge: ‘Ku rhula ni nsirhelelo!’ Kutani ndzoviso wa xitshuketa wu ta wela ehenhla ka vona hi xihatla tanihi xitlhavi xa nhlomulo eka wansati la tikeke; naswona a va nge poni.” Tsalwa leri ri tlakusa swivutiso swa nkoka.

Ku Rhula Ni Nsirhelelo—I Masungulo Ya Yini?

Loko u hlaya mongo wa marito ya Pawulo lama tshahiweke laha henhla, u ta swi vona leswaku lava nge “ku rhula ni nsirhelelo” a hi Vakriste lava xalamukeke, kambe ematshan’wini ya sweswo, i vanhu lava nga swi voniki leswi hakunene swi humelelaka. Va le ka xiyimo xa khombo kambe a va swi xalamukeli hikuva va ehleketa leswaku swilo swa tshembisa. Hambi swi ri tano, malunghana ni Vakriste, Pawulo u te: “Loko ti ri ta minkarhi ni ta tinguva ta kona, vamakwerhu, a mi faneli ku tsaleriwa nchumu hi tona.” (1 Vatesalonika 5:1) Ina, hi fanele hi xalamukela nxaxamelo wa Xikwembu wa minkarhi wa swiendlakalo. Ha yini? Hikuva Pawulo u vule leswaku nkarhi wa ndzoviso wa xitshuketa, lowu vuriwaka “Siku ra [Yehova],” wu ta ta “kukota khamba leri taka nivusiku.”—1 Vatesalonika 5:2.

Xana ku vulavula loku vhumbiweke ka ku rhula ni nsirhelelo ku katsa yini? Entiyisweni, a hi ku vulavula ntsena. Vanhu a va ri karhi va vulavula hi ku rhula ku sukela loko va sungule ku lwa tinyimpi. Marito ya Pawulo ma fanele ma kombetela eka nkarhi lowu matiko ma tikombaka ma fikelela ku rhula ni nsirhelelo hi ndlela leyi hlawulekeke. Kambe leswi ko va vunwa ntsena. Ku rhula ni nsirhelelo lowu tikombaka wu ri kona leswi yisaka eka ndzoviso wa xitshuketa kahle-kahle a hi ku rhula ka ntiyiso kumbe nsirhelelo wa xiviri.

Yesu na yena u vulavule hi ndzoviso lowu wa xitshuketa. U wu vule ‘nhlomulo lowukulu lowu nga si tshamaka wu va kona ku sukela eku sunguleni ka misava ku ta fika sweswi, naswona wu nga ka wu nga ha vi kona ni siku ni rin’we.’ Malembe ya madzana yo hlayanyana emahlweni ka Yesu, muprofeta Daniyele na yena u vulavule hi wona, naswona u wu hlamusele tanihi “masiku ya mapfalo . . . lama nga siki v̌aka kona mpfhuka matiko ma ri kona, ku fikela nkarini wolowo.”—Matewu 24:21; Daniel 12:1.

Hambi wu vuriwa nhlomulo lowukulu kumbe masiku ya mapfalo—emhakeni yin’wana ni yin’wana, hi ku ya hi vuprofeta, wu ta susa vuthala byihi na byihi bya fambiselo ra Sathana ra laha misaveni. Ematshan’wini yo kombisa ku amukeriwa hi Xikwembu, ku vulavula loku ku profetiweke ka ku rhula ni nsirhelelo ku yisa eka leswi hambanaka ni sweswo!—Ringanisa Sofonia 3:8.

Swikombiso Swa Nkarhi Swi Paluxiwa

Xana magoza ya sweswinyana lama yaka eku hlanganeni lokukulu ka misava ni mintshembo ya ku rhula ni nsirhelelo i ku hetiseka ka xitsundzuxo xa Pawulo xa vuprofeta? Phela, hi laha magazini lowu wu swi kombiseke ha kona nkarhi na nkarhi, ku sukela hi 1914 hi vone ku hetiseka ka vuprofeta byo tala bya Bibele lebyi yelanaka ni vukona bya Yesu bya le tilweni ematimbeni ya Mfumo. (Matewu, tindzima 24, 25; 2 Timotiya 3:1-5; Nhlavutelo 6:1-8) Yesu u kombise leswaku siku ra Yehova, loko ndzoviso wa xitshuketa wu wela lavo biha, ri ta fika loko swirho swa rixaka ra vanhu lava voneke ku sungula ka nkarhi lowu va ha hanya.—Luka 21:29-33.

Muapostola Pawulo nakambe u kombise xikombiso xa nkarhi. U te: “Loko va ri karhi va vulavula hi ku rhula ni nsirhelelo, kan’we-kan’we va weriwa hi khombo.” Ku hundzuluxela loku ka marito ya Pawulo eka The New English Bible ku kombisa erivaleni leswaku nhlomulo lowukulu wu humelela “loko va ri karhi va vulavula.” Tanihi khamba ni vusiku—leri nga rindzeriwangiki—ndzoviso wu ta humelela loko wu nga rindzeriwanga, loko nyingiso wa vanhu vo tala wu ri eka mintshembo ya vona ya ku rhula ni nsirhelelo. Kutani ke, hambi leswi sweswi hi nga ta ka hi nga heti hi ku vula leswaku xiyimo xa ku rhula ni nsirhelelo xa sweswi xi hetisisa marito ya Pawulo—kumbe leswaku ku vulavula hi ku rhula ni nsirhelelo ka ha ta humelela ku fikela kwihi—mhaka ya leswaku ku vulavula ko tano sweswi ku twiwa hi mpimo lowu nga si tshamaka wu va kona yi phaphamisela Vakriste eka xilaveko xo tshama va xalamukile minkarhi hinkwayo.

‘Ku Kwetlembetana’ Exikarhi Ka Mimfumo Ya Misava

Loko a vulavula hi nkarhi wa mahlomulo, muprofeta Daniyele na yena u nyikele xikombiso xa nkarhi. U kombise leswaku nkarhi wa mahlomulo a wu ta humelela eku heleni ka nyimpi leyi heteke nkarhi wo leha exikarhi ka mimfumo mimbirhi leyikulu, laha wun’wana wu vuriwaka “hosi ya le ṅwalungwini” naswona lowun’wana i “hosi ya le ḍongeni.” (Daniel 11:5-43) Ku sukela eku heleni ka Nyimpi ya Vumbirhi ya Misava, mintlawa leyi ya mimfumo yi yimeriwe hi, “hosi ya le ḍongeni” ya vukhapitalisi ni “hosi ya le ṅwalungwini” ya vusoxalisi.

Daniyele u vhumbe leswaku ku lwa loku chavisaka loku nga exikarhi ka mimfumo leyi mimbirhi hi laha swi xiyiweke ha kona eka malembe ya 45 lama hundzeke, a ku ta va tanihi ku ‘kwetlembetana,’ tanihi valwi vambirhi lava lwelaka hakelo. Sweswinyana, nkwetlembetano wu tikomba wu herile. Hi xikombiso, hi May n’wexemu, holobye wa matiko mambe wa Soviet u twarise leswaku Nyimpi ya Vusukumbele yi herile. Hi June, magazini wa Time wu kombetele eka nhlengeletano leyi tlakukeke exikarhi ka United States na Soviet Union kutani wu ku: “Mintwanano yin’wana ya ku lawula matlhari ni ku ringetiwa ka nyutliya a yi ta va yi vonake yi ri goza ra vuhunguki malembe ma nga ri mangani lama hundzeke. Sweswi, loko yi kambisisiwa swinene, yi tikomba yi ri leyi kotekaka.”

Leswaku ntwanano lowu vonakaka wu ri kona exikarhi ka mimfumo leyi mimbirhi i wa nkarhinyana kumbe i wa hi laha ku nga heriki, swi ta vonaka loko nkarhi wu ya emahlweni. Hambi swi ri tano, ku na xilo xin’we lexi nga erivaleni. Nkarhi lowu vuriweke hi Yesu wu kusuhi. Naswona swilo leswi endlekaka emisaveni swi komba leswaku hi le kusuhi ni swiendlakalo leswi vhumbiweke hi muapostola Pawulo na muprofeta Daniyele. Hambi leswi swiendlakalo swa sweswinyana swa politiki hi mpimo wo karhi swi vangiwaka hi nkucetelo wa tikereke ta Vujagana, a swi nge yisi eka ku rhula loku nga heriki. Vumbhoni byi komba leswaku swi ta yisa eka leswi hambaneke swinene ni leswi matiko ya misava leyi ma swi rindzeleke.

[Swifaniso leswi nga eka tluka 6]

Nkarhi wu ta hi byela leswaku vuxaka lebyi vonakaka byi ri kona exikarhi ka mimfumo leyi mimbirhi leyikulu byi ta hambeta ku fikela rini

[Xihlovo Xa Kona]

USSR Mission to the UN