‘Ku Hlula Mboyamelo Wa Ku Va Ni Vutianakanyi’

● DOROBA ra Gibraltar leri nga emakumu ya Nhlonhle ya Iberia hi le dzongeni, ri rhendzeriwe ni ku hlaseriwa ko tala eminkarhini ya rona ya mangava. Kambe mahelo-vhiki man’wana hi October 2008, vanhu va le dorobeni rero va vone vanhu va kwalomu ka gidi lava humaka etikweni ra Spain va nghena edorobeni rero hi ku rhula. A va tele ku ta aka Holo ya Mfumo leyi a yi ta va ndhawu yo khomela eka yona minhlangano ya mavandlha mambirhi ya Timbhoni ta Yehovha lama hlanganyelaka eGibraltar.

Holobye wa mfumo u byele vatsari va magazini wa Xalamuka! leswaku doroba ra Gibraltar ri amukele vanhu va kwalomu ka gidi lava teleke ku ta tirha entirhweni lowu. U vule leswaku a va “hoxa xandla eku pfuneni ka vanhu va ndhawu.” U tlhele a ku “Timbhoni ta Yehovha ta nkhensiwa hileswi ti tiseke nhlayo leyikulu ya vanhu eGibraltar leswaku va ta tirha entirhweni wun’we, lowu va wu endlaka hi ku tirhandzela.”

Vatirhela-mfumo va le dorobeni rero va seketele ntirho lowu wo aka ku sukela eku sunguleni, va nyika Timbhoni ndhawu leyinene leswaku ti aka muako wo gandzela eka wona. I yini leswi va susumeteleke ku ti pfuna hi ndlela yoleyo?

Holobye wa mfumo u te: “Ndzi pfumela leswaku loko vanhu va ndhawu yihi na yihi va rhandza Xikwembu i nchumu lowunene. Vanhu va vukhongeri hinkwabyo eGibraltar va ni mfanelo hi ku ya hi nawu yo gandzela Xikwembu va ntshunxekile, kutani hulumendhe a yi fanelanga yi va ni xihlawuhlawu etimhakeni ta vukhongeri. Ku tlula kwalaho, ku nyika Timbhoni ndhawu leyinene leswaku ti aka ndhawu ya vugandzeri swi ta pfuna vaaki va ndhawu.

U tlhele a ku: “Hi fanele hi hlula mboyamelo lowu tolovelekeke wa ku va ni vutianakanyi. Ntlawa wa vatirhi va n’wina va ku tirhandzela wu kombise leswaku sweswo hi nga swi kota ku swi endla.”

Ku nga khathariseki xidzedze lexi endleke leswaku ntirho wo aka wu hlwela ku sungula, Holo ya Mfumo yi hetiwe hi Musumbhunuku, ku nga siku ra vunharhu leri ntirho wo aka wu hetiweke ha rona. Secundino Nogal, loyi a a languteleke ntirho lowu wo aka, u te: “Vatirhi vo tala va ku tirhandzela va tinyikele ku tshama siku leri engetelekeke eGibraltar leswaku va hetisa ntirho. Hi swi toloverile ku hlula swiphiqo leswi vaka kona. Maakelo ya hina ma lava leswaku hi pfumelelana ni swiyimo. Kambe xa nkoka eka hinkwaswo, ma lava leswaku vatirhi va kona va nga vi na vutianakanyi, naswona yoleyo hi yona mhaka leyi endlaka leswaku hi tsaka swinene.”a

[Nhlamuselo ya le hansi]