Nkarhi Lowu Vanhu Hinkwavo Va Nga Ta Rhandzana

EDYONDZWENI yakwe ya le Ntshaveni, Yesu Kreste u vulavule hi nkarhi lowu vanhu hinkwavo va nga ta va va rhandzana. Loko a sungula bulo rakwe, Yesu u tshahe Pisalema 37, a ku: “Va tsaka lavo rhula: hikuva va ta dya ndzhaka ya misava.” Pisalema leyi ya Bibele yi tlhela yi hlamusela ndlela leyi xiyimo lexi xo tsakisa xi nga ta hetiseka ha yona, yi ku: “Vaendli va leswo biha va ta herisiwa; kambe lava rindzelaka Yehovha, va ta dya ndzhaka ya misava.”—Matewu 5:5; Pisalema 37:9; American Standard Version.

Mayana ku cinca ka risima swonghasi—loko hinkwavo lavo biha va susiwile emisaveni ku sale ntsena vanhu lava rhandzanaka! Xana sweswo swi nga endlekisa ku yini? Yesu u ye emahlweni ni dyondzo yakwe leyi dumeke a kombisa ndlela leyi swi nga ta endleka ha yona loko a hi dyondzisa ku khongela: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10, AS) Xiya ndhawu leyi ku rhandza ka Xikwembu ku nga ta endliwa eka yona. A ku nge endliwi etilweni ntsena. “Loko hi khongela hi ri, a ku endliwe ku rhandza ka wena emisaveni ku fana ni le tilweni,” tanihi laha xihloko lexi nga eka The Christian Century xi swi vekeke hakona.

Kutani ke, xana i yini Mfumo wa Xikwembu lowu Yesu a hi dyondziseke ku wu khongelela? Handle ko kanakana, i hulumendhe ya xiviri leyi fumaka yi ri etilweni. Hikokwalaho yi vitaniwaka “mfumo wa matilo.” (Matewu 10:7) Mufumi la hlawuriweke wa Mfumo lowu kumbe hulumendhe, i N’wana wa Xikwembu, Yesu Kreste.

Emahlweni swinene ka ku va Yesu a velekiwa hi Mariya, Esaya, muprofeta wa Yehovha u vhumbhile malunghana ni xiendlakalo lexi xo hlamarisa ku katsa ni leswi a swi ta landzela eku heteleleni: “Hi velekeriwe n’wana, hi nyikiwe n’wana wa jaha; naswona hulumendhe yi ta va ekatleni rakwe: kutani vito rakwe u ta thyiwa Xihlamariso, Mutsundzuxi, Xikwembu xa Matimba, Tatana la nga Riki na ku Hela, Hosana ya ku Rhula. Ku kula ka hulumendhe yakwe ni ku rhula a swi nge heli.” (Esaya 9:6, 7, AS) Endzhaku ka rifu ni ku pfuxiwa ka Yesu eku feni, u tshame ni Tata wakwe etilweni, a rindzele ku nyikiwa xileriso xa ku sungula ku fuma tanihi Hosi.—Pisalema 110:1, 2; Vaheveru 10:12, 13; Nhlavutelo 11:15.

Kutani ke, i yini lexi nga ta humelela eku heteleleni hi misava leyi leyi teleke rivengo? Xiya ndlela leyi Bibele yi xi hlamulaka ha yona xivutiso lexi. Muprofeta wa Xikwembu Daniyele u vhumbhile a ku: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, ni siku riṅwe, kutani v̌uhosi bya kona byi nga ka byi nga hunḍeli ka tiko riṅwana; ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.”—Daniyele 2:44.

Kahle-kahle, vuprofeta lebyi bya Bibele byi kombetela eka ku cinca lokukulu loku nga ta va kona etimhakeni ta vanhu. Mafambiselo lawa hinkwawo ya swilo, lama katsaka vanhu va misava leyi lava hi ku sihalala va alaka ku titsongahatela ku fuma ka Xikwembu, ma ta susiwa emisaveni! Anakanya hi leswi swi nga ta ma siva.

Vutomi eMisaveni Leyintshwa Ya Ku Lulama

Loko misava yi herisiwa, ku ta va ni vaponi. Bibele ya hlamusela: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yohane 2:17) Ina, lava va endlaka ku rhandza ka Xikwembu va ta pona ivi va nghena emisaveni leyintshwa, tanihi laha Nowa ni ndyangu wakwe va poneke hakona loko ku herisiwa misava ya siku ra vona. Muapostola Petro u tsarile a ku: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa [Xikwembu], naswona ku ta va ni ku lulama eka swona.”—2 Petro 3:5-7, 11-13.

Malunghana ni nkarhi lowu ku nga ta va ku lawula hulumendhe yin’we ntsena leyi nga Mfumo wa Xikwembu, Bibele ya tshembisa: “La’v̌o lulama v̌a ta fuma misav̌a, v̌a ta ṭhama ka yona hi masiku.” (Pisalema 37:29) Lavo lulama va ta tiphina hi vutomi emisaveni leyi basisiweke. Mayana nkarhi wo tsakisa swonghasi! Loko u nga si swi endla, hi kombela leswaku u anakanyisisa hi mikateko leyi hlamuseriweke eBibeleni leyi kombisiweke eka matluka yo sungula.

Xana a swi ku tsakisi ku tiva leswaku Muvumbi wa hina u tshembisa ku endla swilo swo tano swo hlamarisa leswaku ku vuyeriwa lava n’wi gandzelaka? Entiyisweni, lexi a xi ri xikongomelo xa Xikwembu loko xi tumbuluxa mpatswa wo sungula wa vanhu ivi xi wu veka emisaveni ya paradeyisi! Anakanya hi leswi Xikwembu xi va byeleke swona: “Tŝalanani, mi anḍa, mi tata misav̌a, mi yi fuma, mi fuma ni tinhlampfi ta lwandle, ni tinyanyana ta tilo, ni ŝiṅwana hikwaŝo le’ŝi hanyaka e misav̌eni.”—Genesa 1:27, 28.

Adamu na Evha a va fanele va va ni vana, naswona loko va ri karhi va kula a va ta hlanganyela entirhweni wo tsakisa wa ku hlayisa misava ya Paradeyisi. Anakanya hi ntsako wa ku kurisa mindzilakana ya ntanga wa Edeni loko ndyangu wa vanhu wu kula hi nhlayo! Swi le rivaleni leswaku a ku ri xikongomelo xa Xikwembu leswaku misava hinkwayo yi va paradeyisi. Xana xikongomelo lexi xi ta kala xi hetiseka? Hi nga tiyiseka leswaku xi ta hetiseka, hikuva i Xikwembu xi vuleke sweswo! Xa tshembisa: “Ndzi swi vurile; . . . ndzi ta tlhela ndzi swi endla.”—Esaya 46:11, NW; 55:11.

Xana u nga swi tsakela ku hanya hilaha ku nga heriki emisaveni ya Paradeyisi leyi hlamuseriweke eka matsalwa lama kombisiweke eka matluka yo sungula? Kavula, a hi mani na mani la nga ta pfumeleriwa ku hanya kona hilaha ku nga heriki. Ku ni swin’wana leswi lavekaka. I yini swilo swa kona?

Ku Fanelekela Ku Hanya Hilaha Ku Nga Heriki

Xo sungula, lava nga ta hanya emisaveni leyintshwa ya Xikwembu va fanele va dyondza ku rhandzana hilaha Xikwembu xi hi dyondzisaka hakona. Bibele yi ri: “N’wina mi dyondzisiwa hi Xikwembu leswaku mi rhandzana.” (1 Vatesalonika 4:9) Xana Xikwembu xi hi dyondzisa njhani ku rhandzana?

Xi tirhisa ngopfu-ngopfu Rito ra xona leri tsariweke, ku nga Bibele. Leswi swi vula leswaku loko hi ta hanya hilaha ku nga heriki, hi fanele hi amukela tidyondzo ta Xikwembu leti nga eBibeleni. Xichudeni xin’wana xa Bibele xa le Vuxeni xi te: “Ndzi wu langutele hi mahlongati nkarhi lowu vanhu hinkwavo va nga ta va va dyondze ku rhandzana hilaha Bibele yi tshembisaka hakona.”

Loko a khongela Tata wakwe, Yesu u boxe xilaveko xa nkoka. U te: “Leswi swi vula vutomi lebyi nga heriki‚ ku nghenisa ka vona vutivi ha wena, Xikwembu xi ri xin’we xa ntiyiso‚ ni loyi u n’wi rhumeke‚ Yesu Kreste.” (Yohane 17:3) Broxara leyi nga ni matluka ya 32 leyi nge I Yini Leswi Xikwembu Xi Swi Languteleke Eka Hina? yi ta ku pfuna leswaku u nghenisa vutivi lebyi. U nga tikumela kopi ya yona hi ku tata xiphephana lexi nga eka tluka 32 ivi u xi rhumela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka tluka 5.

[Box/Pictures on page 16-18]

Leswi Xikwembu Xi Swi Tshembisaka

Rirhandzu Ra Vumakwerhu eMisaveni Hinkwayo

“Xikwembu a xi hlawuli, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

A Ku Nge He Vi Ni Vugevenga Kumbe Nyimpi

“Kambe lavo biha va ta susiwa la misaveni.”—Swivuriso 2:22.

“[Xikwembu xi] herisa tinyimpi ku yisa emakun’weni ya misava.”—Pisalema 46:9.

Ndzalo Ya Swakudya Leswinene

“Ku ta va ni ndzalo ya koroni la misaveni ni le tinhlonhlorhini ta tintshava.”—Pisalema 72:16.

Ku Rhula Exikarhi Ka Vanhu Ni Swiharhi

“Hlolwa ri ta tshamisa ni xinyimpfana, yingwe yi ta etlela ni ximbutana, . . . swi byisiwa hi wandyisanyana.”—Esaya 11:6.

Ku Herisiwa Ka Vuvabyi, Ku Dyuhala Ni Rifu

“[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.

Ku Pfuxiwa Ka Varhandziwa Lava Feke eMisaveni

“Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [Yesu] kutani va huma.”—Yohane 5:28, 29.