Nxungeto Wa Nyutliya—Wu Fambela Makumu!

XIKWEMBU a xi nga lavi swona leswaku vanhu va hanya hi ku chava. Tanihi ‘Xikwembu lexi tsakeke,’ xi lava leswaku va tsakela ku rhula naswona va hanya va hlayisekile—hi ku kongoma, va tsakile. (1 Timotiya 1:11) Kambe emisaveni leyi teleke nxungeto wa nyutliya, swi le rivaleni leswaku leswi a swi koteki.

“Ku Rhula Ni Nsirhelelo”—Ka Mavunwa

Swi le rivaleni leswaku nxungeto wa nyutliya wa ha ri kona. Ni sweswi, ku nga khathariseki mpfilumpfilu wa tipolitiki, ikhonomi ni madzolonga exikarhi ka vanhu, matiko ma tikomba ma ha ri na ntshembo. Matshalatshala lama yaka emahlweni ya ku hunguta khombo leri ma vonakile ku sukela hi Lembe ra ku Rhula ka Matiko Hinkwawo ra UN hi 1986.

Emalembeni ya khume lama hundzeke The Bulletin of the Atomic Scientists yi hundzuluxe xikomba-nkarhi xa yona xa siku ra ndzoviso—ndlela leyi xi kombaka nkarhi lowu nyimpi ya nyutliya yi nga ta fika ha wona—ku suka eka timinete tinharhu emahlweni ka siku ra ndzoviso xi tlhelela eka 17 wa timinete emahlweni ka siku ra ndzoviso. Hi 1989 Stockholm International Peace Research Institute yi tsale leswaku “ntshembo wo herisa madzolonga hi ku rhula wu tiyisiwe hi laha ku antswaka ku tlula rini na rini ku sukela loko ku hele Nyimpi ya Vumbirhi ya Misava.”

Emalembeni ya sweswinyana Nhlangano wa Matiko wu tiyisiwile leswaku wu langutana ni tindhawu leti nga ni madzolonga ematikweni hinkwawo. Ku humelelanyana ka wona ku nghenise xandla eka moya wa hinkwako-nkwako wa ku langutela vumundzuku hi ntshembo. Vumundzuku swi nga ha endleka byi tisa matshalatshala lama humelelaka. Ku vulavula hi ‘ku rhula ni nsirhelelo’ swi nga ha endleka ku engeteleka swinene. Naswona swi nga ha endleka ku tshembiwa swinene.

Kambe tivonele! Bibele ya tsundzuxa, “Siku vanhu va nga ta ku: ‘Ku rhulile, ku hava xo karhata,’ hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana; va nga ka va nga poni.” Xisweswo, ku vulavula hi ‘ku rhula ni nsirhelelo’ ku ta fungha nkarhi wa Xikwembu wa ku “ku herisa lava [hi nthyakiso, wa nyutliya kumbe hi tindlela to karhi, va] herisaka misava.”—1 Vatesalonika 5:3, 4; Nhlavutelo 11:18.

Xiya leswaku Bibele a yi vuli leswaku vanhu va ta ku fikelela ‘ku rhula ni nsirhelelo.’ Handle ko kanakana va ta va va vulavula hi kona swinene, va phofula ntshembo ni xitiyisekiso lexi va nga si tshamaka va va na xona. Ku kumeka ka ku rhula ni nsirhelelo ku ta vonaka ku ri kusuhi ku tlula hambi rini na rini. Ku nga khathariseki nxungeto wa nyutliya lowu yaka emahlweni, matiko ma ta endliwa ma vona onge ma sirhelelekile.

Hambi swi ri tano, Vakreste va ntiyiso a va nge kanganyisiwi. Hi ku tiyimisela lokukulu va ta languta eka xin’wana xo antswa ku tlula ku rhula ni nsirhelelo leswi nga tisiwaka hi munhu!

Ku Rhula Ni Nsirhelelo—Ka Ntiyiso

Hi ku ya hi Pisalema 4:8, (NW), ku rhula ka ntiyiso ni nsirhelelo ku nga kumiwa ntsena elunghiselelweni ra Yehovha Xikwembu: ‘Ndzi ta etlela hi ku rhula, hikuva hi wena ntsena, Yehovha, u endlaka leswaku ndzi tshama ndzi hlayisekile.’ Ku twarisiwa kun’wana ni kun’wana ka ‘ku rhula ni nsirhelelo’ loku endliwaka ehandle ka lunghiselelo ra Mfumo wa Yehovha, i ka mavunwa ntsena. A ku nge tisi nchumu lexi nga ni mpfuno lowu nga heriki.

Mfumo wa Xikwembu ehansi ka Kreste a wu nge nyikeli mintlhantlho leyi nga hetisekangiki. Hulumendhe ya Xikwembu a yi nge hunguti nhlayo ya matlharhi ya nyutliya; yi ta ma herisa hi ku helela ku katsa ni matlharhi man’wana ya nyimpi. Pisalema 46:9 ya hi tshembisa: “O herise tinyimpi ku yisa e makuṅweni ya misav̌a, o ṭhov̌ile mav̌ura, o fayetele matlhari, o hise magolonyi e nḍilweni.”

Hi ku fanana, nxungeto wa nyutliya lowu vangiwaka hi swihoxo swa vuhlayiselo bya matimba ya nyutliya kumbe thyaka leri humesiwaka hi matimba ya athomo swi ta va swi ri swa nkarhi lowu hundzeke. Loko swi nga ri tano marito lawa ma ta va ma nga ri ntiyiso: “V̌a ta ṭhama uṅwana ni uṅwana e hansi ka nkuwa, ni le hansi ka vinya ya yena, ku nga ri na loyi a v̌a pfušaka; hikuv̌a nomu wa Yehova wa tinyimpi wu v̌urisile.” Xikwembu a xi nge hembi. A hi na xivangelo xo kanakana marito ya xona.—Mikiya 4:4; Tito 1:2.

Xana u nga swi tsakela ku va ni ntshembo wo hanya emisaveni leyi nxungeto wa nyutliya wu nga ta va wu heriseriwe makumu eka yona? U nga swi kota, hi ku va Rito ra Xikwembu ri swi veka erivaleni swilaveko swa kona. Hi ku dyondza hi swona ni ku hanya hi ndlela leyi faneleke, siku rin’wana u nga ha vula hi ku ntshunxeka u ku: “Nxungeto wa nyutliya—se wu herile!”

[Xifaniso lexi nga eka tluka 7]

Ku ta va ni ku rhula emisaveni leyintshwa ya Xikwembu, nxungeto wa nyutliya a wu nge he vi kona

[Xihlovo Xa Kona]

M. Thonig/H. Armstrong Roberts

[Laha Xifaniso Xi Humaka Kona eka tluka 6]

U.S. National Archives photo