Leswi Mfumo Wa Xikwembu Wu Nga Ta Swi Endla

“Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—MATEWU 6:10.

1. Xana ku fika ka Mfumo wa Xikwembu ku ta vula yini?

LOKO Yesu a dyondzise valandzeri va yena leswaku va khongelela Mfumo wa Xikwembu, a a swi tiva leswaku loko wu fika wu ta herisa ku tifuma ka munhu ka magidi ya malembe a nga lawuriwi hi Xikwembu. Hi nkarhi wolowo hinkwawo, ku rhandza ka Xikwembu a ku nga endliwi hi ku helela emisaveni. (Pisalema 147:19, 20) Kambe endzhaku ka ku tlhomiwa ka Mfumo etilweni, ku rhandza ka Xikwembu ku ta endliwa kun’wana ni kun’wana. Nkarhi lowu hlamarisaka wa ku susiwa ka ku fuma ka munhu ivi ku fuma Mfumo wa le tilweni wa Xikwembu wu kwala nyongeni.

2. I yini lexi nga ta fungha ku susiwa ka ku fuma ka vanhu ivi ku siviwa hi Mfumo?

² Lexi nga ta fungha ku cinca loku ku ta va nkarhi lowu Yesu a wu vitaneke “nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.” (Matewu 24:21) Bibele a yi vuli leswaku nkarhi wolowo wu ta leha ku fikela kwihi, kambe makhombo lama nga ta humelela hi nkarhi wolowo ma ta chavisa ku tlula hinkwawo lama tshameke ma va kona. Loko nhlomulo lowukulu wu sungula, ku ta humelela nchumu wun’wana emisaveni lowu nga ta va tsema nhlana vanhu vo tala: ku herisiwa ka vukhongeri hinkwabyo bya mavunwa. Nhlomulo wolowo a wu nge ti chavisi Timbhoni ta Yehovha, hikuva i khale ti wu languterile. (Nhlavutelo 17:1, 15-17; 18:1-24) Nhlomulo lowukulu wu ta hela eArmagedoni loko Mfumo wa Xikwembu wu pfotlosa fambiselo hinkwaro ra Sathana.—Daniyele 2:44; Nhlavutelo 16:14, 16.

3. Xana Yeremiya u ri hlamusela njhani khombo ra lava nga yingisiki?

³ Xana leswi swi ta vula yini eka vanhu “lava va nga xi tiviki Xikwembu ni lava va nga ma yingisiki mahungu lamanene” lama vulavulaka hi Mfumo wa xona wa le tilweni lowu nga emavokweni ya Kreste? (2 Vatesalonika 1:6-9) Vuprofeta bya Bibele byi ri: “Waswivo! Ku ni khombo leri sukaka etikweni rin’wana ri ya etikweni rin’wana, naswona ku ta pfuka xidzedze lexikulu ku suka etindhawini ta le kule ta misava. Kunene lava dlayiweke hi Yehovha esikwini rero va ta suka emakun’wini ya misava ku ya fika emakun’wini man’wana ya misava. A va nge rileriwi, hambi ku ri ku hlengeletiwa kumbe ku lahliwa. Va ta kotisa vulongo evuandlalweni bya misava.”—Yeremiya 25:32, 33.

Ku Herisiwa Ka Vuhomboloki

4. Ha yini swi fanerile leswaku Yehovha a herisa fambiselo leri ro biha?

⁴ Yehovha Xikwembu u pfumelele vuhomboloki hi magidi ya malembe, ku nga nkarhi lowu leheke hilaha ku ringaneke leswaku vanhu va timbilu letinene va swi vona leswaku ku fuma ka munhu i khombo. Hi xikombiso, buku yin’wana yi vula leswaku hi lembe-xidzana ra vu-20 ntsena, vanhu lava tlulaka 150 wa timiliyoni va dlayiwile etinyimpini, eka nhlunga-vuhosi ni le ka mimpfilumpfilu yin’wana ya tiko. Tihanyi ta munhu ti voniwe swinene hi nkarhi wa Nyimpi ya Vumbirhi ya Misava, laha ku dlayiweke vanhu va kwalomu ka 50 wa timiliyoni, laha vunyingi bya vona va feke hi ndlela ya tihanyi etikampeni ta nxaniso ta Manazi. Hilaha Bibele yi profeteke hakona, enkarhini wa hina ‘vanhu vo homboloka ni vaxisi va ye emahlweni va nyanya evubihini.’ (2 Timotiya 3:1-5, 13) Namuntlha, mahanyelo layo biha, vugevenga, madzolonga, vukanganyisi ni ku delela mimpimanyeto ya Xikwembu swi tele ngopfu. Hikwalaho, swi fanerile hakunene leswaku Yehovha a herisa fambiselo leri ro biha.

5, 6. Hlamusela vuhomboloki lebyi a byi ri kona eKanana wa khale.

⁵ Xiyimo lexi nga kona sweswi xa fana ni lexiya xa le Kanana emalembeni ya 3 500 lama hundzeke. Bibele yi ri: “Swilo hinkwaswo leswi nyenyetsaka eka Yehovha, leswi a swi vengaka, va swi endlele swikwembu swa vona, hikuva hambi va ri vana va vona va majaha ni vanhwanyana va hambeta va va hisela swikwembu swa vona hi ndzilo.” (Deteronoma 12:31) Yehovha u byele tiko ra Israyele a ku: “Yehovha Xikwembu xa wena u hlongola matiko lawa emahlweni ka wena hikwalaho ka vuhomboloki bya wona.” (Deteronoma 9:5) N’wamatimu wa Bibele Henry H. Halley, u te: “Vugandzeri bya Bali, Axitoreti ni swikwembu swin’wana swa Vakanana a byi ri ni mikhuva leyi hundzeletiweke; titempele ta vona a ti ri tindhawu ta manyala.”

⁶ Halley u kombise ndlela leyi vuhomboloki bya vona a byi kule ha yona, hikuva eka yin’wana ya tindhawu toleto, vayimburi “va kume makhuwana yo tala lawa a ma ri ni masalela ya vana lava a va endliwe gandzelo eka Bali.” U te: “Ndhawu yoleyo hinkwayo yi tikombe yi ri xilahlo xa tincece. . . . Ku tikhoma ko biha a ku ri xiphemu xa mihivahivana ya vukhongeri bya Vakanana emahlweni ka swikwembu swa vona; naswona, a va dlaya vana va vona va mativula, va endla gandzelo eka swikwembu sweswo. Swi vonaka onge tiko hinkwaro ra Kanana ri fane na Sodoma na Gomora hi ku helela. . . . Xana vanhu va thyaka ni tihanyi to tano va ha ri na yona mfanelo yo hanya? . . . Vayimburi lava celaka marhumbi ya miti ya Vakanana va tivutisa leswaku ha yini Xikwembu xi nga va lovisanga hi ku hatlisa ku tlula hilaha xi endleke hakona.”

Ku Dya Ndzhaka Ya Misava

7, 8. Xana Xikwembu xi ta yi basisa njhani misava leyi?

⁷ Tanihi leswi Xikwembu xi basiseke Kanana, ku nga ri khale xi ta basisa misava hinkwayo ivi xi yi nyika lava va endlaka ku rhandza ka xona. “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni.” (Swivuriso 2:21, 22) Naswona mupisalema u ri: “Hi nkarhinyana, lowo homboloka a nge he vi kona . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:10, 11) Sathana na yena u ta va a susiwile, leswaku “a nga ha tshuki a hambukisa matiko kukondza ku hela malembe ya 1000.” (Nhlavutelo 20:1-3) Ina, “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:17.

⁸ Loko Yesu a katsakanya ntshembo lowukulu wa lava va lavaka ku hanya hilaha ku nga heriki emisaveni, u te: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5) Swi nga ha endleka a a kombetela eka Pisalema 37:29, leyi profeteke yi ku: “Lavo lulama va ta dya ndzhaka ya misava, va ta tshama eka yona hi masiku.” Yesu a a swi tiva leswaku a xi ri xikongomelo xa Yehovha leswaku vanhu va timbilu letinene va hanya emisaveni leyi nga paradeyisi hilaha ku nga heriki. Yehovha u ri: “Mina ndzi endle misava, vanhu ni swivandzana leswi nga ehenhla ka vuandlalo bya misava hi matimba ya mina lamakulu . . . , naswona ndzi swi nyike loyi ndzi voneke a lulamile ematihlweni ya mina.”—Yeremiya 27:5.

Misava Leyintshwa Leyi Hlamarisaka

9. Xana Mfumo wa Xikwembu wu ta tisa misava ya muxaka muni?

⁹ Endzhaku ka Armagedoni, Mfumo wa Xikwembu wu ta tisa “misava leyintshwa” leyi hlamarisaka laha ku nga ‘ta va ni ku lulama eka yona.’ (2 Petro 3:13) Mawaku ntshunxeko lowukulu eka lava nga ta va va pone Armagedoni, ku ntshunxiwa eka fambiselo leri ro biha ra swilo leri tshikilelaka! Mawaku ndlela leyi va nga ta va va tsake ha yona ku va va nghene emisaveni leyintshwa ya ku lulama ehansi ka hulumendhe ya Mfumo wa le tilweni, laha va nga ta va va langutele mikateko leyi hlamarisaka ni vutomi lebyi nga heriki!—Nhlavutelo 7:9-17.

10. I swilo swihi swo biha leswi nga taka swi nga ha vi kona ehansi ka ku fuma ka Mfumo?

¹⁰ Vanhu a va nge he pfuki va xungetiwa hi nyimpi, vugevenga, ndlala hambi ku ri swiharhi leswi hlaselaka. “Ndzi ta endla ntwanano wa ku rhula na [vanhu va mina], kunene ndzi ta herisa xivandzana lexi nga ni khombo etikweni . . . Kutani murhi wa nhova wu fanele wu veka mihandzu ya wona, tiko ri ta humesa ntshovelo wa rona, ti ta tshama emisaveni ya tona ti sirhelelekile.” “Va ta fula mabanga ya vona ma va swikomu ni mafumu ya vona ma va swikhutulo. A va nge ri tlakusi banga, tiko rin’wana ku lwa ni tiko rin’wana, naswona a va nge he dyondzi nyimpi. Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.”—Ezekiyele 34:25-28; Mikiya 4:3, 4.

11. I yini lexi hi tiyisekisaka leswaku mavabyi ma ta hela?

¹¹ Vuvabyi, nhlomulo ni rifu swi ta herisiwa. “Ku hava munhu la tshamaka kona la nga ta ku: ‘Ndza vabya.’ Vanhu lava tshamaka etikweni rero va ta va va rivaleriwe xidyoho xa vona.” (Esaya 33:24) “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile. . . . ‘Waswivo, ndzi endla swilo hinkwaswo swi va leswintshwa.’” (Nhlavutelo 21:4, 5) Loko a ri emisaveni, Yesu u kombise vuswikoti bya yena byo endla swilo sweswo hi matimba lawa Xikwembu a xi n’wi nyike wona. Hi ku pfuniwa hi moya lowo kwetsima, Yesu u fambe etikweni hinkwaro a hanyisa lava khwitaka a horisa ni lava vabyaka.—Matewu 15:30, 31.

12. Hi wihi ntshembo lowu nga kona hi vafi?

¹² Yesu u endle swo tlula sweswo. U pfuxe vafi. Xana vanhu lava titsongahataka va angurise ku yini? Loko a pfuxe nhwanyana wa malembe ya 12 hi vukhale, vatswari va yena “a va nga ha tikoti hi ku tsaka lokukulu.” (Marka 5:42) Lexi a xi ri xikombiso xin’wana xa leswi Yesu a nga ta swi endla emisaveni hinkwayo ehansi ka ku fuma ka Mfumo, hikuva hi nkarhi wolowo “ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Anakanya ntsako lowukulu lowu nga ta va kona loko mintlawa ya vafi hi ku landzelana ka yona yi tlheriseriwa evuton’wini ivi yi hlanganisiwa ni varhandziwa va yona! A swi kanakanisi leswaku ku ta va ni ntirho lowukulu wa ku dyondzisa ehansi ka vulanguteri bya Mfumo lerova “misava yi ta tala hi ku tiva Yehovha kukota mati lama funengetaka lwandle.”—Esaya 11:9.

Ku Lweriwa Ka Vuhosi Bya Yehovha

13. Xana ku lulama ka ku fuma ka Xikwembu ku ta va ku kombisiwe hi ndlela yihi?

¹³ Eku heleni ka gidi ra malembe ra Mfumo, vanhu va ta va va hetisekile emianakanyweni ni le miri. Misava yi ta va ntanga wo fana ni wa le Edeni, ku nga paradeyisi. Ku rhula, ntsako, ku sirheleleka ni vanhu lava nga ni rirhandzu swi ta va swi fikeleriwile. Nchumu wo fana ni lowu a wu si voniwa ematin’wini ya vanhu loko ku fuma ka Mfumo ku nga si sungula. Wa nga vona ku hambana lokukulu loku nga ta vonaka hi nkarhi wolowo exikarhi ka magidi ya malembe lama hundzeke ya vulawuri bya vanhu lebyi vangaka maxangu ni vulawuri lebyi hlamarisaka bya Mfumo wa le tilweni wa Xikwembu wa gidi ra malembe! Ku fuma ka Xikwembu ehansi ka Mfumo wa xona ku ta va ku tikombise ku ri loku tlakukeke hi tindlela hinkwato hilaha ku heleleke. Mfanelo ya Xikwembu yo fuma, vuhosi bya xona, swi ta va swi lweriwile hi ku helela.

14. Ku ta endleka yini hi vaxandzuki loko ku hela gidi ra malembe?

¹⁴ Eku heleni ka gidi ra malembe, Yehovha u ta pfumelela vanhu lava hetisekeke leswaku va tirhisa ku tihlawulela ka vona leswaku va lava ku tirhela mani. Bibele yi kombisa leswaku “Sathana u ta ntshunxiwa ekhotsweni rakwe.” U ta tlhela a ringeta ku hambukisa vanhu, lava van’wana va vona va nga ta hlawula ku bakanya Xikwembu kutani va tilawula. Ku sivela ‘maxangu leswaku ma nga ha vi kona ra vumbirhi,’ Yehovha u ta lovisa Sathana, madimona ya yena ni hinkwavo lava xandzukelaka vuhosi bya Yehovha. A nga kona loyi a nga ta lwisana ni leswaku vanhu lava loviseriweke makumu hi nkarhi wolowo a va nyikiwanga nkarhi kumbe leswaku ndlela ya vona yo biha a yi vangeriwa hi ku nga hetiseki. E-e, va ta va va fana na Adamu na Evha lava hetisekeke, lava hlawuleke ku xandzukela ku fuma lokunene ka Yehovha hi vomu.—Nhlavutelo 20:7-10; Nahume 1:9.

15. Xana vanhu lava tshembekaka va ta va ni vuxaka bya njhani na Yehovha?

¹⁵ Hi hala tlhelo, kumbexana vunyingi bya vanhu va ta hlawula ku seketela vuhosi bya Yehovha. Leswi muxandzuki un’wana ni un’wana a nga ta va a lovisiwile, vanhu lavo lulama va ta yima emahlweni ka Yehovha, va hundze kahle eka ndzingo wo hetelela wa vutshembeki. Kutani vanhu lava vo tshembeka va ta amukeriwa hi Yehovha tanihi vana va yena va xinuna ni va xisati. Hikwalaho va ta tlhela va va ni vuxaka lebyi Adamu na Evha a va ri na byona ni Xikwembu loko va nga si xandzuka. Hikwalaho, Varhoma 8:21 yi ta hetiseka: “Ntumbuluko [vanhu] hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.” Muprofeta Esaya u profetile: “[Xikwembu xi] ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:8.

Ntshembo Wa Vutomi Lebyi Nga Heriki

16. Ha yini swi fanerile ku yi langutela hi mahlo-ngati hakelo ya vutomi lebyi nga heriki?

¹⁶ Mawaku ntshembo lowu hlamarisaka lowu yimeleke lava tshembekaka, ku tiva leswaku Xikwembu xi ta va chululela mikateko ya moya ni ya nyama yi khapakhapa! Hilaha ku faneleke mupisalema u te: “U pfula voko ra wena u enerisa ku navela [loku faneleke] ka xilo xin’wana ni xin’wana lexi hanyaka.” (Pisalema 145:16) Yehovha u khutaza lava nga ni ripfumelo eka yena lava nga ta hanya laha misaveni ya Paradeyisini leswaku va va ni ntshembo lowu. Hambileswi mhaka ya vuhosi bya Yehovha yi nga ya nkoka swinene, a nga kombeli vanhu leswaku va n’wi tirhela va nga ri na ntshembo wa hakelo. EBibeleni hinkwayo, ku tshembeka eka Xikwembu ni ntshembo wa vutomi lebyi nga heriki swa fambisana tanihi swiphemu swa nkoka swa ripfumelo ra Mukreste eka Xikwembu. “La tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.”—Vaheveru 11:6.

17. Xana Yesu u swi kombise njhani leswaku swi fanerile ku va hi tiyisiwa hi ntshembo wa hina?

¹⁷ Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Laha u hlanganise ku tiva Xikwembu ni swikongomelo swa xona ni hakelo leyi kumekaka eka swona. Hi xikombiso, loko mudyohi a kombele ku tsundzukiwa loko Yesu a ta va a ri eMfun’weni wa yena, Yesu u te: “U ta va na mina eParadeyisini.” (Luka 23:43) A nga byelanga wanuna loyi leswaku a va ni ripfumelo hambiloko a nga yi kumanga hakelo. A a swi tiva leswaku Yehovha u lava leswaku malandza ya yena ma va ni ntshembo wa vutomi lebyi nga heriki emisaveni leyi nga paradeyisi leswaku va seketeriwa loko va hlangavetana ni miringo yo hambana-hambana emisaveni leyi. Hikwalaho, ku langutela hakelo hi mahlo-ngati swa pfuna swinene leswaku Mukreste a tiyisela.

Vumundzuku Bya Mfumo

18, 19. Ku ta humelela yini eka Hosi ni Mfumo loko ku hela Mfumo wa Gidi ra Malembe?

¹⁸ Tanihi leswi Mfumo a wu ri hulumendhe ya le hansinyana leyi Yehovha a yi tirhiseke leswaku a endla misava ni vaaki va yona va hetiseka a tlhela a vuyelelana na vona, xana Hosi Yesu Kreste ni tihosi ni vaprista va 144 000 va ta endla yini endzhaku ka Gidi ra Malembe? “Endzhaku ku fika makumu, loko a nyiketa mfumo eka Xikwembu tlhelo Tata wa yena, loko a herise hulumendhe hinkwayo ni vulawuri ni vuhosi hinkwabyo. Hikuva u fanele a va hosi ku fikela loko Xikwembu xi veke valala hinkwavo ehansi ka milenge ya yena.”—1 Vakorinto 15:24, 25.

¹⁹ Loko Kreste a nyiketa Mfumo eka Xikwembu, xana matsalwa lama vulavulaka hi wona tanihi lowu tshamaka hilaha ku nga heriki ma fanele ma twisisiwa hi ndlela yihi? Leswi nga ta endliwa hi Mfumo swi ta tshama hilaha ku nga heriki. Kreste u ta fundzhiwa hilaha ku nga heriki hikwalaho ka xiyenge xa yena lexi a xi hetisiseke loko a lwela vuhosi bya Xikwembu. Kambe tanihi leswi xidyoho ni rifu swi nga ta va swi susiwile hi ku helela hi nkarhi wolowo, naswona vanhu se va kutsuriwile, leswi swi herisa xilaveko xa yena xo va Mukutsuri. Ku Fuma ka Gidi ra Malembe ka Mfumo ku ta va ku hetisisiwile hi ku helela; kutani a ku nge he vi na xilaveko xa hulumendhe ya le hansinyana leyi nga ta va yi ri kona exikarhi ka Yehovha ni vanhu lava yingisaka. Xisweswo, “Xikwembu xi va swilo hinkwaswo eka vanhu hinkwavo.”—1 Vakorinto 15:28.

20. Hi nga swi kumisa ku yini leswaku vumundzuku byi n’wi khomele yini Kreste ni lava 144 000?

²⁰ Hi xihi xiphemu xa nkarhi lowu taka lexi Kreste ni vafumi-kulobye va nga ta va na xona loko Mfumo wa Gidi ra Malembe wu hete ntirho wa wona? Bibele a yi vuli nchumu hi mhaka leyi. Kambe, hi nga tiyiseka leswaku Yehovha u ta va nyika malunghelo lama engetelekeke ya ntirho entumbulukweni wa yena hinkwawo. Onge hinkwerhu ka hina namuntlha hi nga seketela vuhosi bya Yehovha ivi hi nyikiwa vutomi lebyi nga heriki, leswaku enkarhini lowu taka, hi ta hanya kutani hi vona leswi Yehovha a tiyimiseleke swona hi Hosi ni tihosi-kulobye ni vaprista-kulobye, swin’we ni hi vuako hinkwabyo bya yena lebyi hlamarisaka!

Tinhla Ta Mpfuxeto

• I ku cinca kwihi ka vulawuri loku hi nga kusuhi na kona?

• Xana Xikwembu xi ta va avanyisa hi ndlela yihi lavo homboloka ni lavanene?

• I swiyimo swihi leswi nga ta va kona emisaveni leyintshwa?

• Xana vulawuri bya Yehovha byi ta lweriwa njhani hi ndlela leyi heleleke?

[Swifaniso leswi nga eka tluka 17]

“Ku ta va ni ku pfuxiwa ka lava lulameke ni ka lava nga lulamangiki”

[Xifaniso lexi nga eka tluka 18]

Lava tshembekaka va ta vuyela evuxakeni lebyi faneleke na Yehovha