Nsirhelelo Wa Xiviri—Sweswi Ni Hilaha Ku Nga Heriki

ASWI kanakanisi leswaku Yehovha Xikwembu a nga va sirhelela vanhu vakwe. Hi “La-nga-ni-matimba-hinkwawo.” (Pisalema 68:14) Vito ra yena lero hlawuleka ri vula leswaku “U Endla Leswaku Swi Hetiseka.” Leswi swi n’wi kombisa a ri Yena ntsena evuakweni hinkwabyo loyi a kotaka ku hlula xihinga xihi na xihi leswaku a hetisisa switshembiso swa yena ni ku endla ku rhandza ka yena. Xikwembu hi xoxe xi ri: “Ŝi tano ni rito ra mina, le’ri humaka e noṅwini wa mina: Ri nga ka ri nga tlheleri ka mina ri nga si tira ntšhumu, ri nga si endla ku ranḍa ka mina, ri nga si hetisa makungu ya mina.”—Esaya 55:11.

Xikwembu xi sirhelela lava tshembelaka eka xona. Rito ra xona ra yi tiyisekisa mhaka leyi. Ehansi ka ku huhuteriwa hi Xikwembu, Hosi Solomoni wo tlhariha u tsarile: “V̌ito ra Yehova i khokholo ro tiya, l’a lulameke o tšhav̌ela ka rona.” U engeterile: “Loyi a tshembaka Yehovha u ta sirheleleka.”—Swivuriso 18:10; 29:25, NW.

Nsirhelelo Eka Malandza Ya Xikwembu

Nkarhi hinkwawo Yehovha u sirhelele lava titshegaka hi yena. Hi xikombiso, muprofeta Yeremiya u sirheleriwe hi Xikwembu. Loko mavuthu ya Babilona ma rhendzele Yerusalema la gwineheke, vanhu va boheke ku “dya v̌uŝa hi mpimo, v̌a ri kari v̌a hlunama.” (Ezekiyele 4:16) Xiyimo xi nyanye ku biha lerova vavasati van’wana va kala va sweka vana va vona va va dya. (Swirilo 2:20; 4:10) Hambileswi Yeremiya enkarhini wolowo a pfaleriwile ekhotsweni hikwalaho ka ku chumayela ka yena hi xivindzi, Yehovha u tiyisekise leswaku “a nyikiwa e siku riṅwana ni riṅwana e šimbunḍu ša v̌uŝa, ši huma e nṭenḍeleni wa v̌aŝeki, e ku fikela loko v̌uŝa byi hela e mutini.”—Yeremiya 37:21.

Loko Yerusalema ri ta va ri wele emavokweni ya Vababilona, Yeremiya a nga dlayiwanga kumbe ku yisiwa eBabilona tanihi mubohiwa. Ematshan’weni ya sweswo, “nḍuna ya v̌alanguteri [ya le Babilona], yi ṅwi nyika timbuv̌a ni tinyiko, yi ṅwi ha ndlela.”—Yeremiya 40:5.

Malembe-xidzana endzhakunyana, Yesu Kreste u tiyisekise malandza ya Xikwembu a ku: “Mi nga vileri mi ku: ‘Xana hi ta dya yini?’ kumbe: ‘Hi ta nwa yini?’ kumbe: ‘Hi ta ambala yini ke?’ Hikuva swilo sweswo hinkwaswo swi laviwa hi vamatiko; kutani Tata wa n’wina wa le tilweni wa swi tiva leswaku swilo leswi hinkwaswo ma swi pfumala. Rhangani mi tilavela Mfumo wa yena ni ku lulama ka yena, kutani sweswo hinkwaswo mi ta engeteleriwa swona.”—Matewu 6:31-33.

Xana leswi swi vula leswaku malandza ya Yehovha ma ta sirheleriwa hi Xikwembu eka makhombo hinkwawo lama nga kona namuntlha? E-e, a swi vuli swona. Vanhu lavo tshembeka a va sawutisiwanga eka makhombo. Vakreste va ntiyiso va khomiwa hi vuvabyi, va xanisiwa, va hlaseriwa hi vugevenga, va fa emakhombyeni ni ku xaniseka hi tindlela tin’wana.

Hambileswi Yehovha a nga nyikeliki nsirhelelo lowu heleleke eka makhombo, swiviko swi kombisa leswaku u nyikela matimba ya yena eka malandza ya yena ni ku ma sirhelela. Vakreste na vona va sirhelelekile eka swirhalanganya swo tala hikuva va tirhisa misinya ya milawu ya Bibele evuton’wini bya vona. (Swivuriso 22:3) Ku tlula kwalaho, va tiphina hi nsirhelelo wa vunakulobye bya rirhandzu bya vamakwerhu va moya va xinuna ni va xisati va misava hinkwayo, lava pfunanaka hi nkarhi lowu ku nga ni xilaveko ha wona. (Yohane 13:34, 35; Varhoma 8:28) Hi xikombiso, loko ti angula eka vamakwavo va tona lava weriweke hi khombo lerikulu le Rwanda leri hlaseriweke hi nyimpi, Timbhoni ta Yehovha le Yuropa hi ku hatlisa ti nyikerile ti tlhela ti rhumela 65 wa tithani ta swiambalo ni mirhi leyi durhaka R5 800 000, swakudya ni swilo swin’wana.—Ringanisa Mintirho 11:28, 29.

Hambileswi Yehovha a pfumelelaka miringo yi wela Vakreste va ntiyiso, va tiyiseka leswaku u ta va nyika matimba, mpfuno ni vutlhari leswaku va kota ku tiyisela. Loko a tsalela vapfumeri-kulobye, muapostola Pawulo u te: “A mi si humeleriwa hi miringo leyi tlulaka matimba ya munhu. Xikwembu xa tshembeka, xi nga ka xi nga pfumeri leswaku mi hlangana ni ndzingo lowu wu mi hlulaka; loko wu tshuka wu mi tela, xi ta mi nyika matimba ya ku tiyisela, mi ko mi huma eka wona.”—1 Vakorinto 10:13.

Leswi Xikwembu Xi Swi Endlelaka Vanhu Va Xona

Namuntlha, timiliyoni ta vanhu ti tsakela ku endla ku rhandza ka Xikwembu. A va sindzisiwi ku tirhela Xikwembu; va endla tano hikwalaho ka leswi va xi tivaka va tlhela va xi rhandza. Hi laha ku fanaka, hikwalaho ka leswi Yehovha a rhandzaka malandza ya yena lama tshembekaka, u ni xikongomelo xo hundzula misava yi va paradeyisi leyi vanhu lava yingisaka va nga ta va ni ku rhula eka yona, rihanyo ni nsirhelelo wa hilaha ku nga heriki.—Luka 23:43.

Xikwembu xi ta endla leswi hi ku tirhisa hulumendhe ya xona ya le tilweni, xi tirhisa Hosi ya xona leyi hlawuriweke, Yesu Kreste tanihi Mufumi wa yona. (Daniyele 7:13, 14) Bibele yi vitana hulumendhe leyi “Mfumo wa Xikwembu” yi tlhela yi wu vula “mfumo wa matilo.” (1 Vakorinto 15:50; Matewu 13:44) Mfumo wa Xikwembu wu ta siva tihulumendhe ta vanhu hinkwato. Ematshan’wini ya ku va ku ri ni tihulumendhe to tala emisaveni, ku ta va ni hulumendhe yin’we ntsena. Yi ta fuma hi ku lulama emisaveni hinkwayo.—Pisalema 72:7, 8; Daniyele 2:44.

Yehovha u rhamba hinkwavo leswaku va ta va ta hanya ehansi ka Mfumo wa kona. Ndlela yin’wana leyi a endlaka leswi ha yona i ku hangalasiwa lokukulu ka Bibele, buku leyi hlamuselaka leswi Mfumo wu nga ta va endlela swona vanhu. Bibele i buku leyi hangalasiweke swinene emisaveni, naswona sweswi ya kumeka yi helerile kumbe hi xiphemu, hi tindzimi leti tlulaka 2 000.

Yehovha Xikwembu hi rirhandzu u pfuna vanhu leswaku va twisisa leswi Bibele yi dyondzisaka swona malunghana ni Mfumo. U endla tano hi ku letela vanhu a tlhela a va rhuma leswaku va ya hlamusela Matsalwa eka van’wana. Timbhoni ta Yehovha leti tlulaka ntlhanu wa timiliyoni ti huwelela mahungu lamanene ya Mfumo wa Xikwembu sweswi ematikweni lama tlulaka 230.

Xana Nsirhelelo Lowu Wa Xiviri I Wa Hinkwavo?

Xana un’wana ni un’wana u ta amukela xirhambo xo va mufumiwa wa Mfumo wa Xikwembu hi ku hundzukela eka mimpimanyeto ya xona leyo lulama? E-e, hikuva vanhu vo tala a va swi tsakeli ku endla ku rhandza ka Xikwembu. Va alana ni tindlela to va pfuna leswaku va hundzula vutomi bya vona byi va byo antswa. Hakunene, va tikomba va fana ni lava Yesu a vulavuleke ha vona a ku: “Timbilu ta vanhu lava ti tlanyarile, va tipfale tindleve ni mahlo, leswaku va nga ha voni, ni ku twa va nga ha twi, hambi ku ri ku twisisa va nga ha twisisi, ni leswaku va nga hundzuki, na mina [Xikwembu] ndzi nga va hanyisi.”—Matewu 13:15.

Xana ku nga va ni nsirhelelo wa xiviri hi ndlela yihi emisaveni exikarhi ka lava alaka ku hanya hi ku pfumelelana ni tindlela ta Xikwembu leto lulama? A wu nge vi kona. Vanhu lava nga riki na mhaka na Xikwembu va kavanyeta nsirhelelo wa lava lavaka ku tirhela Yehovha.

Xikwembu a xi va sindzisi vanhu leswaku va cinca, kambe a xi nge byi tiyiseleli vubihi hilaha ku nga heriki. Hambileswi Yehovha hi ku lehisa mbilu a hambetaka a rhuma Timbhoni ta yena leswaku ti dyondzisa vanhu malunghana ni tindlela ta yena ni swikongomelo swa yena, a nge hambeti a endla tano nkarhi wo leha. Yesu Kreste u vhumbhile: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:14.

Xana “makumu” ma ta vula yini eka lava kanetaka mimpimanyeto ya Xikwembu? Ma ta vula ku avanyisiwa ka vona loku vavaka ni ndzoviso. Bibele yi vulavula hi ku “[rihisela] lava va nga xi tiviki, va nga lava nga yingisiki Evhangeli ya Hosi ya hina Yesu. Vanhu lava va ta avanyisiwa hi ku yisiwa eku onhakeni loku nga heriki.”—2 Vatesalonika 1:6-9.

Eku Heteleleni—Nsirhelelo Wa Xiviri Wa Hilaha Ku Nga Heriki!

Endzhaku ko lovisiwa ka lava alaka tindlela ta Yehovha ta ku rhula, Mfumo wa Xikwembu wu ta tisa nguva leyi vangamaka ya nsirhelelo leswaku lavo lulama emisaveni va vuyeriwa. (Pisalema 37:10, 11) Wa nga vona ku hambana loku misava leyintshwa yi nga ta va na kona ni leyi hi hanyaka eka yona namuntlha!—2 Petro 3:13.

Ku pfumaleka ka swakudya ni ndlala a swi nge he vi kona. Un’wana ni un’wana u ta va a ri ni swakudya swo tala. Bibele yi vula leswaku ‘vanhu hinkwavo va ta tiphina hi ndzalo ya swakudya leswinene.’ (Esaya 25:6) A ku nge he vi na ku kayivela ka swakudya, hikuva “ku ta v̌a ni nḍalo ya koro la misav̌eni ni le tihlohlorini ta tinṭhav̌a.”—Pisalema 72:16.

Vanhu a va nga ha tshami eswidladlanini ni le swidakanini. Ehansi ka Mfumo wa Xikwembu, hinkwavo va ta va ni makaya lamanene, naswona va ta dya swakudya leswi humaka emasin’wini ya vona vini. Bibele ya tshembisa: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona.”—Esaya 65:21.

Ematshan’weni ya ku andza ka ku pfumaleka ka mintirho, ku ta va ni ntirho lowu vuyerisaka naswona vanhu va ta vona mimbuyelo ya wona leyinene. Rito ra Xikwembu ri ri: “V̌ahlawuriwa v̌a mina v̌a ta ṭakela ntiro wa mav̌oko ya v̌ona. V̌a nga ha tikarateli ŝa hav̌a.”—Esaya 65:22, 23.

Ehansi ka ku fuma ka Mfumo, vanhu a va nge he xaniseki ni ku dlayiwa hi vuvabyi. Rito ra Xikwembu ra hi tiyisekisa: “A ku nga v̌i na munhu l’a akeke Yerusalem l’a nga ta ku: nḍa v̌abya!”—Esaya 33:24.

Emisaveni ya Paradeyisi leyi ku nga ri kungani yi nga ta va nchumu wa xiviri, ku xaniseka ni switlhavi, mahlomulo ni rifu, swi ta susiwa. Ina, hambi ku ri rifu! Vanhu va ta hanya hilaha ku nga heriki aParadeyisini! Bibele yi hi byela leswaku Xikwembu “xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:4.

Ehansi ka ku fuma ka Yesu Kreste, “Hosi ya ku rula,” eku heteleleni vutomi emisaveni byi ta va ni nsirhelelo wa xiviri. Hakunene, nsirhelelo wa misava hinkwayo wu ta va kona ehansi ka hulumendhe leyo lulama, leyi nga ta fuma hi rirhandzu—Mfumo wa Xikwembu.—Esaya 9:6, 7; Nhlavutelo 7:9, 17.

[Marito lama tshahiweke exihlokweni lama nga eka tluka 4]

“Nsirhelelo wa munhu wu nyikela ntshembo hi vumundzuku, . . . [ntshembo eka] ntshamiseko wa swa tipolitiki ni wa xiyimo xa ikhonomi.”—Wansati la tshamaka le Asia

[Marito lama tshahiweke exihlokweni lama nga eka tluka 5]

“Leswi ku endlaka u titwa u nga sirhelelekanga ku tlula hinkwaswo i madzolonga ni ku tluriwa ka milawu.”—Wanuna la tshamaka le Amerika Dzonga

[Marito lama tshahiweke exihlokweni lama nga eka tluka 6]

“Ndzi titwe ndzi nga hlayisekanga hi nkarhi . . . wa nhlaselo. Loko tiko ri ri enyimpini, xana vanhu va nga titwa va hlayisekile hi ndlela yihi?”—N’wana wa xikolo xa le hansi le Middle East

[Marito lama tshahiweke exihlokweni lama nga eka tluka 7]

“Ndzi ta titwa ndzi hlayisekile ntsena loko ndzo tiva leswaku ndzi nga famba exitarateni ni vusiku handle ko pfinyiwa.”—Nhwanyana la nghenaka xikolo wa le Afrika