Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • jv ndz. 20 matl. 318-339
  • Ku Aka Swin’we eMisaveni Hinkwayo

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ku Aka Swin’we eMisaveni Hinkwayo
  • Timbhoni Ta Yehovha I Vahuweleri Va Mfumo Wa Xikwembu
  • Swihloko
  • Tinhlokomhaka Tin'wana Leti Yelana Na Yona
  • Tiholo Ta Mfumo
  • Ku Ni Tindlela To Tala To Aka
  • Ku Sungula Tindlela Ta Ku Aka Hi Xihatla
  • Ku Aka Hi Xihatla Ku Ya eMatikweni Hinkwawo
  • Tikomiti To Aka Ta Xifundzha
  • Ku Fikelela Xilaveko Xa Tiholo Ta Tinhlengeletano
  • Tihofisi, Vugandliselo ni Makaya ya Bethele eMisaveni Hinkwayo
  • Ku Engeteleka Lokukulu eMisaveni Hinkwayo
  • Magidi Yo Tala Ma Lava Ku Pfuna
  • Ku Kula Loku Hambetaka Le Yindlu-nkulu Ya Misava
  • Vatirhi Vo Tirhandzela Va Matiko Hinkwawo
  • Ku Titshega Hi Yehovha Eka Hinkwaswo Leswi Hi Swi Endlaka
    Vutirheli Bya Hina Bya Mfumo—1992
  • Ntirho Wo Aka Lowu Yisaka Ku Dzuneka Eka Yehovha
    Mfumo Wa Xikwembu Wa Fuma!
  • Ku Hlangavetana Ni Swilaveko Swa Ntshovelo Hi Ntsako
    Vutirheli Bya Hina Bya Mfumo—1992
  • Xiphemu Xa Wena Eku Akeleni Ka Nkarhi Lowu Taka
    Vutirheli Bya Hina Bya Mfumo—1991
Vona Swo Tala
Timbhoni Ta Yehovha I Vahuweleri Va Mfumo Wa Xikwembu
jv ndz. 20 matl. 318-339

Ndzima 20

Ku Aka Swin’we eMisaveni Hinkwayo

RIRHANDZU ra vumakwerhu bya ntiyiso exikarhi ka Timbhoni ta Yehovha ri kombisiwa hi tindlela to tala. Lava va vaka kona eminhlanganweni ya tona va ri vona. Emintsombanweni ya tona ri kombisiwa swinene. Nakambe ri vonaka kahle loko va tirha swin’we leswaku va lunghiselela tindhawu leti fanelekaka ta ku hlangana ka mavandlha ya tona.

Loko malembe ya va-1990 ma sungula, a ku ri na mavandlha ya Timbhoni ta Yehovha lama tlulaka 60 000 emisaveni hinkwayo. Eka malembe ya khume ya le mahlweni ka kwalaho, a ku engeteriwa mavandlha ya 1 759 hi avhareji, lembe rin’wana ni rin’wana. Eku sunguleni ka va-1990 nhlayo yoleyo yi tlakukile yi tlula 3 000 hi lembe. Ku lunghiselela tindhawu leti fanelekeke ta vona hinkwavo to hlanganyela ku ve ntirho lowukulu swinene.

Tiholo Ta Mfumo

Hi laha a swi ri ha kona eka Vakreste va lembe xidzana ro sungula, eku sunguleni mavandlha yo tala ya Timbhoni ta Yehovha a ma tirhisa makaya ku khomela minhlangano ya wona yo tala. Le Stockholm, Sweden lava va nga sungula ku khoma minhlangano nkarhi na nkarhi kwalaho a va tirhisa ndhawu yo vatlela, leyi a va yi qacha leswaku va ta yi tirhisa endzhaku ka loko ntirho wa siku wu endliwile. Hikwalaho ka nxaniso, ntlawa lowutsongo le xifundzheni xa La Coruña, le Spain, a wu khomela minhlangano ya wona yo sungula exitlatini.

Loko ku laveka ndhawu leyi engetelekeke, ematikweni lawa a ku ri ni ntshunxeko wa ku endla sweswo, mavandlha ya kwalaho ya Timbhoni ta Yehovha a ma qacha ndhawu ya minhlangano. Hambi swi ri tano, loko ku ri holo leyi a yi tirhisiwa na hi tinhlengeletano tin’wana, a ku fanele ku yiwa ni nhundzu kumbe yi lulamisiwa emahlweni ka nhlangano wun’wana ni wun’wana, naswona hakanyingi a ku va na risema leri saleleke ra musi wa fole. Laha swi kotekaka kona, vamakwerhu a va qacha xitolo lexi nga tirhisiwiki kumbe kamara ra le henhla leri a ri ta tirhisiwa hi vandlha ntsena. Kambe, hi ku famba ka nkarhi, etindhawini to tala, hikwalaho ka ku tlakuka ka mali yo qacha ni ku pfumaleka ka tindhawu leti fanelekeke, ku endliwe malunghiselelo man’wana. Minkarhi yin’wana a ku xaviwa miako ivi yi pfuxetiwa.

Emahlweni ka Nyimpi ya Vumbirhi ya Misava, a ku ri na mavandlha ma nga ri mangani lama a ma aka tindhawu ta wona to hlangana eka tona leti a ti endleriwe ku tirhisiwa hi wona. Le ndzhaku hi 1890, ntlawa wa Swichudeni swa Bibele le United States eMount Lookout, Virginia Vupela-dyambu, wu ake ndhawu ya wona yo hlanganela eka yona.a Hambi swi ri tano, ku akiwa ka Tiholo ta Mfumo etindhawini to tala, a ku sungulanga ku fikela hi va-1950.

Vito leri nge Holo ya Mfumo ri kunguhatiwe hi 1935 hi J. F. Rutherford, loyi hi nkarhi wolowo a a ri muungameri wa Sosayiti ya Watch Tower. Mayelana ni miako ya rhavi ya Sosayiti le Honolulu, Hawaii, u hlele vamakwerhu lava a va ta aka holo ya ku khomela minhlangano eka yona. Loko James Harrub a vutise Makwerhu Rutherford leswaku a ta wu vitana yini muako, u hlamurile: “Xana a wu anakanyi leswaku hi fanele hi wu vitana ‘Holo ya Mfumo,’ tanihi leswi sweswo ku nga leswi hi swi endlaka, ku chumayela mahungu lamanene ya Mfumo?” Endzhaku ka sweswo, laha swi kotekaka kona, tiholo leti ti tirhisiwaka hi Timbhoni hakatsongo-tsongo ti sungule ku tiviwa hi mimfungho leyi nge “Holo ya Mfumo.” Xisweswo loko London Tabernacle yi pfuxetiwile hi 1937-38, yi thyiwe vito ra Holo ya Mfumo. Hi ku famba ka nkarhi, ndhawu leyi minhlangano hinkwayo ya mavandlha a yi khomeriwa kona emisaveni hinkwayo yi sungule ku vitaniwa Holo ya Mfumo ya Timbhoni ta Yehovha.

Ku Ni Tindlela To Tala To Aka

Swiboho mayelana ni leswaku xana Tiholo ta Mfumo ti fanele ku qachiwa kumbe ku akiwa swi endliwa hi mavandlha hi woxe. Nakambe va ni vutihlamuleri byo hakelela mali yo aka ni ya nhlayiso. Leswaku ku hlayisiwa mali, mavandlha yo tala ma ringete hi matimba ku endla ntirho wo tala wa ku aka hi laha swi kotekaka ha kona handle ko tshembela eka tikontraka leti hakeriwaka.

Tiholo hi toxe ti nga akiwa hi switina, maribye, timhandzi kumbe swin’wana, swi titshege hi mali leyi lavekaka ni leswi kumekaka endhawini yoleyo. Le Katima Mulilo, Namibia, ku tirhisiwe byanyi byo leha ku fuleriwa hi byona naswona misava ya matshuka (leyi tiyaka swinene loko yi oma) yi tirhisiwe ku rhidela makhumbi ni le hansi. Timbhoni ta le Segovia, Colombia, ti tiendlele switina swo aka swa semendhe. Le Colfax, California ku tirhisiwe ridaka leri humaka endzhaku ka ku buluka ka Ntshava ya Lassen.

Leswi nhlayo ya lava vaka kona eminhlanganweni a yi tlula 200 hi 1972, vandlha ra le Maseru, eLesotho, ri swi vonile leswaku a ri fanele ku aka Holo ya Mfumo leyi fanelekaka. Hinkwavo va pfunetile eka tsima leri. Vamakwerhu va xinuna lava dyuhaleke va fambe tikhilomitara ta 32 leswaku va ta hlanganyela. Vana va khunguluxe madiromu ya mati va ma yisa le muakweni. Vamakwerhu va xisati va lunghiselele swakudya. Va tlhele va kandziyela vuandlalo hi milenge ya vona, va gandla misava leswaku ku lunghekela ku cheriwa xilebe, va pfa va yimbelela tinsimu ta Mfumo va gandla va fambisana ni mpfumawulo wa vuyimbeleri. Sava leri kumekaka etintshaveni mahala loko u tilandzela rona, ri tirhiseriwe makhumbi. Vuyelo bya kona a ku ri Holo ya Mfumo leyi kotaka ku rhurhela vanhu va 250.

Minkarhi yin’wana, Timbhoni ta le mavandlheni ya le kusuhi ti pfunetile hi ntirho wo aka. Hi xikombiso, hi 1985, loko Timbhoni ta Yehovha le Imbali, muti wa vantima le Afrika Dzonga, ti aka holo leyi nga rhurhelaka vanhu va 400 kahle, Timbhoni-kulobye leti humaka ekusuhi le Pietermaritzburg na Durban ti tile ti ta va pfuna. Xana u nga vona ndlela leyi vaakelani a va hlamale ha yona loko hi masiku wolawo ya ku lwa ka tinxaka le Afrika Dzonga, va vone makume ya Timbhoni ta valungu, Makhaladi ni Maindiya va khitikanela eximutanini, va tirhisana ni vamakwavo wa vona va Vantima? “Swi nga endleka ntsena hi rirhandzu,” hi laha mulanguteri wa muti wolowo a vuleke ha kona.

Hambi leswi vamakwerhu a va tinyiketele swinene, mavandlha ma kume leswaku swiyimo swa kwalaho swi sivela vamakwerhu ku endla leswi va nga swi kotaka. Vavanuna emavandlheni a va ri ni mindyangu leyi a va fanele va yi hlayisa naswona a va kota ku tirha etsimeni ro tano ntsena hi mahelo-vhiki kumbexana switsongo nimadyambu. Mavandlha yo tala a ma ri na vanhu vatsongo lava tivaka mintirho ya ku aka. Hambi swi ri tano, muako wo olova lowu pfulekeke lowu fanelaka tindhawu to hisa wu nga simekiwa hi masiku kumbe mavhiki ma nga ri mangani. Hi mpfuno wa Timbhoni ta le mavandlheni ya le kusuhi, miako leyi akiweke yi tiya yi nga ha hetiwa hi ntlhanu kumbe tsevu wa tin’hweti. Minkarhi yin’wana swi nga ha lava lembe rin’we kumbe mambirhi.

Kambe, loko ti ya ti nghena eka va-1970 Timbhoni ta Yehovha emisaveni hinkwayo ti engeteleke hi mpimo wa mavandlha mambirhi ku ya ka manharhu hi siku. Eku sunguleni ka va-1990 mpimo wa ku engeteleka wu ve ku fikela kwalomu ka kaye wa mavandlha hi siku. Xana xilaveko lexikulu xa Tiholo ta Mfumo letintshwa a xi ta fikeleriwa?

Ku Sungula Tindlela Ta Ku Aka Hi Xihatla

Le ndzhaku hi va-1970, le United States, Timbhoni to tlula 50 leti humaka emavandlheni ya le kusuhi ti hlanganyerile ti pfuneta eku akiweni ka Holo ya Mfumo le Carterville, Missouri, ya ntlawa lowu a wu hlanganyela le Mutini wa Webb. Hi mahelo-vhiki man’we va ake makhumbi hinkwawo ivi va endla ntirho lowukulu elwangwini. Ntirho a wa ha ri wukulu, naswona swi teke tin’hweti ku heta ntirho wolowo; kambe xiphemu xa yona lexikulu xi hetiwe hi nkarhi wo koma swinene.

Eka malembe ya khume lama landzeleke, loko vamakwerhu va ri karhi va tirha swin’we eka tiholo ta 60, va hlule swihinga, naswona va sungule tindlela leti humelelaka swinene. Hi ku famba ka nkarhi, va swi xiyile leswaku endzhaku ka loko ntirho wa masungulo wu endliwile, va nga ha swi kota ku heta Holo ya Mfumo hinkwayo hi mahelo-vhiki man’we.

Valanguteri vo hlayanyana va mavandlha—hinkwavo va huma le vupela-dyambu-xikarhi bya United States—va sungule ku tiyimisela ku fikelela pakani yoleyo. Loko mavandlha ma kombele ku pfuniwa hi ku akiwa ka Tiholo ta wona ta Mfumo, un’we wa vamakwerhu lava a a burisana na vona hi ntirho lowu ivi a va nyika vuxokoxoko mayelana ni ku lunghiselela loku faneleke ku endliwa va nga si sungula ntirho. Swin’wana swa swona a ku fanele ku kumiwa mpfumelelo wo aka, a ku fanele ku endliwa masungulo ya muako ni xilebe, gezi ri fanele ri tirha, tiphayiphi ta mati ta le hansi ka misava ti fanele ti nghenisiwa, naswona a ku fanele ku endliwa malunghiselelo lama tiyeke ya ku tisiwa ka swilo swo aka. Kutani ku vekiwa siku leri Holo ya Mfumo hi yoxe yi nga ta sunguriwa ha rona. Muako a wu nga ta va ku hlanganisa swiphemu-phemu; a wu ta sunguriwa ehansi, wu akiwa endhawini ya kona.

I vamani lava kahle-kahle a va ta aka? Hi laha swi kotekaka ha kona, swi endliwe hi vatirhi vo tirhandzela, lava nga hakeriwiki. Hakanyingi ndyangu hinkwawo a wu hlanganyela. Lava va hlelaka ntirho lowu a va vulavurisana ni Timbhoni leti tivaka ntirho wa mavoko ni leti kombiseke ku tsakela ku hlanganyela emiakweni leyi. Vo tala va vona va langute emahlweni hi mahlo-ngati eka tsima ro aka lerintshwa. Timbhoni tin’wana leti a ti twa hi ta miako leyi ti lave ku hlanganyela; va ri madzana lama humaka eka tindhawu ta le kusuhi—ni lava humaka etindhawini ta le kule—va ye etindhawini leti ku akiwaka eka tona, va lava ku tirha hi ndlela yihi na yihi leyi va nga kotaka ha yona. Vo tala va vona a va nga ri vaaki lava nga swi dyondzela, kambe va kombise leswaku va faneriwa hi nhlamuselo ya lava va nga ta va vaseketeri va Hosi ya Yehovha ya Vumesiya hi laha va hlamuseriweke ha kona eka Pisalema 110:3, leyi nge: “Tiko ra wena ri ta v̌a le’ra mapfunḍa.”

Hi Ravumune ni madyambu loko ntirho lowukulu wu ri kusuhi ni ku sungula, lava va kongomisaka ntirho va hlanganile leswaku va hlela vuxokoxoko byo hetelela. Hi madyambu lama landzelaka, vatirhi a va kombiwa nkombiso wa ti-slide wa ndlela ya ku aka leswaku va ta twisisa ndlela leyi ntirho a wu ta famba ha yona. Ku kandziyisiwe nkoka wa ku va ni timfanelo ta ku chava Xikwembu. Vamakwerhu va khutaziwe ku tirha swin’we hi rirhandzu, va va ni tintswalo, va kombisa ntwela-vusiwana ni ku ehleketelelana. Un’wana ni un’wana u khutaziwe ku tirha hi goza leri fanaka kambe ku nga ri hi ku tsutsuma, naswona a nga chavi ku avelana ntokoto lowu akaka ni un’wana. Hi ku hatlisa eka mixo lowu landzeleke, ku sunguriwe ku aka.

Hi nkarhi lowu vekiweke wa ni mixo hi Mugqivela, hinkwavo a va tshika leswi a va swi endla ivi va yingisela bulo ra Matsalwa ra ndzimana ya siku. A ku khongeriwa, hikuva a va swi xiya leswaku ku humelela ka ntirho hinkwawo a ku titshege hi ku katekisiwa hi Yehovha.—Ps. 127:1.

Loko ntirho wu sungula, wu fambe hi xihatla. Ku nga si hela awara makhumbi a ma yimile. Ivi ku landzela timhandzi ta lwangu. Swiphepherele leswi endliweke hi mapulanga swi gongondzeriwe emakhumbini. Lava endlaka swa gezi va sungula ku hlanganisa tintambhu ta gezi. Tiphayiphi ta moya wo hola ni wo hisa ti nghenisiwile. Tikhabodo ti akiwile ivi ti vekiwa etindhawini ta tona. Minkarhi yin’wana mpfula a yi na mahelo-vhiki hinkwawo, kumbe maxelo ya hundzuka ya titimela swinene kumbe ku hisa ku tlurisa, kambe ntirho a wu ya emahlweni. A ku nga ri na mphikizano, kumbe ku lwetana eka lava va tivaka ntirho wa mavoko.

Hi ku hatlisa, dyambu ri nga si pela hi siku ra vumbirhi, Holo ya Mfumo a yi herile—yi sasekisiwe kahle endzeni, kumbexana ni ntanga wu lunghisiwile ehandle. Loko se yi humelela kahle, mintirho a yi hleriwa leswaku yi heta masiku manharhu, kumbexana mahelo-vhiki mambirhi. Eku heleni ka tsima, vatirhi vo tala a va sala va karhele kambe va tsakile, va tsakela ku khoma nhlangano wa vona wo sungula wa vandlha lowu tolovelekeke, wa dyondzo ya Xihondzo xo Rindza.

Hi ku nga tshembi leswaku ntirho wo tano lowunene a wu ta endliwa hi ku hatlisa ko tano, vanhu vo tala le Guymon, Oklahoma, U.S.A., va vitane mukamberi wa ku aka wa kwala mutini leswaku a ta vona. “Ndzi va byele leswaku loko va lava ku vona nchumu wu endliwa kahle, a va fanele ku ya le holweni!” ku vule mukamberi endzhaku, loko a hlamusela mhaka leyi eka Timbhoni. “N’wina mi swi endla kahle ni swilo leswi a swi ta va swi tumberile swi nga voniwi!”

Loko xilaveko xa Tiholo ta Mfumo xi ya xi tlakuka, vamakwerhu vo tala lava va nga sungula tindlela to aka hi xihatla va dyondzise van’wana. Swiviko swa leswi a swi endliwa swi hangalakele ematikweni man’wana. Xana tindlela toleto ta ku aka a ti ta tirhisiwa ni le ka wona?

Ku Aka Hi Xihatla Ku Ya eMatikweni Hinkwawo

Ku akiwa ka Tiholo ta Mfumo a ku nonoka le Canada ku tlula ndlela leyi swilaveko swa mavandlha a swi ri ha yona. Timbhoni ta le Canada ti vitane lava a va hlela matsima ya ku aka hi xihatla le United States leswaku va ta va hlamusela ndlela leyi va swi endlaka ha yona. Eku sunguleni, lava va le Canada a va kanakana leswaku xana swi nga endleka le Canada, kambe va anakanye ku swi ringeta. Holo yo sungula ya Mfumo leyi akiweke hi ndlela leyi le Canada yi yimisiwe le Elmira, Ontario, hi 1982. Hi 1992, a ku ri na Tiholo ta Mfumo ta 306 le Canada leti ti nga akiwa hi ndlela leyi.

Timbhoni ta le Northampton, Nghilandi, ti anakanye leswaku na tona ti nga swi endla. Hi 1983, muako wa tona a ku ri wo sungula le Yuropa. Vamakwerhu lava nga ni ntokoto hi maakelo ya muxaka lowu va famba-fambe ku suka le United States na Canada leswaku va ya langutela miako ni ku pfuna Timbhoni ta kun’wana ti dyondza ndlela ya kona. Vatirhi van’wana vo tirhandzela a va ri kona ku suka ekule le Japani, India, Furwa ni le Jarimani. A va te tanihi vatirhi vo tirhandzela, lava nga taka va nga hakeriwi. Xana a swi kotekisa ku yini? Hi laha mulanguteri wa ntlawa wa Timbhoni ta le Ireland loyi a tirheke eka tsima ro tano a vuleke ha kona, ‘Swa koteka hikuva hinkwavo vamakwerhu va xinuna ni va xisati va tirhisana ehansi ka nsusumeto wa moya wa Yehovha.’

Hambi loko milawu ya kwalaho ya swa ku aka yi vonaka yi lwisana ni miako leyo tano, Timbhoni, hakanyingi ti kume leswaku loko vuxokoxoko byi hlamuseriwile eka valawuri va muti, va swi tsakela ku pfuna.

Endzhaku ka tsima ro aka hi xihatla le Norway, en’walungwini wa Xirhendzevutana xa Arctic, phepha-hungu ra Finnmarken ri te: “Swa tsakisa. Wolawo hi wona ntsena marito lama hi vonaka ma hlamusela leswi Timbhoni ta Yehovha ti swi endleke eka mahelo-vhiki lama hundzeke.” Hi ku fanana, loko Timbhoni le Xihlaleni xa le N’walungu wa New Zealand ti ake Holo ya Mfumo leyi kokaka mahlo hi masiku mambirhi na hafu, nhloko-mhaka ya le handle ya phepha-hungu ra kwalaho yi te: “Tsima Leri Lavaka Ku Va Hlori.” Xihloko xi engeterile: “Kumbexana nchumu lowu nyanyulaka swinene eka tsima leri a ku ri ku hleleka ni ku famba ka ntirho hi ku rhula, ku nga kavanyetiwi.”

Vukule bya ndhawu leyi Holo ya Mfumo yi lavekaka eka yona a hi xihinga lexikulu ngopfu. Le Belize muako wa ku aka hi xihatla wu endliwile, hambi leswi a ku laveka leswaku ku rhwariwa swilo swa ku aka swi yisiwa exihlaleni lexi a xi ri eka tikhilomitara ta 60 ku suka le Mutini wa Belize. Loko Holo ya Mfumo leyi nga ni fambiselo ro nghenisa ni ku humesa moya yi yimisiwile le Port Hedland, eVupela-dyambu bya Australia, hi mahelo-vhiki man’we, ku tirhisiwe nhundzu yo aka ni vandla ra vatirhi lava a va huma eka tikhilomitara ta 1 600 kumbe ku tlula. Vatirhi a va tihakelela mali ya ku famba ha yona. Vo tala va lava a va ri na xiphemu eka tsima leri a va nga ti tivi Timbhoni ta le Vandlheni ra le Port Hedland, naswona i vatsongo lava a va ta khoma minhlangano kwalaho. Kambe sweswo a swi va sivelanga ku kombisa rirhandzu ra vona hi ndlela leyi.

Hambi laha nhlayo ya Timbhoni yi nga yitsongo, leswi a swi va sivelanga ku tirhisa tindlela leti ta ku aka tiholo. Timbhoni ta kwalomu ka 800 to huma le Trinidad ti tinyiketele ku famba ti ya le Tobago leswaku ti ya pfuna vamakwavo va xinuna ni va xisati va Vakreste va 84, ku aka holo le Scarborough hi 1985. Timbhoni ta 17 (leti to tala ta tona ku nga vavasati ni vana) le Goose Bay, Labrador, hakunene a ti lava mpfuno leswaku ti va ni Holo ya Mfumo ya tona. Hi 1985, Timbhoni ta le swiphen’wini swin’wana swa Canada ti qache swihaha-mpfhuka swinharhu leswaku swi rhwala vanhu va 450 va ya le Goose Bay leswaku va ya tirha. Endzhaku ka masiku mambirhi ya ntirho lowukulu, va ve ni nongonoko wa ku nyiketela, endzeni ka holo leyi nga hela hi Sonto nimadyambu.

Leswi a swi vuli swona leswaku Tiholo ta Mfumo hinkwato sweswi ti akiwa hi tindlela ta ku aka hi xihatla, kambe to tala ta tona ti akiwa tano.

Tikomiti To Aka Ta Xifundzha

Exikarhi ka 1986 mpimo lowu Tiholo ta Mfumo letintshwa a ti laveka ha wona a wu kurile swinene. Eka lembe leri hundzeke, mavandlha lamantshwa ya 2 461 ma vumbiwile emisaveni hinkwayo; 207 ya wona a ma ri le United States. Tiholo tin’wana ta Mfumo a ti tirhisiwa hi mavandlha manharhu, mune, kumbe hambi ku ri ntlhanu. Hi laha Matsalwa ma nga vhumbha ha kona, hakunene Yehovha a hatlisisa ntirho wa ku hlengeleta.—Esa. 60:22.

Leswaku vatirhi va tirhisiwa hi ndlela leyinene leyi kotekaka, ni leswaku hinkwavo lava a va aka Tiholo ta Mfumo va pfuneka hi ntokoto lowu va veke na wona, Sosayiti yi sungule ku kongomisa ntirho wa vona. Tanihi masungulo ntsena, hi 1987 United States yi avanyisiwe hi Tikomiti to Aka ta Xifundzha ta 60. A swi tele leswi a ti fanele ti swi endla; tin’wana ta tona hi ku hatlisa a ti ri ni matsima lama hleriweke ya lembe kumbe ku tlula. Lava va averiweke ku tirha eka tikomiti leti a ku ri vavanuna lava, xo sungula a va faneleka hi tlhelo ra moya, vakulu va mavandlha, lava vekaka xikombiso lexinene eku kombiseni ka mihandzu ya moya wa Xikwembu. (Gal. 5:22, 23) Vo tala va vona a va ri ni ntokoto eku xaviseni ka tindhawu, vunjhiniyara, ku aka, ku fambisa mabindzu, vuhlayiseki bya vatirhi lava akaka ni mintirho yin’wana leyi yelanaka na yona.

Mavandlha ma khutaziwe ku vulavurisana ni Komiti yo Aka ya Xifundzha ma nga si hlawula ndhawu ya Holo ya Mfumo leyintshwa. Laha a ku ri ni mavandlha yo tlula rin’we emutini nakambe va khutaziwe ku vulavurisana ni (mu-)valanguteri va xifundza, mulanguteri wa muti, ni vakulu lava humaka emavandlheni ya le kusuhi. Mavandlha lama a ma kunguhata ku endla ku pfuxeta lokukulu kumbe ku aka Holo ya Mfumo leyintshwa ma tsundzuxiwe ku tirhisa ntokoto wa vamakwerhu va Komiti yo Aka ya Xifundzha endhawini ya ka vona, kun’we ni swiletelo leswi Sosayiti yi va nyikeke swona. Hi ku tirhisa komiti yoleyo, ku endliwa malunghiselelo ya ku hlengeletiwa ka vatirhi va vutshila va mintirho ya 65 leyi lavekaka eka vamakwerhu va xinuna ni va xisati lava ana se va tinyiketeleke ku pfuneta eka miako yo tano.

Loko malunghiselelo ma endliwile, swi kotekile ku hunguta nhlayo ya vatirhi lava va katsekaka eka ntirho wo karhi. Ematshan’wini ya leswaku ku va ni magidi yo tala endhawini yo aka ma tela ku hlalela kumbe ku tirha, hakanyingi a va nga tluli 200 lava nga endhawini yo aka hi nkarhi wun’we. Ematshan’wini ya ku heta mahelo-vhiki hinkwawo kwalaho, vatirhi a va ta ntsena loko ntirho wa vona wo karhi wu laveka. Xisweswo a va va ni nkarhi wo tala wo va ni mindyangu ya vona ni ku endla mintirho ya mavandlha ya ka vona. Loko vamakwerhu va kwalaho va kota ku endla ntirho wa vona wo karhi hi nkarhi lowu ringaneleke, va vone swi antswa swinene ku tisa ntlawa wa lava va akaka hi xihatla ntsena eka swivumbeko swa ntirho leswi a va laveka eka swona hi xihatla.

Hambi leswi ntirho hinkwawo a wu famba hi xihatla lexi hlamarisaka, lexi a ku nga ri xikongomelo-nkulu. Nchumu wa nkoka a ku ri ku aka Tiholo ta Mfumo leti fanelekaka leti endleriweke ku fikelela swilaveko swa kwalaho. Ku hleriwe hi vukheta leswaku ku akiwa hi mali ya le hansi. A ku tekiwa magoza ku vona leswaku ku va ni vuhlayiseki—vuhlayiseki bya vatirhi, vaakelani, vahundzi va ndlela ni lava nga ta tirhisa Holo ya Mfumo enkarhini lowu taka.

Loko swiviko mayelana ni malunghiselelo lama ya ku aka Tiholo ta Mfumo swi fika ematikweni man’wana, tihofisi ta marhavi ya Sosayiti leti a ti vona leswaku a ma ta pfuna etindhawini ta wona ti nyikiwe vuxokoxoko lebyi lavekaka. Hi 1992, Tikomiti to Aka ta Xifundzha leti vekiweke hi Sosayiti a ti pfuneta hi ku aka Tiholo ta Mfumo ematikweni yo tanihi Afrika Dzonga, Argentina, Australia, Britain, Canada, Furwa, Japani, Jarimani, Mexico na Spain. Tindlela ta ku aka ti twananisiwe ni swiyimo swa tindhawu. Loko ku laveka mpfuno wa rhavi rin’wana leswaku ku akiwa Tiholo ta Mfumo, leswi a swi lunghiseleriwa hi hofisi-nkulu ya Sosayiti. Eswiphen’wini swin’wana swa misava, tiholo letintshwa a ti hetiwa hi masiku; kun’wana hi mavhiki kumbe tin’hweti ti nga ri tingani. Hi ku kunguhata ni matshalatshala ya vukheta lama hlanganeke, nkarhi lowu lavekaka wa ku aka Holo ya Mfumo leyintshwa hakunene a wu hungutiwa.

Mintirho ya ku aka ya Timbhoni ta Yehovha a yi heleri eka Tiholo ta Mfumo ntsena. Miako leyikulu ya laveka loko mintlawa ya mavandlha yi hlangana eka tinhlengeletano ta xifundzha ta lembe na lembe ni tinhlengeletano ta masiku yo hlawuleka.

Ku Fikelela Xilaveko Xa Tiholo Ta Tinhlengeletano

Emalembeni yo tala, miako ya tinxaka to hambana-hambana yi tirhiseriwe ku khomela tinhlengeletano ta xifundzha eka yona. Timbhoni ta Yehovha ti qache tindhawu to kota tiholo ta vaaka-tiko, swikolo, tiholo ta mintlangu, tindhawu leti ku hlayiseriwaka matlharhi eka tona, tindhawu ta mintlangu ni timbala ta mintlangu. Etindhawini ti nga ri tingani, ku kumeke tindhawu letinene hi mali ya le hansi. Hakanyingi, a ku laveka nkarhi ni matimba lamakulu leswaku ku basisiwa ndhawu, ku lulamisiwa michini ya mpfumawulo, ku yimisiwa platifomo ni ku tisa switulu. Minkarhi yin’wana a hi byeriwa leswaku swi nge koteki ku tirhisa ndhawu, naswona hi byeriwa loko nkarhi se wu ri kusuhi. Loko mavandlha ya ri karhi ya engeteleka, a swi ya swi tika ku kuma tindhawu leti ringaneleke, leti fanelekaka. Xana a ku ta endliwa yini?

Nakambe, ntlhantlho a ku ri wa leswaku Timbhoni ta Yehovha ti va ni tindhawu ta tona. Leswi a swi ta katsa ku pfuxeta miako leyi fanelekaka ni ku aka leyintshwa. Yo sungula ya Tiholo to tano ta Tinhlengeletano le United States a ku ri holo ya mintlangu le Mutini wa Long Island, New York, leyi pfuxetiweke hi Timbhoni ta Yehovha, ti sungula ku yi tirhisa eku heleni ka 1965.

Hi nkarhi lowu fanaka, Timbhoni ta le xihlaleni xa Kharibiya xa Guadeloupe a ti kunguhata Holo ya Tinhlengeletano leswaku ti fikelela swilaveko swa tona. A va anakanya leswaku a swi ta va pfuna loko a vo kota ku va ni tinhlengeletano ta vona ta xifundzha etindhawini to tala to hambana-hambana. Kambe madoroba yo tala a ya nga ri na tona tindhawu leti nga tikulu hi laha ku ringaneleke. Kutani Timbhoni ti ake muako lowu rhwalekaka lowu endliweke hi tiphayiphi ta nsimbhi ni lwangu ra nsimbhi yo basa, nchumu lowu nga kotaka ku eneta vanhu va 700 ni lowu nga kotaka ku yimisiwa kun’wana ni kun’wana laha a ku ri ni rivala leri nga andlaleka. Ti boheke ku kurisa holo leyi hi ku phindha-phindha ku kondza yi kota ku rhurhela vanhu va 5 000. Ehleketa ku rhwala, ku yimisa, ni ku tlhantlha swiphemu swa tithani ta 30 eka nhlengeletano yin’wana ni yin’wana! Holo yoleyo ya Tinhlengeletano yi akiwile, yi tlhantlhiwa minkarhi yo tala elembeni hi malembe ya 13, ku kondza loko ndhawu leyinene ya holo leyi leyi rhwalekaka yi nga ha kumeki hi ku olova kutani ku laveka leswaku va xava ndhawu ni ku yimisa Holo ya Tinhlengeletano ya nkarhi hinkwawo, leyi sweswi yi nga ya tinhlengeletano ta xifundzha ni mintsombano ya muganga.

Eka tindhawu ti nga ri tingani, ku tirhisiwe miako leyi a yi ri kona tanihi Tiholo ta Tinhlengeletano. Le Nghilandi, eHays Bridge, Surrey, ku xaviwe muako wa xikolo lowu nga na malembe ya 50 ivi wu pfuxetiwa. Wu tshame kahle etiko-xikaya ro saseka ra tihekitara ta 11. Khale ka tiholo ta tibayiskopo ni yindlu yo veka nhundzu ya feme swi pfuxetiwile ivi swi tirhisiwa le Spain; feme ya malapi leyi nga tirhiki le Australia; holo ya ku cinela ka yona le Quebec, Canada; holo ya ntlangu wa bolo yo khunguluxiwa hi mavoko le Japani; yindlu yo veka nhundzu le Riphabliki ra Korea. Miako leyi hinkwayo yi pfuxetiwile yi va Tiholo ta Tinhlengeletano leti kokaka mahlo leti nga tirhaka tanihi tindhawu letikulu ta ku dyondza Bibele.

Tiholo tin’wana ta Tinhlengeletano a ti ri tintshwa hi laha ku heleleke, ti akiwe ku suka ehansi. Holo leyi hlawulekeke ya matlhelo ya nhungu le Hellaby, Yorkshire Dzonga, eNghilandi, ku katsa ni leswaku ntirho wo tala a wu endliwa hi vatirhi vo tirhandzela, yi endle leswaku ku va ni xihloko eka magazini wa Institution of Structural Engineers. Holo ya Tinhlengeletano le Saskatoon, Saskatchewan, le Canada, yi endleriwe ku rhurhela vanhu va 1 200; kambe loko makhumbi ya le ndzeni ma kokeriwa etindhawini ta wona, muako lowu wu nga ha tirhisiwa hi matlhelo ya mune lama vandzakaneke tanihi Tiholo ta Mfumo. Holo ya Tinhlengeletano ya le Haiti (ya swiphemu-phemu leswi nga tisiwa hi xikepe swi huma hi le United States) yi pfuriwile eka matlhelo mambirhi leswaku lava va nga endzeni va tshama va ri karhi va beriwa hi moya lowu hungaka—hakunene i xiphyuphyisi lexinene eka dyambu leri hisaka ra le Haiti. Holo ya le Port Moresby, Papua New Guinea, yi endliwe hi ndlela leyi pfumelelaka leswaku swiphemu swa makhumbi swi nga pfuriwa tanihi tinyangwa leswaku yi rhurhela mintshungu leyi engetelekeke.

Xiboho xa ku aka Holo ya Tinhlengeletano a xi endliwi hi ntlawa lowutsongo wa valanguteri lava va langutelaka leswaku hinkwavo va xi seketela. Loko ku nga si akiwa Holo ya Tinhlengeletano leyintshwa, Sosayiti ya tiyiseka leswaku nkambisiso wa vukheta wa endliwa hi ku ya hi xilaveko xa yona ni mpimo lowu yi nga ta tirhisiwa ha wona. A ku xiyiwi ntsena ndlela leyi vanhu kwalaho va yi hisekelaka ha yona kambe ni swilaveko hinkwaswo swa nsimu. Ku burisaniwa hi yona ni mavandlha hinkwawo lama nga ta katseka, leswaku ku tiyisekiwa hi ku navela ni vuswikoti bya vamakwerhu byo yi seketela.

Xisweswo, loko ntirho wu sungula, Timbhoni ta Yehovha endhawini yoleyo ti wu seketela hi mbilu hinkwayo. Muako wun’wana ni wun’wana wu hakeleriwa hi Timbhoni hi toxe. Swilaveko swa timali swa hlamuseriwa, kambe minyikelo i ya ku tirhandzela naswona a yi kombisiwi leswaku yi huma eka mani. Ku hlela hi vukheta ku endliwa ka ha ri ni nkarhi, naswona muako wu humelela hikwalaho ka ntokoto lowu kumiweke loko ku akiwa Tiholo ta Mfumo, naswona hakanyingi, wu kumiwa ni le ka matsima ya Tiholo ta Tinhlengeletano etindhawini tin’wana. Loko swi fanerile, swivumbeko swin’wana swa ntirho swi nga ha nyikiwa tikontraka leti hakeriwaka, kambe wo tala wa wona hakanyingi wu endliwa hi Timbhoni leti hisekaka. Leswi swi nga ha hunguta ntsengo wa mali wu va hafu.

Loko ku ri na vatirhi va vutshila lava nga swi dyondzela ni van’wana lava nyiketelaka nkarhi ni vuswikoti bya vona, hakanyingi muako hinkwawo wu famba hi xihatla. Miako yin’wana yi nga ha lava nkarhi lowu tlulaka lembe. Kambe hi 1985, le Xihlaleni xa Vancouver le Canada, vatirhi vo tirhandzela va 4 500 va hete Holo ya Tinhlengeletano ya swikwere-mitara swa 2 300 hi masiku ya kaye ntsena. Muako lowu wu katsa ni Holo ya Mfumo leyi tshamisaka vanhu va 200 leyi tirhisiwaka hi mavandlha ya kwalaho. Le New Caledonia, hi 1984, hulumendhe yi endle nsivelo wa ku famba-famba hi minkarhi yo karhi, hikwalaho ka mpfilumpfilu wa politiki, kambe vatirhi vo tirhandzela va kwalomu ka 400 va tirhe eHolweni ya Tinhlengeletano hi nkarhi wun’we, naswona yi hetiwe hi tin’hweti ta mune ntsena. Ekusuhi na Stockholm, Sweden, Holo ya Tinhlengeletano yo saseka, leyi nga ni switulu swa 900 swa muoki leswi lavaka ku fana ni masofa, yi akiwe hi tin’hweti ta nkombo.

Minkarhi yin’wana ku endliwe matshalatshala lama hambetaka lama lavekaka ya le hubyeni leswaku ku kumiwa mpfumelelo wa ku aka Tiholo leti ta Tinhlengeletano. Swi ve tano le Canada, eSurrey, xiphemu xa Columbia lexi lawuriwaka hi Britain. Loko ku xaviwe ndhawu, timfanelo ta swifundzha a ti pfumela leswaku muako wo tano wa vugandzeri wu akiwa kwalaho. Kambe endzhaku ka loko tipulani ta muako ti tisiwile, hi 1974, Huvo ya Xifundzha xa Surrey yi humese nawu wa le ndzhaku lowu vulaka leswaku tikereke ni tiholo ta Tinhlengeletano ti nga akiwa ntsena eka Xifundzha P-3—xifundzha lexi ni ku va kona a xi nga ri kona! Kambe, a ku ri na tikereke ta 79 exifundzheni xa miako ya hulumendhe leti akiweke ku ri hava xo karhata. Mhaka leyi yi yisiwe ehubyeni. Hi ku phindha-phindha ku humesiwe milawu leyi yimelelaka Timbhoni ta Yehovha. Loko nsivelo wa xihlawu-hlawu wa valawuri eku heteleleni wu hluriwile, vatirhi vo tirhandzela va hambete ni tsima rolero hi ku hiseka lokukulu lerova va yi heta hi tin’hweti ta kwalomu ka nkombo. Hi laha a swi ri ha kona eka matshalatshala ya Nehemiya yo tlhela a aka makhumbi ya Yerusalema, va swi vonile leswaku ‘voko ra Xikwembu a ri ri henhla ka vona’ leswaku va hetisisa ntirho.—Neh. 2:18.

Loko Timbhoni ta Yehovha le United States ti xave Stanley Theater le Mutini wa Jersey, eNew Jersey, muako a wu ri endhawini ya tiko leyi hlawulekeke ematin’wini. Hambi leswi holo leyi ya mintlangu a yi ri exiyin’weni lexi nga nyawuriki lexi lavaka mpfuxeto, a yi faneleka leswaku yi tirhisiwa tanihi Holo ya Tinhlengeletano. Hambi swi ri tano, loko Timbhoni ti lave ku endla ntirho lowu lavekaka wa ku yi pfuxeta, valawuri va muti a va ti pfumelelanga. Mulanguteri wa doroba a a nga ti lavi Timbhoni ta Yehovha endhawini yoleyo; a a ri na makungu man’wana hi ndhawu yoleyo. Mhaka leyi yi yisiwe ehubyeni leswaku valawuri va tshikisiwa ku tirhisa vulawuri bya vona hi ndlela leyi hoxeke. Huvo yi yimelele Timbhoni. Endzhakunyana ka sweswo, vaaki va kwalaho a va ha n’wi hlawulanga mulanguteri wa doroba ivi a suka exitulwini. Ntirho wa le holweni wu fambe hi xihatla. Yi hetelele hi ku va Holo ya Tinhlengeletano yo saseka leyi tshamisisaka vanhu lava tlulaka 4 000. I ndhawu leyi van’wamabindzu ni vaaki va doroba hi ku fanana va tinyungubyisaka ha yona.

Eswiphen’wini swo tala swa misava, eka malembe ya 27 lama hundzeke, Tiholo ta Tinhlengeletano to xonga ni leti langutekaka ti akiwile hi Timbhoni ta Yehovha leswaku ti va tindhawu ta ku dyondza Bibele. Tiholo to tano sweswi ti kumeka hi xitalo le N’walungu ni le Dzongeni wa Amerika, Yuropa, Afrika ni le Vuxeni, ku katsa ni le swihlaleni swo tala. Ematikweni man’wana—hi xikombiso Nigeria, Italy na Denmark—Timbhoni ta Yehovha ti ake tindhawu letikulu swinene ni leti pfulekeke leti nga tirhiseriwaka mintsombano ya tona ya muganga nkarhi hinkwawo.

Hambi swi ri tano, Tiholo ta Tinhlengeletano ni Tiholo ta Mfumo a hi yona ntsena miako leyi Timbhoni ta Yehovha ti khomekeke ha yona leswaku ti yisa ku huweleriwa ka Mfumo wa Xikwembu emahlweni.

Tihofisi, Vugandliselo ni Makaya ya Bethele eMisaveni Hinkwayo

Emisaveni hinkwayo, hi 1992, a ku ri na tihofisi ta marhavi ta 99 ta Sosayiti ya Watch Tower, laha yin’wana ni yin’wana a yi tirha ku kongomisa mintirho ya Timbhoni ta Yehovha exiphen’wini xa yona xa nsimu. Ku tlula hafu ya marhavi lawa a ma kandziyisa swilo swa tinxaka to hambana-hambana leswaku ma yisa ntirho wa ku dyondzisa Bibele emahlweni. Vunyingi bya lava va tirhaka emarhavini va tshama tanihi ndyangu lowukulu emakaya lama vitaniwaka Bethele, leswi vulaka “Yindlu ya Xikwembu.” Hikwalaho ka ku andza ka nhlayo ya Timbhoni ta Yehovha ni ntirho wa tona wa ku chumayela, ku laveke leswaku ti kurisa tindhawu leti ni ku aka tin’wana letintshwa.

Nhlengeletano yi kule hi xihatla swinene lerova hakanyingi ku ve na minongonoko ya ku kurisiwa ka marhavi ya 20 ku ya ka 40 hi nkarhi wun’we. Leswi swi lave nongonoko lowukulu wa ku aka ka misava hinkwayo.

Hikwalaho ka mpimo lowukulu wa ntirho wa ku aka lowu endliwaka emisaveni hinkwayo, Sosayiti ya Watch Tower yi ni Ndzawulo ya Vunjhiniyara ni ya ku Mpfampfarhuta ya yona n’wini eyindlu-nkulu ya yona le New York. Vanjhiniyara lava nga ni malembe yo tala ya ntokoto va tshike mintirho ya vona ya ku tihanyisa, va tinyiketela ku pfuna nkarhi hinkwawo eka matsima ya ku aka lama khumbanaka hi ku kongoma ni ntirho wa Mfumo. Ku engetela kwalaho, lava va nga ni ntotoko va dyondzise vavanuna ni vavasati van’wana entirhweni wa vunjhiniyara, wa ku kunguhata tipulani ni wa ku mpfampfarhuta. Hi ku kongomisa ntirho hi ku tirhisa ndzawulo leyi, ntokoto lowu kumiwaka eku akiweni ka rhavi rin’wana eka xiphemu xin’wana xa misava wu pfuna lava va tirhaka eka matsima wolawo ematikweni man’wana.

Hi ku famba ka nkarhi, mpimo lowukulu wa ntirho lowu endliwaka wu endle leswaku swi koteka ku pfula Hofisi ya Xifundzha ya Vunjhiniyara le Japani leswaku yi pfuna hi ku mpfampfarhuta swivumbeko swa miako le Vuxeni. Tin’wana Tihofisi ta Xifundzha ta Vunjhiniyara ti kona le Yuropa ni le Australia, vatirhi va kona va huma hi le matikweni yo hambana-hambana. Tona ti tirhisana swinene ni hofisi-nkulu naswona mintirho ya tona, ku katsa ni ku tirhisa vutshila bya tikhomphyuta, yi hungutela vatirhi va ku mpfampfarhuta lava lavekaka eka ndhawu yihi na yihi leyi va nyikiweke yona.

Miako yin’wana kahle-kahle yi ni mpimo lowu ringaneleke. Swi ve tano hi hofisi ya rhavi leri akiweke le Tahiti hi 1983. Yona yi ni ndhawu ya tihofisi, makamara yo veka nhundzu ni tindhawu to tshama ta vatirhi vo tirhandzela va nhungu. Nakambe swi ve tano hi muako wa swithezi swa mune swa rhavi lowu yimisiweke le xihlaleni xa Kharibiya xa Martinique hi 1982 ku ya ka 1984. Miako leyi yi nga ha vonaka yi nga hlamarisi eka vanhu lava tshamaka emadorobeni lamakulu ematikweni man’wana, kambe yi hlamarise vo tala. Phepha-hungu leri nge France-Antilles ri hlamusele leswaku muako wa rhavi ra le Martinique a wu ri “vutshila lebyi hlamarisaka bya vuaki” lebyi kombisaka “ku rhandza ntirho lowu endliweke kahle.”

Ku hambana ni mpimo wa vukulu, miako leyi hetiweke le Canada hi 1981 a yi katsa ndhawu leyikulu ya vugandliselo kumbe fektri, leyi nga ni swikwere-mitara swa 9 300 ehansi ni muako wo tshama wa vatirhi vo tirhandzela va 250. Le Cesario Lange, le Brazil, muako wa Watch Tower lowu hetiweke hi lembe rolero a wu katsa miako ya nhungu, leyi nga na swikwere-mitara swa 46 000 ehansi. A yi lava semendhe, maribye ni sava leswi nga tataka tilori ta 10 000 ku katsa ni tinhulu ta khonkhiriti leti nga tlakukaka ti ringana ni Ntshava ya Everest kambirhi! Hi 1991, loko vugandliselo lebyintshwa lebyikulu byi hetiwile le Philippines, ku tlhele ku laveka leswaku va aka ndhawu yo tshama ya swithezi swa 11.

Leswaku ku fikeleriwa swilaveko swa nhlayo leyi kulaka ya vahuweleri va Mfumo le Nigeria, tsima ra muako lowukulu ri sunguriwile le Igieduma hi 1984. Wona a wu ta katsa fektri, muako wa tihofisi lowu nga ni ndhawu leyikulu, miako ya mune leyi hlanganisiweke yo tshama, ni tindhawu tin’wana leti lavekaka. Ku endliwe makungu ya ku endla swiphemu-phemu swa fektri leswi lavaka ku hlanganisiwa ivi swi rhumeriwa hi swikepe swi huma le United States. Kambe vamakwerhu a va salele hi masiku matsongo yo endla leswaku nhundzu ya vona yi fika. Endzhaku ko endla matshalatshala, hinkwaswo swi fike swi hlayisekile le ndhawini ya ku aka, Timbhoni a ti tidzunisanga kambe ti nkhense Yehovha hikwalaho ka mikateko ya yena.

Ku Engeteleka Lokukulu eMisaveni Hinkwayo

Hambi swi ri tano, ku andza ka ntirho wa ku huwelela Mfumo ku hatlise swinene ngopfu lerova, hambi ku ri endzhaku ka ku kurisiwa ka miako lokukulu etikweni, hakanyingi ku laveke leswaku ku tlhela ku sunguriwa ku aka nakambe hi nkarhi wo koma swinene. Xiya swikombiso swi nga ri swingani.

Le Peru rhavi lerintshwa ro saseka—leri nga ni ndhawu ya tihofisi, makamara yo etlela ya 22 xikan’we ni tindhawu tin’wana leti lavekaka ta swirho swa ndyangu wa Bethele, ni Holo ya Mfumo—ri hetiwe eku heleni ka 1984. Kambe ndlela leyi rungula ra Mfumo ri amukeriweke ha yona le tikweni leriya ra le Amerika Dzonga a yi ri yikulu ku tlula ndlela leyi a yi languteriwile. Endzhaku ka mune wa malembe a swi laveka leswaku ku endliwa muako lowu fanaka ni lowu a wu ri kona, laha se sweswi a ku ta tirhisiwa endlelo leri endleriweke ku hunguta ku onhaka loko ku va ni ku tsekatseka ka misava.

Muako wa rhavi lerintshwa lowu nga ni ndhawu leyikulu wu hetiwile le Colombia hi 1979. Swi vonake onge a wu ta va ni ndhawu leyi ringaneke hi malembe yo tala lawa a ma ta landzela. Hambi swi ri tano, ku nga si hela malembe ya nkombo nhlayo ya Timbhoni le Colombia a yi lave ku tlakuka kambirhi, naswona rhavi leri hi nkarhi lowu a ri kandziyisa timagazini ta La Atalaya na ¡Despertad! ta Colombia ni ta matiko ya mune lama nga ekusuhi. A va fanele va tlhela va sungula ku aka hi 1987—sweswi a va ta aka laha ndhawu ya ku aka a yi ri yikulu.

Hi 1980, Timbhoni ta Yehovha le Brazil ti tirhise tiawara ta kwalomu ka 14 000 000 eku chumayeleni ka rungula ra Mfumo erivaleni. Nhlayo yi kule yi ya kwalomu ka 50 000 000 hi 1989. Vanhu vo tala a va kombisa leswaku va tsakela ku wundliwa hi tlhelo ra moya. Miako leyi engeteriweke ya rhavi leyi yi nyiketeriweke hi 1981, a yi nga ha ringaneli. Ana hi September 1988, ku cela-cela ka fektri leyintshwa a ku sungurile. Yona a yi ta va ni vuandlalo lebyi tlulaka bya fektri leyi a yi ri kona hi tiphesente ta 80, naswona tindhawu to tshama ta ndyangu wa Bethele lowu kulaka a ti ta laveka na tona.

Le Selters/Taunus, Jarimani, muako wa vumbirhi eka leyikulu swinene ya Sosayiti ya Watch Tower wu nyiketeriwile hi 1984. Endhzhaku ka malembe ya ntlhanu, hikwalaho ka ku andza le Jarimani ni leswaku ku endliwa mintirho ya ku engetela ntirho wa ku vula vumbhoni ematikweni lama rhavi leri ri ma kandziyiselaka tibuku, ku endliwe makungu ya ku engetela fektri hi tiphesente leti tlulaka 85 ni ku engetela miako leyi vatirhi va nga ta tshama ni ku endla mintirho yin’wana eka yona.

Rhavi ra le Japani ri rhurhe le Tokyo ri ya emiakweni leyikulu le Numazu hi 1972. Nakambe hi 1975 ku ve na ku engetela lokukulu swinene. Hi 1978 va kume ndhawu yin’wana, le Ebina; naswona ntirho wo aka fektri lowu a wu tele ku tlula wa le Numazu hi makhamba manharhu wu sunguriwile hi ku hatlisa. Wona wu hetiwe hi 1982. Kambe a wu nga si ringana; ku engeteriwe miako yin’wana hi 1989. Xana a swi nga ta koteka ku aka kan’we ntsena ivi va yi endla yi va leyikulu hi laha ku ringaneke? Doo. Nhlayo ya vahuweleri va Mfumo le Japani yi kule hi ku phindha-phindha hi ndlela leyi ku nga riki na munhu loyi a ta va a yi ehleketile. Ku sukela eka 14 199 hi 1972, tinhlayo ta vona ti kule ti ya ka 137 941 hi 1989, naswona vunyingi bya vona a va nyikela nkarhi wa vona hinkwawo evutirhelini.

Leswi fanaka swa vonaka eka swiphemu swin’wana swa misava. Ku nga si hela khume ra malembe—naswona ku nga si hela malembe yo tala—endzhaku ka ku akiwa ka marhavi lamakulu lama kandziyisaka, a ku laveka leswaku ku sunguriwa ntirho wun’wana lowukulu wa ku ma kurisa. Sweswo swi ve tano le Mexico, Canada, Afrika Dzonga ni le Riphabliki ra Korea.

Kahle-kahle i mani la akaka? Xana wu hetisisiwa njhani hinkwawo?

Magidi Yo Tala Ma Lava Ku Pfuna

Le Sweden, eka Timbhoni ta le tikweni leriya ta 17 000 hi nkarhi wa ku aka rhavi ra le Arboga, vatirhi vo tirhandzela va kwalomu ka 5 000 va pfunetile hi ntirho. Vo tala a va ri vapfuni vo tirhandzela, kambe a ku ri ni lava ringaneke lava nga vatirhi va vutshila bya le henhla swinene leswaku va vona leswaku ntirho a wu endliwa kahle. A va susumetiwa hi yini? Ku rhandza Yehovha.

Loko mulawuri le hofisini ya vukambisisi bya misava le Denmark a twe leswaku ntirho hinkwawo le rhavini lerintshwa le Holbæk a wu ta endliwa hi Timbhoni ta Yehovha, u kombise ku kanakana. Ku nga khathariseki sweswo, exikarhi ka Timbhoni leti a ti ta pfuneta hi ku tirhandzela, a va kuma vuxokoxoko hinkwabyo lebyi a va byi lava. Kambe, xana a va ta pfuneka ku antswa loko a va lo qacha vaaki lava lavaka mali leswaku va tirha? Loko muako wu hetiwile, vativi lava humaka eka ndzawulo yo aka ya doroba va famba-fambe emuakweni va bumabumela vutshila bya vaaki—nchumu lowu va nga tolovelangiki ku wu vona eka mintirho ya lava va hakeriwaka namuntlha. Kasi mulawuri loyi eku sunguleni a nga kombisa ku kanakana, u n’wayiterile ivi a ku: “Ma vona, hi nkarhi lowuyani a ndzi nga swi tivi leswaku mi hleleke njhani.”

Le Australia tindhawu leti vanhu va tshamaka eka tona ti hangalakile swinene; kutani, vo tala va vatirhi va ku tirhandzela va 3 000 lava tirheke emiakweni ya rhavi le Ingleburn exikarhi ka 1978 na 1983 a va fanele ku famba tikhilomitara ta kwalomu ka 1 600. Hambi swi ri tano, ku lunghiseleriwe maendzo ya mabazi ya mintlawa ya vatirhi vo tirhandzela, naswona mavandlha lama nga endleleni etindhawini ta vona to wisa, hi mafundzha ma va nyike swakudya ni ku va kombisa vunghana lebyikulu. Van’wana va vamakwerhu lava va xavise makaya, va pfala mabindzu ya vona, va tirhisa minkarhi ya vona yo wisa, ni ku titsona swilo swin’wana leswaku va kota ku hlanganyela eka tsima leri. Ku te mintlawa yo tala ya vanhu lava nga dyondzela mintirho—van’wana va vona va te minkarhi yo talanyana—leswaku va ta chela khonkhiriti, va vekela silingi, va dzima rihlampfu. Van’wana va nyikele hi swilo swo aka ha swona.

Vo tala va vatirhi vo tirhandzela eka matsima lawa a va nga ri na vutshila, kambe hi ndzetelo wutsongonyana, van’wana va vona va byarhe vutihlamuleri lebyikulu naswona va endle ntirho wa kahle swinene. Va dyondze ku hlanganisa mafestere, ku fambisa titeretere, va pfuva khonkhiriti, ni ku aka hi switina. Va tsakele mpfuno wa xiviri lowu va wu kumeke eka lava nga riki Timbhoni lava a va tirha ntirho lowu fanaka leswaku va tikumela mali. Hi ndlela yihi? Vanhu volavo va nga ni ntokoto a va tsakela ku avelana vutivi bya vona ni van’wana. A ku ri hava loyi a a chava leswaku un’wana u ta n’wi tekela ntirho; a ku ri na ntirho wo tala wa un’wana ni un’wana. Naswona a va susumeteleka ku endla ntirho wa xiyimo xa le henhla, hikuva a wu endliwa hi ku kombisa ku rhandza ka vona Xikwembu.

Etindhawini hinkwato ta ku aka, Timbhoni tin’wana ti vumba xisekelo xa “ndyangu” wa ku aka. Hi nkarhi wa ntirho le Selters/Taunus, eJarimani, ku suka hi 1979 ku ya ka 1984, madzana yo hlayanyana hi ntolovelo ma vumbe mbilu ya vatirhi. Van’wana va magidi va hlanganyerile hi minkarhi yo hambana, vo tala hi mahelo-vhiki. A ku ri na ku hlela ka vukheta leswaku loko vatirhi vo tirhandzela va fika, va kuma ku ri na ntirho wo tala wa vona leswaku va wu endla.

Ntsendze loko vanhu va nga hetisekanga, swiphiqo swi va kona, kambe lava tirhaka eka miako leyi va ringeta ku swi lulamisa hi ku tirhisa mimpimanyeto ya Bibele. Va swi tiva leswaku ku endla swilo hi ndlela ya Vukreste i swa nkoka ku tlula ku humelela. Tanihi xitsundzuxo, le ndhawini ya ku aka le Ebina, Japani, a ku ri ni mimfungho leyikulu leyi nga ni swifaniso swa vatirhi va ambale swihuku leswo tsindziyela ivi ehenhla ka xihuku xin’wana ni xin’wana ku tsariwe wun’wana wa mihandzu ya moya wa Xikwembu hi tinhlanga ta Xijapani: rirhandzu, ntsako, ku rhula, ku leha mbilu, tintswalo, vunene, ripfumelo, musa ni ku tikhoma. (Gal. 5:22, 23) Lava va endzelaka tindhawu leti ta ntirho va vona ni ku twa ku hambana loku nga kona. Muviki wa mahungu loyi a nga famba-famba endhawini ya ku aka ya rhavi le Brazil, loko a hlamusela ku titwa ka yena n’wini u te: “A ku na ku hambana kumbe ku pfumaleka ka ntirhisano . . . Moya lowu wa Vukreste wu swi endla swi hambana ni leswi toloveriweke eka vatirhi lava hakeriwaka va le Brazil.”

Ku Kula Loku Hambetaka Le Yindlu-nkulu Ya Misava

Loko marhavi ya Sosayiti ya Watch Tower ma ri karhi ma kula, ku laveke leswaku ku engeteriwa miako ya yindlu-nkulu ya misava. Ku ve ni ku engeteriwa lokukulu ka fektri ya yona ni miako ya tihofisi le Brooklyn ni le tindhawini tin’wana le New York State ku tlula minkarhi ya khume hi mpfhuka ka Nyimpi ya Vumbirhi ya Misava. Leswaku vatirhi va kuma ndhawu yo tshama, ku laveke leswaku ku akiwa kumbe ku xava ni ku pfuxeta miako yo tala, leyikulu ni leyitsongo. Hi August 1990 na hi January 1991 ku tivisiwe ku engeteriwa kun’wana lokukulu le Brooklyn—hambi leswi le n’walungu wa Muti wa New York ku aka loku sunguriweke hi 1989 a ku ya emahlweni endhawini leyikulu ya Watchtower Educational Center, leyi endleriweke ku tshamisisa vanhu va 1 200, ku katsa ni vatirhi va kwalaho ni swichudeni.

Ku sukela hi 1972 ntirho wa ku aka a wu yimanga le yindlu-nkulu ya misava le Brooklyn ni miako yin’wana leyi tirhisanaka na yona swinene eswiphen’wini swin’wana swa New York ni le New Jersey. Hi ku famba ka nkarhi, swi ve erivaleni leswaku hambi loko va ri madzana, vatirhi va nkarhi hinkwawo va ku aka a va nga swi koti ku hatlisisa ntirho. Kutani, hi 1984 ku sunguriwe nongonoko wa vatirhi va nkarhinyana lowu yaka emahlweni. Ku rhumeriwe mapapila emavandlheni lama hi nkarhi wolowo a ma ri 8 000 le United States, ku rhambiwa vamakwerhu lava fanelekaka leswaku va ta pfuneta ku ringana vhiki kumbe ku tlula. (Nongonoko lowu fanaka ana a wu tirhe kahle eka marhavi man’wana, ku katsa ni le Australia, laha lava a va ta swi kota ku tshama mavhiki mambirhi va nga rhambiwa leswaku va ta pfuneta.) Vatirhi a va nyikiwa ndhawu yo tshama ni swakudya, kambe a va ta hakelela maendzo ya vona naswona a va nga ta hakeriwa. I vamani lava a va ta ta?

Hi 1992, swikombelo swo amukeriwa swo tlula 24 000 swi amukeriwile! Kwalomu ka 3 900 wa vanhu lava hi lava a va ta ra vumbirhi kumbe ra vunharhu, kumbe hambi ku ri ra vu-10 kumbe ra vu-20. Vo tala va vona a va ri vakulu, malandza ya vutirheli kumbe maphayona—vanhu lava nga ni timfanelo letinene ta moya. Hinkwavo va endle ntirho lowu lavekaka hi ku tirhandzela, hambi wu lava leswaku va endla mintirho leyi va nga yi dyondzela kumbe e-e. Hakanyingi ntirho a wu tika naswona a wu va thyakisa. Kambe a va ri teka ri ri lunghelo ku hlanganyela hi ndlela leyi leswaku va yisa timhaka ta Mfumo emahlweni. Van’wana va vone va pfuneka leswaku va kombisa moya wa ku tinyiketela ku antswa lowu nga xiphemu xa ntirho lowu endliwaka le yindlu-nkulu ya misava. Hikwalaho ko va kona eka nongonoko wa ndyangu wa Bethele wa vugandzeri bya ni mixo ni dyondzo ya vhiki na vhiki ya Xihondzo xo Rindza, hinkwavo ka vona va titwe va kume hakelo leyi fuweke.

Vatirhi Vo Tirhandzela Va Matiko Hinkwawo

Loko xilaveko xa ku kurisa hi ku hatlisa xi ya xi kula, ku sunguriwe lunghiselelo ra vatirhi vo tirhandzela va matiko hinkwawo hi 1985. Kahle-kahle a ku nga ri ku sunguriwa ka vandla ro aka ra matiko hinkwawo, kambe malunghiselelo se a ma kongomisiwa hi vukheta ku suka le yindlu-nkulu. Hinkwavo lava hlanganyelaka i Timbhoni leti tirhandzelaka ku pfuneta hi ntirho wo aka ehandle ka matiko ya ka vona. I vatirhi lava nga ni vutshila, ni vanghana va vukati lava fambaka ni vanuna va vona leswaku va pfuneta hi ndlela yihi na yihi leyi va nga yi kotaka. Vo tala va vona va tihakelela maendzo ya vona; ku hava lava kumaka muholo wa leswi va swi endlaka. Van’wana va vona va tirha swa xinkarhana, hakanyingi va tshama mavhiki mambirhi ku ya ka tin’hweti tinharhu. Van’wana i vatirhi vo tirhandzela va nkarhi wo leha, va tshama lembe kumbe ku tlula, kumbexana ku kondza loko muako wu herile. Timbhoni ta Yehovha leti tlulaka 3 000 leti humaka ematikweni ya 30 ti hlanganyerile eka leswi emalembeni yo sungula ya ntlhanu, naswona vo tala a va swi lava ku hlanganyela loko vutshila bya vona byi laveka. Va teka ku tinyiketela ka vona ni swilo swa vona leswi vonakaka ri ri lunghelo leswaku va yisa timhaka ta Mfumo wa Xikwembu emahlweni hi ndlela leyi.

Vatirhi vo tirhandzela va matiko hinkwawo va nyikiwa ndhawu yo tshama ni swakudya. Vulovolovo hakanyingi a byi kona. Timbhoni ta kwalaho ti tlangela swinene leswi vamakwavo va tona lava va endzeke va swi endlaka, naswona ku nga khathariseki leswaku i swisiwana ku fika kwihi, loko swi koteka va va amukela leswaku va tirhisa makaya ya vona swin’we. Hakanyingi va dya swakudya swa le muakweni.

Vamakwerhu lava humaka ematikweni mambe a va telanga ku endla ntirho hinkwawo. Xikongomelo xa vona i ku tirha swin’we ni ntlawa wa kwalaho wa ku aka. Naswona madzana kumbe magidi ya van’wana etikweni na vona va nga ha ta hi nkarhi wun’we leswaku va ta pfuna hi mahelo-vhiki kumbe vhiki kumbe ku tlula kwalaho. Le Argentina, vatirhi vo tirhandzela va 259 vo huma ematikweni man’wana va tirhe swin’we ni madzana yo hlayanyana ya vamakwerhu va kwalaho, lava van’wana va vona a va tirha masiku hinkwawo, van’wana mavhiki ma nga ri mangani, naswona a ku ta vo tala hi mahelo-vhiki. Le Colombia, vatirhi vo tirhandzela va matiko hinkwawo vo tlula 830 va pfunetile hi minkarhi yo hambana-hambana. Nakambe a ku ri ni vatirhi vo tirhandzela va kwalaho vo tlula 200 lava va hlanganyeleke eka tsima leri nkarhi hinkwawo, naswona hi mahelo-vhiki man’wana ni man’wana van’wana va 250 kumbe ku tlula a va ta. Loko va hlanganile a ku ri vanhu vo hambana vo tlula 3 600 lava hlanganyelaka.

Ku hambana ka ririmi ku nga vanga swiphiqo, kambe a swi yi siveli mintlawa leyi ya matiko hinkwawo leswaku yi tirha swin’we. Ku vulavula hi mavoko, xiyimo xa nghohe, ku hleka van’wana ni ku tihleka hi ndlela leyi faneleke, ni ku navela ku hetisisa ntirho lowu nga ta dzunisa Yehovha swi pfuna ku endla leswaku ntirho wu endliwa.

Ku andza loku hlamarisaka enhlengeletanwini—loku endlaka leswaku ku laveka miako leyikulu ya marhavi—minkarhi yin’wana ku endleka ematikweni lawa nhlayo ya vanhu lava nga ni vutshila emintirhweni yo aka yi nga yitsongo. Kambe leswi a hi xihinga eka Timbhoni ta Yehovha, leti ti pfunanaka hi ntsako. Ti tirha swin’we tanihi xiphemu xa ndyangu wa misava hinkwayo lowu nga hambanisiwiki hi rixaka, muvala wa nhlonge kumbe ririmi.

Le Papua New Guinea, un’wana ni un’wana wa vatirhi vo tirhandzela lava teke hi le Australia ni le New Zealand u dyondzise munhu un’we wa le Papua New Guinea ntirho wakwe, hi ku pfumelelana ni xikombelo xa Ndzawulo ya Hulumendhe ya Vatirhi. Hi ndlela leyi, loko ti tinyiketela, Timbhoni ta kwalaho ti dyondze mintirho ya mavoko leyi nga ti pfunaka ku khathalela swilaveko swa tona vini ni mindyangu ya tona.

Loko rhavi lerintshwa ri laveka le El Salvador, vamakwerhu va kwalaho va joyiniwe hi vatirhi vo tirhandzela va 326 va le matikweni mambe. Emuakweni wa le Ecuador, Timbhoni ta 270 to huma ematikweni ya 14 ti tirhe swin’we ni vamakwavo va tona va xinuna ni va xisati va le Ecuador. Vatirhi van’wana vo tirhandzela va matiko hinkwawo va pfunetile hi miako yo hlayanyana leyi a yi sunguriwile hi nkarhi lowu fanaka. Va famba-fambe ni tindhawu leti ku akiwaka eka tona le Yuropa na Afrika, hi ku ya hi xilaveko xa vutshila bya vona bya ntirho wa mavoko.

Hi 1992, vatirhi vo tirhandzela va matiko hinkwawo va rhumeriwe eka tindhawu ta marhavi ta 49 leswaku va pfuna mintlawa ya kwalaho ya ku aka. Eka minkarhi yin’wana lava va pfuniweke eka nongonoko lowu na vona va swi kotile ku pfuna van’wana. Hi xikombiso, loko va pfuniwile hi mintirho ya malandza ya matiko hinkwawo ya nkarhi wo leha ya kwalomu ka 60 lama pfuneke eku akeni ka muako wa rhavi le Philippines, ku katsa ni vatirhi vo tirhandzela lava tlulaka 230 va le matikweni mambe lava pfuneke swa nkarhinyana, van’wana va le swihlaleni swa Philippines va tinyiketerile leswaku va pfuneta ku aka miako eswiphen’wini swin’wana swa le Dzonga-vuxa bya Asia.

Timbhoni ta Yehovha ti endla ntirho wa ku aka hikwalaho ka swilaveko leswi vaka kona sweswi mayelana ni ku chumayela mahungu lamanene. Hi ku pfuniwa hi moya wa Yehovha, va lava ku nyikela vumbhoni lebyikulu hi laha va nga kotaka ha kona enkarhini lowu wa ha seleke ku nga si fika Armagedoni. Va tshemba leswaku misava ya Xikwembu leyintshwa yi le kusuhi swinene, naswona va pfumela leswaku va ta pona tanihi vanhu lava hlanganeke va ya emisaveni leyintshwa, ehansi ka ku fuma ka Mfumo wa Xikwembu wa Vumesiya. Nakambe ntshembo wa vona hi leswaku kumbexana miako ya vona leyinene yo tala leyi va yi akeke ivi va yi nyiketela eka Yehovha yi ta hambeta yi tirhisiwa endzhaku ka Armagedoni tanihi tindhawu leti vutivi bya Xikwembu xin’we xa ntiyiso byi nga ta humesiwa eka tona ku kondza byi tata misava.—Esa. 11:9.

[Nhlamuselo ya le hansi]

a A yi tiviwa tanihi “New Light” Church, hikuva lava a va hlanganyela kwalaho a va anakanya leswaku hikwalaho ka ku hlaya tibuku ta Watch Tower, a va kume rivoni lerintshwa ra Bibele.

[Marito lama tshahiweke exihlokweni lama nga eka tluka 322]

Timbhoni ta le mavandlheni ya le kusuhi ti pfunetile hi ntirho

[Marito lama tshahiweke exihlokweni lama nga eka tluka 323]

Ntirho wa ku aka wu endliwe hi vatirhi va ku tirhandzela lava nga hakeriwiki

[Marito lama tshahiweke exihlokweni lama nga eka tluka 324]

A ku kandziyisiwa timfanelo ta moya

[Marito lama tshahiweke exihlokweni lama nga eka tluka 326]

Ku aka hi ndlela leyinene, vuhlayiseki, mali ya le hansi ni hi xihatla

[Marito lama tshahiweke exihlokweni lama nga eka tluka 328]

Holo ya Tinhlengeletano leyi rhwalekaka!

[Marito lama tshahiweke exihlokweni lama nga eka tluka 331]

Ku yisa timhaka etihubyeni

[Marito lama tshahiweke exihlokweni lama nga eka tluka 332]

Ku andza lokukulu ematikweni hinkwawo

[Marito lama tshahiweke exihlokweni lama nga eka tluka 333]

Vatirhi a va tidzunisanga, va dzunise Yehovha

[Marito lama tshahiweke exihlokweni lama nga eka tluka 334]

Ku andza hi ndlela leyi ku nga riki na munhu loyi a nga vaka a yi anakanyile

[Marito lama tshahiweke exihlokweni lama nga eka tluka 336]

Va swi teke swi ri lunghelo ku pfuneta eku akeni le yindlu-nkulu

[Marito lama tshahiweke exihlokweni lama nga eka tluka 339]

Va tirha tanihi ndyangu wa misava hinkwayo va nga hambanisiwi hi rixaka, muvala wa nhlonge kumbe ririmi

[Swifaniso leswi nga eka tluka 320, 321]

Ku Tirha Swin’we Eku Akeni Ka Tiholo Ta Mfumo Hi Ku Hatlisa

Mavandlha ya magidi lamantshwa ma vumbiwa lembe rin’wana ni rin’wana. Minkarhi yo tala Tiholo ta Mfumo ti akiwa hi Timbhoni hi toxe. Swifaniso leswi swi tekiwe hi nkarhi wa ku akiwa ka Holo ya Mfumo le Connecticut, U.S.A., hi 1991

Ravuntlhanu, 7:40 a.m.

Ravuntlhanu, 12 ni nhlikanhi

Mugqivela, 7:41 p.m.

Ntirho wo tala wu herile, Sonto, 6:10 p.m.

A va langutele mikateko ya Yehovha, naswona va teke nkarhi va vulavurisana hi ndzayo leyi humaka eRitweni ra yena

Hinkwavo vatirhi vo tirhandzela lava nga hakeriwiki, va tsakela ku tirha swin’we

[Swifaniso leswi nga eka tluka 327]

Tiholo Ta Mfumo eMatikweni Yo Hambana-hambana

Tindhawu ta minhlangano leti tirhisiwaka hi Timbhoni ta Yehovha hakanyingi ta languteka. Ti basile, ti hlelekile, naswona ti koka mahlo

Peru

Philippines

Furwa

Riphabliki ra Korea

Japani

Papua New Guinea

Ireland

Colombia

Norway

Lesotho

[Swifaniso leswi nga eka tluka 330]

Tiholo Ta Tinhlengeletano Ta Timbhoni Ta Yehovha

Leswaku ti kota ku khoma tinhlengeletano ta tona ta nkarhi na nkarhi, Timbhoni ta Yehovha etindhawini tin’wana ti vone swi laveka leswaku ti tiakela Tiholo ta Tinhlengeletano. Ntirho wo tala wa ku aka wu endliwa hi Timbhoni ta ndhawu ya kwalaho. Hi leti tiholo tin’wana ti nga ri tingani leti a ti tirhisiwa eku sunguleni ka va-1990

Britain

Venezuela

Italy

Jarimani

Canada

Japani

[Swifaniso leswi nga eka tluka 338]

Nongonoko Wa Ku Aka Wa Matiko Hinkwawo Wu Eneta Swilaveko Swa Xihatla

Ku kula ka xihatla ka nhlengeletano ku lave leswaku ku tshameriwa ku kurisa tihofisi, tifektri, ni makaya ya Bethele emisaveni hinkwayo

Vatirhi vo tirhandzela va matiko hinkwawo va pfuna Timbhoni ta kwalaho

Spain

Tindlela ta ku aka leti tirhisiwaka ti endla leswaku vatirhi vo tala vo tirhandzela lava nga ni ntokoto wutsongo va kota ku endla ntirho wa nkoka

Puerto Rico

Hi ntsako vatirhi va vutshila va tiyimisele ku pfuna

New Zealand

Greece

Brazil

Ku tirhisa swilo swo aka leswi tshamaka nkarhi wo leha swi pfuna leswaku mali yo swi hlayisa yi va ehansi

Britain

Ntirho wa xiyimo xa le henhla wu vangiwa hi loko lava va wu endlaka va wu tsakela hi xiviri; lexi i xikombiso xa vona xo rhandza Yehovha

Canada

Matsima lawa i minkarhi leyi tsakisaka; vunghana lebyi khomelelaka bya endliwa

Colombia

Mfungho le Japani a wu tsundzuxa vatirhi hi milawu ya vuhlayiseki, ni hi xilaveko xo kombisa mihandzu ya moya wa Xikwembu

[Xifaniso lexi nga eka tluka 318]

Muako wo sungula lowu vitaniweke Holo ya Mfumo, le Hawaii

[Swifaniso leswi nga eka tluka 319]

Tiholo ta Mfumo to tala to rhanga a ku ri miako leyi qachiweke kumbe makamara lama nga nyawuriki lama nga ehenhla ka switolo; a hi yingani miako leyi a yi akiwa hi Timbhoni

[Swifaniso leswi nga eka tluka 329]

Tiholo timbirhi ta Tinhlengeletano to sungula

Muti wa New York

Guadeloupe

[Swifaniso leswi nga eka tluka 337]

Vatirhi va nkarhinyana va ku aka lava ha ku fikaka le yindlu-nkulu ya misava le New York

Ntlawa wun’wana ni wun’wana wu tsundzuxiwa leswaku ku va munhu wa moya ni ku endla ntirho wa xiyimo xa le henhla i swa nkoka ku tlula ku tirha ntirho hi ku hatlisa

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela