Minhlangano Ya Ntirho Ya January

Vhiki Leri Sungulaka Hi December 30

Risimu 201

5 min: Switiviso swa bandlha ni Switiviso leswi faneleke leswi humaka eka Vutirheli Bya Hina Bya Mfumo.

20 min: “Xana Wa Yi Tlangela Nhlengeletano Ya Yehova Ya Laha Misaveni?” Nkulumo leyi sekeriweke eka Xihondzo xo Rindza, November 1, 1991, matluka 30-1.

20 min: “Hinkwavo A Va Tive Leswaku Nsirhelelo Wa Misava Hinkwayo Wu Tshinele.” Endzhaku ka tinhlamuselo to koma ta masungulo, kambisisa ndlela yin’wana ni yin’wana ivi u kombisa matirhelo ya yona hi vahuweleri lava lunghiseleleke kahle loko nkarhi wu pfumela. Loko swi koteka, swi nga va swinene ku va ni muntshwa a kombisa Ndlela No. 2. Ndlela No. 3 yi pfumelela muhuweleri ku siya mianakanyo leyi tsakisaka ya Matsalwa emianakanyweni ya n’wini wa muti. Hi ku hiseka khutaza vamakwerhu ku tirhisa xin’wana xa swingheniso leswi ringanyetiweke eka tluka 4 ni yin’wana ya tindlela leti.

Risimu 30 na xikhongelo xo pfala.

Vhiki Leri Sungulaka Hi January 6

Risimu 126

5 min: Switiviso swa bandlha.

10 min: “Ku Tshinelela Loku Tirhaka Ko Lunghiselela Ntirho Wa Nsimu.” Bula hi xihloko lexi ni vayingiseri, kutani u kombela vahuweleri vanharhu kumbe mune lava averiweke ka ha ri emahlweni ku nyikela tinhlamuselo leti kongomeke ta tindlela leti ku tshinela loku ku nga va pfunaka ha tona. Hi xikombiso, va nga ha hlamusela timhaka to hambana-hambana, tindlela leti mhaka yi nga fanelanisiwaka ha yona ni nsimu ya kwalaho, ku cinca-cinca, kumbe leswaku ku tshinelela loku ku endla vahuweleri va hlawula mhaka leyi va titwaka va ntshunxekile ku yi nyikela. Khutaza vahuweleri ku ta na kopi ya vona ya Vutirheli Bya Hina Bya Mfumo eminhlanganweni ya ntirho wa nsimu.

18 min: “Swingheniso Swo Endla Vini Va Miti Va Yingisela.” Hi ku komisa kambisisa xiyimo xa nsimu ya kwalaho. I timhaka tihi leti nga ta nkoka eka vini va miti? Kambisisa xingheniso ni mhaka leyi hakanyingi yi nga humelelaka kwalaho. Vana ni muhuweleri la lunghiseleleke kahle a kombisa mhaka leyi ni ku nyikela buku leyi nge Ntiyiso. Muhuweleri u fanele a vula mhaka hi laha yi kombisiweke ha kona exihlokweni. Kutani muntshwa la nghenaka xikolo a nga kombisa mhaka leyi fanaka ivi a gimeta hi ku nyikela timagazini eka munhu la tsakelaka. Khutaza hinkwavo ku ringeta ndlela leyi entirhweni wa nsimu.

12 min: “Medical Document” na “Identity Card.” Matsalani u endla leswaku makhadi ma nyikiwa swirho leswi khuvuriweke swa bandlha. Loko u lunghiselela, pfuxeta papila ra January 1, 1990, leswaku u kuma tinhla leti kongomeke leti fanelaka swilaveko swa kwalaho. Kandziyisa leswaku vanhu vambirhi lava sayinaka tanihi timbhoni va fanele va xiyisisa loko papila ri sayiniwa ivi va ri sayina hi voxe. Vulavurisana ni vayingiseri ehenhleni ka mhaka leyi swiletelo swi faneleke swi landzeriwa hi vukheta ha yona ku endlela leswaku makhadi ma tirha hi laha ku humelelaka swinene leswaku ma hi sirhelela. Vakulu va nga landzelerisisa endzhaku ka nhlangano hi laha va endleke ha kona n’wexemu. Mi nga hlweli ku tata makhadi ni ku ma sayina hi laha ku faneleke.

Risimu 130 na xikhongelo xo pfala.

Vhiki Leri Sungulaka Hi January 13

Risimu 176

10 min: Switiviso swa bandlha na Marungula Ya Swa Mfumo. Katsa xiviko xa timali ni swibumabumelo swa minyikelo.

15 min: Xana Ntirho Wa Vuphayona I Wa Mina? Etikweni leri kwalomu ka tiphesente ta 7 ta vahuweleri hinkwavo i maphayona ya nkarhi hinkwawo. Nyikela tinhlayo ta kwalaho leswaku mi pimanisa. Xana vo tala va hina, ku katsa ni vantshwa lava ha ku hetaka xikolo xa le henhla, hi nga nghenela ntirho wa nkarhi hinkwawo? Vulavurisana ni maphayona manharhu ya nkarhi hinkwawo, ngopfu-ngopfu muntshwa, manana wa ndyangu ni munhu loyi a tshikeke ntirho hikwalaho ka ku dyuhala. (Loko maphayona ya nkarhi hinkwawo ma nga ri kona, maphayona ya nkarhinyana kumbe vahuweleri lava phayoneke va nga ha tirhisiwa.) Xiyisisa timhaka ta timali. I muxaka muni wa ntirho wa nkarhinyana lowu nga kona endhawini ya ka n’wina? Xana hinkwavo va swi kotisa ku yini ku hakela swikweleti swa vona? I ku cinca kwihi ka mukhuva wo xava loku va ku endleke? Kambisisa xiyimiso xo hlangavetana ni tiawara leti lavekaka. Xana va kona lava nga ni swiphiqo swa rihanyo? Va swi hlurisa ku yini? I mintlhontlho yihi yin’wana leyi va yi hluleke? Mimbulavurisano yi fanele yi va leyinene ni leyi khutazaka. Endla xikombelo lexi kufumelaka eka vayingiseri leswaku va kambisisa xiyimo xa munhu hi xiyexe ku vona loko vo tala va ta swi kota ku nghenela ntirho wa nkarhi hinkwawo.

20 min: Ndlela Leyi Vatswari Lava Nga Voxe Va Nga Pfunaka Vana Va Vona Ha Yona. Xingheniso xo koma lexi landzeriwaka hi nkombiso wa manana la nga ni vana vambirhi va lunghiselela ntirho wa nsimu. Mindyangu leyi nga ni mutswari un’we yi tele enhlengeletanweni namuntlha ku tlula rini na rini. Ndlela leyi manana na kokwana wa Timotiya va ngheniseke ntiyiso eka yena yi nyika xikombiso lexinene lexi vatswari hinkwavo va nga xi landzelaka. (2 Tim. 1:5; 3:14, 15) Nkombiso: Manana, nhwana wa kondlo-a-ndzi-dyi ni nhwana lontsongo va tshamile etafuleni ekhixini, va hetile ku lalela. Manana u vula leswaku va nga si hlantswa swibya va fanele va kambisisa timhaka ta vona ta nsimu naswona yena u ta va n’wini wa muti. Nhwana lontsongo u hlawula xingheniso eka tluka 4 ra Vutirheli Bya Hina Bya Mfumo ivi a xi vula eka mana wa yena. Manana u n’wi bumabumela swinene hi ntirho wa yena lowunene ivi a n’wi kombela ku hlaya tsalwa leri Sosayiti yi ri ringanyeteke. Nhwana lontsongo hi ku hatlisa u langutisa Esaya 9:6, 7 ivi a yi hlaya. Kutani manana u vutisa nhwana loyi lonkulu ndlela leyi a nga ta nyikela buku ha yona. Nhwana u hlawula ndlela eka tluka 1 ra Vutirheli Bya Hina Bya Mfumo ivi a yi vula eka mana wa yena. Manana wa n’wi bumabumela ivi a khutaza vanhwana havambirhi ku titoloveta xingheniso ni ndlela yoleyo leswaku va nyikela buku entirhweni wa nsimu. Vanhwana va byeriwa leswaku va ta titoloveta nkarhinyana wo leha kutani hi kona va nga ta hlantswa swibya. Nkulu u gimeta xiphemu hi ku khutaza mindyangu hinkwayo ebandlheni ku nyikela mpfuno wa rirhandzu eka vana va vona.

Risimu 183 na xikhongelo xo pfala.

Vhiki Leri Sungulaka Hi January 20

Risimu 192

15 min: Nkulu u tamela switiviso swa bandlha ivi a kambisisa swilaveko swa bandlha. Loko nkarhi wu pfumela, bulani hi tinhla to hambana-hambana to vulavurisana leti humaka eka timagazini ta sweswinyana. Hlawula lowu wu nga ta hlangana kahle ni xin’wana xa swingheniso ni tindlela leti ringanyetiweke enkandziyisweni wa Vutirheli Bya Hina Bya Mfumo. Kutani vana ni muhuweleri la lunghiseleleke kahle a nyikela mhaka leyi teleke a tirhisa xingheniso ni ndlela ya kona, a nyikela timagazini eka munhu la tsakelaka. Kombisa leswaku hi ku nghenisa vanhu ebulwini ni ku tirhisa timhaka leti ringanyetiweke, a swi nonon’hwi ku vona vanhu lava tsakelaka.

18 min: “Amukela Vutihlamuleri Bya Maendzo Yo Vuyela.” Swivutiso ni tinhlamulo. Khutaza swinene hinkwavo ku hlanganyela hi xitalo eku endleni ka maendzo yo vuyela. Khutaza hinkwavo ku tlhela va ta vhiki leri landzelaka laha Nhlangano wa Ntirho wu nga ta bula hi leswi faneleke ku vuriwa eka riendzo ro vuyela.

12 min: Bulo ra “Abortion” leri humaka eka Reasoning, matluka 25-6. Endzhaku ka xingheniso xo koma emhakeni, lexi kombisaka ndlela leyi swi nga etimhakeni ha yona namuntlha ni ndlela leyi swi khumbaka timiliyoni ta vanhu swinene, tivisa xiendlakalo xa makwerhu wa xisati la fambisaka dyondzo ya Bibele. Xichudeni lexintshwa xa Bibele xi tivisa makwerhu wa xisati leswaku xi khumbeka swinene hi ku va xi tikile. Xi hlamusela ndlela leyi xi karhatekaka ha yona, tanihi leswi xiyimo xa timali xa ndyangu xi nga riki xinene. Maxaka ya xona ya misava ma xi khutaza leswaku xi xixa nyimba xikan’we-kan’we. Makwerhu wa xisati u ringanyeta leswaku va pfula ebukwini leyi nge Reasoning ivi va kambisisa Matsalwa ku vona ndlela leyi Yehova a langutaka vutomi bya n’wana la nga siki velekiwaka ha yona ni leswaku xana u languta ku xixa nyimba ku fanerile. Xo sungula va kambisisa nhlamuselo ya ku xixa nyimba. Kutani va bula hi swivutiso, matsalwa ni tinhlamuselo tin’wana eka matluka 25-6. Makwerhu loyi wa xisati u fanele ku pfuna xichudeni ku twisisa ni ku tlangela ku hlawuleka ka vutomi.

Risimu 164 na xikhongelo xo pfala.

Vhiki Leri Sungulaka Hi January 27

Risimu 92

10 min: Switiviso swa bandlha. Khutaza vahuweleri ku endla makungu ka ha ri sweswi yo phayona nkarhinyana hi March na April. Khutaza mindyangu, kun’we ni vahuweleri lavantshwa lava nga ta va va wisile hi March kumbe hi April, ku vona malunghiselelo lawa va nga ma endlaka leswaku va va ni xiphemu lexikulu entirhweni wa nsimu.

20 min: “U Ta Ku Yini Loko U Tlhelela?” Bula ni vayingiseri naswona u va ni vahuweleri lava lunghiseleleke ku kombisa swiringanyeto eka tindzimana hi laha swi kambisisiwaka ha kona. Minkombiso leyi yo koma yi fanele yi pfuxetiwa ka ha ri na nkarhi.

15 min: “Ku Lomba Vakriste-kuloni Mali.” Nkulumo hi nkulu, eka xihloko lexi humaka eka Xihondzo xo Rindza, October 15, 1991, matluka 25-8.

Risimu 147 na xikhongelo xo pfala.