Xana Wa Yi Tlangela Nhlengeletano Ya Yehova Ya Laha Misaveni?

LANGUTA dayimani leyi tsemiweke kahle yo saseka, kutani u vona yini? Ribye ra nkoka leri hakunene ku nga xilo xo saseka. Sweswi languta dayimani yoleyo hi microscope, kutani u vona yini? Kumbexana ku na ku halahaleka, ku pandzekela, swilo swo karhi leswi nga kona kumbe ku onhaka kun’wana.

Xana u nga onha kumbe ku cukumeta dayimani hikwalaho ka leswi yi vonakisaka xiswona eka microscope? Niswitsongo! Suka eka microscope, kutani wa ha ta tlangela ku saseka ni ku vangama loku tlurisaka loku yi endlaka yi hlawuleka exikarhi ka rifuwo rin’wana.

Tanihi dayimani, nhlengeletano ya Yehova ya laha misaveni yi hlawulekile hi tindlela to tala. A ku na nhlengeletano yin’wana emisaveni leyi tsakelaka xinghana xa le kusuhi ni Muvumbi. Eka papila ro ya eka Vakriste va lembe xidzana ro sungula, lava tsakeleke ntshembo wa le tilweni, muapostola Petro u kombetele eka vuxaka lebyi byo hlawuleka. U te: “Mi rixaka leri hlawuriweke, mi vaprista va Hosi, mi tiko leri hlawulekeke, vanhu lava nga va Xikwembu.” (1 Petro 2:9) Namuntlha ntshungu lowukulu wa “tinyimpfu tin’wana,” leti nga ni ntshembo wo hanya hi laha ku nga heriki emisaveni, wu joyine masalela ya “tiko leri hlawulekeke” eku gandzeleni ka Xikwembu. (Yohane 10:16) Yi hlanganile, mintlawa leyimbirhi yi vumba nhlengeletano leyi xiyekaka tanihi rifuwo ro saseka leri vangamaka.

Papalata Ku Languta Van’wana Hi Tihlo Ra Ku Xopaxopa

Kambe hi fanele hi xiya leswaku nhlengeletano leyi ya misava hinkwayo yi vumbiwa hi vanhu lava nga hetisekangiki. Kutani ke, a ku ta humelela yini loko hi yi languta hi microscope yo fanekisela? Ina, a hi ta kuma mimboyamelo ya swidyoho ni ku tsana ka munhu hi xiyexe eka vanhu lava nga xiphemu xa yona.—Varhoma 3:23.

Muapostola Pawulo u pfumerile leswaku u ni ku tsana ko tano. U te: “Loko ndzi navela ku endla leswo lulama, leswo biha na swona swi kona eka mina.” (Varhoma 7:21) Mukriste un’wana ni un’wana u tokota nyimpi leyi fanaka. Hinkwavo va endla swihoxo. Ku tlula kwalaho, minkarhi yin’wana vo tala va xaniseka hikwalaho ka swihoxo swa van’wana. Xana hi fanele hi hela matimba kumbe hi siringeka loko ku tsana ni ku nga hetiseki ka Mukriste-kulobye ku paluxeka? Xana sweswo swi fanele swi herisa ku tlangela ka hina ka nhlengeletano ya Xikwembu? Doo! Ematshan’weni ya sweswo, hi fanele hi papalata ku xopaxopa ku tlurisa mpimo, hi tshika ku languta ku nga hetiseki ka vanhu van’wana.

Matsalwa ma longoloxa timfanelo to tala leti a ti ta fungha lava moya lowo kwetsima wu tirhaka eka vona. Tin’wana ta tona i “rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma.” (Vagalatiya 5:22, 23) Ku hambana ni sweswo, vukhongeri, politiki ni minhlangano ya mabindzu ya misava hakanyingi swi kombisa leswi Bibele yi swi kombisaka tanihi ntirho wa nyama: “rivengo, ni timholovo, ni vukwele, ni ku kariha, ni ku tirhandza, ni ku avana, ni ku lwetana, ni mavondzo, ni vudakwa, ni makampfu, ni swo kota sweswo.” (Vagalatiya 5:20, 21) Xisweswo, tanihi dayimani leyi vangamaka exikarhi ka maribye lama tolovelekeke, vanhu va Yehova va hlawulekile exikarhi ka misava leyi boleke emoyeni.—Matewu 5:14-16.

“Mi Va Van’we Eku Anakanyeni”

Xivumbeko xin’wana lexi xiyekaka xa dayimani i ku tiya ka yona ni xivumbeko xa yona xa athomo. Hi laha ku fanaka, nhlengeletano ya Yehova ya le misaveni yi kombisa vun’we lebyi nga ringanisekiki eka tidyondzo ni vumakwerhu. Lava va nga xiphemu xa nhlengeletano yoleyo va tirhisa xitsundzuxo lexi kumekaka eBibeleni eka 1 Vakorinto 1:10, lexi nge: “Ndza mi khongotela vamakwerhu, hi vito ra Hosi ya hina Yesu Kriste, ndzi ri: Twananani hinkwenu eku vulavuleni. Ku nga tshuki ku va ni ku avana exikarhi ka n’wina, kambe mi hlangana mi va van’we eku anakanyeni ne makungwini ya n’wina.”

Nakambe Timbhoni ta Yehova ti hlule xihlawu-hlawu ni ku tikurisa ka vutiko. Hi ku va ni “vutlhari byo ta hi le henhla,” a va ‘na ku ya hi nghohe.’ (Yakobo 3:17) Hi yisa ku dzuneka eka Yehova eka leswi a swi kombiseke emhakeni leyi hi ku tirhisa nhlengeletano ya yena leyi vumbiweke hi vanhu lava nga hetisekangiki.

Ku hambana na sweswo, magazini lowu nge The Christian Century, loko wu vulavula hi lembe ra 1990, wu vule leswaku “misava a yi vonaka yi avanile ku tlula rini na rini hi mintlawa ya vukhongeri na hi minsusumeto ya rixaka ni ya vutiko leswi hlanganeke swinene ni vupfumeri bya vukhongeri. Ku suka eIndia ku ya eYuropa ni ku suka eMiddle East ku ya ePacific, vukhongeri byi pfangane ni ku tinyiketela eka rixaka ni vutiko—laha vuyelo bya kona hakanyingi ku nga ku hundzuka-hundzuka ka politiki.” Entiyisweni, lava navelaka ku tirhela Xikwembu va nga hundzukela ntsena eka nhlengeletano yin’we leyi nga ni moya ni nkateko wa Yehova.

‘Ndzi Endle Mombo Wa Wena Tanihi Dayimani’

Dayimani i xilo xo tiya xa ntumbuluko eka leswi tiviwaka hi vanhu. Bibele yi kombetela eku tirhiseni ka dayimani eku haleni kumbe eku vatleni ka xilo xo tiya. (Yeremia 17:1) Nakambe xiya marito ya Yehova eka Ezekiyele: “V̌ona nḍi ta nonoṅhwisa ngohe ya wena leŝaku u lwa ni tingohe ta v̌ona nḍi ta honokisa mombo wa wena lešaku u kota ku lwa ni mimombo ya v̌ona, nḍi ta ku nonoṅhwisa, nḍi ku ringanisa ni daiman.” (Ezekiel 3:8, 9) Yehova u nyike Ezekiyele ku tiyimisela ko tiya ko fana ni ka dayimani leswaku a ta kota ku profeta eka vanhu lava nga yingisiki.—Ezekiel 2:6.

Hi laha ku fanaka namuntlha, Yehova u nyike vanhu va yena ku tiya ko fana ni ka dayimani leswaku va hlangavetana ni ku kanetiwa lokukulu. Timbhoni ta Yehova ti tiyisele ku yirisiwa ka le nawini, ku hlaseriwa hi mintlawa, ku dlayiwa loku nga riki enawini, ku biwa, ku pfaleriwa emakhotsweni loku nga riki nawini, ku xanisiwa hambi ku ri ku dlayiwa. Hambi swi ri tano, va kombise ripfumelo ra vona ri ri leri nga onhiwiki.

“Malanḍa Ya Mina Ma Ta Ṭaka”

Bibele yi vhumbe nkarhi lowu vanhu a va ta va ni ‘nghohe ya vukhongeri’ kambe va “ala matimba ya byona.” (2 Timotiya 3:1, 5) Phepha-hungu rin’wana ri vike leswaku “Maprotestente, Rhoma Khatoliki na Vayuda va vilerisiwa ngopfu hi ku ehla loku nga kona” etikerekeni ni le masinagogweni ya vona. Hi tlhelo rin’wana Timbhoni ta Yehova i swichudeni leswi hisekaka swa Bibele. Hi tinhlayo leti kulaka, lavatsongo ni lavakulu, vavanuna ni vavasati, hinkwavo ka vona va va kona nkarhi hinkwawo eka minhlangano ya vhiki na vhiki. Papila leri rhumeriweke eka phepha-hungu ri vulavule hi vona ri ku “vukhongeri bya vona i xilo xa nkoka lexi va nga na xona, naswona lexi va vilerisaka ngopfu i ku byi avela van’wana.”

Langutelo ro tano ri endla nhlengeletano ya Yehova yi yima ku fana ni dayimani yo xonga. Naswona xichavo xi ya eka La tiyisaka ni ku letela vanhu lava nga hetisekangiki hi ku tirhisa moya wakwe wo kwetsima.

Muprofeta Esaya u vhumbile: “Hikwalaho Hosi Yehova a v̌ulav̌ulaka ŝeŝo, a ku: Maŝivo, malanḍa ya mina ma ta dya . . . maŝiv̌o, malanḍa ya mina ma ta nwa . . . maŝiv̌o, malanḍa ya mina ma ta ṭaka, maŝiv̌o, malanḍa ya mina ma ta yimbelela hi ku ṭaka ka timbilu ta vona.”—Esaya 65:13, 14.

Namuntlha hi vona ku hetiseka ka vuprofeta lebyi. Xikwembu xi khathalela vanhu va xona hi ndlela leyi hlamarisaka! Kutani ke, loko u hlanganyela na vona, u nga pfumeleli mianakanyo leyi hoxeke leswaku yi ku tekela ntsako wa wena. Languta eka mhaka hinkwayo kutani u tsundzuka: A ku na nhlengeletano yin’wana emisaveni leyi tsakelaka nkhathalelo wo hlawuleka ni nsirhelelo wa Xikwembu. U nga hupi lunghelo ra wena ro va xiphemu xa yona.