I Mani La Nga Ta Yisa Vanhu Eku Rhuleni?

XANA mhaka ya leswaku vanhu a va nge ku tisi ku rhula yi vula leswaku a hi nge pfuki hi vone ku rhula? Doo. Tanihi leswi Sathana, loyi a nga na matimba yo tlula ya hina, a nga xihinga lexi heleleke xa ku rhula emisaveni, kutani ku ni Un’wana la nga ni matimba yo tlula swinene ya Sathana loyi eku heteleleni a nga ta yisa vanhu eku rhuleni. Bibele, leyi hi byelaka hi Sathana, nakambe yi hi byela hi Munhu loyi. Yi ri: “V̌uhosi byi v̌ekiwile khatleni ra yena. O ta tšhyiwa Muhlamarisi, Muṭunḍuši, Šikwembu ša matimba, Tatana l’a nga riki na ku hela, [Hosana] ya ku rula.” (Esaya 9:6, 7) I mani Hosana leyi ya Ku Rhula? A ku na un’wana handle ka Yesu Kriste, naswona a nga tisa ku rhula hikuva u faneleka swinene ku tlula hina. Hi tindlela tihi?

Ku Tlula Timfanelo Ta Munhu

Hi xivangelo xin’we, Yesu a hi munhu, a nga le hansi ka rifu. I ntiyiso, u hanye tanihi munhu kutani a fa rifu ra gandzelo. Kutani endzhaku u pfuxeriwe evuton’wini bya ku nga fi bya le tilweni, naswona hi le ka xiyimo lexi laha a vaka Hosana ya ku Rhula. Hi yona mhaka leyi ha yona vuprofeta byi nge: “Vuhosi bya yena byi nga ka byi nga vi na makumu.” (Luka 1:32, 33) Ku hambana na Aśoka mufumi wa le Vuxeni, Yesu u ta hanya hi laha ku nga heriki ku tiyisekisa leswaku ntirho wa yena lowunene a wu nga herisiwi hi vadyandzhaka lava solekaka.

Ku tlula kwalaho, Yesu a nga khumbiwanga hi xidyoho. Vuhosi bya yena byi sekeriwe eka vutlhari bya Xikwembu ni minsinya ya milawu leyinene. Muprofeta Esaya u vhumbile: “Moya wa Yehova wu ta ṭhama henhla ka yena, moya wa v̌utlhari ni wa mianakanyo, moya wa nṭunḍušo ni wa matimba, moya wa ku tiv̌a ni wa šitšhav̌o ša Yehova . . . a nga ka a nga av̌anyisi hi ngohe, hambi ku ri ku av̌anyisa hi ku twa mhaka ya širi. O ta av̌anyisa šisiwana hi ku lulama.” (Esaya 11:2-4) Ku hambana ni Valungu va nguva ya le mahlweninyana, Yesu a nge tisi ku rhula ekaya ivi a ya pfuxa tinyimpi eka matiko mambe. Ehansi ka yena, ku rhula ku ta va ka misava hinkwayo.

Nakambe, Yesu u na matimba yo tisa ku rhula. Vuprofeta byi ri: “Moya wa Yehova . . . , moya wa nṭunḍušo ni wa matimba,” wu le henhla ka yena. Moya lowu hi wona wu vumbeke vuako kun’we ni mintirho hinkwayo leyinene ya matimba leyi vikiweke eBibeleni. Hambi ku ri mukaneti lonkulu, Sathana, a nga na wona matlhari lawa hi laha ku humelelaka a nga ta lwisana ni matimba ya moya wa Xikwembu ha wona.

Magoza Yo Ya Eku Rhuleni

Xana Yesu u ta va yisa njhani vanhu eku rhuleni? U nga ha hlamala ku twa leswaku ana se u sungurile. Eka buku ya vuprofeta ya Nhlavutelo, Yesu u voniwa a amukela vuhosi eka Xikwembu eMfunweni wa le tilweni. (Nhlavutelo 11:15) Loko hi kambisisa vuprofeta bya Bibele hi vukheta ni ku byi pimanisa ni swiendlo swa lembe xidzana ra hina, hi vona leswaku ku vekiwa ka Yesu tanihi Hosi ku humelele etilweni le ndzhaku hi 1914. (Matewu 24:3-42) Rero a ku ri goza lerikulu ro tisa ku rhula emisaveni.

Kambe, loko leswi swi ri tano, ha yini Nyimpi yo Sungula ya Misava yi tlhekekile hi 1914? Naswona ha yini lembe xidzana ra hina ri vone tinyimpi to biha ku tlula rin’wana na rin’wana eka matimu? Hikuva goza ro sungula ra Hosi ya le tilweni a ku ri ro hlongola Sathana hi laha ku heleleke ematilweni ni ku n’wi cukumeta exivandleni xa laha misaveni. Vuyelo? Vuprofeta byi ri: “Mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” (Nhlavutelo 12:7-12) Tinyimpi letikulu ta lembe xidzana ra hina ti fambisana ni ku kariha ka Sathana. Kambe xiya: Ku kariha ka Sathana i ka ‘nkarhinyana.’ Nkayakayo wu ta hela ku nga ri khale!

Kambe, loko wu nga si hela, Hosana ya Ku Rhula yi endla malunghiselelo man’wana ya nkoka ya ku rhula. Xo sungula, vanhu va fanele ku tiva hi xikongomelo xa Xikwembu xo tisa ku rhula ha Kriste. Hi ku fanana, Yesu u profete leswaku enkarhini wa hina “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.” (Matewu 24:14) Eku hetisekeni ka leswi, mahungu lamanene ma le ku twarisiweni namuntlha hi Timbhoni ta Yehova eka xiphemu xin’wana ni xin’wana xa Misava.

Kutani ke, vanhu va timbilu letinene va fanele ku dyondzisiwa tindlela ta ku rhula. Bibele ya tshembisa. “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.” (Esaya 54:13) Timiliyoni ta vanhu va timbilu letinene va amukele dyondzo leyi hambi ku ri sweswi.

Goza Leri Landzelaka

Sweswi nakambe ku lava ku va nkarhi wa goza rin’wana ro hetelela eka lunghiselelo ro tisa ku rhula. Hi rihi rona ke? Hi leri vo tala va ri tivaka hi vito kambe va nga vantsanana lava tivaka hi xikongomelo xa rona xa ntiyiso. Bibele yi ri vitana “ku lwa ka siku le’rikulu ra Šikwembu ša matimba hikwawo,” kumbe Armagedoni. (Nhlavutelo 16:14, 16, BX) Vo tala va anakanya hi Armagedoni tanihi nyimpi ya nyutliya leyi nga ta herisa nhluvuko. Ematshan’wini ya sweswo, i goza leri kongomeke ra Yesu, Hosana ya Ku Rhula, ku hetisisa swilo leswi nga swa nkoka eku rhuleni.

Xo sungula, Armagedoni yi ta susa swihinganyeto hinkwaswo swa vanhu swa ku rhula. Vuprofeta eka Psalma 37:10 byi ri: “Ku sele nkarhinyana, kutani lo’wo biha a nga ka a nga ha v̌i kona; u ta lav̌isisa šiv̌andla ša yena, kutani a ta v̌a a nga ha ri kona.” Ina, Yesu u ta susa “lo’wo biha”—vavangi va nyimpi, swigevenga, matherorisi, kun’we ni hinkwavo lava alaka ku amukela Hosana leyikulu ya Ku Rhula—exivandleni xa misava. A va nga ha vi ni lunghelo rin’wana ro hambeta va hanya eka planete leyi.—Nhlavutelo 19:19-21.

Xa vumbirhi, eArmagedoni vuprofeta lebyi bya Daniyele byi ta hetiseka: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, ni siku riṅwe, kutani v̌uhosi bya kona byi nga ka byi nga hunḍeli ka tiko riṅwana; ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.” (Daniel 2:44) Ku avana ka matiko loku hakanyingi ku yiseke enyimpini ku ta herisiwa. Eku heteleleni, ku ta va ni hulumendhe ya misava hinkwayo ehansi ka mufumi loyi hi nga ta n’wi tshemba!

Xana Armagedoni yi ta ta rini? Bibele a yi vuli. Kambe swiendlo swa misava eku hetisekeni ka vuprofeta swi komba leswaku yi ta ta ku nga ri khale. Bibele hi laha ku twisisekaka yi vhumba xiendlo lexi xi nga ta va xikombiso xa le kusuhi. Muapostola Pawulo u ri: “Siku vanhu va nga ta ku: ‘ku rhurile, ku hava xo karhata,’ hi wona nkarhi lowu ku onhaka ku nga ta va wela ehenhla hi xitshuketa.” (1 Vatesalonika 5:3) Kutani ke, xikan’we-kan’we endzhaku ka ndzoviso wa xihatla lowu chaputaka hi Armagedoni, xihingakanyo lexikulu xa ku rhula xi ta susiwa. ‘Nkarhi wa Sathana wo koma’ wu ta va wu herile, naswona u ta vekiwa eka xiyimo lexi a nga ta ka a nga ha karhati laha misaveni. (Nhlavutelo 20:1-3) Mawaku ntshunxeko wo tano!

Misava Leyi Nga Eku Rhuleni

Anakanya xiyimo enkarhini wolowo. Mupisalema u profetile: “V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.” (Psalma 37:11) Vanhu lava vo lulama va ta hambeta va hetisisa vuprofeta byo saseka bya Esaya: “Hi mabanga ya v̌ona v̌a ta fula ŝikomu, hi matlhari ya v̌ona v̌a ta fula masikeri; tiko ri nga ka ri nga ha lwi ni riṅwana, kutani a ku nga ha dyonḍisiwi ku lwa.”—Esaya 2:4.

Eku heteleleni, ro sungula hi mpfhuka ku va na Edeni, vanhu hinkwavo lava hanyaka va ta tsakela minkateko ya Yehova Xikwembu, naswona u ta xi hetisisa xitshembiso xa yena lexi nge: “Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:3,4.

Ntshembo Lowu Tiyeke

Kutani i mani loyi a nga ta yisa vanhu eku rhuleni? I Yesu Kriste, Hosana leyi hlawuriweke ya Ku Rhula. Xana lowu i ntshembo lowu kotekaka eka hina namuntlha? Phela, loko switshembiso swa Bibele swi nga ri ntiyiso, a ku nga vi na ntshembo wa ntiyiso wa ku rhula. Vanhu va ta hambeta va lwa ni ku dlayana hi laha ku nga heriki. Kambe Bibele ya tshembeka, naswona Mfumo wa Xikwembu ehansi ka Kriste wu ta tisa ku rhula. Hi ku khutaza ku yingisela mahungu lamanene ya Mfumo lama Timbhoni ta Yehova ti ma tisaka ekaya ra wena kutani u vona leswi hi wexe. Kutani loko nkarhi wu fika, onge u nga va exikarhi ka lavo lulama lava nga ta dya ndzhaka ya misava ni ku titsakela hi ku rhula lokukulu.

Ntshembo wa ku rhula lowu hlamuseriweke exihlokweni lexi wu huma eBibeleni. Namuntlha, laha vo tala va nga yi tshembiki Bibele, u nga ha kanakani hi loko ntshembo lowu wu ri ntiyiso. Timbhoni ta Yehova hi laha ku tiyeke ti pfumela leswaku leswi swi tano. Va amukela Bibele tanihi Rito leri huhuteriweke ra Xikwembu, naswona tanihi ntiyiso lowu heleleke. Hi 1989 va humese buku leyi nge Bibele—I Rito Ra Xikwembu Kumbe I Ra Munhu? leyi nyikaka vumbhoni byo tala bya ntiyiso lowu. Rungula rin’wana ebukwini yoleyo ra hlamuseriwa eka swihloko swimbirhi leswi landzelaka, leswi hi ku rhambelaka ku swi hlaya.

Rungula leri engetelekeke mayelana ni xitshembiso xa Bibele xa ku rhula ri ta humelela eka xihloko lexi nge “Ku Rhula Ka Misava—Ku Ta Vula Yini Hakunene?” lexi nga ta humesiwa eka nkandziyiso wa Xihondzo xo Rindza wa April 15, 1990.

[Marito lama tshahiweke exihlokweni lama nga eka tluka 8]

I Yesu ntsena la nga ni timfanelo to yisa vanhu eku rhuleni

[Marito lama tshahiweke exihlokweni lama nga eka tluka 9]

Namuntlha, mahungu lamanene ya Mfumo ya twarisiwa exiphen’wini xin’wana ni xin’wana xa misava