“Mahungu Lamanene” Lawa Va Lavaka Leswaku U Ma Twa

Loko Yesu a ri emisaveni vadyondzisiwa vakwe va te eka yena ivi va vutisa: “Xikombiso xa ku vuya ka wena ni xa ku hela ka minkarhi xi ta va xihi ke?” A hlamula a ku a ku ta va ni tinyimpi leti katsaka matiko yo tala, tindlala, mintungu, ku tsekatseka ka misava, ku andza ka ku homboloka, vadyondzisi va mavunwa va vukhongeri va hambukisa vo tala, valandzeri vakwe va ntiyiso va va lava vengiwaka ni ku xanisiwa, ni leswaku rirhandzu ra leswo lulama a ri ta hela eka vanhu vo tala. Nkarhi lowu swilo leswi a swi ta sungula ha wona ku humelela, a swi ta komba vukona lebyi nga vonakiki bya Kriste ni leswaku Mfumo wa le tilweni wu ta va wu ri ekusuhi. Lawa a ku ta va mahungu—mahungu lamanene! Kutani Yesu u engetele marito lawa tanihi xiphemu xa xikombiso: “Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:3-14.

Swona hi swoxe, swiendlakalo swa sweswinyana swa misava, swi bihile, kambe leswi swi vulaka swona, ku nga vukona bya Kriste, i swinene. Hikwalaho ke, Yesu u te: “Kutaku loko swilo sweswo swi sungula ku humelela, tsakani, mi yimisa tinhloko, hikuva ku kutsuriwa ka n’wina ku kusuhi.” (Luka 21:28) Swilo leswi swi sungule ku endleka hi lembe leri twarisiweke hinkwako-nkwako, 1914! Ri funghe makumu ya Minkarhi ya Vamatiko ni ku sungula ka nkarhi wo cinca ku suka eka mfumo wa vanhu ku ya eka Mfumo wa Kriste wa Malembe ya Gidi (Millenium).

Leswaku a ku ta va ni nkarhi wa ku cinca swi kombisiwile hi Psalma ya vu-110, tindzimana 1 na 2, na Nhlavutelo 12:7-12. Kwalaho ku kombisiwe leswaku Kriste a a ta tshama evokweni ra xinene ra Xikwembu etilweni ku kondza ku fika nkarhi wa ku ta kakwe ka vumbirhi. Kutani nyimpi etilweni a yi ta vangela leswaku Sathana a cukumeteriwa emisaveni, ku va ni khombo emisaveni, naswona Kriste a a ta fuma exikarhi ka valala vakwe hi nkarhi lowu nga hundziki rixaka rin’we. Ku herisiwa loku heleleke ka vuhomboloki a ku ta tisiwa hi “ku xaniseka lokukulu,” loku chaputaka enyimpini ya Armagedoni ni ku landziwa hi Mfumo wa Kriste wa Malembe ya Gidi ya ku rhula.—Matewu 24:21, 33, 34; Nhlavutelo 16:14-16.

“Twisisa leswi,” ku vula Bibele, “leswaku emasikwini ya makumu, ku ta fika minkarhi yo nonon’hwa. Hikuva vanhu va ta va lava tirhandzaka, va ta va lava rhandzaka mali ngopfu, ni ku tikurisa, ni ku titiva, ni ku rhukana; va ta va lava nga yingisiki vatswari va vona, lava nga riki na ku nkhensa, lava nga khongeriki; va ta va vanhu va tihanyi, lava nga riki na ku tsetselela, valumbeti, lava nga tikotiki, lavo leva, lava vengaka leswo lulama; va ta va timbabva, vanhu va futa, lava nga ni manyunyu, lava rhandzaka ku tiphina ku tlula ku rhandza Xikwembu. Va ta tiendla wonge hi loko va ri ni vukhongeri, kambe va ala matimba ya byona. Fambela kule ni vanhu lavo tano.” (2 Timotiya 3:1-5) Sweswi, van’wana va nga ha vula leswaku swilo leswi swi tshame swi humelela khale ematin’wini ya vanhu.

Kambe, hi laha van’wamatimu ni vahlamuseri va vulaka ha kona, emisaveni a ku si tshama ku va ni nkarhi wo fana ni lowu voniweke ku sukela hi 1914 ku ya emahlweni. Makhombo ma ve makulukumba ku tlula nkarhi wihi na wihi lowu hundzeke. Ku tlula kwalaho, loko ti ri ta swiendlakalo swin’wana swa “xikombiso” xa Kriste xa masiku ya makumu, timhaka leti ti fanele ku xiyiwa: Ku vuriwa emisaveni hinkwayo ka vukona bya Kriste ni Mfumo swi ve hi mpimo lowu nga hava ku ringanisiwa evurungurwini. Ku xaniseriwa ku chumayela a ku si tshama ku ringana ni loku ku weleke Timbhoni ta Yehova. Madzana yo tala ya vona ma dlayiwile emixaxeni ya nxaniso ya Hitler. Ku ta fika namuntlha Timbhoni ta Yehova ti le hansi ko siveriwa ematikweni yo tala, naswona eka man’wana ta khomiwa, ta pfaleriwa, ta xanisiwa ni ku dlayiwa. Leswi hinkwaswo i xiphemu xa “xikombiso” lexi Yesu a xi nyikeke.

Hi laha swi vhumbiweke ha kona eka Nhlavutelo 11:18, ‘matiko ma karihele’ Timbhoni leti tshembekaka ta Yehova, naswona leswi swi komba leswaku “vukari” bya Yehova byi ta kombisiwa ehenhla ka matiko wolawo. Tsalwa rolero ri vula leswaku Xikwembu xi ta “herisa lava herisaka misava.” Evurungurwini bya vanhu a ku si tshama ku va ni nkarhi lowu vuswikoti bya misava byo hlayisa vutomi byi xungetiweke ku fana ni namuntlha. Kambe, sweswi swa hambana! Tintlhari to tala ti tsundzuxe leswaku loko munhu o ya emahlweni a thyakisa misava, yi ta va leyi nga fanelangiki ku aka eka yona. Kambe Yehova u yi “endlile leswaku yi akiwa,” naswona u ta susa lava yi thyakisaka va nga si heta ku herisa ka vona ka misava.—Esaya 45:18.

MIKATEKO YA LA MISAVENI EHANSI KA MFUMO

Miehleketo yo va vanhu va tshama emisaveni tanihi vafumiwa va Mfumo wa Xikwembu yi nga vonaka yi nga tolovelekanga eka vapfumeri vo tala va Bibele lava tekaka hinkwavo lava poneke va ri lava nga etilweni. Bibele yi komba leswaku i nhlayo leyi hikiweke ntsena leyi yaka etilweni, ni leswaku lava nga ta hanya hi masiku emisaveni va ta va ntshungu lowukulu wa nhlayo leyi nga hikiwangiki. (Nhlavutelo 14:1-5; 7:9; Psalma 37:11, 29) Leswaku Mfumo wa Xikwembu ehansi ka Kriste wu ta tata misava ni ku yi fuma swi kombisiwe hi vuprofeta ebukwini ya Bibele ya Daniyele.

Mfumo wa Kriste kwalaho wu yimeriwe hi ribye leri khwexukaka emfun’weni wa Yehova lowu fanaka ni ntshava. Wu faya ni ku herisa xifaniso lexi yimelaka matiko ya matimba ya misava, naswona “ribye leri ngi ri himile xifaniso, ri hundzuka ntshava leyikulu, ri tata misava hinkwayo.” Vuprofeta byi ya emahlweni: “Eminkarhini ya tihosi leti, Xikwembu xa matilo xi ta pfuxa ku fuma loku nga ta ka ku nga onhaki, ni siku rin’we, kutani vuhosi bya kona byi nga ka byi nga hundzeli ka tiko rin’wana; ku ta seletela ni ku herisa ku fuma koloku hinkwako, kambe kona ku ta va kona hi laha ku nga riki na makumu.”—Daniel 2:34, 35, 44.

I Mfumo lowu ni ntshembo wa vutomi lebyi nga heriki, lowu seketeriwaka hi Matsalwa, emisaveni leyi basisiweke ni ku khavisiwa lowu Timbhoni ta Yehova ti rhandzaka ku ku byela ha wona. Timiliyoni leti hanyaka sweswi na timiliyoni to tala leti sweswi ti nga emasirheni ya tona va ta va ni nkarhi wo hanya eka wona hi masiku. Kutani ke, ehansi ka ku Fuma ka Kriste Yesu ka Malembe ya Gidi, kungu ra Yehova ro sungula ro vumba misava ni ku veka vatekani vo sungula va vanhu eka yona ri ta hetiseka. Paradeyisi leyi ya le misaveni yi nga ka yi nga phirhwi ni kan’we. Tanihi leswi Adamu a a averiwe ntirho entangeni wa Edeni, hikwalaho vanhu va ta va ni mintirho leyi tsakisaka eku hlayiseni ka misava ni vutomi bya swimilana ni swiharhi ehenhla ka yona. Va ta “tsakela ntirho wa mavoko ya vona.”—Esaya 65:22; Genesa 2:15.

Ku nga humesiwa matsalwa yo tala ku komba swiyimo leswi nga ta va kona loko ku hlamuriwa xikhongelo lexi Yesu a hi dyondziseke xona a ku: “A ku te ku fuma ka wena. Ku rhandza ka wena a ku endliwe misaveni, tanihi loko ku endliwa tilweni.” (Matewu 6:10) Hambi swi ri tano, leri a ri ve leri ringaneke sweswi: “Ndzi twa ni rito lerikulu leri humaka exiluvelweni ri ku: ‘Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta hlangula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.’ Kutani loyi a tshameke exiluvelweni a ku: ‘Vonani, ndzi endla swilo hinkwaswo swi va leswintshwa.’ A engeta a ku: ‘Tsala, hikuva marito lawa ma tshembekile, ma ni ntiyiso.’”—Nhlavutelo 21:3-5.

[Marito lama tshahiweke exihlokweni lama nga eka tluka 15]

“Minkarhi yo nonon’hwa” KAMBE “ku kutsuriwa ka n’wina ku kusuhi”