Vutomi eParadeyisini Leyi Kondleteriweke

LOKO Yesu a byela vadyondzisiwa vakwe leswaku vanhu lava feke va ta pfuxiwa eku feni, a a tiyiseka leswaku swi ta va tano. U te: ‘Eku tumbuluxiweni hi vuntshwa’ mi “ta dya ndzhaka ya vutomi lebyi nga heriki.” Xana Yesu a a vula yini loko a ku ‘eku tumbuluxiweni hi vuntshwa’?—Matewu 19:25-29.

Loko Luka mutsari wa Bibele a vulavula hi mhaka leyi fanaka, u tshahe marito ya Yesu loko a ku, “emafambiselweni lama taka ya swilo,” vadyondzisiwa vakwe a va ta kuma “vutomi lebyi nga heriki.” (Luka 18:28-30) Ha yini Bibele yi ma tirhisa hi ndlela leyi fanaka marito lama nge “emafambiselweni lama taka ya swilo” ni lama nge ‘eku tumbuluxiweni hi vuntshwa’?

A ku ri vumbhoni lebyi kandziyisaka leswaku Yehovha Xikwembu u ta tiyiseka leswaku xikongomelo xa yena xo sungula xa leswaku vanhu va hanya hilaha ku nga heriki emisaveni leyi nga paradeyisi xi ta hetiseka. Vanhu va ta va lava hetisekeke hilaha Adamu na Evha a va ha ri hakona loko va nga si dyoha. Kutani “emafambiselweni lama taka ya swilo” ku ta va ni ‘ku tumbuluxiwa hi vuntshwa’ ka swiyimo swa Paradeyisi leyi a yi ri kona entangeni wa Edeni.

Ndlela Leyi Paradeyisi Yi Nga Ta Kondleteriwa Ha Yona

Loko Yesu a ha ri emisaveni u dyondzise valandzeri vakwe leswaku va khongelela xitirho lexi Xikwembu xi nga ta xi tirhisa ku tlhela xi endla misava hinkwayo yi va paradeyisi. Yesu u te hi fanele hi khongela hi ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Xikwembu xi veke N’wana wa xona leswaku a va Mufumi wa Mfumo lowu nga ta hetisisa xikongomelo xa Xikwembu leswaku misava hinkwayo yi va Paradeyisi.

Loko Bibele yi vulavula hi Loyi Xikwembu xi nga n’wi veka leswaku a ta va Mufumi yi ri: “Hi velekeriwe n’wana, hi nyikiwe n’wana wa jaha; naswona ku fuma ka vuhosana ku ta va ekatleni ra yena. Kutani vito ra yena u ta thyiwa . . . Hosana ya Ku Rhula. Ku tala ka ku fuma ka vuhosana ni ku rhula a swi nge vi na makumu.” (Esaya 9:6, 7) Kambe, xana hulumendhe leyi, leyi nga ta va yi ri ehansi ka “ku fuma ka vuhosana” yi ta endla yini ku tiyisekisa leswaku ku rhandza ka Xikwembu ka hetiseka?

Loko Bibele yi hlamula yi ri: “Emasikwini ya tihosi teto Xikwembu xa le tilweni xi ta veka mfumo [ku fuma ka vuhosana] lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:44.

A hi kambisiseni ndlela leyi swiyimo swi nga ta va swi ri xiswona emisaveni leyi kondleteriweke ya Paradeyisi, leyi nga ta va yi ‘tumbuluxiwe hi vuntshwa,’ loko N’wana wa Xikwembu a tirhisa matimba yakwe tanihi ‘Hosana’ eMfun’weni wa Tata wakwe.

Ndlela Leyi Vutomi Byi Nga Ta Va Byi Ri Xiswona eParadeyisini

Ku pfuxiwa ka lava feke

“Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma.”—Yohane 5:28, 29.

“Ku ta va ni ku pfuxiwa ka lava lulameke ni ka lava nga lulamangiki.”—Mintirho 24:15.

Vuvabyi, ku dyuhala ni rifu swi ta va swi nga ha ri kona

“Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.”—Esaya 35:5, 6.

“Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.

Ku ta va ni ndzalo ya swakudya leswinene

“Kunene misava yi ta humesa swimila swa yona; Xikwembu, Xikwembu xa hina xi ta hi katekisa.”—Pisalema 67:6.

“Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

Vanhu hinkwavo va ta va ni makaya lamanene ni mintirho leyi tsakisaka

“Va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.”—Esaya 65:21, 22.

Vugevenga, madzolonga ni nyimpi a swi nge he vi kona

“Loko ku ri lavo homboloka, va ta dlayiwa emisaveni.”—Swivuriso 2:22.

“Va ta fula mabanga ya vona ma va swikomu ni mafumu ya vona ma va swikhutulo. Tiko a ri nge tlakuseli tiko rin’wana banga, naswona a va nge he dyondzi nyimpi.”—Esaya 2:4.

Ku chava a ku nge he vi kona, kutani misava hinkwayo yi ta va ni ku rhula

‘Va ta tshama va sirhelelekile, va nga chavisiwi hi munhu.’—Ezekiyele 34:28.

“A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:9.

Anakanya ndlela leyi swi nga ta tsakisa ha yona ku hanya emisaveni leyi nga ta va yi ri paradeyisi, laha vanhu hinkwavo va nga ta va va rhandzana va tlhela va rhandza Xikwembu! (Matewu 22:37-39) U nga tiyiseka leswaku hinkwaswo leswi Xikwembu xi swi tshembisaka swi ta va swi hetisekile hi nkarhi wolowo. Xikwembu xi ri: “Ndzi swi vurile . . . ndzi ta tlhela ndzi swi endla.”—Esaya 46:11.

Ku ni swilo swo tala leswi u nga ha bohekaka ku swi dyondza hi Yehovha Xikwembu ni hi misava yakwe leyintshwa leyi a yi tshembisaka. Hi xikombiso, hi byihi vumbhoni lebyi nga kona lebyi kombisaka leswaku misava leyintshwa se yi kwala nyongeni? Xana Mfumo wa Xikwembu wu ta ti siva njhani tihulumendhe ta misava leyi? Naswona hi swihi swiendlakalo leswi nga ta va kona leswi nga ta endla leswaku Mfumo wa Xikwembu wu siva tihulumendhe ta misava leyi? Timbhoni ta Yehovha ti ta swi tsakela ku bula na wena hi swivutiso leswi. Leswaku u kuma rungula leri engetelekeke, vona tluka 32 ra magazini lowu.

Misava leyintshwa yo lulama leyi vanhu va nga ni malembe va ri karhi va yi navela se yi kwala nyongeni. Timiliyoni ta vanhu lava feke ti ta pfuxiwa. Ku rhandza ka Xikwembu hi leswaku vanhu va tlhela va hanya. Hakunene vanhu lava feke va ta pfuxiwa! Ina, va ta kuma ‘vutomi bya xiviri’ “lebyi nga ta ta.”—1 Timotiya 4:8; 6:19.

[Xifaniso lexi nga eka tluka 7]

Paradeyisi leyi lahlekeke hikwalaho ka ku nga yingisi ka vanhu vo sungula yi ta kondleteriwa