Vutomi Lebyinene Lebyi Tshembisiweke

XANA u nga swi tsakela ku ntshunxeka eka swiphiqo leswi endlaka leswaku vutomi byi nonon’hwa? Xana wa swi lava ku hanya emisaveni leyi eka yona vutomi byi tsakisaka tanihi laha swi kombisiweke ha kona exifanisweni lexi nga exifunengetweni xa le mahlweni ni xa le ndzhaku xa magazini lowu? Xi langutise kahle xifaniso lexi. Vanhu va ni swakudya swo tala. Va ta tsakela swakudya sweswo swo xawula hakunene. Hinkwavo va tsakile. Vanhu va tinxaka to hambana-hambana va hanyisana hi ku rhula. Hambi ku ri swiharhi swi ni ku rhula! Ku hava loyi a nga eku lweni. Ku hava lava lwaka. A Ku na xisiwana. Ku ni tindhawu to saseka, mirhi yo saseka, mati yo tenga, lama baseke. Mawaku vuxongi bya swona!

Xana misava leyi yi ta kala yi va tano? Ina, yi ta va paradeyisi. (Luka 23:43) Xikwembu lexi vumbeke misava, xi kunguhate leswaku vanhu va ta tsakela vutomi byo antswa emisaveni ya paradeyisi. Na wena u nga va kona kwalaho!

Xana Wena A Wu Ta Hlawula Vutomi Byihi?

Xana Paradeyisi leyi taka ya laha misaveni yi ta va yi hambane njhani ni misava leyi sweswi hi hanyaka eka yona? Sweswi, vanhu vo tlula gidi ra timiliyoni va ni ndlala siku na siku. Kambe eParadeyisini leyi Xikwembu xi tiyimiseleke yona emisaveni, un’wana ni un’wana u ta va ni swakudya swo tala. Bibele ya tshembisa: “Yehova wa tinyimpi o ta lungisela matiko hikwawo . . . e ŝakudya ŝa tinyama le’ti noneke, ni ŝakunwa ŝa tivinyo le’ti tengeke, le’ti kumiwaka henhla ka šisese.” (Esaya 25:6) Swakudya a swi nge pfumaleki, hikuva Bibele yi ri: “Ku ta v̌a ni nḍalo ya koro la misav̌eni ni le tihlohlorini ta tinṭhav̌a.”—Pisalema 72:16.

Namuntlha, vo tala va tshama emikhukhwini ni le swidakanini, kumbe swa va tikela ku hakela xibalo. Van’wana a va na makaya naswona va etlela etlhelo ka mapato. Hi ku ya hi World Health Organization, vana va kwalomu ka 100 wa timiliyoni emisaveni hinkwayo a va na makaya. Kambe eParadeyisini leyi taka, un’wana ni un’wana u ta va ni kaya leri nga ta va ra yena. Rito ra Xikwembu ri ri: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona.”—Esaya 65:21.

Vo tala va tirha mintirho leyi va nga yi tsakeliki. Hakanyingi va tirha ntirho wo tika nkarhi wo leha, kambe leswi va swi kumaka a swi nyawuli. Kwalomu ka munhu un’we eka vanhu va ntlhanu emisaveni u hanya hi muholo lowu nga ehansi ka R1 800 hi lembe. Hambi swi ri tano, eParadeyisini leyi taka, vanhu va ta tsakela ntirho wa vona naswona va ta kuma mbuyelo lowunene eka wona. Xikwembu xa tshembisa: “Kutani v̌ahlawuriwa v̌a mina v̌a ta ṭakela ntiro wa mav̌oko ya v̌ona. V̌a nga ha tikarateli ŝa hav̌a.”—Esaya 65:22, 23.

Sweswi, swifo ni vuvabyi swi tele. Vo tala i mabofu. Van’wana va fe tindleve. Van’wana a va koti ku famba. Kambe eParadeyisini, vanhu va ta ntshunxeka eka swifo ni mavabyi. Yehovha u ri: “A ku nga v̌i na munhu l’a akeke . . . l’a nga ta ku: nḍa v̌abya.” (Esaya 33:24) Eka lava se va lamaleke, xitshembiso lexi kufumetaka mbilu xi ri: “Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka; ŝilema ŝi ta tlula kukota tinhlangu [hodzolume] kutani ririmi ra mbev̌ev̌e ri ta yimbelela hi ku ṭaka.”—Esaya 35:5, 6.

Namuntlha ku ni ku xaniseka ni ku vaviseka, mbitsi ni rifu. Kambe eParadeyisini emisaveni, swilo leswi hinkwaswo a swi nge vi kona. Ina, hambi ri ri rifu a ri nge he vi kona! Bibele yi ri: “Xikwembu hi xoxe xi ta va na vona, xi va Xikwembu xa vona . . . Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:3, 4.

Kutani ke, swi le rivaleni leswaku xitshembiso xa Yehovha xa Paradeyisi ya laha misaveni xi ta vula vutomi lebyinene eka vanhu. Kambe xana hi nga tiyiseka njhani leswaku yi ta ta? Yi ta fika rini, naswona njhani? Xana u fanele ku endla yini leswaku u va kona kwalaho?