Ndlela Leyi U Nga Tokotaka Ku Rhula Ka Xikwembu Hi Xitalo Ha Yona

“Mawako! loko ngi u yingisa milawu ya mina! Ku rula ka wena ku ta v̌a tani hi nambu, ku lulama ka wena ku ta fana ni magandlati ya lwandle.”—ESAYA 48:18.

1. I yini leswi lavekaka loko hi ta tokota ku rhula hi xitalo hi laha hi faneleke ha kona?

LAVA va hlanganyelaka nkarhi na nkarhi eka dyondzo ya bandlha ya Bibele hi mpfuno wa magazini lowu va xiya nkoka wa ku rhula loku Xikwembu xi ku nyikaka, naswona va lava ku rhula koloko. Handle ko kanakana vo tala va ku tsakela. Kambe a hi hinkwavo lava ku tokotaka hi laha ku teleke hi laha va faneleke ha kona. Ha yini swi ri tano? Mayelana ni lava va nga ta va ni ku rhula ka Xikwembu, Yehova u ri: “Hi mina Yehova, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona. Mawako! loko ngi u yingisa milawu ya mina! Ku rula ka wena ku ta v̌a tani hi nambu, ku lulama ka wena ku ta fana ni magandlati ya lwandle.”—Esaya 48:17, 18.

2. (a) I yini leswi vuriwaka hi xiga lexi nge “ku yingisisa”? (b) Hi fanele ku yingisisa milawu yingani ya Xikwembu? (1 Yohane 5:3)

² Entiyisweni, un’wana ni un’wana a nga pfuneka hi ku va kona eminhlanganweni laha hi kanelaka Bibele kona. Kambe hi lava yingisisaka milawu ya Yehova ntsena, va yi tirhisa hi munhu hi xiyexe naswona va pfumelelana na yona, lava va tsakelaka ku rhula ka Xikwembu hi xiviri. Xana ku na swivandla leswi u faneleke ku endla leswi hi xitalo eka swona ke? (2 Petro 1:2) A swi anelanga eka hina ku yingisa swilaveko swi nga ri swingani swa Xikwembu kambe endzhaku hi balekela leswi hi kumaka onge swa tika kumbe ku nonon’hwa ngopfu. Loko Diyavulosi a ringete ku phasa Yesu Kriste hi ndlela ya yena yo ehleketa ya vutianakanyi, Yesu u hlamule hi ku tiya a ku: “Ku tsariwile va te: ‘Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon’wini wa Xikwembu.’”—Matewu 4:4.

3. I timhaka tihi ta vutomi bya hina leti faneleke ku pfumelelana ni tindlela ta Yehova loko hakunene hi ta va ni ku rhula lokukulu?

³ Milawu ya Xikwembu yi khumba timhaka hinkwato ta vutomi bya hina. Xo sungula, yi katsa vuxaka bya hina na Yehova. Kutani swi khumba langutelo ra hina eka nhlengeletano ya yena leyi vonekaka ni vutirheli bya Vukriste, ndlela leyi hi khomaka swirho swa ndyangu ha yona ni ku tirhisana ka hina ni vanhu va misava. Lava va yingisaka swinene milawu ya Xikwembu eka timhaka leti hinkwato hi lava va katekisiwaka hi ku rhula lokukulu. A hi xiyeni swilo swi nga ri swingani leswi nga hi pfunaka ku tokota swoleswo hi munhu hi xiyexe.

Xana Yin’wana Ya Timhaka Leti Yi Lava Mianakanyo Ya Wena?

4. (a) Ha yini ku va ni dyondzo ya Bibele ya le kaya kumbe ku ya eHolweni ya Mfumo swi nga tiyisi leswaku hi le ku rhuleni ni Xikwembu? (b) I yini lexi katsekaka eka ku kombisa ripfumelo eka Yesu Kriste? (Yohane 3:36)

⁴ Xana wa ha ku sungula ku dyondza Bibele na Timbhoni ta Yehova sweswinyana? Kumbexana a wu hlanganyela ni bandlha ra kwalaho hi tin’hweti to hlayanyana kumbe hambi ku ri lembe ke? Loko swi ri tano, handle ko kanakana u kume ntsako wa ku pfulekeriwa hi vutivi bya swikongomelo swa Xikwembu. Kambe ntiyiso wa leswaku munhu u tsakela dyondzo ya Bibele ya le kaya kumbe u kuma ntsako hi ku ya eHolweni ya Mfumo a wu kombisi leswaku u ni ku rhula ni Xikwembu. Hinkwerhu hi velekeriwe exidyohweni, naswona ku rhula ni Xikwembu swa koteka eka hina ha Yesu Kriste ntsena. (Esaya 53:5; Mintirho 10:36) Ku tshemba loku nga nyawuriki eka Yesu a ku ku tisi ku rhula koloko. Swa laveka ku tlangela xilaveko xa hina xa nkutsulo hi munhu hi xiyexe, ku kombisa ripfumelo eka nkoka wa gandzelo ra Yesu, ivi kutani u nyika vumbhoni bya ripfumelo rolero hi ku yingisa milawu ya yena. (Yakobo 2:26) Wun’wana wa milawu leyi Yesu a yi nyikeke loko a ha ri laha misaveni a wu ri wa leswaku lava va vaka vadyondzisiwa va yena va fanele ku khuvuriwa ematini. (Matewu 28:19, 20) Xana u khuvuriwile leswaku u kombisa ku tinyiketela ka wena eka Yehova ha Yesu Kriste?

5. Ha yini ku tinyiketela ni nkhuvulo swi ri swa nkoka leswaku hi va ni ku rhula ni Xikwembu?

⁵ Xana ku na swin’wana evuton’wini bya wena leswi ku endlaka leswaku u nga fanelekeli ku khuvuriwa? Loko u swi tiva leswaku swi kona, kumbe loko hi nkarhi wa ku dyondza ka wena u tiva leswaku sweswo swi tano, u nga nonoki ku lunghisa timhaka. Xiya leswaku langutelo rin’wana ni rin’wana kumbe mahanyelo lawa ya nga endlaka leswaku munhu a nga fanelekeli nkhuvulo nakambe i xihinga eka ku va ka yena ni ku rhula ni Xikwembu. Endla hi ku hatlisa loko ka ha ri na nkarhi. Hi laha swi kombisiweke ha kona eka 1 Petro 3:21, lava va nyikiwaka ripfalo lerinene hi Yehova Xikwembu va sungula hi ku tinyiketela eka yena exisekelweni xa ripfumelo eka gandzelo ra Kriste, va khuvuriwa leswaku va kombisa ku tinyiketela koloko, kutani va endla ku rhandza ka Xikwembu. Kutani ku rhula loku fambisanaka ni ripfalo lerinene hikwalaho ka ku va ni xiyimo lexi amukelekaka emahlweni ka Xikwembu swi va swa vona; a swi koteki hi ndlela yin’wana. Kavula, i masungulo ntsena.

6. Hikwalaho ka yini langutelo ra hina eka minhlangano ya bandlha ri ri ra nkoka leswaku hi tsakela ku rhula?

⁶ Ku ya emahlweni, khathalela ku va kona ka wena eminhlanganweni ya bandlha nkarhi na nkarhi ni ku hlanganyela ka wena eka yona hi laha u kotaka ha kona. Xana minhlangano leyi yi na ndhawu evuton’wini bya wena lerova a wu pfumeleli ku kavanyetiwa hi misava kumbe mintirho yin’wana ya munhu hi xiyexe? Xana u lunghiselela minhlangano naswona u swi teka ri ri lunghelo ku hlanganyela? Nakambe swilo leswi, swi na ntikelo lowu heleleke eka ku tsakela ka munhu ka ku rhula. Ha yini? Hikuva moya wa Xikwembu wu ni vanhu va xona lava hlengeletaneke, naswona ku rhula i muhandzu wa moya wolowo. (Vagalatiya 5:22) Hi le ka minhlangano leyi laha hi pfuniwaka ku twisisa swilaveko swa Yehova, naswona ha swi lava leswi leswaku hi endla leswi tsakisaka emahlweni ya yena. Nakambe laha, hi dyondza ndlela leyi hi nga kurisaka ku rhula ha yona eka vuxaka bya hina ni vanhu-kulorhi—ebandlheni, ekaya, exikolweni ni le ntirhweni wa hina wo tihanyisa. Minhlangano ya hina hi yin’wana ya tindlela-nkulu leti hi dyondzisiwaka hi Yehova ha tona, naswona hi laha Matsalwa ya kombaka ha kona, hi lava va dyondzisiwaka hi Yehova lava va tsakelaka ku rhula lokukulu.—Esaya 54:13.

7. I ku landzelela kwihi ka swilo leswi kaneriweke eminhlanganweni ya hina loku lavekaka?

⁷ Yinhla leyi yelanaka ngopfu leyi faneleke ku khathaleriwa i ku tirhisiwa loku yaka emahlweni evuton’wini bya hina bya munhu hi xiyexe ka leswi hi swi dyondzaka. A hi swi lavi ku fana ni Vaisrayele lavaya Yehova a nga te ‘ku yingisa va ta yingisa kambe va nga swi twisisi.’ (Esaya 6:9) Ku tlula kwalaho, xana hi lava ku fana ni lava Yehova a va hlamuselaka eka Ezekiyele—vanhu lava a va ta yingisa muprofeta wa Yehova kambe va nga endli leswi a swi vuleke hikuva va hlawule ku hetisisa ku navela ka vona loku nga basangiki kumbe ka swilo leswi vonekaka? (Ezekiel 33:31, 32) Hi laha ku hambaneke, lava a va ta hlengeletana endlwini ya Yehova esikwini ra hina ni lava a va ta kuma ku amukeleka eka yena va hlamuseriwa tanihi lava va nge: “A hi yeni, hi tlhandlukela e nṭhav̌eni ya Yehova, e ndlwini ya Šikwembu ša Yakob, a ta hi dyonḍisa tindlela ta yena, kutani hi famba hi tindlela ta yena.” (Mikea 4:2) Loko hakunene hi nghenisa swiletelo leswi hi swi amukelaka eminhlanganweni ya hina embilwini, loko eka nhlangano wun’wana ni wun’wana hi hlawula yinhla yin’we leyi hi yi lavaka hi munhu hi xiyexe ivi hi tirhela ehenhla ka yona, hi ta tshovela mihandzu ya ku rhula. Hi laha Yesu a vuleke ha kona eka Luka 11:28: “Ngopfu ku katekile lava yingisaka Rito ra Xikwembu, va vuya va ri hlayisa!”

8. Ku hlanganyela evutirhelini bya nsimu hi mpimo lowukulu lowu pfumeleriwaka hi swiyimo swa hina ku nga hi pfunisa ku yini ha un’we-un’we?

⁸ Xin’wana xa swilo leswi kandziyisiwaka eminhlanganweni ya hina i nkoka wa ku hlanganyela eku huweleleni ka Mfumo wa Xikwembu hi laha ku teleke ni ku pfuna van’wana ku va vadyondzisiwa. (Matewu 24:14; 28:19) Xana mintirho leyi yi kurise ku yini evuton’wini bya wena? Loko hakunene hi yingise leswi Yehova a swi vulaka eka hina hi ku tirhisa Rito ra yena ni ku tirhisa nhlengeletano ya yena, ha swi tiva leswaku lowu i ntirho wa nkoka ngopfu lowu endliwaka emisaveni namuntlha. (Nhlavutelo 14:6, 7) Naswona i mhaka leyi tivekaka swinene leswaku lava va nga eka ntirho wa nkarhi hinkwawo—kun’we ni lava, hambi loko va nga swi koti ku va maphayona, va chivirikaka hakunene evutirhelini—hi vona exikarhi ka hina lava va tsakeke ngopfu. Ku rhula loku va ku tsakelaka a ku fani ni thonsi ra mati ntsena, kambe hi laha Yehova a vuleke ha kona, ku va “tani hi nambu.” (Esaya 48:18) Xana sweswo hi leswi u swi tokotaka? Hinkwerhu ka hina hi nga swi kota.

9. I yini lexi nga hi pfunaka ku hlayisa ku rhula loku hi ku nyikiweke hi Xikwembu hambi loko hi tokota swihinga leswikulu?

⁹ Hambi swi ri tano, ku yingisa ka hina switsundzuxo leswi hinkwaswo, a swi hi endli leswaku hi sawuta eka mintshikilelo ya vutomi emafambiselweni ya sweswi ya swilo. Kambe ku nga khathariseki ndlela leyi swiyimo swi nga ha tikaka ha yona, Xikwembu xi hi tiyisekisa hi mpfuno wa xona wa rirhandzu loko hi ta hundzulukela eka xona. (1 Petro 5:6, 7) Xana hi dyondzile ku lava mpfuno ni nkongomiso wa Yehova eka hinkwaswo leswi hi swi endlaka, hi hundzulukela eka yena hi xikhongelo hi ku ntshunxeka naswona, endzhaku ka loko hi endle leswi hi nga swi endlaka ehenhleni ka swiyimo swo nonon’hwa, hi lahlela mindzhwalo ya hina eka Yehova, hi yi siya eka yena hi ku tiyiseka? (Swivuriso 3:5, 6; Psalma 55:22) Hi khutaziwa swinene eka Vafilipiya 4:6, 7: “Mi nga vileli ha nchumu; kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.” Mawaku lunghiselelo leri hlamarisaka leri sweswo swi nga rona! Xana u dyondzile ku pfuneka hi xitalo eka ku rhula ka Xikwembu loku xisweswo ku endliweke ku koteka ke?

Hambeta U Lava Ku Rhula

10. Endzhaku ka ku lava ku rhula, i yini leswi lavekaka eka hina?

¹⁰ Loko se hi ri na ku rhula ko tano, hi nge swi koti ku va na futa ehenhleni ka kona. Matshalatshala lamakulu ya laveka leswaku hi ku hlayisa. Xisweswo 1 Petro 3:10, 11 yi ri: “Loyi a navelaka ku hanya vutomi lebyi tsakisaka, ni ku vona masiku lamanene, . . . a a lave ku rhula a tiyisela endleleni ya kona.” Loko a lave pakani naswona a yi fikelerile, munhu u ta va xiphukuphuku loko a khoma pakani yoleyo hi vusopfa. Endzhaku ka ku lava ni ku kuma ku rhula, hi fanele ku tirindza eka swilo leswi nga ku onhaka. Ku hlula sweswo, hi fanele ku lava swilo leswiya swi kurisaka ku rhula hi ku gingiriteka.

11. (a) I langutelo rihi leri nga vekaka vuxaka bya hina na Yehova ekhombyeni? (b) Hi rini laha hi faneleke hi kombela mpfuno wa Yehova hi xiviri malunghana ni miringo? (Matewu 6:13)

¹¹ Loko hi fikelele ku rhula ni Xikwembu hi ku tirhisa tindlela leti xi ti lunghiseleleke, hi fanele ku tivonela leswaku hi nga onhi vuxaka byolebyo hi ku tlhelela eku endleni ka xidyoho. Kavula, leswi hinkwerhu ka hina hi nga hetisekangiki, hinkwerhu ka hina ha dyoha. Kambe ku ni khombo loko munhu a yimelela malangutelo ni swiendlo leswi nga eka yena leswi Xikwembu xi swi solaka. Hi nge swi koti ku khindlata makatla ya hina hi ku olova ivi hi ku, “Yoleyo i ndlela leyi ndzi nga yona.” (Varhoma 6:16, 17) Hi fanele ku hundzuka eku endleni ka leswo biha ematshan’wini yo ku tsetselela, naswona endzhaku hi fanele ku kombela Xikwembu leswaku xi hi rivalela exisekelweni xa ripfumelo ra hina eka gandzelo ra Yesu. Nakambe hi fanele ku dyondza ku hundzulukela eka Xikwembu hi kombela mpfuno hi nga si endla xihoxo, ematshan’wini yo ringeta ku lwa nyimpi hi ri hexe, eku heteleleni hi tshiketa, ivi kutani hi kombela ku rivaleriwa. Hi mpfuno wa Xikwembu, hi nga humelela eku ambaleni ka “munhu lontshwa la vumbiweke hi xifaniso xa Xikwembu, la vonakaka hi ku lulama ka yena loko hlawuleka loku nga ni ntiyiso.”—Vaefesa 4:20-24.

12. (a) Leswaku u tsakela ku rhula, i vuxaka byihi byin’wana lebyi lavaka ku khathaleriwa? (b) I yini lexi lavekaka eka hina malunghana ni leswi?

¹² Kavula, ku tsakela ku rhula, nakambe ku katsa swinakulobye ni vanhu van’wana. Vakriste va ntiyiso va tirhela Xikwembu tanihi xiphemu xa nhlengeletano; i “nhlengeletano ya vamakwerhu.” (1 Petro 2:17) Tanihi leswi Yesu a vuleke leswaku a swi ta va ntiyiso hi valandzeri va yena, va xiyeka erirhandzwini ra vona ra ku rhandzana. (Yohane 13:35) Kambe ku hava ni un’we wa vona la hetisekeke. Hikwalaho ka ku nga hetiseki ka hina hi hexe ni lokuya ka van’wana, hi nga ha fanela ku khongela swinene ehenhleni ka swiyimo swin’wana ivi hi tirha hi matimba leswaku hi lulamisa swiphiqo. Vaheveru 12:14 ya hi khutaza: “Ringetani hi matimba ku hanya hi ku rhula ni vanhu hinkwavo.” Naswona evuxakeni bya hina ni vamakwerhu va xinuna ni va xisati va Vukriste, ku na ndzhwalo wo hlawuleka wa ku tiyisela eku landzeleleni ka ku rhula. Hi ku kongoma, 1 Vatesalonika 5:13 yi ri: “Hanyani swin’we hi ku rhula.” Sweswo a swi vuli ku tshika ku rihisela ntsena kambe ku va vaseketeri lava chivirikaka va ku rhula, hi teka goza ro sungula ku tlherisela ku rhula ni ku rhandza ku amukela mhaka ya ku rhula.—Vaefesa 4:1-3.

13. (a) Eka ku kurisa ku rhula ni lava nga pfumeriki, hi nga ha endla yini, kambe xana hi swi kombisisa ku yini leswaku ku rhula ni Xikwembu swi ta eku sunguleni? (b) Xana swi koteka njhani eka hina ku va ni ku rhula loko ku ri na dzolonga ekusuhi ka hina?

¹³ Hambi swi ri tano, ehandle ka bandlha, a hi hinkwavo lava lavaka ku rhula. Kutani, hi xiviri, Varhoma 12:18 ya tsundzuxa: “Endlani hinkwaswo leswi mi nga swi endlaka, hi tlhelo ra n’wina, ku hanyisana ni vanhu hinkwavo hi ku rhula.” Kambe matshalatshala ya hina ya ku kurisa ku rhula a ya katsi ku landzula mayelana ni swilaveko swo lulama swa Yehova. Hi nga ha lulamisa minkarhi yo endla swilo swin’wana, kambe ha swi tiva leswaku a swi nga ta va vutlhari ku tshika ku va kona eminhlanganweni ya bandlha kumbe ku tshika ku hlanganyela evutirhelini bya nsimu leswaku hi hlayisa ku rhula ni vanghana va vukati kumbe maxaka. Naswona ha swi tiva leswaku Yehova a nge pfumeleli ku hlanganyela ka hina eka swiendlo leswo biha ni vanghana va le ntirhweni kumbe vanghana va le xikolweni leswaku hi va ni ku amukeleka eka vona. Hi xiya leswaku ku rhula ka xiviri i ka lava va sungulaka hi ku tsakela ku rhula ni Xikwembu ntsena, eka lava va rhandzaka nawu wa Yehova naswona va famba etindleleni ta yena. I ku rhula koloko loku hi ku vekaka ehenhla ka hinkwaswo. (Psalma 119:165) I ntiyiso, ekusuhi na hina ku nga ha va na dzolonga. Lava nga pfumeriki va nga ha endla njhekanjhekisano ni ku lwa; va nga ha tlhandleka ni vubihi ehenhla ka hina hikwalaho ka ripfumelo ra hina. Kambe ha yi tiva ndlela leyi Rito ra Xikwembu ri hi dyondziseke ku hanya ha yona. Hi ku hambeta hi lava ndlela leyi pfumelelanaka ni tindlela to lulama ta Yehova, a hi ku tekeriwi ku rhula loku nga ka nkoka ngopfu.—Ringanisa Psalma 46:1, 2.

14. Hambi leswi hi tokotaka nhlomulo wa munhu hi xiyexe, i yini lexi endlaka leswaku swi koteka eka hina ku hambeta hi hlayisa ku rhula ka le ndzeni ni ku languteka loku vangamaka?

¹⁴ Evusikwini byo hetelela lebyi landzeriweke hi rifu ra yena, Yesu u byele vaapostola va yena lava tshembekaka a ku: “Ndzi mi byerile swilo leswi leswaku mi va ni ku rhula eka mina. La misaveni, mi ta va ni nhlomulo, kambe tiyani timbilu, ndzi hlurile misava.” (Yohane 16:33) Ina, ha wu tokota nhlomulo. Tanihi Vakriste, hi hlangavetana ni nxaniso wa tinxaka to hambana-hambana. Hi nga ha tokota tihanyi, naswona hi nga xanisiwa hi vuvabyi lebyikulu. Kambe ku rhula ka Xikwembu ka hi tiyisa eka hinkwaswo leswi. Hikuva hi dyondzisiwile hi Yehova, ha swi tiva leswaku hikwalaho ka yini Vakriste va xanisiwa. A hi kanakani leswaku ha yini ku ri na tihanyi ni leswaku hikwalaho ka yini hi xaniseka hi vuvabyi. Naswona ha swi tiva leswaku vumundzuku byi khome yini. Ha swi tiva leswaku hikwalaho ka ndlela ya vutomi bya Yesu yo tshembeka ni rifu rakwe ra gandzelo, nkutsulo i wa xiviri. Tlhandla-kambirhi, ha swi tiva leswaku ku nga khathariseki swiphiqo leswi hi hlangavetanaka na swona sweswi, hi nga hundzulukela eka Xikwembu hi xikhongelo hi ku tiyiseka ka leswaku xa hi khathalela hi rirhandzu naswona xi ta hi tiyisa hi ku tirhisa moya wa xona.—Varhoma 8:38, 39.

15. I ntiyiso hi ndlela yihi leswaku ku rhula loku Kriste a endlaka leswaku ku va kona a ku fani ni loku misava yi ku nyikaka?

¹⁵ Kahle-kahle, eka Yohane 14:27 Yesu u te: “Ndzi mi siyela ku rhula, ndzi mi nyika ku rhula ka mina. A ndzi mi nyiki hi laha misava yi nyikaka ha kona. Timbilu ta n’wina ti nga karhateki, ti nga khomiwi hi ku chava.” Hakunene i ntiyiso—misava yi hava leswi fanaka ni ku rhula loku Xikwembu xi ku nyikaka hi ku tirhisa Yesu Kriste. Ku hi endla leswaku hi tiya emahlweni ka swiyimo leswi nga endlaka van’wana va tshika ku tshemba hinkwako.

16. (a) I langutelo rihi leri nga emahlweni ka lava sweswi hakunene va tsakelaka ku rhula loku Xikwembu xi ku nyikaka? (b) Xana hi nga kombisisa ku yini leswaku hi lava ku rhula koloko?

¹⁶ Mawaku vumundzuku lebyi hlamarisaka lebyi nga emahlweni ka hinkwavo lava va kombisaka ku rhula loku humaka eka Xikwembu ni lava va ku nyikaka xivandla xo sungula lexi ku xi fanelaka evuton’wini bya vona! Hi ku hatlisa misava leyi vengaka Xikwembu yi ta va yi nga ha ri kona. Hi nkarhi lowu faneleke swivumbiwa hinkwaswo swi ta va swi hlanganisiwile hi xitalo eku rhuleni hi swilaveko swo lulama swa Mufumi wa Misava Hinkwayo. Onge ku tlangela ka hina ka langutelo leri rinene ku nga hi susumetela ku tirha hi ku twanana loku heleleke na kona sweswi. Onge hinkwerhu ka hina hi nga yingisela swiletelo swa Yehova hi vukheta ivi hi endla leswaku milawu ya yena yi dzima timitsu etimbilwini ta hina hi laha ku tiyeke leswaku hi rhandza tindlela ta yena hi xiviri kutani hi endla leswi a swi lavaka. Hi laha Swivuriso 3:1, 2 yi vulaka ha kona yi ri: “Ṅwananga, u nga riv̌ali nawu wa mina, mbilu ya wena a yi hlayise ku lerisa ka mina; hikuv̌a ŝi ta engetela masiku ya wena, ni malembe ya ku hanya ka wena, ni ku rula ka wena.”

Swivutiso Swo Pfuxeta

◻ Hi ku ya hi Esaya 48:18, i yini leswi lavekaka loko hi ta va ni ku rhula lokukulu?

◻ I ku endla swilo swihi laha hi nga tokotaka ku rhula ka Xikwembu hi laha ku teleke?

◻ I yini leswi languteriwaka eka hina malunghana ni ku hlayisa ku rhula ni vamakwerhu va xinuna ni va xisati?

◻ Xana hi nga hlayisa ku rhula hambi loko hi rhendzeriwe hi lava nga pfumeriki hi ndlela yihi?

[Xifaniso lexi nga eka tluka 16]

Nkhuvulo

[Swifaniso leswi nga eka tluka 17]

Ku va kona eminhlanganweni nkarhi na nkarhi

Ku tirhisa leswi hi swi dyondzaka

[Swifaniso leswi nga eka tluka 18]

Ku hlanganyela evutirhelini bya nsimu hi xitalo

Ku lahlela mindzhwalo ya hina eka Yehova