Ntshembo Lowu Nyikeriwaka Hi Vukhongeri Bya Ntiyiso

HI NTUMBULUKO hi rhandza ku vulavula hi swilo leswi swi hi khumbaka kumbe leswi swi hi tsakisaka. Lexi hi xin’wana xa swivangelo leswi endlaka leswaku Timbhoni ta Yehovha ti tsakela ku byela van’wana rungula lerinene ra Bibele. Rungula rero, leri vulavulaka hi Mfumo wa Xikwembu, ri ni tinhlamulo ta swivutiso leswi hakunene swi khumbaka vanhu namuntlha, swo tanihi vumundzuku, nsirhelelo, rihanyo ni ntsako.—Luka 4:43.

Kambe xo sungula, Mfumo wa Xikwembu i yini?

Ntshembo Lowu Tsakisaka

Mfumo wa Xikwembu i hulumendhe ya Xikwembu ehansi ka ku fuma ka N’wana wa xona, “Hosi ya ku rula.” Malunghana na yena, Bibele yi ri: “Hi v̌elekeriwe ṅwana, hi nyikiwe ṅwana wa wanḍisanyana, v̌uhosi byi v̌ekiwile khatleni ra yena. O ta tšhyiwa . . . Hosi ya ku rula; e ku kurisa ku fuma, . . . e ku rula lo’ku nga heriki.”—Esaya 9:6, 7.

Ina, loko hi languta vumundzuku, enkarhini wa hina wa matimu lama nga ni vafumi va wona, vuprofeta byin’wana bya Bibele byi vhumbhile: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, . . . ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.”—Daniyele 2:44.

Mfumo lowu wa Xikwembu, ehansi ka ku fuma ka Kreste, Hosana ya ku Rhula, wu ta hetisisa xikhongelo lexi Yesu a xi dyondziseke valandzeri vakwe leswaku va xi khongela, lexi nge: “Tata wa hina la nge matilweni . . . , mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) Xana sweswo swi ta va swi vula yini eka misava ni le ka hina loko Mfumo wa Xikwembu wu fika? Ehleketa hi switshembiso leswi landzelaka leswi tshembisiweke hi Yehovha Xikwembu hi byakwe hilaha swi rhekhodiweke hakona eBibeleni. Swin’wana swa swona swi kombisiwile eka matluka lawa.

Rungula Leri Humaka Eka Xikwembu

Switshembiso leswinene leswi kumekaka eRitweni ra Xikwembu a swi fanelanga swi tumbetiwa, naswona leswi swi hi tlherisela emhakeni ya ku vulavula hi vukhongeri. Yesu u vhumbhe leswaku loko xiyimiso lexi xa swilo xi nga si lovisiwa, valandzeri vakwe a va ta sungula ku chumayela hi Mfumo wa Xikwembu: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14; 28:19, 20; Mintirho 1:8.

I rungula leri ri khumbaka Mfumo wa Xikwembu leri Timbhoni ta Yehovha ti ri huwelelaka emisaveni hinkwayo. Munghana wa magazini lowu, ku nga Xihondzo xo Rindza, wu kandziyisiwa hi tindzimi ta 130, naswona exifunengetweni xa tikopi leti tlulaka 22 wa timiliyoni ta magazini wun’wana ni wun’wana ku ni marito lama nge: “Xi Huwelela Mfumo wa Yehovha.”

Tanihi munhu wo tlhariha, u nga ha rhandza ku endla swiboho leswinene malunghana ni vutomi bya wena. (Swivuriso 18:13) Hikwalaho, ha ku rhamba wena leswaku u dyondza swo tala malunghana ni Mfumo wa Xikwembu lowu vangamaka ni leswi wu nga ku endlelaka swona. Leswaku u endla tano, u nga ali ku bula hi Bibele. A ri kona bulo rin’wana leri nga ni rungula ro tala, leri tsakisa ni ra nkoka.—Yohane 17:3.

[Bokisi/Swifaniso leswi nga eka tluka 8, 9]

SWITSHEMBISO SWA MISAVA LEYI NGA PARADEYISI

Ku ta va ni ku rhula loku heleleke emisaveni. “E masikwini ya yona, lo’wo lulama o ta hluka; ni ku rula ku ta anḍa, ṅhweti yi ko yi nga ha ri kona.”—Pisalema 72:7, 8.

Hambi lava feke va ta pfuxiwa. “Ku ta va ni ku pfuxiwa ka lava lulameke ni ka lava nga lulamangiki.”—Mintirho 24:15.

Vanhu va ta va ni rihanyo leri hetisekeke hilaha ku nga heriki. “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:3, 4.

Vanhu va ta aka va tlhela va tshama emakaya ya vona. “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona.”—Esaya 65:21.

Ku ta va ni ndzalo ya swakudya. “Ku ta v̌a ni nḍalo ya koro la misav̌eni ni le tihlohlorini ta tinṭhav̌a.”—Pisalema 72:16.