Mahungu Lamanene Lawa Ti Lavaka Leswaku U Ma Twa
LOKO Yesu a ri emisaveni, vadyondzisiwa vakwe va te eka yena ivi va n’wi vutisa: “Xi ta va xihi xikombiso xa vukona bya wena ni xa makumu ya mafambiselo ya swilo?” U hlamule hi ku vula leswaku a ku ta va ni tinyimpi leti katsaka matiko yo tala, tindlala, mintungu, ku tsekatseka ka misava, ku andza ka ku homboloka, vadyondzisi va vukhongeri bya mavunwa a va ta hambukisa vo tala, valandzeri vakwe va ntiyiso a va ta vengiwa ni ku xanisiwa ni leswaku rirhandzu ra leswo lulama a ri ta hela eka vanhu vo tala. Loko swilo leswi swi sungula ku humelela, a swi ta komba vukona lebyi nga vonakiki bya Kreste, ni leswaku Mfumo wa le tilweni wu ta va wu ri ekusuhi. Lawa a ku ta va mahungu—mahungu lamanene! Kutani Yesu u engetele marito lawa tanihi xiphemu xa xikombiso: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:3-14.
Swona hi swoxe, swiendlakalo swa sweswinyana swa misava, swi bihile, kambe leswi swi vulaka swona i swinene, ku nga vukona bya Kreste. Swilo leswi boxiweke laha henhla swi sungule ku endleka hi lembe leri twarisiweke hinkwako-nkwako ra 1914! Ri funghe makumu ya Minkarhi ya Vamatiko ni ku sungula ka nkarhi wo cinca ku suka eka mfumo wa vanhu ku ya eka Mfumo wa Kreste wa Gidi ra Malembe (Millennial).
Leswaku a ku ta va ni nkarhi wa ku cinca swi kombisiwile hi Pisalema ya vu-110, tindzimana 1 na 2, na Nhlavutelo 12:7-12. Kwalaho ku kombisiwe leswaku Kreste a a ta tshama evokweni ra xinene ra Xikwembu etilweni ku kondza ku fika nkarhi wa leswaku a va Hosi. Kutani nyimpi etilweni a yi ta vangela leswaku Sathana a cukumeteriwa emisaveni, ku va ni khombo emisaveni, naswona Kreste a a ta fuma exikarhi ka valala vakwe. Ku herisiwa loku heleleke ka vuhomboloki a ku ta tisiwa hi “nhlomulo lowukulu,” lowu nga ta chaputa enyimpini ya Armagedoni kutani wu landzeriwa hi Mfumo wa Kreste wa Gidi ra Malembe wa ku rhula.—Matewu 24:21, 33, 34; Nhlavutelo 16:14-16.
Bibele yi ri: “Kambe tiva leswi, leswaku emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu, va ri ni xivumbeko xa ku tinyiketela loku nga ni vukwembu kambe va tikomba va nga tshembeki eka matimba ya kona; kutani lava u va fularhela.”—2 Timotiya 3:1-5.
Van’wana va nga ha vula leswaku swilo leswi swi tshame swi humelela ematin’wini ya vanhu, kambe ntiyiso hi leswaku a swi nga humeleli hi mpimo lowu fanaka. Hilaha van’wamatimu ni vahlamuseri va vulaka hakona, emisaveni a ku si tshama ku va ni nkarhi wa swiendlakalo leswi voniweke ku sukela hi 1914 ku ya emahlweni. (Vona tluka 7.) Makhombo ma ve makulukumba ku tlula nkarhi wihi na wihi lowu hundzeke. Ku tlula kwalaho, loko ti ri ta swiendlakalo swin’wana swa xikombiso xa Kreste xa masiku ya makumu, timhaka leti ti fanele ku xiyiwa: Ku twarisiwa ka vukona bya Kreste ni Mfumo emisaveni hinkwayo, swi ve hi mpimo lowu nga hava ku ringanisiwa evurungurwini. Ku xaniseriwa ku chumayela a ku si tshama ku ringana ni loku ku weleke Timbhoni ta Yehovha. Madzana yo tala ya tona ma dlayiwile etikampeni ta nxaniso ta Manazi. Ku ta fika namuntlha, Timbhoni ta Yehovha ti yirisiwile etindhawini tin’wana, kasi etindhawini tin’wanyana ta khomiwa, ta pfaleriwa, ta xanisiwa ni ku dlayiwa. Leswi hinkwaswo i xiphemu xa xikombiso lexi Yesu a xi nyikeke.
Hilaha swi boxiweke hakona ka ha ri emahlweni eka Nhlavutelo 11:18, ‘matiko ma karihele’ Timbhoni leti tshembekaka ta Yehovha, naswona leswi swi komba leswaku “vukari” bya Yehovha byi ta kombisiwa ehenhla ka matiko wolawo. Tsalwa rolero ri vula leswaku Xikwembu xi ta “lovisa lava onhaka misava.” Evurungurwini bya vanhu a ku si tshama ku va ni nkarhi lowu vuswikoti bya misava byo hlayisa vutomi byi xungetiweke ku fana ni namuntlha. Kambe, sweswi swilo swi hundzukile! Tintlhari to tala ti tsundzuxe leswaku loko munhu o ya emahlweni a thyakisa misava, a swi nge he koteki ku tshama eka yona. Kambe Yehovha u yi “[vumbele] leswaku ku akiwa eka yona,” naswona u ta susa lava yi thyakisaka va nga si yi onhela makumu.—Esaya 45:18.
MIKATEKO YA LA MISAVENI EHANSI KA MFUMO
Miehleketo yo va vanhu va tshama emisaveni tanihi vafumiwa va Mfumo wa Xikwembu yi nga vonaka yi nga twali eka vapfumeri vo tala va Bibele lava anakanyaka leswaku hinkwavo lava poneke va le tilweni. Bibele yi komba leswaku i nhlayo leyi pimiweke ntsena ya lava yaka etilweni, ni leswaku lava nga ta hanya hi masiku emisaveni va ta va ntshungu lowukulu wa nhlayo leyi nga pimiwangiki. (Pisalema 37:11, 29; Nhlavutelo 7:9; 14:1-5) Leswaku Mfumo wa Xikwembu ehansi ka Kreste wu ta fuma misava hinkwayo swi kombisiwa hi vuprofeta bya buku ya Bibele ya Daniyele.
Kwalaho Mfumo wa Kreste wu yimeriwa hi ribye leri khwexukaka emfun’weni wa Yehovha lowu fanaka ni ntshava. Ri faya xifaniso lexi yimelaka matiko ya matimba ya misava, naswona “ribye leri ri beke xifaniso lexi, ri hundzuke ntshava leyikulu, ri tata misava hinkwayo.” Vuprofeta byi ya emahlweni byi ku: “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:34, 35, 44.
I Mfumo lowu ni ntshembo lowu seketeriwaka hi Matsalwa wa ku hanya hilaha ku nga heriki emisaveni leyi basisiweke yi tlhela yi saseka, lowu Timbhoni ta Yehovha ti rhandzaka ku ku byela ha wona. Timiliyoni ta vanhu lava hanyaka sweswi na timiliyoni to tala ta lava sweswi va nga emasirheni ti ta va ni lunghelo ra ku hanya ehansi ka wona hi masiku. Kutani ke, ehansi ka Mfumo wa Kreste Yesu wa Gidi ra Malembe, xikongomelo xa Yehovha xo sungula xo vumba misava ni ku veka vatekani vo sungula va vanhu eka yona xi ta hetiseka. Paradeyisi leyi ya le misaveni yi nga ka yi nga phirhi ni kan’we. Tanihi leswi Adamu a a averiwe ntirho entangeni wa Edeni, hikwalaho vanhu va ta va ni mintirho leyi tsakisaka eku hlayiseni ka misava ni vutomi bya swimilana ni swiharhi ehenhla ka yona. Va ta “tsakela ntirho wa mavoko ya vona hilaha ku nga heriki.”—Esaya 65:22; Revised Standard Version; Genesa 2:15.
Ma tele matsalwa lama kombaka swiyimo leswi nga ta va kona loko ku hlamuriwa xikhongelo lexi Yesu a hi dyondziseke xona a ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Hambiswiritano, a hi gimeteni hi tsalwa leri nge: “Kutani ndzi twa rito lerikulu ri huma exiluvelweni ri ku: ‘Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.’ Kutani Loyi a tshameke exiluvelweni a ku: ‘Waswivo, ndzi endla swilo hinkwaswo swi va leswintshwa.’ A tlhela a ku: ‘Tsala, hikuva marito lawa ma tshembekile, i ya ntiyiso.’”—Nhlavutelo 21:3-5.
[Marito lama tshahiweke exihlokweni lama nga eka tluka 15]
“Minkarhi yo nonon’hwa ku langutana na yona”
KAMBE “hi kona makumu ma nga ta fika”
[Xifaniso lexi nga eka tluka 18]
Netherlands
[Xifaniso lexi nga eka tluka 18]
Nigeria