Vutomi Lebyi A Hi Pfuleleke Byona

“WASWIVO! Hosi yi ta fuma hi ku tshembeka.” Bibele yi vulavula ngopfu hi switshembiso swo tsakisa swo fana ni leswi, malunghana ni leswi ku fuma ka Mfumo wa Yesu ku nga ta va xiswona. Xitshembiso xin’wana xi ri: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. . . . Ngati ya vona yi ta va ya risima ematihlweni ya yona.”—Esaya 32:1; Pisalema 72:12-14.

Xana u kona la nga alaka leswaku vanhu emisaveni hinkwayo va lava mfumo wo tano wo lulama? Yesu u khutaze valandzeri vakwe leswaku va tshama va ri karhi va anakanya hi Mfumo wa Xikwembu. U va dyondzise ku khongela va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

Vumbhoni Bya Leswaku Mfumo Wa Xikwembu Wu Tshinele

Xana hi ta swi tivisa ku yini leswaku Mfumo wolowo wu ta ta wu ta hlamula xikhongelo xexo? Valandzeri vo sungula va Yesu a va lava ku tiva sweswo kutani va vutise va ku: “Xi ta va xihi xikombiso xa vukona bya wena [tanihi Hosi leyi fumaka] ni xa makumu ya mafambiselo ya swilo?” Yesu u hlamule a ku: “Tiko ri ta pfukela tiko rin’wana . . . , kutani ku ta va ni ku kayivela ka swakudya ni ku tsekatseka ka misava ku suka endhawini yin’wana ku ya eka yin’wanyana. Swilo leswi hinkwaswo i ku sungula ka switlhavi swa maxangu.” Nakambe, u tlhele a va lemukisa a ku: “Rirhandzu ra vo tala ri ta hola hikwalaho ka ku engeteleka ka ku kala nawu.”—Matewu 24:3-12.

Vuprofeta byin’wana bya Bibele byi vula leswaku “emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu, va ri ni xivumbeko xa ku tinyiketela loku nga ni vukwembu kambe va tikomba va nga tshembeki eka matimba ya kona.”—2 Timotiya 3:1-5.

U nga ha pfumela leswaku nhlamuselo leyi ya ‘masiku yo hetelela’ yi fambisana kahle ni leswi endlekaka eminkarhini leyi hi hanyaka eka yona. Ku ni vumbhoni lebyi nga erivaleni bya leswaku sweswi i nkarhi wa ku hetiseka ka vuprofeta lebyi landzelaka bya Bibele: “Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:44.

Ku fuma ka Mfumo wa “Hosana ya Ku Rhula” ku ta susa hinkwaswo leswi nga ta kavanyeta ku rhula ka lava va nga ta pona ku hela ka misava leyi. (Esaya 9:6) Vuprofeta bya Bibele bya tshembisa: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yohane 2:17) Ku hela ka misava leyi ku ta pfula ndlela ya leswaku lava endlaka ku rhandza ka Xikwembu va kuma leswi swi lahlekeleke vanhu loko vatswari va hina vo sungula, Adamu na Evha, va xandzukela Xikwembu.

Vutomi Lebyi Nga Kusuhi

Yesu u te: “Eku tumbuluxeni hi vuntshwa, . . . N’wana wa munhu a tshama ehansi exiluvelweni xakwe lexi vangamaka.” (Matewu 19:28) Xana i yini ku ‘tumbuluxiwa hi vuntshwa’? Vuhundzuluxeri byin’wana byi tirhisa xiga lexi nge, “ku pfuxetiwa ka swilo hinkwaswo.” (New International Version) Rungula leri fanaka ra le Bibeleni ri swi vula ‘mafambiselo lama taka ya swilo.’ (Luka 18:30) Hi nkarhi wolowo Yesu u ta tirhisa vulawuri lebyi a byi nyikiweke hi Xikwembu bya ku va Hosana ya Ku Rhula hi ku va nyika vutomi lebyi nga heriki hinkwavo lava nga ta va ni ripfumelo exitlhavelweni xakwe xa nkutsulo.—Yohane 5:21.

Eka mafambiselo lamantshwa ya swilo ya Xikwembu, vanhu va ta kuma vutomi byo fana ni lebyi Xikwembu xi byi nyikeke Adamu na Evha loko xi va veka emisaveni ya Paradeyisi. Tsundzuka leswaku Xikwembu xi va lerise ku va ni vana, ina, ku “tata misava, [va] yi fuma.” Xiavelo xa vona a ku ri ku ndlandlamuxa Paradeyisi ya Edeni yi tata misava hinkwayo! (Genesa 1:28) Hilaha ku fanaka, loko misava leyi yi pfuxeleriwa yi ta tala hi vanhu lava poneke makumu ya misava leyi, vana va vona, ni lava a va file lava hi nkarhi wolowo va nga ta va va pfuxiwile. Vanhu volavo va ta hlanganyela eku endleni ka misava leyi yi va paradeyisi, hilaha Xikwembu a xi lava hakona eku sunguleni.

Xiya yin’wana ya mikateko leyi Bibele yi kombisaka leswaku yi ta tsakeriwa hi vanhu lava nga ta hanya emisaveni yoleyo yo lulama.—2 Petro 3:13.

Hambileswi switshembiso leswi kombisiweke eka matluka lawa swi vonakaka swi ri swinene ngopfu, kunene swi ta hetiseka eka “mafambiselo ya swilo lama taka.” Loko Yesu a khongela eka Xikwembu, u hlamusele leswi lavekaka leswaku vanhu va kuma mikateko leyi, u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Hi navela leswaku u va un’wana wa lava hi ku titsongahata va lavaka vutivi byebyo lebyi nyikaka vutomi.

[Marito lama tshahiweke exihlokweni lama nga eka tluka 7]

“Vito ra yena u ta thyiwa . . . Hosana ya Ku Rhula. Ku tala ka ku fuma ka vuhosana ni ku rhula a swi nge vi na makumu.”—Esaya 9:6, 7

[Xifaniso lexi nga eka tluka 8]

Vanhu Hinkwavo Va Ta Va Ni Makaya Ni Mintirho

“Kunene va ta aka tindlu va tshama eka tona . . . A va nge rimi kutani ku dya un’wana.”—Esaya 65:21, 22.

[Xifaniso lexi nga eka tluka 8]

Vanhu Hinkwavo Va Ta Kuma Swakudya Swo Tala

“Kunene misava yi ta humesa swimila swa yona.” “Ku ta va ni mavele yo tala emisaveni.”—Pisalema 67:6; 72:16.

[Xifaniso lexi nga eka tluka 8]

Ku Rhula Ka Misava Ku Ta Hundzela Ni Le Ka Swiharhi

“Mhisi yi ta tshama nkarhinyana ni xinyimpfana xa xinuna, yingwe yi ta etlela ni ximbutana, . . . kutani swi ta rhangeriwa hi mufana lontsongo.”—Esaya 11:6.

[Xifaniso lexi nga eka tluka 9]

Nyimpi Yi Ta Herisiwa, Ku Va Ni Ku Rhula Hilaha Ku Nga Heriki

“Tiko a ri nge tlakuseli tiko rin’wana banga, naswona a va nge he dyondzi nyimpi.” “Ku tala ka ku fuma ka vuhosana ni ku rhula a swi nge vi na makumu.”—Esaya 2:4; 9:7.

[Xifaniso lexi nga eka tluka 9]

Vanhu Lava Hi Va Rhandzaka Lava Feke Va Ta Pfuka

“Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [Yesu] kutani va huma.”—Yohane 5:28, 29.

[Xifaniso lexi nga eka tluka 9]

A Ku Nge He Vi Na Mavabyi Kumbe Ku Fa

“Ku hava munhu la tshamaka kona la nga ta ku: ‘Ndza vabya.’” “Rifu a ri nge he vi kona, . . . Swilo swo sungula swi hundzile.”—Esaya 33:24; Nhlavutelo 21:3, 4.