“Hinkwavo Lava Nge Masirheni”

XANA u nga tiyiseka leswaku vo tala lava feke va ta tlhela va hanya? Ina, hikuva Yesu u te: “Mi nga hlamaleni hi mhaka leyi, hikuva nkarhi wa ta lowu hinkwavo lava nge masirheni [xitsundzuxo] va nga ta twa rito ra yena, kutani va ta huma.” (Yohane 5:28, 29) Xiya xiga lexi nge ‘masirha ya xitsundzuxo’ lexi xiyekaka eka New World Translation. Xi hi tsundzuxa hi nkoka wa ku tsundzuka ka Xikwembu eku pfuxiweni ka vafi.

Ha yini rito leri tolovelekeke leri nge “masirha” ri nga tirhisiwanga? Hikuva Yesu a nga tirhisi byona vunyingi bya rito ra Xigriki leri nge taʹphos, leri vulaka “sirha” kumbe “ndhawu ya sirha.” Hakunene, a hi hinkwavo lava feke lava celeriweke emasirheni ya xiviri kumbe taʹphoi. Hambi swi ri tano, lava Xikwembu xi nga ta va pfuxa eku pfuxiweni ka vafi hi lava va nga emianakanyweni ya xona. Leswi swi kombisiwe hi ku tirhisa ka Yesu xivumbeko xa vunyingi xa mne·meiʹon, leri ri yelanaka swinene ni marito ya Xigriki lawa entiyisweni ma vulaka “ku tsundzuka.” (Matewu 16:9; Marka 8:18) Greek-English Lexicon hi H. G. Liddell na R. Scott yi hundzuluxela mne·meiʹon tanihi “xitsundzuxo, ku tsundzuka, rhekhodo ya munhu kumbe ya nchumu, . . . sirha, . . . hi ntolovelo, i ribye ra xitsundzuxo.”

Xisweswo, New World Translation yi endla ku hambana exikarhi ka rito taʹphos na mne·meiʹon. Nakambe swi fanele ku xiyiwa leswaku ku hundzuluxela ko tala ka Bibele hi ku fanana ku tirhisa marito mambirhi lama hambanaka eka Matewu 23:29 laha marito lawa hamambirhi ya Xigriki ma humelelaka kona. Revised Standard Version yi ma hundzuluxela hi ndlela leyi: “Mi aka masirha [xivumbeko xa taʹphos] ya vaprofeta ni ku khavisa maribye yo tsundzuka [xivumbeko xa mne·meiʹon] lavo lulama.”

Muvumbi wa munhu a nga ti rivali tindlela ta vutomi ta vanhu va magidi ya timiliyoni lava tshameke va hanya. (Psalma 139:16; 147:4; Matewu 10:30) Hi nkarhi wa yena lowu faneleke, u ta va tsundzuka lava nga ‘amasirheni ya xitsundzuxo’ ivi a va tlherisela evuton’wini emisaveni leyi basisiweke. Vona ndlela leyi hi khutaziwaka ni ku khongoteriwa ha yona hi ku tiva leswaku ku tsundzuka ka Xikwembu loku hetisekeke a ku nge tsandzeki!—Nhlavutelo 20:11-13.