Section 8
Hanya Hi Masiku eMisaveni Ya Paradeyisi
1, 2. Byi ta va njhani vutomi ehansi ka ku fuma ka Mfumo wa Xikwembu?
1 Vutomi byi ta va njhani loko Xikwembu xi susa vuhomboloki ni ku xaniseka emisaveni ivi xi tisa misava ya xona leyintshwa ehansi ka Mfumo wa xona wa le tilweni wa rirhandzu? Xikwembu xi tshembisa ku ‘pfula voko ra xona xi enerisa ku navela ka xin’wana ni xin’wana lexi hanyaka.’—Pisalema 145:16.
2 I yini leswi u swi navelaka ngopfu? Xana a hi vutomi bya ntsako, ntirho lowu vuyerisaka, ndzalo ya swilo leswi vonakaka, mbango wo saseka, ku rhula exikarhi ka vanhu hinkwavo, ni ku hela ka vuhomboloki, vuvabyi, ku xaniseka ni rifu? Naswona ku vuriwa yini hi langutelo leri tsakisaka ra moya? Swilo sweswo hinkwaswo swi ta kumiwa hi ku hatlisa ehansi ka ku fuma ka Mfumo wa Xikwembu. Xiya leswi vuprofeta bya Bibele byi swi vulaka hi mikateko leyinene swonghasi leyi nga ta ta emisaveni yoleyo leyintshwa.
Vanhu Va Ri Ni Ku Rhula Loku Heleleke
3-6. I xitiyisekiso xihi lexi hi nga na xona xa leswaku vanhu va ta va ni ku rhula emisaveni leyintshwa?
3 “[Xikwembu xi] herise tinyimpi ku yisa e makuṅweni ya misav̌a, [xi] ṭhov̌ile mav̌ura, [xi] fayetele matlhari, [xi] hise magolonyi e nḍilweni.”—Pisalema 46:9.
4 “Hi mabanga ya v̌ona v̌a ta fula ŝikomu, hi matlhari ya v̌ona v̌a ta fula masikeri; tiko ri nga ka ri nga ha lwi ni riṅwana, kutani a ku nga ha dyonḍisiwi ku lwa.”—Esaya 2:4.
5 “V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.”—Pisalema 37:11.
6 “Misav̌a hikwayo yi wisile, yi rula, v̌a endla huwa ya ku ṭaka.”—Esaya 14:7.
Vanhu Va Hanya Ni Swiharhi Hi Ku Rhula
7, 8. Xana i ku rhula kwihi loku nga ta va kona exikarhi ka vanhu ni swiharhi?
7 “Hlolwa ri ta ṭhamisa ni šinyimpfana, yingwe yi ta etlela ni šimbutana. Role ni šinghalana, ni homu le’yi noneke, ŝi ta v̌a kuṅwe, ŝi byisiwa hi wanḍisanyana. Ntŝele ya homu ni ya bere ŝi ta dya ŝiṅwe, marole ya ŝona ma ta etlela kuṅwe; nghala yi ta dya byanyi tani hi homu. Šihlangi le’ši aṅwaka ši ta titlangela e ntšyeleni wa mhiri, ni ṅwana l’a lumukeke o ta nghenisa v̌oko e ntšyeleni wa šihiridyana. Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a tani hi leŝi mati ma funengetaka v̌uento bya lwandle.”—Esaya 11:6-9.
8 “Hi siku lero, nḍi ta v̌a endlela ntwanano ni ŝihari ŝa nhov̌a, ni tinyanyana ta tilo, ni le’ŝi kokov̌aka e misav̌eni, . . . kutani nḍi ta v̌a akisa hi ku rula.”—Hosiya 2:18.
Rihanyo Lerinene, Vutomi Lebyi Nga Heriki
9-14. Hlamusela swiyimo swa rihanyo emisaveni leyintshwa.
9 “Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka; ŝilema ŝi ta tlula kukota tinhlangu, ririmi ra mbev̌ev̌e ri ta yimbelela hi ku ṭaka.”—Esaya 35:5, 6.
10 “[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.”—Nhlavutelo 21:4.
11 “Ku hava muaki la nga ta ku: ‘Ndza vabya.’”—Esaya 33:24, NW.
12 “Kutani mmiri wa yena wu hlukela e ku tlula v̌uhlangini. A tlhelela masikwini ya v̌untŝha bya yena.”—Yobo 33:25.
13 “Nyiko leyi nyikiwaka ntsena, leyi humaka eka Xikwembu, i vutomi lebyi nga heriki, ha Kriste Yesu Hosi ya hina.”—Varhoma 6:23.
14 “Un’wana ni un’wana la pfumelaka ka yena, [u ta] va ni vutomi lebyi nga heriki.”—Yohane 3:16.
Lava Feke Va Vuyiseriwa eVuton’wini
15-17. Ku ni ntshembo wihi eka lava ana se va feke?
15 “Lavo lulama ni lava nga lulamangiki va ta pfuka eku feni.”—Mintirho 24:15.
16 “Nkarhi wa ta lowu hinkwavo lava nge masirheni [lava tsundzukiwaka hi Xikwembu] va nga ta twa rito ra yena, kutani va ta huma.”—Yohane 5:28, 29.
17 “Lwandle ri tlherisa lava feleke eka rona. Rifu ni Tihele [masirha] swi tlherisa vafi lava a va ri ka swona.”—Nhlavutelo 20:13.
Misava, Paradeyisi Ya Ndzalo
18-22. Misava hinkwayo yi ta hundzuriwa yi va yini?
18 “Ku ta v̌a ni ku ṭakama ka ku kateka kona. Muri wa le masiṅwini wu ta v̌eka mihanḍu ya wona, ni tiko ri ta v̌eka ŝa rona.”—Ezekiyele 34:26, 27.
19 “Misav̌a yi humesile mihanḍu ya yona, Šikwembu, Šikwembu ša hina ši ta hi katekisa.”—Pisalema 67:6.
20 “Tiko ra ntlhohe ri ta ṭaka, ni tiko le’ri omeke; makwanḍasi ma ta ṭakisisa, ma rumbuka kukota koṅhwa.”—Esaya 35:1.
21 “Tinṭhav̌a ni ŝiṭunga ŝi ta ṭaka ngopfu e mahlweni ka ṅwina, kutani miri hikwayo ya nhov̌a yi ta phokotela. E maṭhaṅweni ya mphasamhala, ku ta kula mirta.”—Esaya 55:12, 13.
22 “U ta va na mina eParadeyisini.”—Luka 23:43.
Tiyindlu Letinene Ta Hinkwavo
23, 24. I xitiyisekiso xihi lexi hi nga na xona xa leswaku hinkwavo va ta va ni tindlu letinene?
23 “V̌a ta aka tindlu, v̌a ta ṭhama ka tona . . . V̌a nga ka v̌a nga ha aki tindlu, leŝaku uṅwana a ta ṭhama kona, v̌a nga ka v̌a nga ha byari leŝaku uṅwana a ta dya. . . . V̌ahlawuriwa v̌a mina v̌a ta ṭakela ntiro wa mav̌oko ya v̌ona. V̌a nga ha tikarateli ŝa hav̌a.”—Esaya 65:21-23.
24 “V̌a ta ṭhama uṅwana ni uṅwana e hansi ka nkuwa, ni le hansi ka vinya ya yena, ku nga ri na loyi a v̌a pfušaka.”—Mikiya 4:4.
U Nga Hanya Hi Masiku eParadeyisini
25. I langutelo rihi lerinene swonghasi leri hi nga na rona ra vumundzuku?
25 Mawaku ku langutela lokunene swonghasi ka vumundzuku! Mawaku xikongomelo xa xiviri lexi vutomi byi nga na xona loko byi sekeriwa hi ntshembo lowu tiyeke wa leswaku emisaveni leyintshwa ya Xikwembu swiphiqo swa namuntlha hinkwaswo swi ta va swilo swa nkarhi lowu hundzeke! “Timhaka ta khale a ti nga ha ṭunḍukiwi, ti nga ka ti nga ha tlheleri meehleketweni.” (Esaya 65:17) Naswona mawaku ndlela leyi swi chavelelaka ha yona ku tiva leswaku enkarhini wolowo vutomi byi ta va bya hi laha ku nga heriki: “[Xikwembu xi] ta lov̌isa rifu hi laha ku nga heriki.”—Esaya 25:8.
26. Hi xihi xilotlelo xo hanya hi laha ku nga heriki emisaveni leyintshwa ya Xikwembu?
26 Xana wa swi lava ku hanya hi laha ku nga heriki emisaveni leyintshwa ya Paradeyisi leyi nga ekusuhi swinene? U nga ha tivutisa ‘I yini leswi ndzi faneleke ku swi endla leswaku ndzi amukeriwa hi Xikwembu emakun’wini ya misava leyi ivi ndzi ponela emisaveni ya xona leyintshwa?’ U fanele ku endla leswi Yesu a swi kombiseke loko a khongela eka Xikwembu a ku: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.”—Yohane 17:3.
27. I yini leswi u faneleke u swi endla leswaku u hlanganyela eka xikongomelo xa Xikwembu?
27 Hikwalaho, teka Bibele, u tiyisekisa leswi u nga swi hlaya eka broxara leyi. Lava van’wana lava dyondzaka ni ku dyondzisa mintiyiso leyi ya Bibele. Huma eka vukhongeri bya vukanganyisi lebyi dyondzisaka ni ku endla swilo leswi hambanaka ni Bibele. Dyondza ndlela leyi wena, xikan’we ni van’wana va timiliyoni lava ana se va endlaka ku rhandza ka Xikwembu, mi nga hlanganyelaka ha yona eka xikongomelo xa Xikwembu xa leswaku vanhu va hanya hi laha ku nga heriki emisaveni ya paradeyisi. Naswona yingisa leswi Rito ra Xikwembu leri huhuteriweke ri swi vulaka hi ta nkarhi lowu tshineleke: “Misava ya hundza, ni ku navela ka yona, kambe loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:17.
[Xifaniso lexi nga eka tluka 31]
Ku nga ri khale xikongomelo xa Xikwembu xa ku vuyetela misava yi va paradeyisi xi ta hetiseka