Lavani Ku Rhula Ka Ntiyiso Mi Ku Landzela!
“Loyi a navelaka ku hanya vutomi lebyi tsakisaka, ni ku vona masiku lamanene, . . . a a tshike leswo homboloka a endla swo lulama; a a lave ku rhula a tiyisela endleleni ya kona.”—1 PETRO 3:10, 11.
1. Hi wahi marito lama tivekaka ngopfu ya Esaya lama ma nga ta hetiseka hakunene?
“HI MABANGA ya v̌ona v̌a ta fula ŝikomu, hi matlhari ya v̌ona v̌a ta fula masikeri; tiko ri nga ka ri nga ha lwi ni riṅwana, kutani a ku nga ha dyonḍisiwi ku lwa.” (Esaya 2:4) Hambileswi tsalwa leri leri tolovelekeke ri tsariweke hi marito lamakulu ekusuhi ni yindlu-nkulu ya misava hinkwayo ya Nhlangano wa Matiko eDorobeni-nkulu ra New York, nhlangano wolowo wa misava hinkwayo a wu kalanga wu ma hetisisa nikatsongo marito wolawo. Hambiswiritano, tanihi xiphemu xa rito ra Yehovha Xikwembu leri nga tsandzekiki, xitiviso xexo a xi nga vi xa hava.—Esaya 55:10, 11.
2. I yini leswi nga ‘ta humelela eminkarhini ya makumu,’ hi ku ya hi Esaya 2:2, 3?
2 Entiyisweni, marito lama kumekaka eka Esaya 2:4 i xiphemu xa vuprofeta lebyi tsakisaka, vuprofeta bya mayelana ni ku rhula ka ntiyiso—naswona bya karhi bya hetiseka enkarhini wa hina. Emahlweni ko tivisa hi ku langutela loku tsakisaka malunghana ni leswaku a ku nga ha vi ni tinyimpi ni matlhari ya nyimpi, vuprofeta byi ri: “E mikarini ya makumo, ku ta humelela leŝaku nṭhav̌a ya yindlu ya Israel yi ta v̌ekiwa e nhlohlorini ya tinṭhav̌a, yi tlakusiwa henhla ka ŝiṭunga, kutani matiko hikwawo ma ta talela kona. Matiko la’yo tala ma ta ta kona, ma ku: Tanani, hi ta tlhandlukela nṭhav̌eni ya Yehova, e ndlwini ya Šikwembu ša Yakob; ši ta hi dyonḍisa tindlela ta šona, kutani hi ta famba e mitileni ya šona. Hikuv̌a nawu wu ta huma e Sion, ni rito ra Yehova ri ta huma e Yerusalem.”—Esaya 2:2, 3.
Vanhu Va Nga Swi Kota Ku Va Lavo Rhula
3. Xana munhu a nga hundzuka njhani eka ku rhandza ku lwa a va la rhandzaka ku rhula?
3 Xiya leswaku loko vanhu va nga si landzela ndlela ya ku rhula, va fanele va dyondzisiwa tindlela ta Yehovha. Ku amukela dyondzo ya Yehovha hi ku titsongahata swi nga cinca ndlela leyi munhu a ehleketaka ha yona ni ndlela leyi a endlaka swilo ha yona, leswaku loyi a a rhandza ku lwa a hundzuka la rhandzaka ku rhula. Xana ku hundzuka loku ku endlisiwa ku yini? Varhoma 12:2 yi ri: “Mi nga landzi hanyelo ra nguva leyi, kambe mi pfumela ku hundzuka mi va vantshwa emiehleketweni ya n’wina, mi ta kota ku twisisa leswi ku rhandza lokunene ka Xikwembu, loku nkhensekaka ni ku hetiseka, ku nga swona.” Hi hundzula mianakanyo ya hina kumbe hi yi kongomisa etlhelweni rin’wana, hi ku yi tata hi misinya ya milawu ni milawu ya mahanyelo leyi humaka eRitweni ra Xikwembu. Ku dyondza Bibele nkarhi na nkarhi swa hi pfuna leswaku hi va ni ku cinca koloko, naswona swi hi pfuna leswaku hi vona leswi ku rhandza ka Yehovha ku nga swona, leswaku hi kota ku yi vona kahle ndlela leyi hi faneleke hi famba ha yona.—Pisalema 119:105.
4. Xana munhu u byi ambala njhani vumunhu lebyintshwa lebyi nga ni ku rhula?
4 Ntiyiso wa Bibele a wu hundzuli ndlela ya hina ya ku ehleketa ntsena, kambe wu tlhela wu hundzula swiendlo ni vumunhu bya hina. Wu hi pfuna ku endla leswi muapostola Pawulo a khutazaka swona: “Mi hluvula munhu wa khale loyi a a onhiwa hi mhaka ya ku navela ka yena loku kanganyisaka . . . miehleketo ya n’wina a [y]i hundzuke [y]i va le[y]intshwa. Ambalani munhu lontshwa la vumbiweke hi xifaniso xa Xikwembu, la tikombaka hi ku lulama ka yena ni ku hlawuleka loku nga ni ntiyiso.” (Vaefesa 4:22-24) Matimba lama lawulaka mianakanyo i nchumu wa le ndzeni. Ya hundzuriwa kutani yi va ni matimba loko rirhandzu ra hina hi Yehovha ni milawu yakwe ri ya ri kula, naswona yi hi endla vanhu va moya ni lava rhandzaka ku rhula.
5. Xana “nawu lowuntshwa” lowu Yesu a wu nyikeke vadyondzisiwa vakwe wu xi hoxa njhani xandla eka ku rhula loku va nga na kona?
5 Xilaveko xa ku hundzuka loku xi vonaka eka ndzetelo lowu Yesu a wu nyikeke vadyondzisiwa va yena eka tiawara to hetelela a ri na vona: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) Rirhandzu leri leri kotisaka ra Kreste, leri nga riki na vutianakanyi, ri hlanganisa vadyondzisiwa endhawini yin’we evun’weni lebyi hetisekeke. (Vakolosa 3:14) Hi lava hi ku swi rhandza va amukelaka “nawu [lowu] lowuntshwa” ntsena lava nga ta kuma ku rhula loku Xikwembu xi ku tshembisaka. Xana va kona vanhu lava endlaka leswi namuntlha?
6. Hikwalaho ka yini Timbhoni ta Yehovha ti ri ni ku rhula, ku hambana ni vanhu va misava?
6 Timbhoni ta Yehovha ti tikarhatela ku kombisa rirhandzu eka vumakwerhu bya tona bya misava hinkwayo. Hambileswi ti humaka ematikweni hinkwawo ya misava, a ti katseki eka madzolonga ya misava, hambiloko ti langutane ni ntshikilelo lowukulu wa tipolitiki ni wa vukhongeri. Leswi ti nga vanhu lava nga ni vun’we, ti dyondzisiwa hi Yehovha, naswona ti ni ku rhula. (Esaya 54:13) Ti hlayisa vukala-tlhelo eka madzolonga ya swa tipolitiki, naswona a ti hlanganyeli etinyimpini. Van’wana lava a va rhandza madzolonga va tshike mahanyelo wolawo. Va hundzuke Vakreste lava rhandzaka ku rhula, va tekelela xikombiso xa Kreste Yesu. Naswona va xi landzela swinene xitsundzuxo xa Petro: “Loyi a navelaka ku hanya vutomi lebyi tsakisaka, ni ku vona masiku lamanene, a a fume ririmi ra yena ri chava swo biha, ni nomo wa yena wu nga vulavuli mavunwa; a a tshike leswo homboloka a endla swo lulama; a a lave ku rhula a tiyisela endleleni ya kona.”—1 Petro 3:10, 11; Vaefesa 4:3.
Lava Landzelaka Ku Rhula
7, 8. Nyikela swikombiso swa vanhu lava tshikeke nyimpi kutani va va valavi va ku rhula ka ntiyiso. (Boxa van’wana lava u nga ha vaka u tolovelane na vona.)
7 Hi xikombiso, ku na Rami Oved, khale ka murhangeri wa ntlawa wo lwisana ni vutherorisi lowu nga ni vuswikoti. A a leteriwe ku dlaya valala vakwe. A a kholwa swinene eka vurhandza-tiko tanihi Muisrayele la rhandzaka tiko ra ka vona, ku fikela esikwini leri a xiyeke leswaku varhabi a va nga swi lavi leswaku a teka wansati loyi a a n’wi rhandza, hikwalaho ka leswi a a ri Muasia, munhu wa Matiko. U sungule ku lavisisa ntiyiso eBibeleni. Hiloko a tihlanganisa ni Timbhoni ta Yehovha. Ku dyondza ka yena Bibele ni Timbhoni swi n’wi susumetele ku xiya leswaku a a nga ha fanelanga a hisekela ku rhandza tiko ra ka vona. Rirhandzu ra Vukreste ri vula ku tshika nyimpi ni matlhari kutani u dyondza ku rhandza vanhu va rixaka rin’wana ni rin’wana. Vona ndlela leyi a hlamaleke ha yona loko a kuma papila leri kombisaka tintswalo leri marito ya rona yo sungula ma nge, “Makwerhu Rami”! I yini leswi a swi hlamarisa emhakeni yoleyo? Mutsari wa rona a a ri Mbhoni ya Mupalestina. Rami u ri: “A ndzi anakanya leswaku sweswo a hi ntiyiso, tanihi leswi vanhu va le Palestina a va ri valala va mina, kutani un’wana wa vona u ndzi vula ‘Makwerhu.’” Sweswi Rami ni nsati wakwe va landzela ku rhula ka ntiyiso hi ndlela ya Xikwembu.
8 Xikombiso xin’wana i xa Georg Reuter, loyi a a tirha eka vuthu ra nyimpi ra Jarimani leri hlaseleke Russia hi nkarhi wa Nyimpi ya Vumbirhi ya Misava. Ku nga ri kungani u nyamisiwe mbilu hi ndlela leyi Hitler a a ku hisekela swinene hayona ku lawula misava hinkwayo. Loko a tlhelele ekaya a huma enyimpini, u sungule ku dyondza Bibele ni Timbhoni ta Yehovha. U tsarile: “Eku heteleleni, ndzi sungule ku pfuleka mahlo. Ndzi swi lemukile leswaku Xikwembu a xi fanelanga xi soriwa eku halatiweni hinkwako ka ngati . . . ndzi dyondze leswaku xikongomelo xa xona a ku ri ku simeka paradeyisi emisaveni hinkwayo ni mikateko leyi nga heriki eka vanhu lava titsongahataka. . . . Hitler a a tinyungubyisa hi ‘Mfumo wa yena wa Gidi ra Malembe’ kambe u lo fuma [malembe ya] 12 ntsena—kutani ku va ni vuyelo lebyi chavisaka swinene! Ematshan’weni ya Hitler i Kreste . . . loyi a nga swi kotaka ku simeka mfumo wa gidi ra malembe ehenhla ka misava, naswona u ta endla tano.” Sweswi swi endla kwalomu ka malembe ya 50 Georg a ri karhi a tirha tanihi muyimeri wa ku rhula ka ntiyiso evutirhelini bya nkarhi hinkwawo.
9. Xana ntokoto wa Timbhoni ta Yehovha eJarimani ra Manazi wu swi kombisa njhani leswaku ti ni xivindzi, kambe ti ni ku rhula?
9 Vutshembeki ni vukala-tlhelo bya Timbhoni ta Yehovha eJarimani hi nkarhi wa mfumo wa Manazi byi hambete byi va vumbhoni bya rirhandzu ra tona hi Xikwembu ni ku rhula ni sweswi, endzhaku ka malembe yo tlula 50. Xibukwana lexi humesiweke hi United States Holocaust Memorial Museum eWashington, D.C., xi ri: “Timbhoni ta Yehovha ti tiyisele nxaniso lowukulu ehansi ka mfumo wa Manazi. . . . Xivindzi lexi vunyingi byi xi kombiseke hi ku ala [ku landzula vukhongeri bya tona], loko ti langutane ni nxaniso, ku khomiwa hi ndlela yo biha etikampeni ta nxaniso, naswona minkarhi yin’wana hambi ku ri ku dlayiwa, swi endle leswaku ti xiximiwa hi vo tala lava a va hanya enkarhini wolowo.” Kutani xa engetela: “Hi nkarhi wa ku ntshunxiwa etikampeni, Timbhoni ta Yehovha ti hambete ni ntirho wa tona, ti hlangana ni lava poneke, ti va hundzula.”
Ku Hundzuka Lokukulu
10. (a) Hi kwihi ku hundzuka lokukulu loku lavekaka leswaku ku va ni ku rhula ka ntiyiso? (b) Xana leswi swi kombisiwe njhani ebukwini ya Daniyele?
10 Xana leswi swi vula leswaku Timbhoni ta Yehovha ti kholwa leswaku ti nga swi kota ku tisa ku rhula emisaveni hinkwayo, loko vunyingi bya vanhu byo hundzukela edyondzweni ya Vukreste malunghana ni vukala-tlhelo? E-e! Hikuva leswaku ku vuyeteriwa ku rhula emisaveni, ku laveka ku cinca lokukulu. I ku hundzuka kwihi xana? Vulawuri bya vanhu byo pfumala vun’we, lebyi tshikilelaka ni lebyi nga ni madzolonga byi fanele byi suka leswaku ku lawula Mfumo wa Xikwembu, lowu Yesu a dyondziseke vadyondzisiwa vakwe leswaku va wu khongelela. (Matewu 6:9, 10) Kambe, xana sweswo swi ta endlekisa ku yini? Enorhweni lowu huhuteriweke hi Xikwembu, muprofeta Daniyele u twe leswaku emasikwini ya makumu, Mfumo wa Xikwembu, lowu fanaka ni ribye lerikulu ‘leri phemekaka ku nga ri hi mavoko ya munhu,’ wu ta faya xifaniso lexikulu lexi fanekiselaka vulawuri bya vanhu va tipolitiki ehenhla ka misava. Hiloko a ku: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, ni siku riṅwe, kutani v̌uhosi bya kona byi nga ka byi nga hunḍeli ka tiko riṅwana; ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.”—Daniyele 2:31-44.
11. Xana Yehovha u ta tirhisa yini leswaku a tisa ku hundzuka loku lavekaka ka ku rhula?
11 Hikwalaho ka yini ku hundzuka loku lokukulu ka xiyimo xa misava ku ta va kona? Hikuva Yehovha u tshembise leswaku u ta susa hinkwavo emisaveni lava yi thyakisaka ni ku yi onha. (Nhlavutelo 11:18) Ku hundzuriwa loku ku ta va kona enyimpini ya Yehovha yo lulama loko a lwa na Sathana ni misava ya yena. Eka Nhlavutelo 16:14, 16 ha hlaya: “Leyi [ku nga marito ya thyaka lama huhuteriweke] i mimoya ya mademona leyi endlaka masingita, leyi rhendzelekaka hi tihosi [ku nga valawuri va tipolitiki] ta misava hinkwayo, yi ti rhamba nyimpi, ku ya lwa ni Xikwembu xa Matimba Hinkwawo hi siku lerikulu ra kona. Kutani mimoya yi hlengeleta tihosi endhawini leyi va nge i Armagedoni hi ririmi ra Xiheveru.”
12. Xana Armagedoni yi ta va njhani?
12 Xana Armagedoni yi ta va njhani? A ku nge vi khombo ra nyutliya kumbe khombo leri vangiweke hi vanhu. E-e, i nyimpi ya Xikwembu leyi nga ta heta tinyimpi hinkwato ta vanhu, ni ku herisa hinkwavo lava hlohlotelaka tinyimpi to tano. I nyimpi ya Xikwembu leyi nga ta tisa ku rhula ka ntiyiso eka lava lavaka ku rhula. Ina, Armagedoni ya ta hilaha Yehovha a vuleke hakona. A yi nga hlweri. Muprofeta wakwe Habakuku u huhuteriwe ku tsala a ku: “Hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.” (Habakuku 2:3) Hikwalaho ka langutelo ra hina ra vumunhu, yi nga ha vonaka onge ya hlwela, kambe Yehovha u hlayisa xiyimiso xa yena. Armagedoni yi ta fika hi nkarhi lowu Yehovha a wu vekeke ka ha ri emahlweni.
13. Xikwembu xi ta endlisa ku yini hi muhomboloki lonkulu, Sathana Diyavulosi?
13 Goza leri leri tiyeke ri ta pfula ndlela ya ku rhula ka ntiyiso! Kambe leswaku ku rhula ka ntiyiso loku tiyeke ku va kona, ku fanele ku endliwa nchumu wun’wana—ku nga ku susa loyi a vangaka ku avana, rivengo ni ku lwa. Kutani hi swona leswi vuprofeta bya Bibele byi vulaka leswaku swi ta humelela endzhaku—ku nga ku pfaleriwa ka Sathana ekheleni, khale ka muhlohloteri wa nyimpi ni tata wa mavunwa. Muapostola Yohane u vone xiendlakalo lexi exivonweni, hilaha xi tsariweke hakona eka Nhlavutelo 20:1-3: “Ndzi vona ntsumi leyi xikaka hi le tilweni, yi tamele xilotlelo xa khele lero enta ku ya ni ku ya, yi tamele ni nketani leyikulu. Kutani yi khoma dragona, nyoka leya khale (hileswaku Diyavulosi, kumbe Sathana), yi n’wi boha nkarhi wo ringana malembe ya 1000. Yi n’wi hoxa ekheleni, yi pfala, yi n’wi lemela ndzeni leswaku a nga ha yi emahlweni [ni] ku xisa vanhu va matiko, ku fikela loko malembe ya 1000 ma ta va ma hundzile.”
14. Xana xiendlo xa Yehovha xa ku hlula Sathana xi nga hlamuseriwa njhani?
14 Mhaka leyi a hi norho; i xitshembiso xa Xikwembu—naswona Bibele yi ri: ‘A swi endleki leswaku Xikwembu xi hemba.’ (Vaheveru 6:18) Xisweswo Yehovha u swi kotile ku vula leswi hi muprofeta wa yena Yeremiya: “Hi mina Yehova nḍi endlaka musa, ni fanelo, ni le’ši lulameke e misav̌eni; hikuv̌a nḍi ṭakisiwa hi ŝona, ku v̌ula Yehova.” (Yeremiya 9:24) Yehovha u endla swilo hi ku lulama na hi vunene, naswona u tsakisiwa hi ku rhula loku a nga ta ku tisa emisaveni.
Vulawuri Bya Hosana Ya Ku Rhula
15, 16. (a) I mani loyi a hlawuriweke hi Yehovha leswaku a fuma tanihi Hosi? (b) Xana vulawuri byebyo byi hlamuseriwa hi ndlela yihi, naswona i vamani lava nga ta hlanganyela eka byona?
15 Leswaku a tiyisekisa leswaku ku rhula ka ntiyiso ku va kona eka hinkwavo lava hanyaka ehansi ka lunghiselelo ra Mfumo wakwe, Yehovha u nyike vulawuri eka Hosana ya ku Rhula ka ntiyiso, Yesu Kreste, hilaha swi vhumbhiweke hakona eka Esaya 9:6, 7: “Hikuv̌a hi v̌elekeriwe ṅwana, hi nyikiwe ṅwana wa wanḍisanyana, v̌uhosi byi v̌ekiwile khatleni ra yena. O ta tšhyiwa Muhlamarisi, Muṭunḍuši, Šikwembu ša matimba, Tatana l’a nga riki na ku hela, Hosi ya ku rula; e ku kurisa ku fuma, . . . ka yena e ku rula lo’ku nga heriki . . . Ku hiseka ka Yehova wa tinyimpi ku ta endla ŝeŝo!” Mupisalema na yena u tsarile malunghana ni vulawuri bya Mesiya byo rhula, hi ndlela yo profeta a ku: “E masikwini ya yona, lo’wo lulama o ta hluka; ni ku rula ku ta anḍa, ṅhweti yi ko yi nga ha ri kona.”—Pisalema 72:7.
16 Ku engetela kwalaho, vamakwavo va Kreste va 144 000 lava totiweke hi moya va ta fuma na yena ematilweni. Lava i vadyandzhaka-kulobye va Kreste lava Pawulo a tsaleke ha vona a ku: “Xikwembu lexi nyikaka ku rhula, xi ta hatla xi pfotlosela Sathana ehansi ka milenge ya n’wina. Tintswalo ta Hosi ya hina Yesu, a ti ve na n’wina!” (Varhoma 16:20) Ina, lava va ta hlanganyela eku hluleni ka Kreste va ri ematilweni, loko a hlula muhlohloteri wa nyimpi, ku nga Sathana Diyavulosi!
17. Xana hi fanele hi endla yini leswaku hi ta kuma ku rhula ka ntiyiso?
17 Kutani xivutiso lexi tlakukaka sweswi hi lexi nge, Xana u fanele u endla yini leswaku u ta kuma ku rhula ka ntiyiso? Ku rhula ka ntiyiso ku ta ta hi ndlela ya Xikwembu ntsena, naswona leswaku u ta ku kuma u fanele u teka magoza lama faneleke. U fanele u amukela Hosana ya ku Rhula kutani u hundzukela eka yona. Leswi swi vula leswaku u fanele u amukela Kreste exiphen’wini lexi a nga na xona xo va Mukutsuri ni Muponisi wa vanhu lava dyoheke. Yesu hi yexe u vule marito lawa lama tolovelekeke: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Xana wa swi rhandza ku kombisa ripfumelo eka Kreste Yesu tanihi Muyimeri wa Xikwembu loyi a nga ta tisa ku rhula ka ntiyiso ni ku ponisiwa? Ku hava vito rin’wana ehansi ka tilo leri nga swi kotaka ku tisa ku rhula ni ku ku tiyisa. (Vafilipiya 2:8-11) Hikwalaho ka yini? Hikuva Yesu i Muhlawuriwa wa Xikwembu. I murhumiwa lonkulu wa ku rhula eka hinkwavo lava tshameke va va kona emisaveni. Xana u ta n’wi yingisa Yesu ni ku landzela xikombiso xa yena?
18. Xana hi fanele hi endla yini ku angula eka marito ya Yesu lama tsariweke eka Yohane 17:3?
18 Yesu u te: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” (Yohane 17:3) Sweswi i nkarhi wo va kona nkarhi na nkarhi eminhlanganweni ya Timbhoni ta Yehovha eHolweni ya Mfumo. Minhlangano leyi leyi dyondzisaka yi ta ku susumetela ku avelana vutivi swin’we ni ntshembo wa wena ni van’wana. Na wena u nga va muyimeri wa ku rhula ka Xikwembu. U nga va ni ku rhula sweswi hi ku tshembela eka Yehovha Xikwembu, hilaha swi boxiweke hakona eka Esaya 26:3, hi ku ya hi New International Version: “U ta n’wi endla a va ni ku rhula loku hetisekeke yena loyi mianakanyo ya yena yi nga tsekatsekiki, hikuva u tshembela eka wena.” Xana u fanele u tshembela eka mani? “Ṭhembani Yehova hi mikari ni mikari, hikuv̌a Yehova, Yehova i ribye ra malembe ya madzanadzana.”—Esaya 26:4.
19, 20. I yini leswi yimeleke lava namuntlha va lavaka ku rhula ni ku ku landzela?
19 Teka goza sweswi leswaku u kuma vutomi lebyi nga heriki emisaveni leyintshwa ya Xikwembu ya ku rhula. Eka Nhlavutelo 21:3, 4, Rito ra Xikwembu ra hi tiyisekisa: “Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” Xana byebyo a hi byona vumundzuku lebyi nga ni ku rhula lebyi u byi navelaka?
20 Kutani tsundzuka leswi Xikwembu xi swi tshembiseke. “V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona. Šiya l’a tengeke, u languta l’a lulameke; hikuv̌a munhu wa ku rula o ni v̌atukulu.” (Pisalema 37:11, 37) Loko siku rero ri fika, onge hi nga vula hi ku tinyungubyisa hi ku, “Ku rhula ka ntiyiso eku heteleleni! Hi nkhensa Yehovha Xikwembu, xihlovo xa ku rhula ka ntiyiso!”
Xana U Nga Hlamusela?
◻ I yini leswi nga pfunaka munhu leswaku a hundzula mianakanyo ni swiendlo swakwe?
◻ Xana Timbhoni ta Yehovha, ha un’we-un’we niloko ti hlangene, ti ku kombise njhani ku rhandza ka tona ku rhula ka ntiyiso?
◻ Xana Yehovha u ta endla yini hi hinkwavo lava hlohlotelaka rivengo ni nyimpi?
◻ Xana vulawuri bya Hosana ya ku Rhula byi ta va endlela yini vanhu?
[Swifaniso leswi nga eka tluka 14]
Marito ya Esaya a ma hetisisiwi hi Nhlangano wa Matiko, kambe hi lava angulaka eka dyondzo ya Yehovha
[Swifaniso leswi nga eka tluka 15]
Vavanuna lavambirhi va hundzukile leswaku va ta landzela ku rhula
Rami Oved
Georg Reuter
[Xifaniso lexi nga eka tluka 16]
Ku ta va ni ku rhula ka ntiyiso ehansi ka vulawuri bya Hosana ya ku Rhula