Xiviko Xa Vahuweleri Va Mfumo

“Xitsundzuxo Xa Moya Wa Ntirhisano”

EDZONGA-MPFUNGWE wa Spain ku ni ribye lerikulu ngopfu leri tivekaka tanihi Ribye ra Gibraltar. Hi malembe ya madzana, ribye leri ri ve mbhoni leyi tivulavulelaka eka ku kwetlembetana ka tipolitiki ni ku kanetana ka matiko hinkwawo. Ku hambana ni leswi, Ribye ra Gibraltar ra ha ku va xisekelo xo kombisa ntirhisano ni ntwanano leswi nga tolovelekangiki namuntlha emisaveni.

Tikhilomitara tinharhu ku suka eka Ribye leri ku ni doroba ra La Línea eSpain. Ku akiwa ka Holo ya Mfumo ya Timbhoni ta Yehovha kwalaho ku hlanganise madzana ya vatirhi vo tirhandzela lava a va hisekela ku nyikela hi nkarhi ni matimba ya vona. Loko va ri karhi va tirha hi matimba ku aka ndhawu leyi fanelaka yo gandzela Muvumbi, Yehovha Xikwembu, hambi ma ri masungulo lama tiyeke ya Ribye ra Gibraltar ma vonake ya nga ha ri ya nkoka loko ma ringanisiwa ni ntirho lowu a wu endliwa.

Vahuweleri va Mfumo eka xiphemu xolexo xa misava va rhumele xiviko lexi landzelaka:

“Madzana-kaye wa vatirhi vo tirhandzela lava hisekaka va tirhe vusiku ni nhlekanhi, va sungula hi Ravuntlhanu ni ndzhenga, September 24, 1993. Hi awara ya nkombo hi Sonto ni madyambu, mfungho lowuntshwa lowu kombisaka muako lowu tanihi Holo ya Mfumo ya Timbhoni ta Yehovha wu veheriwile, naswona muako lowu wo saseka lowuntshwa a wu tirhisiwa ro sungula ku khomela nhlangano wa le rivaleni.

“Timbhoni to tala leti sukaka kusuhi na Gibraltar ti tsemakanye ndzilakana ku ya pfuna vamakwavo va tona va le Spain. Un’wana wa vatirhi vo tirhandzela, muaka-tiko wa le Gibraltar u hlamuserile: ‘Ku avana ka matiko a ku wu herisanga moya wa vamakwerhu va hina va matiko hinkwawo.’ U engeterile: ‘Malembe ma nga ri mangani lama hundzeke, vamakwerhu vo suka eLa Línea va tile va ta hi pfuna ku aka Holo ya hina ya Mfumo eGibraltar, sweswi hi tsakile ku tlhela hi va endlela leswi va hi endleleke swona.’

“Ku engetela eka matshalatshala yo tinyiketela ya mavandlha mambirhi ya Timbhoni ta Yehovha ni madzana ya vapfuni va vutshila vo huma exifundzheni xa Andalusia, huvo ya doroba ra La Línea yi bohe makungu yo hi nyika ndhawu leyi faneleke. Meyara wa La Línea u hlamusele leswi landzelaka hi nkarhi lowu a endzele ndhawu yo akela ka yona: ‘Hi ntolovelo, valawuri va le Spain va nyika Makhatoliki ndhawu yo aka tikereke. Hikwalaho ka yini va nga endli leswi fanaka ni le ka mintlawa leyin’wana ya vukhongeri? Ndzi tsakisiwa ngopfu hi ku pfumala ku titiva ka vatirhi vo tirhandzela, naswona ndza tshemba leswaku va faneriwa hi nseketelo wa hina. Hi lava moya lowu engetelekeke wa muxaka lowu emisaveni leyi avaneke namuntlha.’

“U vulavule hi Holo ya Mfumo tanihi ‘xitsundzuxo xa moya wa ntirhisano.’ Kavula, lexi a xi tsakisa ngopfu a ku nga ri pulani kumbe vukulu bya muako. Ematshan’wini ya sweswo, lexi tsakiseke vanhu vo tala a ku ri leswaku yi akiwile hinkwayo ka yona hi vatirhi vo tirhandzela hi tiawara ta 48 ntsena!”

Swi le rivaleni leswaku Timboni ta Yehovha eLa Línea ni tindhawu leti yi rhendzeleke ti pfumelelana ni marito ya Vagalatiya 6:10. Kwalaho muapostola Pawulo u tsundzuxe vapfumeri-kulobye a ku: “Hikokwalaho, minkarhi hinkwayo loko swi koteka, a hi endleleni vanhu hinkwavo leswinene, ngopfu-ngopfu va ndyangu wa lava pfumeleke.”