Ku Rhula Ka Xikwembu Eka Lava Dyondzisiwaka Hi Yehova
“V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.”—ESAYA 54:13.
1, 2. Ku tsakela ku rhula swi titshege hi yini xana?
KU RHULA! Ku naveleka swonghasi! Kambe rhekhodo ya vanhu a yi nga vulavuli hi nchumu loko ku nga ri ku rhula. Ha yini leswi swi ri tano?
2 Ntsako wa ku rhula wu fambisana swinene ni xichavo xa mufumi. Kutani i mani mufumi la tlakukeke emisaveni hinkwayo? Muvumbi, Yehova Xikwembu. Vuxaka lebyinene na yena hikwalaho i bya nkoka emhakeni ya ku rhula. (Psalma 29:11; 119:165) Loko vuxaka byebyo bya risima ngopfu byi tsemekile, a swi koteki ku va ni ku rhula ka ntiyiso ni Xikwembu, ni nakulorhi wa munhu, kumbe yena hi yexe.—Esaya 57:21.
Hi Laha Misava Yi Pfumalaka Ku Rhula Ha Kona
3. Vuxaka bya vanhu ni Xikwembu byi onhiwe hi ndlela yihi?
3 Tanihi leswi hi swi tivaka swinene, a ku ri endzhaku ka ku sungula ka matimu ya vanhu laha n’wana wa moya wa Xikwembu a xandzukeleke Yehova. Ku xandzuka i xiyimo xa nyimpi. Mutshovi yoloye wa ku rhula, loyi a tivekeke tanihi Sathana Diyavulosi, u susumete Evha leswaku nawu wa Xikwembu wu nga n’wi siveli ku endla xanchumu loko a vona leswaku swi ta n’wi pfuna. Diyavulosi u soholote timhaka ku n’wi vangela ku anakanya leswaku a a tsoniwa nchumu wun’wana lowunene hi ku yingisa Xikwembu. Mhaka a yi ri ya vutianakanyi, langutelo ra ku mina-ku-sungula. Hi ku anghwetla nuna wakwe u hlanganyele na yena eka mahanyelo yakwe lama nga riki enawini, kutani hikwalaho ka sweswo, vana va vona hinkwavo va tluleriwile hi moya wolowo.—Genesa 3:1-6, 23, 24; Varhoma 5:12.
4, 5. (a) Sathana u humelele ku fikela kwihi eku kuceteleni ka mianakanyo ya vanhu? (b) I vuyelo byihi lebyi leswi swi veke na byona eka matshalatshala ya vanhu yo kuma ku rhula?
4 A hi xiphemu xintsongo ntsena xa vanhu lexi tshikaka nawu wa Xikwembu. Matsalwa ya hi byela leswaku Sathana u ‘kanganyisa misava hinkwayo.’ (Nhlavutelo 12:9) Vanhu van’wana a va na nawu hi laha ku heleleke, va komba ku honisa loku heleleke ka Xikwembu ni ka munhu-kulobye; van’wana swa antswanyana. Kambe hi laha ku humelelaka Sathana a a ri karhi a kucetela mianakanyo ya vanhu ku kala muapostola Yohane a ku: “Misava hinkwayo yi le hansi ka matimba ya Lowo biha.” (1 Yohane 5:19) Hambi vanhu va ku va pfumela leswaku Diyavulosi u kona kumbe a nga kona, va endla leswi a swi lavaka. Va n’wi yingisa, kutani i mufumi wa vona. Hikwalaho ka sweswo, vanhu va tihambanise ni Xikwembu, i valala eka xona. Eka ndhawu yo tano, xana ku ni ku kanakana leswi matshalatshala ya vanhu yo fikelela ku rhula ya beke ehansi?—Vakolosa 1:21.
5 Hambi swi ri tano, nhlayo leyi kulaka ya vanhu va matiko hinkwawo yi tokota ku rhula ka Xikwembu, ku rhula loku sunguriweke hi Xikwembu. Xana leswi swi endleke hi ndlela yihi?
Ku Rhula Loku Anerisaka Loku Xikwembu Xi Ku Nyikaka
6. (a) I ku kandziyisa kwihi loku Bibele yi ku vekaka ehenhleni ka ku rhula? (b) I mani loyi ha yena swi kotekaka leswaku hi tsakela ku rhula loku Xikwembu xi ku nyikelaka?
6 Eka Varhoma 15:33 Yehova u hlamuseriwa kahle tanihi “Xikwembu lexi nyikaka ku rhula.” Ku sukela eku sunguleni, a ku ri xikongomelo xa Xikwembu leswaku swivumbiwa swa xona hinkwaswo swi tsakela ku rhula. Hi makhamba lama tlulaka 300 Rito ra xona leri huhuteriweke, Bibele, ri vulavula hi ku rhula. Ri swi veka erivaleni leswaku Yesu Kriste i “Hosi ya ku Rula.” (Esaya 9:6, 7) Hi yena loyi a vekiweke hi Xikwembu leswaku a tshova mintirho ya mutshovi-nkulu yoloye wa ku rhula, Sathana Diyavulosi. (1 Yohane 3:8) Naswona hi ku tirhisa “Hosana ya ku Rhula” swa koteka eka un’wana ni un’wana wa hina ku tsakela ku rhula loku anerisaka loku nyikiwaka hi Xikwembu.
7. (a) Xana ku rhula loku nyikeriweke hi Xikwembu ku katsa yini? (b) Ha yini ku nga ri nchumu lowu hi faneleke ku wu rindzela ku kondza mafambiselo ya khale ma nga ha ri kona ni ku va hi hetelele hi ku kuma ku hetiseka?
7 Mawaku ku rhula loku hlamarisaka swonghasi! Swi tlula ku pfumaleka ka nyimpi. Rito ra Xiheveru sha·lohmʹ, leri hakanyingi ri hundzuluxeriweke va ku “ku rhula,” ri vula rihanyo, ntshamiseko ni vuhlayiseki. Ku rhula ka Xikwembu loku nga rifuwo ra Vakriste va ntiyiso ku hlawulekile hikuva a ku titshegi hi mbango wa vona. Leswi a swi vuli leswaku mimbango leyi nga tsakisiki a yi va khumbi. Kambe va ni matimba lama sukaka endzeni lama endlaka leswaku va kota ku papalata ku engetela eka nkitsinkitsi hi ku tirihisela loko wu va khumba. (Varhoma 12:17, 18) Hambi loko munhu a nga ha vabya emirini kumbe a ri na rifuwo lerintsongo, a nga ha va ni rihanyo ni ku tshamiseka etlhelweni ra moya kutani xisweswo a tsakela ku rhula loku nyikiwaka hi Xikwembu. Kahle-kahle, ku rhula loku vanhu vo tano va ku tokotaka ku ta engeteriwa loko misava leyi ya vutianakanyi yi nga ha ri kona, naswona ku ta enta loko vanhu hinkwavo va fikelele ku hetiseka. Kambe ku rhula ka Xikwembu loku nga kona sweswi i xiyimo lexi rhuleke xa mianakanyo ni mbilu, xiyimo xa le ndzeni xa ku rhula ku nga khathariseki leswi swi nga ha humelelaka ehandle. (Psalma 4:8) Ku huma eka vuxaka lebyinene ni Xikwembu. Mawaku rifuwo leri nga hava ku ringanisiwa!
Vana Lava Dyondzisiwaka Hi Yehova
8. I vamani vo sungula ku tsakela ku rhula loku ni Xikwembu ha Yesu Kriste?
8 I mani a nga ni ku rhula ko tano hi leswi a dyondzisiwaka hi Yehova ni ku yingisa milawu ya yena? Loko yi hlamula, Bibele yi sungula hi ku kongomisa nyingiso wa hina eka lava va endlaka Israyele wa moya. Ku vulavuriwe hi vona eka Vagalatiya 6:16, laha hi hlayaka: “Ku rhula ni ku tsetseleriwa a swi ve ehenhla ka hinkwavo lava fambaka hi nawu lowu, ni ka vana hinkwavo va Xikwembu.” Lava i 144 000 lava va hlawuriweke hi Xikwembu ku hlanganyela vutomi bya le tilweni na Yesu Kriste.—Nhlavutelo 14:1.
9. A ku ri yini ‘nawu wa mahanyelo’ lowu fambisanaka ni ku tiphina ka Israyele wa moya hi ku rhula?
9 Endzhaku eka lembe xidzana ro sungula, lava va Israyele wa moya a va dyondza xisekelo xa ntiyiso, ‘nawu wa mahanyelo,’ lowu hi ku kongoma a wu hlanganisiwe ni ntsako wa vona wa ku rhula. A swi ri swa risima leswaku va khoma nawu lowu wa mahanyelo. Hi malembe xidzana yo tlula 15, Yehova u tirhisile Nawu wa Muxe ku humesa mindzhuti ya swilo leswinene leswi nga ta ta. Kambe endzhaku ka rifu ra gandzelo ra Yesu Kriste, swilaveko swa nawu wa Muxe a swi nga ha bohi. (Vaheveru 10:1; Varhoma 6:14) Leswi swi kombisiwile hi xiboho xa huvo leyi fumaka ya Vukriste eYerusalema emhakeni ya ku yimba. (Mintirho 15:5, 28, 29) Swi kandziyisiwile swinene nakambe eka papila leri huhuteriweke ro ya eka Vagalatiya. Swilo leswinene leswi Nawu wa Muxe wu swi yimeleke swi endlekile. Hi ku lehisa mbilu Yehova a a nghenisa nkoka wa tintswalo ta Yena leti kombisiweke ha Kriste emianakanyweni na le timbilwini ta valandzeri lava totiweke va Kriste. Hi ku pfumela eka lunghiselelo leri, hi ku hanya hi ku twanana na rona, a va ta tsakela ku rhula ka muxaka lowu nga si tshamaka wu va kona eka vanhu lava nga ni xidyoho.—Vagalatiya 3:24, 25; 6:16, 18.
10. (a) Israyele wa moya a a tokota ku hetiseka ka xitshembiso xihi lexi rhekhodiweke eka Esaya 54:13? (b) Ku laya ka Yehova eka vona a ku ri mpfuno eku tokoteni ka vona ka ku rhula hi ndlela yihi?
10 Lava va Israyele wa moya a va tokota ku hetiseka ka xitshembiso lexinene lexi rhekhodiweke eka Esaya 54:13. Kwalaho Xikwembu hi xoxe xi te eka nhlengeletano ya xona leyi fanaka ni wansati ya swivumbiwa leswi tshembekaka swa moya: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.” Kavula, N’wana lonkulu wa yena i Yesu Kriste hi byakwe, la humeleleke tanihi Mesiya loko a totiwa hi moya lowo kwetsima hi 29 C.E. Kambe “wansati” wa Yehova wa le tilweni a a ri ni vana vo tala—van’wana va 144 000 lava va veke xiphemu xa vumbirhi xa rixaka leri vhumbiweke eka Genesa 3:15. Yehova u tshembise leswaku a a ta va Muleteri Lonkulu wa vana lava hinkwavo. U va dyondzisile ntiyiso hi ta yena hi yexe ni swikongomelo swakwe. U va byerile hi laha va nga n’wi tirhelaka ha kona. Minkarhi yin’wana, a a fanele ku va laya. Leswi a swi fanela loko va hlulekile ku hlayisa Rito ra yena. Swi nga ha nonon’hwa ku amukela ndzayo. Kambe hi ku titsongahata va amukele ku yi lava ka vona ivi va endla mindzhundzuluko leyi lavekaka, kutani ku laya koloko ku humese mimbuyelo leyinene—“mihandzu ya ku rhula ya vutomi lebyo lulama.”—Vaheveru 12:7, 11; Psalma 85:8.
“Ntshungu Lowukulu” Wu Leteriwa Tindlela Ta Xikwembu
11. (a) I vamani nakambe lava dyondzisiwaka hi Yehova esikwini ra hina? (b) Va kombisisa ku yini leswaku va fanelekela nhlamuselo leyi kumekaka eka Esaya 2:2, 3, naswona ku va ni vuyelo byihi eka van’wana?
11 Esikwini ra hina, Israyele wa moya a hi ntlawa lowu Yehova a wu dyondzisaka ntsena. Hi hafu leyi hundzeke ya lembe xidzana, nakambe nyingiso wu kongomisiwe eka van’wana. Esaya a a huhuteriwe ku tsala hi ta vona eka ndzima 2, tindzimana 2 na 3: “E mikarini ya makumu, ku ta humelela leŝaku nṭhav̌a ya yindlu ya [Yehova] yi ta v̌ekiwa e nhlohlorini ya tinṭhav̌a, yi tlakusiwa henhla ka ŝiṭunga, kutani matiko hikwawo ma ta talela kona.” Ina, lava va amukelaka vugandzeri bya Xikwembu xin’we xa ntiyiso va xi nyika ndhawu leyi tlakukeke swinene evuton’wini bya vona. Xisweswo yi va leyi tlakuseriweke ehenhla ka muxaka wun’wana ni wun’wana wa vugandzeri lebyi a va byi tirhisa ni lebyi misava leyi va rhendzeleke yi hambetaka yi byi tirhisa. Vanhu va matiko hinkwawo va xiye leswi. Va vone leswaku, ku nga khathariseki leswi laviwaka hi mimfumo ya misava kumbe ku hangalaka ka swiendlo leswi nga riki swa Vukriste emisaveni, lava va gandzelaka Yehova va yisa vuxaka bya vona na yena ehenhla ka hinkwaswo. Vaxiyi nakambe va vonile muhandzu lowu leswi swi wu humesaka evuton’wini bya vagandzeri vo tano, naswona vo tala va lava ku hlanganyela eka vugandzeri bya ntiyiso. Kutani vanhu va timiliyoni tinharhu ni ku tlula sweswi va ri eka van’wana: “Tanani, hi ta tlhandlukela ndlwini ya Yehova, e ndlwini ya Šikwembu ša Yakob; ši ta hi dyonḍisa tindlela ta šona, kutani hi ta famba e mitileni ya šona.”—Nakambe vona Zakaria 8:23.
12. Lava va vuriweke eka Esaya 2:2, 3 va vuyeriwe hi ndlela yihi hi ku va ni Xikwembu tanihi Mudyondzisi wa vona, naswona i xiphemu xihi lexi xiyekaka xa dyondzo leyi a va nyikaka yona?
12 Anakanya leswi swoleswo swi vulaka swona—ku va na Xikwembu tanihi Mudyondzisi wa vona! Lava va amukelaka xiletelo xo tano ni ku tlangela xihlovo xa yona hi ntiyiso a va kavanyetiwi hi madzolonga ya mianakanyo ya nkarhi na nkarhi. A va tikumi va ri exikarhi ka mianakanyo mimbirhi kumbe eku kanakaneni ehenhleni ka leswi swi nga swinene. Ntiyiso lowu humaka eRitweni ra Xikwembu wu le rivaleni. Kutani xana Esaya 2:4 yi komba yini leswi ku nga ta va xiphemu lexi xiyekaka xa dyondzo leyi va yi kumaka? Yi katsa ndlela yo tsakela ku rhula eka misava ya mpfilumpfilu. Xisweswo, ku nga khathariseki leswi van’wana va hlawulaka ku swi endla, lava va dyondzisiweke hi Yehova va va vo sungula eku fuleni ka mabanga ya vona swi va swikomu ni mafumu ya vona ya va tihwevo. A va ha dyondzi nyimpi.
13. “Ntshungu lowukulu” wu huma eka mahanyelo wahi, kambe i yini lexi va endleke muxaka wa vanhu lava va nga vona?
13 I ntlawa wolowu lowu hlamuseriweke eka Nhlavutelo 7:9, 10, 14 tanihi vaponi lava ngheneke eka misava leyintshwa ya ku rhula ya Xikwembu leyi landzelaka ku ta ka ‘ku xaniseka lokukulu.’ “Ntshungu lowukulu” lowu ponaka wu huma hi le matikweni hinkwawo, ni le tinxakeni hinkwato, ni swivongo hinkwaswo ni tindzimi hinkwato. Vo tala va vona a va ri eka mintlawa leyi lwisanaka. Van’wana hi ku olova va hlongorise ndlela ya vutomi leyi kahle-kahle a yi ri ya vutianakanyi; kambe, swoleswo na swona swi kavanyetane ni ntsako wa ku rhula. Kambe sweswi lava va humaka hi le matikweni hinkwawo i vanhu lava rhandzaka ku rhula, lava hlohlotelaka ku rhula. Kutani i yini lexi xi va endliseke sweswo? Va dyondzisiwile hi Yehova.—Esaya 11:9.
Muxaka Lowu Hlawulekeke Wa Ku Rhula
14. Ku rhula ka vanhu va Yehova ku sekeriwe eka yini, naswona leswi swi tano hi ndlela yihi?
14 Ku rhula loku Yehova a ku nyikaka vanhu va yena hakunene ku hlawulekile. A hi muxaka wa nchumu lowu humelelaka loko ntwanano lowu tsekatsekaka wu endliwile exikarhi ka mintlawa mimbirhi leyi nga tshembaniki. A wu katsi ku landzula. Wu sekeriwe eka leswinene. (Esaya 32:17) Kambe sweswo ku nga va ntiyiso hi ndlela yihi hi ku rhula loku katsaka vanhu lava nga hetisekangiki? Tanihi vadyohi, i ku lulama kwihi loku un’wana ni un’wana wa hina a nga na kona? Hi ripfumelo hi nga tsakela ku lulama loku vangiweke hi nxavo wa gandzelo leri susaka swidyoho ra Yesu.
15. Enkarhini wa vutirheli bya Yesu bya laha misaveni, xana Yehova a a va dyondzisa yini vana vakwe lava tshembekaka lexi a ku ri xa nkoka ehenhleni ka ku rhula?
15 Leswi swi hi pfuna ku tlangela leswi Yesu a swi vuleke tanihi laha swi rhekhodiweke ha kona eka Yohane 6:45-47. Kwalaho a a vulavula ni Vayuda lava a va nga n’wi teki tanihi Mesiya naswona hikwalaho a va n’wi dzuma-dzumela. Kambe a a vulavula hi vadyondzisiwa vakwe loko a ku: “Ku tsariwile etibukwini ta vaprofeta [hi xiviri, eka Esaya 54:13], ‘Hinkwavo va ta dyondzisiwa hi Xikwembu.’ Un’wana ni un’wana la tweke Tatana ni ku dyondza eka yena, wa ta eka mina. A hi leswaku ku ni munhu loyi a tshamaka a vona Tatana, loko a nga ri loyi a humaka eka Xikwembu; hi yena la voneke Tatana. Ndzi tiyisisile ndzi ri ka n’wina, loyi a pfumelaka, u ni vutomi lebyi nga heriki.” Vadyondzisiwa volavo va amukele dyondzo leyi Yehova a a va nyika yona. A va kokeriwe eka Yesu. Loko van’wana va ale swilo leswi a swi dyondziseke ivi va tshika Yesu, vaapostola va yena va tshamile. Hi laha Petro a vuleke ha kona: “Kutani hina hi ni ku pfumela, ni ku swi tiva leswaku hi wena Muhlawuleki wa Xikwembu.” (Yohane 6:69) Hikwalaho ka ripfumelo ra vona eka Yesu Kriste, a va ta swi kota ku ta eka vuxaka bya ku rhula na Yehova Xikwembu, vuxaka lebyi nga ni ntshembo wa vutomi lebyi nga heriki.
16. (a) Ku sukela hi Pentekosta ya 33 C.E., valandzeri va Yesu va vuyeriwe hi ndlela yihi hi lunghiselelo leri endliweke ha Kriste? (b) Endzhaku, a ku laveka yini eka vona?
16 Ku sukela hi Pentekosta ya 33 C.E., mimpfuno ya gandzelo ra Kriste yi sungule ku tirha eka valandzeri volavo lava tshembekaka va Yesu. Leswi Pawulo endzhaku a swi tsaleke eka Varhoma 5:1 swi ve ntiyiso eka vona: “Leswi hi nga endliwa lava lulameke hi mhaka ya ku pfumela, hi ni ku rhula ni Xikwembu, hi Hosi ya hina Yesu Kriste.” Hi ku velekiwa hinkwavo lava a ku ri vana va Adamu. Tanihi vadyohi, va tihambanisile na Xikwembu. Ku hava mintirho leyinene leyi vona hi voxe ingi va yi endlile leyi ngi yi suse ndzhaka ya vona ya xidyoho. Kambe hikwalaho ka tintswalo ta Yena, Yehova u amukele gandzelo ra vutomi bya munhu la hetisekeke bya Yesu ematshan’wini ya vatukulu va Adamu. Eka lava va pfumelaka eka lunghiselelo leri, swi ve leswi kotekaka sweswi ku va va nyikiwa ku lulama ni leswaku va amukeriwa hi Xikwembu tanihi vana lava languteleke vutomi bya le tilweni. (Vaefesa 1:5-7) Kambe a ku laveka swo tala eka vona ke? Ina, a va fanele ku famba hi tindlela ta Yehova. A va nga ha fanelanga ku endla vudyoho. Kambe va swi xiyile leswaku ku lulama kwihi na kwihi loku va nga na kona i vuyelo bya tintswalo ta Xikwembu leti kombisiweke ha Kriste. Hi laha tsalwa ri vulaka ha kona, va ‘tsakela ku rhula ni Xikwembu ha Yesu Kriste.’
17, 18. (a) Xana “tinyimpfu tin’wana” ta ku tsakela ku rhula ko tano ni Xikwembu? (b) I swivutiso swihi swin’wana swi lavaka ku xiyiwa?
17 Ku vuriwa yini hi lava Yesu a vulavuleke hi vona tanihi “tinyimpfu tin’wana” ta yena? (Yohane 10:16) Xana va tsakela ku rhula ko tano ni Xikwembu? Hayi tanihi vana va Xikwembu, kambe Vakolosa 1:19, 20 yi va katsa tanihi vaamukeri va ku rhula ka Xikwembu. Yi vula leswaku Xikwembu xi vone swi lulamile ha Kriste “ku endla leswaku, ha yena, swilo hinkwaswo swi vuyelelana na xona, hikuva hi yena [Yesu] la tiseke ku rhula hi ku fa ka yena [emhandzeni ya nxaniso]; hinkwaswo, hambi la misaveni [hi leswaku, lava va nga ta nyikiwa vutomi lebyi nga heriki eparadeyisini emisaveni], hambi le matilweni.” Lava va nga ni ku langutela ka la misaveni va vuriwe lava lulameke kutani va tsakela ku rhula ni Xikwembu hambi sweswi, hayi tanihi vana, kambe tanihi ‘vanakulobye va Xikwembu,’ tanihi Abrahama. Mawaku xiyimo lexi kombisiweke tintswalo!—Yakobo 2:23.
18 Xana wena hi wexe u tsakela ku rhula koloko? U ku tokota hi vutalo tanihi loko ku ri kona eka vanhu lava hanyaka enkarhini lowu wa nkoka evurungurwini? Eka xihloko lexi landzelaka hi ta xiya swin’wana swa swilo leswi swi nga pfunaka ku endla leswaku swi olova.
Swivutiso Swa Mpfuxeto
◻ Hikwalaho ka yini misava yi nga ri na ku rhula?
◻ I ku rhula kwihi loku Xikwembu xi ku nyikaka sweswi?
◻ I vamani lava va nga tsakelaka ku rhula ko tano?
◻ Ku lulama i mhaka ya nkoka eku rhuleni loku hi ndlela yihi?
[Xifaniso lexi nga eka tluka 14]
“Un’wana ni un’wana la tweke Tatana ni ku dyondza eka yena, wa ta eka mina”