Amukela Vutihlamuleri Bya Maendzo Yo Vuyela
1 Ku na swivangelo swo tala leswi susumetelaka ku hlanganyela hi xitalo hi laha swi kotekaka ha kona eku endleni ka maendzo yo vuyela. Hi lava ku wu hetisisa kahle ntirho lowu hi nyikiweke ku wu endla, hi laha Pawulo a endleke ha kona. (Mintirho 20:21, 24) Loko hi ri na vukheta loko hi tlhela hi endzela vanhu hinkwavo lava tsakelaka, hi ta hlayisa ripfalo lerinene loko hi lwela ku hetisisa vutirheli bya hina hi xitalo.—2 Tim. 4:5.
2 Vutivi Byi Hi Endla Hi Va Ni Vutihlamuleri: Mhaka ya leswaku vutomi byi le khombyeni yi fanele yi hi susumetela leswaku hi gingiriteka eku endleni ka maendzo yo vuyela. (Yoh. 17:3) Vutivi bya hina hi ku avanyisa ka Yehova ni ku tshinela ka Armagedoni swi fanele swi hi khutaza ku tsundzuxa lavo biha ni ku pfuna lava va ‘karhatekaka ni ku rila hikwalaho ka swilo leswo biha leswi endlekaka emisaveni.’ (Ezek. 9:4) Va fanele va ta hlanganisiwa ni nhlengeletano leyi vonakaka ya Yehova.
3 Vanhu va lava mpfuno leswaku va twisisa ntiyiso hi ku kongoma. (Mintirho 8:30, 31; 18:26) Lexi i xivangelo xin’wana xa leswaku hi amukela vutihlamuleri bya hina byo tlhelela ivi hi “cheleta” timbewu ta ntiyiso leti byariweke. Xana i nhluvuko wihi wa moya lowu a hi ta va hi wu endlile loko a ku nga ri leswaku van’wana va tlhelela nkarhi na nkarhi leswaku va ta hi pfuna leswaku hi kuma vutivi lebyi kongomeke bya Yehova ni swikongomelo swa Yena leswi hlamarisaka?—Mat. 7:12.
4 Kombisa Rirhandzu Ni Ku Chivirika: Ku endla maendzo yo vuyela i ndlela leyinene yo kombisa ku rhandza ka hina vanhu. Makwerhu un’wana la nga bofu, loyi a tirhaka tanihi phayona ra nkarhi hinkwawo u te: “Ku sukela loko ndzi khuvuriwile, a ndzi navela ku byela van’wana hi leswi ndzi swi dyondzeke eBibeleni. Ndzi tsakile hikuva ku lamala ka mina a ku ndzi sivelanga ku endla leswi. . . . Nakambe ndzi dyondze ku hlayisa rhekhodo ya yindlu yin’wana ni yin’wana exitarateni, naswona hi ndlela leyi, a a ndzi swi kota ku endla maendzo yo vuyela eka vanhu lava tsakelaka dyondzo ya Bibele.” Makwerhu loyi wa bofu hakunene wa swi kota ku vona hi mbilu ya yena, naswona a nga tshiketi ku endla maendzo yo vuyela ni ku kombisa rirhandzu ra yena ra Vukriste eka van’wana.
5 Loko hi endla maendzo yo vuyela, hakanyingi hi va ni nkarhi wo tirhisa Bibele hi ndlela leyinene ni ku nyikela swivangelo swa ntshembo lowu hi nga na wona. (1 Pet. 3:15) Leswi a swi pfuni n’wini wa muti ntsena kambe swi pfuxa ku chivirika ni ku tlangela ka hina ntiyiso. Ku endla maendzo yo vuyela swi tisa ntsako lowu wu nga taka wu nga kumiwi hi ndlela yin’wana. Naswona nkoka wa ntsako wolowo a wu fanelanga wu hela. Wu nga hamba wu pfuxetiwa hi ku endla ka hina maendzo yo vuyela hi ku chivirika.—Swiv. 10:22.
6 Vutihlamuleri bya hina byo endla maendzo yo vuyela hi fanele hi byi teka byi ri mhaka leyikulu. Vanhu va Yehova a va va tsoni van’wana leswi swi nga swinene, naswona leswi hi nga swi vona hi ntirho wa hina wa misava hinkwayo elembeni ra ntirho ra 1991. (Swiv. 3:27) Hi endle maendzo yo vuyela ya 344 926 952 naswona hi fambise tidyondzo ta le kaya ta Bibele ta 3 947-261. A a ku ri na vadyondzisiwa lavantshwa va 300 945 lava tinyiketeleke eka Yehova naswona va khuvuriwile. Ku andza loku loku hlamarisaka a ku ta va ku nga humelelanga loko a ku nga ri ku rhandza ka hina ku amukela vutihlamuleri byo endla maendzo yo vuyela.—1 Vates. 2:8.