Xana Bibele Yi Ri Yini Hi Nyimpi Ya Nyutliya?

Misava ya hina yi ya yi va ekhombyeni ro hlaseriwa hi nyimpi ya nyutliya hileswi mifumo ya misava yi yaka emahlweni yi engetela nhlayo ya matlhari ya yona. Sweswo swi endla leswaku vanhu va chava leswaku leswi matlhari ma yaka ma endliwa hi xitalo, ku nga tlhekeka nyimpi ya nyutliya. Va tlhela va chava leswaku ku tirhisiwa ka mpimo lowutsongo wa nyutliya ku nga endla leswaku ku va ni nyimpi ya nyutliya leyi nga onhaka misava hinkwayo. Hi yona mhaka buku leyi nge, Bulletin of the Atomic Scientists yi vulaka leswaku, “hi hanya enkarhini lowu nyimpi ya nyutliya yi nga tlhekekaka hi ku olova.”

Xana nyimpi ya nyutliya yi nga ha tlhekeka? Loko swi ri tano, xana misava ya hina yi ta pona? Naswona hi nga langutana njhani ni ku vilela hi nyimpi leyi ya nyutliya? Xana Bibele yi ri yini hi mhaka leyi?

Eka nhlokomhaka leyi

• Xana Bibele yi profete leswaku ku ta va ni nyimpi ya nyutliya?

• Xana Xikwembu xi ta yi pfumelela nyimpi ya nyutliya?

• Xana Misava yi ta pona?

• U nga langutana njhani ni ku vilela hi nyimpi ya nyutliya?

• Xana Bibele yi profete leswaku Armagedoni i nyimpi ya nyutliya?

• Xana Bibele yi ri ku ta endleka yini hi nyimpi?

• Xana buku ya Bibele ya Nhlavutelo yi vulavula hi nyimpi ya nyutliya?

Xana Bibele yi profete leswaku ku ta va ni nyimpi ya nyutliya?

Bibele a yi yi boxi hi ku kongoma nyimpi ya nyutliya. Hambiswiritano, nyimpi ya nyutliya yi nga va kona hikwalaho ka mahanyelo ya vanhu ni swiendlakalo leswi Bibele yi profeteke haswona.

Xiya tindzimana leti landzelaka ta le Bibeleni leti vulavulaka hi swiendlakalo leswi endlekaka laha misaveni namuntlha:

Tindzimana ta Bibele: Vadyondzisiwa va Yesu va n’wi vutise va ku: “Xana swilo leswi swi ta endleka rini naswona xi ta va xihi xikombiso xa ku vuya ka wena ni xa ku fika ka makumu?” Yesu u hlamule a ku: “Matiko ma ta hlaselana ni mifumo yi ta hlaselana.”—Matewu 24:3, 7.

Leswi endlekaka namuntlha emisaveni: Matiko lama nga ni matlhari ya nyutliya ni lama nga eku ma endleni, hi xitalo ma tshamela ku lwa.

“Emalembeni ya sweswinyana ku ni ku andza lokukulu ka madzolonga laha misaveni: nkwetlembetano lowu nga kona exikarhi ka matiko na wona wu ya wu andza.”—The Armed Conflict Location & Event Data Project.

Ndzimana ya Bibele: “Enkarhini wa makumu hosi ya le dzongeni yi ta susumetana ni hosi ya le n’walungwini.”—Daniyele 11:40.

Leswi endlekaka namuntlha emisaveni: Hilaha Bibele yi profeteke hakona, matiko lama phikizanaka ni lama ma ma seketelaka ma lwela ku va ni matimba. Hambileswi namuntlha mifumo ya matimba leyi nga ni tibomo ta nyutliya yi nga ti tirhiseki ku hlaselana, kambe yi ya emahlweni yi endla tibomo toleto ta matimba.

“Eka malembe ya khume lama hundzeke ku ve ni matiko yo tala lama lwisaneke naswona mimfumo ya matimba yi nghenise nhompfu eka tinyimpi toleto ku seketela matiko wolawo.”—The Uppsala Conflict Data Program.

Ndzimana ya Bibele: “Emasikwini yo hetelela ku ta fika mikarhi yo nonon’hwa leyi swi tikaka ku hanya eka yona. Hikuva vanhu va ta va . . . lava nga tiyimiselangiki ku pfumelelana ni van’wana, valumbeti, lava nga tikhomiki, lava nga ni tihanyi.”—2 Timotiya 3:1-3.

Leswi endlekaka namuntlha emisaveni: Ku fana ni leswi vanhu vo tala namuntlha va nga voniki swilo hi tihlo rin’we, hakanyingi swi tano ni hi vafumi va misava. Ematshan’wini yo lulamisa swilo hi ndlela yo rhula, va lulamisa swiphiqo swa vona hi ku xungetana kumbe hi nyimpi. Swiendlo sweswo swi nga endla leswaku ku tlhekeka nyimpi ya nyutliya. Sweswo swi endla leswaku vanhu va chava leswaku ku nga tshuka ku va ni nyimpi ya nyutliya.

“Loko va nga kumi ndlela leyinene yo tirhisana, ku nga twanani koloko ku ta ya ku nyanya swinene.”—S. Saran na J. Harman, World Economic Forum.

Xana Xikwembu xi ta yi pfumelela nyimpi ya nyutliya?

Bibele a yi swi vuli sweswo kambe ya boxa leswaku ‘swilo leswi chavisaka’ a swi ta endleka enkarhini wa hina. (Luka 21:11) Xikombiso xa swiendlakalo sweswo xi katsa tibomo ta athomo leti tirhisiweke hi nkarhi wa Nyimpi ya Vumbirhi ya Misava. Bibele ya hlamusela leswaku hikwalahokayini Xikwembu xi pfumelele tinyimpi. Leswaku u dyondza swo tala, hlalela vhidiyo leyi nge, Hikwalaho Ka Yini Xikwembu Xi Pfumelele Leswaku Ku Va Ni Ku Xaniseka?

Xana Misava yi ta pona?

Ina. Hambiloko vanhu vo tlhela va tirhisa tibomo ta nyutliya, Xikwembu a xi nge ti pfumeleli leswaku ti herisa misava hinkwayo. Bibele yi vula leswaku misava a yi nge lovisiwi naswona vanhu va ta tshama eka yona hilaha ku nga heriki.

Vanhu van’wana va ehleketa leswaku enkarhini lowu taka ku ta va ni vanhu vatsongo emisaveni, lava swi nga ta va tikela ku hanya hikwalaho ka leswi misava yi nga ta va yi hlakatiwe hi tibomo ta nyutliya. Hambiswiritano, Bibele yi vula leswaku misava yi ta tlhela yi tlhelela exiyin’weni xa yona, onge hiloko yi nga onhiwanga hi tinyimpi.

Mutumbuluxi wa hina u endle misava yi ri ni vuswikoti byo tilunghisa. Nakambe Xikwembu xi ta tirhisa matimba ya xona ku lunghisa misava naswona yi ta tshama yi ri kaya ra vanhu ro xonga.—Pisalema 37:11, 29; Nhlavutelo 21:5.

U nga langutana njhani ni ku vilela hi nyimpi ya nyutliya?

Van’wana va tshama va ri karhi va chava leswaku nyimpi ya nyutliya yi nga ha tlhekeka ku katsa ni switandzhaku leswi nga va ka kona hikwalaho ka yona. Switshembiso ni switsundzuxo swa le Bibeleni swi nga pfuna lava nga ni ku chava loku, leswaku va nga ha chavi ngopfu. Njhani?

Bibele yi vula leswaku enkarhini lowu taka misava yi ta tshama yi ri exiyin’weni lexinene naswona lava tshamaka eka yona va ta tiphina. Ku dyondza hi ntshembo lowu swi nga fana ni “nsoma wa vutomi bya hina,” lowu nga ta hi pfuna leswaku hi nga vileli ngopfu. (Vaheveru 6:19) Hi nga hunguta ku vilela ka hina hi ku languta ta namuntlha ntsena ku ri ni ku karhateka hi swilo swo biha leswi nga ha endlekaka enkarhini lowu taka. Yesu u te, “Siku rin’wana ni rin’wana ri ni swiphiqo swa rona leswi swi ri ringaneke.”—Matewu 6:34.

Hi ta va hi endla kahle loko hi sirhelela mianakanyo ya hina ni ku papalata swilo leswi nga hi twisaka ku vava. Hi nga endla tano hi ku fambela ekule ni swilo leswi nga endlaka hi vilela swo fana ni mabulo, ku kumbetela ni mavonelo lama vulavulaka hi tibomo ta nyutliya leti nga eku endliweni. Sweswo a swi vuli swona leswaku hi chava ku langutana ni ntiyiso. Ematshan’weni ya sweswo, hi endla hinkwaswo leswi hi nga swi kotaka leswaku hi papalata swilo leswi hi nga kotiki ku swi lawula naswona swi nga ta pfuka swi nga endlekanga.

Ematshan’weni yo ehleketa hi swilo leswi ku hetaka matimba, ehleketa hi swilo leswi tsakisaka evuton’wini bya wena.

Loko u ya u dyondza hi switshembiso swa Xikwembu u ta va ni ntshembo, ntsako ni ku rhula.

Xana Bibele yi profete leswaku Armagedoni i nyimpi ya nyutliya?

Van’wana va ehleketa leswaku Armagedoni i nyimpi ya misava ya nyutliya. A swi kanakanisi leswaku va ehleketa hi vuyelo byo biha lebyi nga ta vangiwa hi nyimpi yoleyo.

Hambiswiritano, Bibele yi tirhisa rito “Armagedoni” ku kombetela eka nyimpi leyi nga ta va kona exikarhi ka “tihosi ta misava hinkwayo,” kumbe mifumo ya vanhu ni Xikwembu.a (Nhlavutelo 16:14, 16) Armagedoni a yi katsi ku herisiwa ka misava ni vanhu ku fana ni ndlela leyi bomo ya nyutliya yi nga ha endlaka hakona. Ku ri na sweswo, hi nkarhi wa Armagedoni, Xikwembu xi ta lovisa ntsena lavo homboloka naswona sweswo swi ta endla leswaku ku va ni ku rhula ni nsirhelelo.—Pisalema 37:9, 10; Esaya 32:17, 18; Matewu 6:10.

Xana Bibele yi ri ku ta endleka yini hi nyimpi?

Yehovhab Xikwembu u ta tirhisa matimba yakwe leswaku a herisa tinyimpi exikarhi ka matiko ni matlhari ya wona. U ta tirhisa Mfumo wakwe wa le tilweni leswaku wu lulamisa swiphiqo hinkwaswo emisaveni.—Daniyele 2:44.

Mfumo wa Xikwembu wu ta dyondzisa vanhu ku hanyisana kahle hi ku rhula. Vanhu a va nge he dyondzi ku lwa tinyimpi hikuva ku ta va ku ri ni mfumo wun’we lowu nga ta va wu fuma misava hinkwayo naswona ku nga twanani ka matiko swi ta kuma ndzhuti swi yima. (Mikiya 4:1-3) Hikwalaho ka sweswo, “un’wana ni un’wana u ta tshama ehansi ka murhi wakwe wa madiriva ni le hansi ka nkuwa wakwe [naswona] a va nge chavisiwi hi munhu.”—Mikiya 4:4.