Xiyenge 10
Misava Leyintshwa Yo Saseka Leyi Endliweke Hi Xikwembu
1, 2. Ku ta endleka yini endzhaku ka nyimpi leyi kukulaka ya Armagedoni?
ENDZHAKU ka nyimpi leyi kukulaka ya Xikwembu ya Armagedoni, ku ta landzela yini ke? Ku ta sungula nguva leyintshwa yo tsakisa. Lava poneke Armagedoni, lava ana se va kombiseke ku tshembeka ka vona evulawurini bya Xikwembu, va ta nghenisiwa emisaveni leyintshwa. Wolowo wu ta va nkarhi lowuntshwa lowu nyanyulaka swonghasi ematin’wini loko mimpfuno yo hlamarisa yi huma eka Xikwembu yi ya endyangwini wa vanhu!
2 Ehansi ka nkongomiso wa Mfumo wa Xikwembu, lava poneke va ta sungula ku endla paradeyisi. Matimba ya vona ma ta nyikeriwa emintirhweni yo pfumala vutianakanyi leyi nga ta vuyerisa hinkwavo lava hanyaka hi nkarhi wolowo. Misava yi ta sungula ku endliwa kaya ra vanhu ro saseka, ra ku rhula ni leri enerisaka.
Ku Lulama Ku Siva Vubihi
3. I ku wisa kwihi ka xihatla loku nga ta twiwa endzhakunyana ka Armagedoni?
3 Hinkwaswo leswi swi ta endliwa swi koteka hi ku lovisiwa ka misava ya Sathana. Ku nga ka ku nga ha vi na vukhongeri bya mavunwa, mafambiselo ya ntshamisano kumbe tihulumendhe leti avanisaka vanhu. Ku nga ka ku nga ha vi na mavunwa ya Sathana yo hambukisa vanhu; swilo hinkwaswo leswi byi humesaka swi ta lova ni fambiselo ra Sathana. Ehleketa: Ku ta herisiwa moya hinkwawo lowu nga ni chefu wa misava ya Sathana! Mawaku ku wisa konghasi loku ku nga ta va kona!
4. Hlamusela ku cinca malunghana ni dyondzo loku nga ta va kona.
4 Kutani mianakanyo leyi lovisaka ya vulawuri bya munhu yi ta siviwa hi dyondzo leyi akaka leyi humaka eka Xikwembu. “Vana va wena va xinuna hinkwavo va ta va vadyondzisiwa va Yehova.” (Esaya 54:13) Hi ndzetelo lowu lowunene lembe na lembe, “ku tiva Yehova ku ta eneta misava, tanihi leswi mati ma funengetaka vuento bya lwandle.” (Esaya 11:9) Vanhu a va nge he dyondzi swilo swo biha, kambe “vanhu va misava va [ta] dyondza ku lulama.” (Esaya 26:9) Mianakanyo ni mintirho leyi akaka swi ta va hanyelo ra kona.—Mintirho 17:31; Vafilipiya 4:8.
5. Ku ta endliwa yini hi vubihi ni vanhu vo biha hinkwavo?
5 Xisweswo, ku dlaya, vukari, ku pfinya, ku yiva kumbe vugevenga byihi ni byihi a swi nge he vi kona. A nga kona la nga ta xaniseka hikwalaho ka swiendlo swo biha swa van’wana. Swivuriso 10:30 yi ri: “La lulameke a nga ka a nga tsekatseki, ni siku ni rin’we, loko va ri lavo biha, va nga ka va nga hlweri la misaveni.”
Rihanyo Leri Hetisekeke Ri Tlheriseriwa
6, 7. (a) I nchumu wihi wo biha lowu nga ta herisiwa hi vulawuri bya Mfumo? (b) Yesu u swi kombise njhani leswi loko a ha ri emisaveni?
6 Emisaveni leyintshwa, ku ta herisiwa swiendlo hinkwaswo leswo biha swa ku xandzuka ko sungula. Hi xikombiso, vulawuri bya Mfumo byi ta herisa vuvabyi ni ku dyuhala. Namuntlha, hambi loko u ri ni rihanyo lerinene, khombo ra kona hi leswaku loko u kula, mahlo ya wena a ma ha voni kahle, meno ya wena ma bola, a wa ha twi kahle, nhlonge ya wena ya khwanyana, swirho swa wena swa le ndzeni swa tsana, ku kondza eku heteleleni u fa.
7 Hambi swi ri tano, swilo sweswo leswi khomisaka gome leswi hi swi kumeke hi ndzhaka eka vatswari va hina vo sungula swi ta hela ku nga ri khale. Xana wa swi tsundzuka leswi Yesu a swi kombiseke malunghana ni rihanyo loko a ha ri emisaveni? Bibele ya hlamusela: “Mintshungu leyikulu yi ta ka yena, yi ri ni lavo khwita, ni swilema, ni lavo-fe-mahlo, ni timbheveve, ni van’wana lavo tala; yi va veka emilengeni ya Yesu, kutani a va hanyisa. Mintshungu yi hlamala loko yi vona timbheveve ti vulavula, ni swilema swi hanyisiwa, ni lavo khwita va famba, ni lavo-fe-mahlo va vona.”—Matewu 15:30, 31.
8, 9. Hlamusela ntsako lowu nga ta ta emisaveni leyintshwa loko ku tlheriseriwa rihanyo leri hetisekeke.
8 Mawaku ntsako lowukulu swonghasi lowu nga ta ta emisaveni leyintshwa loko mavabyi ya hinkwavo ya herisiwa! Ku xaniseka loku vangiwaka hi rihanyo leri tsaneke a ku nge he tlheli ku hi xanisa. “A ku nga vi na munhu la akeke [kona] la nga ta ku: ndza vabya!” “Hi laha mahlo ya vo-fe-mahlo ma nga ta hanyanya, ni tindleve leti sivekeke ti nga ta pfuleka; swilema swi ta tlula kukota tinhlangu, kutani ririmi ra mbheveve ri ta yimbelela hi ku tsaka.”—Esaya 33:24; 35:5, 6.
9 Xana a swi nge ku nyanyuli loko u pfuka mixo wun’wana ni wun’wana kutani u kuma leswaku sweswi u ni rihanyo lerinene? Xana a swi nge tsakisi eka vanhu lava kuleke ku tiva leswaku va tlheriseriwe ematimbeni ya vuntshwa ni leswaku va ta fikelela ku hetiseka loku Adamu na Evha a va ri na kona eku sunguleni? Xitshembiso xa Bibele xi ri: “Miri wa yena wu hlukela eku tlula vuhlangini. A tlhelela masikwini ya vuntshwa bya yena.” (Yobo 33:25) Mayana ndlela leyi swi nga ta tsakisa ha yona ku cukumeta manghilazi ya mahlo, swipfuneto swa ku twa, minxongotelo, switulu swa swigulana ni mirhi ya vutshunguri! Swibedlhele, madokodela ni madokodela ya meno a swi nge he laveki.
10. Ku ta humelela yini hi rifu?
10 Vanhu lava nga ni rihanyo ro tano leri tiyeke a va nge swi lavi ku fa. Naswona a va nge fi, hikuva vanhu va ta va va nga ha ri na kona ku pfumala ku hetiseka ni rifu loku kumiweke hi ndzhaka. Kriste “ú fanele ku fuma, Xikwembu xi kondza xi veka valala hinkwavo ehansi ka minkondzo ya yena. Kutani nala lowo hetelela la nga ta herisiwa i rifu.” “Nyiko leyi nyikiwaka ntsena, leyi humaka eka Xikwembu, i vutomi lebyi nga heriki.”—1 Vakorinto 15:25, 26; Varhoma 6:23; nakambe vona Esaya 25:8.
11. Nhlavutelo yi katsakanya mimbuyelo ya misava leyintshwa hi ndlela yihi?
11 Loko yi katsakanya mimbuyelo leyi nga ta khuluka yi huma eka Xikwembu lexi khathalelaka yi ya endyangwini wa vanhu eParadeyisini, buku yo hetelela ya Bibele yi ri: “[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:3, 4.
Vafi Va Pfuka
12. Yesu u ma kombisise ku yini matimba ya yena lama humaka eka Xikwembu ya ku pfuxa vafi?
12 Yesu a nga hanyisanga vavabyi ni ku tshungula lava lamaleke ntsena. U tlhele a pfuxa vanhu emasirheni. Xisweswo u kombise matimba lama hlamarisaka ya ku pfuxa vafi lawa Xikwembu xi n’wi nyikeke wona. Xana wa wu tsundzuka nkarhi lowu ha wona Yesu a nga ta endlwini ya wanuna loyi nhwanyana wa yena a a file? Yesu u byele nhwanyana la feke a ku: “Nhwanyana, ndzi ri ka wena, pfuka!” Vuyelo byi ve byihi ke? “Kan’we kan’we nhwanyana a pfuka, a famba-famba.” Loko va vona sweswo, vanhu “va hlamala hi ku hlamala lokukulu.” A va nga tikoti hi ku tsaka!—Marka 5:41, 42; nakambe vona Luka 7:11-16; Yohane 11:1-45.
13. I vanhu va muxaka muni lava nga ta pfuxiwa?
13 Emisaveni leyintshwa, “lavo lulama ni lava nga lulamangiki va ta pfuka eku feni.” (Mintirho 24:15) Enkarhini wolowo Yesu u ta tirhisa matimba ya yena lama humaka eka Xikwembu leswaku a pfuxa vafi, hikuva hi laha a vuleke ha kona, “Hi mina ku pfuka ni vutomi; la pfumelaka ka mina, hambi a nga fa, ú ta hanya.” (Yohane 11:25) U tlhele a ku: “Hinkwavo lava nga emasirheni ya xitsundzuxo [lava tsundzukiwaka hi Xikwembu] va ta twa rito ra yena [ra Yesu] kutani va huma.”—Yohane 5:28, 29, NW.
14. Hikwalaho ka leswi rifu ri nga ta hela, i swilo swihi leswi nga ta herisiwa?
14 Ntsako wu ta va wukulu emisaveni hinkwayo loko mintlawa ya vanhu lava feke yi tlhelela evuton’wini hi ku landzelelana ku ya hlangana ni varhandziwa va vona! Ku nga ka ku nga ha vi na tikholomo ta switiviso swa vafi leswi khomisaka gome eka lava ha hanyaka. Ematshan’wini ya sweswo, ku nga ha va ni leswi hambaneke ni sweswo: switiviso swa lava ha ku pfuxiwaka leswi nga ta tisa ntsako eka lava a va va rhandza. Kutani a ku nge he vi na minkosi, ku hisiwa ka vafi, vuhiselo bya mintsumbu kumbe masirha!
Misava Leyi Nga Ni Ku Rhula Hakunene
15. Vuprofeta bya Mikiya byi ta xiyiwa njhani hi vutalo?
15 Ku ta va ni ku rhula ka ntiyiso evuton’wini hinkwabyo. Tinyimpi, vahlohloteri va tinyimpi ni ku endliwa ka matlhari swi ta va swi hundzile. Hikwalaho ka yini? Hikuva timhaka leti avanisaka vanhu ta tiko, swivongo ni rixaka ti ta nyamalala. Kutani, hi vutalo, “tiko rin’wana a ri nga ha pfukeli rin’wana hi tlhari, a va nga ha dyondzi nyimpi.”—Mikea 4:3.
16. Xikwembu xi ta swi endlisa ku yini leswaku tinyimpi ti nga ha vi kona?
16 Leswi swi nga vonaka swi hlamarisa hikwalaho ka matimu ya torha ra munhu ra ngati, ya nyimpi leyi yaka emahlweni. Kambe sweswo swi vangiwe hi ku va munhu a ve ehansi ka vulawuri bya munhu ni bya mademona. Emisaveni leyintshwa, ehansi ka vulawuri bya Mfumo, ku ta endleka leswi: “Tanani, mi hlalela mitirho ya Yehova . . . U herise tinyimpi ku yisa emakun’wini ya misava, u tshovile mavurha, u fayetele matlhari, u hise magolonyi [ya nyimpi] endzilweni.”—Psalma 46:8, 9.
17, 18. Emisaveni leyintshwa, ku ta va ni vuxaka byihi exikarhi ka vanhu ni swiharhi?
17 Munhu ni xivandzana na swona swi ta tshamisana hi ku rhula, hi laha a a swi ri ha kona aEdeni. (Genesa 1:28; 2:19) Xikwembu xi ri: “Hi siku rero, ndzi ta va endlela ntwanano ni swiharhi swa nhova, ni tinyanyana ta tilo, ni leswi kokovaka emisaveni, kutani . . . ndzi va akisa hi ku rhula.”—Hosea 2:18.
18 Ku rhula koloko ku ta va kukulu hi ndlela yihi ke? “Hlolwa ri ta tshamisa ni xinyimpfana, yingwe yi ta etlela ni ximbutana. Rhole ni xinghalana, ni homu leyi noneke, swi ta va kun’we, swi byisiwa hi wandzisanyana.” Swiharhi a swi nge he tlheli swi xungeta munhu kumbe swona vini swi xungetana. Hambi ku ri “nghala yi ta dya byanyi tanihi homu”!—Esaya 11:6-9; 65:25.
Misava Yi Hundzuriwa Paradeyisi
19. Xana misava yi ta hundzuriwa yi va yini?
19 Misava hinkwayo yi ta hundzuriwa kaya ra paradeyisi ra vanhu. Hi yona mhaka leyi Yesu a tshembiseke munhu loyi a a pfumela eka yena a ku: “U ta va na mina eParadeyisini.” Bibele yi ri: “Tiko ra ntlhohe ri ta tsaka, ni tiko leri omeke; makwandzasi ma ta tsakisisa, ma rhumbuka kukota khon’wa! . . . Hikuva mati ma ta khuluka mananga, ni swinambyana swi ta khulukela makwandzasini.”—Luka 23:43; Esaya 35:1, 6.
20. Ha yini ndlala yi nga ta ka yi nga tlheli yi hlasela vanhu?
20 Ehansi ka Mfumo wa Xikwembu, ndlala a yi nge he ti hlaseli timiliyoni ta vanhu. “Ku ta va ni ndzalo ya koro la misaveni ni le tihlohlorhini ta tintshava.” “Murhi wa le masin’wini wu ta veka mihandzu ya wona, ni tiko ri ta veka swa rona; va ta tikhorisa etikweni ra vona.”—Psalma 72:16; Ezekiel 34:27.
21. Ku ta endliwa yini hi ku pfumaleka ka makaya, tindlu ta swidakani ni vaakelani lavo biha?
21 A ku nge he vi na vusweti, vanhu vo pfumala makaya, tindlu ta swidakani, kumbe vaakelani lava teleke vugevenga. “Va ta aka tindlu, va ta tshama ka tona; va ta byala tivhinya, va dya mihandzu ya tona. Va nga ka va nga ha aki tindlu, leswaku un’wana a ta tshama kona, va nga ka va nga ha byari leswaku un’wana a ta dya.” “Va ta tshama un’wana ni un’wana ehansi ka nkuwa, ni le hansi ka vhinya ya yena, ku nga ri na loyi a va pfuxaka.”—Esaya 65:21, 22; Mikea 4:4.
22. Bibele yi hlamusela mikateko ya vulawuri bya Xikwembu hi ndlela yihi?
22 Vanhu va ta katekisiwa hi swilo leswi hinkwaswo, ni swin’wana eParadeyisini. Psalma 145:16 yi ri: “[Xikwembu xi] funungula xandla xa [xona, xi] xurhisa hinkwaswo leswi hanyaka.” A swi hlamarisi leswi vuprofeta bya Bibele byi nge: “Va musa va ta fuma misava, va ta titsakela eku rhuleni lokukulu ka vona. . . . Lavo lulama va ta fuma misava, va ta tshama ka yona hi masiku.”—Psalma 37:11, 29.
Ku Herisa Swa Nkarhi Lowu Hundzeke
23. Mfumo wa Xikwembu wu ta ku herisa njhani ku xaniseka hinkwako loku hi ku tokoteke?
23 Vulawuri bya Mfumo wa Xikwembu byi ta herisa ku onhaka hinkwako loku endliweke endyangwini wa vanhu eka malembe ya tsevu wa magidi lama hundzeke. Enkarhini wolowo ntsako wu ta tlula swinene ku xaniseka kwihi ni kwihi loku vanhu va veke na kona. Vutomi a byi nge kavanyetiwi hi miehleketo yihi na yihi yo biha ya ku xaniseka ka nkarhi lowu hundzeke. Mianakanyo ni mintirho leyi akaka leyi nga ta va hanyelo ra vanhu ra siku na siku yi ta dlaya miehleketo leyi vavaka, hakatsongotsongo.
24, 25. (a) I yini leswi Esaya a vhumbeke leswaku swi ta endleka? (b) Ha yini hi nga tiyisekaka leswaku miehleketo ya ku xaniseka loku hundzeke yi ta hela?
24 Xikwembu lexi khathalelaka xi ri: “Ndzi vumba matilo lamantshwa [hulumendhe leyintshwa ya le tilweni leyi fumaka vanhu], ni misava leyintshwa [vandla ra vanhu leri lulameke]; timhaka ta khale a ti nga ha tsundzukiwi, ti nga ka ti nga ha tlheleri meehleketweni. Kambe, hikwalaho ka leswi ndzi nga ta swi vumba, tsakani mi tsakisisa hi masiku.” “Misava hinkwayo yi wisile, yi rhula, va endla huwa ya ku tsaka.”—Esaya 14:7; 65:17, 18.
25 Kutani hi Mfumo wa xona, Xikwembu xi ta hundzuluxa xiyimo xo biha hi ku helela lexi tshameke nkarhi wo leha swinene. Hi laha ku nga heriki xi ta hi kombisa nkhathalelo wa xona lowukulu hi ku hi nyika mikateko leyi nga ta tlula swinene ku vaviseka kwihi ni kwihi loku hi ku tweke enkarhini lowu hundzeke. Maxangu lama hundzeke lawa hi veke na wona hi ta ma rivala, hambi loko hi lava ku ma tsundzuka.
26. Ha yini Xikwembu xi ta hi hakela hikwalaho ka ku xaniseka kwihi na kwihi loku hundzeke?
26 Hi yona ndlela leyi Xikwembu xi nga ta hi hakela ha yona eku xanisekeni loku hi nga vaka hi ku tiyiserile emisaveni leyi. Xa swi tiva leswaku a ku nga ri xihoxo xa hina leswi hi velekiweke hi nga hetisekanga, hikuva hi kume ku nga hetiseki eka vatswari va hina vo sungula, hi ndzhaka. A ku nga ri xihoxo xa hina leswi hi velekiweke emisaveni ya Sathana, hikuva loko Adamu na Evha a va tshembekile, a hi ta va hi velekeriwe eparadeyisini. Kutani hi ntwela-vusiwana lowukulu Xikwembu xi ta hi nyika hakelo leyi tlulaka swinene ku riha vubihi lebyi hi byi tokoteke enkarhini lowu hundzeke.
27. Hi byihi vuprofeta lebyi nga ta hetiseka hi ndlela leyi hlamarisaka emisaveni leyintshwa?
27 Emisaveni leyintshwa, vanhu va ta va ni ntshunxeko lowu vhumbiweke eka Varhoma 8:21, 22: “Swivumbiwa leswi swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu. Hikuva hi tiva leswaku, ku fikela namuntlha, swivumbiwa hinkwaswo swa konya hi ku vaviseka.” Enkarhini wolowo vanhu va ta vona ku hetiseka loku heleleke ka xikhongelo lexi nge: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.” (Matewu 6:10) Swiyimo swo saseka emisaveni ya Paradeyisi swi ta kombisa swiyimo swa le tilweni.
[Swifaniso leswi nga eka tluka 23]
Emisaveni leyintshwa, lava dyuhaleke va ta tlhelela ematimbeni ya vuntshwa
[Xifaniso lexi nga eka tluka 24]
Vuvabyi ni ku lamala hinkwako swi ta herisiwa emisaveni leyintshwa
[Xifaniso lexi nga eka tluka 25]
Emisaveni leyintshwa, vafi va ta pfuxeriwa evuton’wini
[Xifaniso lexi nga eka tluka 26]
‘A va nge he dyondzi nyimpi’
[Swifaniso leswi nga eka tluka 27]
Vanhu ni swiharhi swi ta va ni ku rhula loku heleleke eParadeyisini
[Xifaniso lexi nga eka tluka 27]
‘Xikwembu xi ta pfula voko ra xona, xi eneta ku navela ka xin’wana ni xin’wana lexi hanyaka’
[Swifaniso leswi nga eka tluka 28]
Mfumo wa Xikwembu wu ta hakela swinene hi leswi tlulaka ku xaniseka loku hi ku tiyiseleke