Xana U Navela Nsirhelelo Wa Muxaka Muni?

VANHU vo hambana-hambana va ni mianakanyo yo hambana hi nsirhelelo. Van’wana va wu languta wu ri ntshamiseko exikarhi ka mimfumo leyi kanetanaka ya matlhari. Hi xikombiso, mimfumo leyi lawulaka misava hinkwayo kun’we ni matiko lama endleke ntwanano na Yuropa ma pfumerile eka mimpimanyeto leswaku ma sivela swiendlakalo leswitsongo ku vanga nyimpi ya nyutliya ya misava hinkwayo. Stockholm International Peace Research Institute Yearbook 1990 yi hlamarisiwe hi leswi matiko man’wana ma nga yi tsakeriki mimpimanyeto yo tano “eka swiphemu swin’wana swa misava.”

Hambi swi ri tano, eka timiliyoni leti tshamaka ematikweni lama sweleke, “nsirhelelo” wu vula swakudya ni nkhathalelo wa rihanyo. “Loko swi ta eku anakanyeni hi ‘ku rhula ni nsirhelelo,’” ku hlamusela mutivi wa sayense ya politiki, Yash Tandon, “mianakanyo leyi amukeriwaka swinene ya ndhavuko lowu lawulaka wa le Vupela-dyambu ya fambe emahlweni. . . . ‘Nsirhelelo’ wu vonaka ku ri mhaka ya matlhari ni ku veka matlhari ehansi, handle ka timhaka ta nsirhelelo wa vanhu va mbirhi-xa-nharhu wa vaaki va misava lava pfumalaka swakudya ni ndhawu.”

Kambe Bibele yi tshembisa leswaku ehansi ka Mfumo wa Xikwembu a ku nge he vi na nyimpi. “O herise tinyimpi ku yisa e makuṅwini ya misav̌a, o ṭhov̌ile mav̌ura, o fayetele matlhari, o hise magolonyi e nḍilweni.” (Psalma 46:9; Esaya 2:4) Ku vabya emirini ku ta va swilo leswi hundzeke. “A ku nga ha v̌i na munhu l’a akeke [kona] l’a nga ta ku: nḍa v̌abya! Tiko le’ri akeke kona ri riv̌aleriwile ŝidyoho ŝa rona.”—Esaya 33:24.

Ehansi ka Mfumo wolowo, ku tsekatseka ka ikhonomi a ku nge he karhati munhu. “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. V̌a nga ka v̌a nga ha aki tindlu, leŝaku uṅwana a ta ṭhama kona, v̌a nga ka v̌a nga ha byari leŝaku uṅwana a ta dya.”—Esaya 65:21, 22.

Hambi swi ri tano, lexi nga xa nkoka swinene, Mfumo lowu wu ta susa xivangelo-nkulu xa ku pfumaleka ka ku rhula ni nsirhelelo. I mani loyi a vangeke matimu ya nkarhi wo leha ya munhu, ya mimfumo leyi tshikilelaka ni leyi nga humeleliki? Hambi leswi Xikwembu hi xivangelo lexi twalaka xi swi pfumeleleke leswaku swi humelela, loyi a nga ni vutihlamuleri i Sathana, tanihi leswi Bibele yi vulaka leswaku ‘misava hinkwayo yi le hansi ka matimba ya yena.’—1 Yohane 5:19.

Kutani ke, vona ntshunxeko wa kona loko ehansi ka Mfumo wa Xikwembu, marito ya Pawulo eka Varhoma eku heteleleni ma ta hetiseka: “Xikwembu lexi nyikaka ku rhula, xi ta hatla xi pfotlosela Sathana ehansi ka milenge ya n’wina”! (Varhoma 16:20) I Mfumo wa Xikwembu wa le tilweni ntsena, ehansi ka Hosi Yesu Kriste, lowu nga hetisisaka swilo swo tano. Kutani ke, hi le hansi ka Mfumo wolowo ntsena laha misava yi nga ta hundzuriwa paradeyisi.—Genesa 1:28; Luka 23:43.

Ina, nsirhelelo lowu tshembisiweke eBibeleni wu tlakukile ni ku va lowukulu swinene eka xin’wana ni xin’wana lexi tshembisiweke hi munhu. Phela, hi hlaya leswaku “rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” (Nhlavutelo 21:4) Xana hi nga swi tshemba switshembiso swo tano? Ina, hikuva swi huma eka Muvumbi wa matimba, Yehova Xikwembu, loyi nakambe a nge: “Rito ra mina, le’ri humaka e noṅwini wa mina: Ri nga ka ri nga tlheleri ka mina ri nga si tira ntšhumu, ri nga si endla ku ranḍa ka mina, ri nga si hetisa makungu ya mina.” (Esaya 55:11) Ku humelela kun’wana ku fungha magoza lawa Yehova Xikwembu a ma tekaka hambi ku ri sweswi ku tisela vanhu ku rhula ka hi laha ku nga heriki ni loku tsakisaka, nsirhelelo ni ntsako ku lwela vuhosi bya Yena hi laha ku nga heriki.