Tshama U Hlayisekile Tanihi Xirho Xa Nhlengeletano Ya Xikwembu

“V̌ito ra Yehova i khokholo ro tiya, l’a lulameke o tšhav̌ela ka rona, [a sirheleriwa, NW].”—SWIVURISO 18:10.

1. Hi ku ya hi xikhongelo xa Yesu, hi xihi xiyimo xo nonon’hwa lexi Vakreste va nga eka xona?

EMAHLWENINYANA ka ku fa kakwe, Yesu u khongelele valandzeri vakwe eka Tata wakwe wa le tilweni. Hi nkhathalelo wa rirhandzu u te: “Ndzi va nyike rito ra wena, kambe misava yi va vengile, hileswi va nga riki xiphemu xa misava, tanihi leswi na mina ndzi nga riki xiphemu xa misava. Ndza ku kombela leswaku u nga va susi emisaveni, kambe u va rindza hikwalaho ka lowo homboloka.” (Yohane 17:14, 15) Yesu a a swi tiva leswaku misava a yi ta va ndhawu ya khombo eka Vakreste. A yi ta kombisa rivengo leri yi nga na rona eka vona hi ku va hembela ni ku va xanisa. (Matewu 5:11, 12; 10:16, 17) Nakambe a yi ta va xihlovo xa manyala.— 2 Timotiya 4:10; 1 Yohane 2:15, 16.

2. Vakreste va nga yi kuma kwihi ndhawu ya vuhlayiseki bya moya?

² Misava leyi a yi ta venga Vakreste i vanhu lava hambukeke eka Xikwembu, lava lawuriwaka hi Sathana. (1 Yohane 5:19) Misava leyi i yikulu swinene eka vandlha ra Vukreste, naswona Sathana u ni matimba swinene ku tlula munhu wihi ni wihi wa nyama. Hikwalaho, rivengo ra misava a hi mhaka ya matlangwana. Xana valandzeri va Yesu va nga byi kuma kwihi vuhlayiseki bya moya? Nhlamuselo leyi kumekaka eka nkandziyiso wa Xihondzo xo Rindza (xa Xinghezi) wa December 1, 1922 yi ringanyete nhlamulo yi ku: “Sweswi hi le sikwini ro biha. Ku pfuke nyimpi exikarhi ka nhlengeletano ya Sathana ni nhlengeletano ya Xikwembu. I nyimpi leyikulu.” Enyimpini leyi, nhlengeletano ya Xikwembu i ndhawu yo hlayiseka hi tlhelo ra moya. Rito leri nge “nhlengeletano” a ri kumeki eBibeleni, naswona le ndzhaku hi va-1920, “nhlengeletano ya Xikwembu” a ku ri xiga lexintshwa. Kutani, xana nhlengeletano leyi i yini? Naswona xana hi nga byi kuma njhani vusirheleri eka yona?

Nhlengeletano Ya Yehovha

3, 4. (a) Hi ku ya hi xihlamusela-marito xin’wana ni Xihondzo xo Rindza, nhlengeletano i yini? (b) Xana xinakulobye xa Timbhoni ta Yehovha ematikweni hinkwawo xi nga vuriwa nhlengeletano hi ndlela yihi?

³ Nhlengeletano i “ntlawa lowu hlelekeke,” hi ku ya hi Concise Oxford Dictionary. Hikwalaho, ha swi twisisa leswaku tanihi leswi vaapostola va hleleke Vakreste va lembe-xidzana ro sungula va va mavandlha etindhawini to karhi ehansi ka vulanguteri bya huvo leyi fumaka eYerusalema, swi fanerile ku vulavula hi ‘nhlangano wolowo wa vamakwerhu’ tanihi nhlengeletano. (1 Petro 2:17) Timbhoni ta Yehovha namuntlha ti hleriwe hi ndlela leyi fanaka. Vun’we bya ntlawa wa lembe-xidzana ro sungula byi tiyisiwe hi “tinyiko leti nga vanhu,” to tanihi “varisi ni vadyondzisi.” Van’wana va vona a va endzela mavandlha yo hambana-hambana, kasi van’wana a va ri vakulu emavandlheni ya ka vona. (Vaefesa 4:8, 11, 12; Mintirho 20:28) “Tinyiko” leti fanaka ti tiyisa vun’we bya Timbhoni ta Yehovha namuntlha.

⁴ Nkandziyiso wa Xihondzo xo Rindza (xa Xinghezi) wa November 1, 1922, wu vule leswi landzelaka hi rito leri nge “nhlengeletano”: “Nhlengeletano i ku hlangana ka vanhu hi xikongomelo xo hetisisa kungu leri endliweke.” Xihondzo xo Rindza xi ye emahlweni xi hlamusela leswaku ku vitana Timbhoni ta Yehovha nhlengeletano a swi ti endlanga “mpambukwa hi ku ya hi matirhiselo ya rito leri, kambe swi vula ntsena leswaku Swichudeni swa Bibele [Timbhoni ta Yehovha] swi ringeta ku hetisisa swikongomelo swa Xikwembu, swi endla hilaha Hosi yi endlaka swilo hinkwaswo hakona, hi ku hleleka.” (1 Vakorinto 14:33) Muapostola Pawulo u kombise leswaku Vakreste va le sikwini ra yena hi ku fanana a va endla swilo hi nhleleko. U fanise xinakulobye xa Vakreste lava totiweke ni miri wa munhu, lowu nga ni swirho swo tala, laha xin’wana ni xin’wana xi endlaka ntirho wa xona leswaku miri wu tirha kahle. (1 Vakorinto 12:12-26) Xexo i xikombiso lexinene xa nhlengeletano! Vakreste a va hleleriwa yini? Leswaku va hetisisa “swikongomelo swa Xikwembu,” va endla ku rhandza ka Yehovha.

5. Nhlengeletano ya Xikwembu leyi vonakaka i yini?

⁵ Bibele yi vhumbhe leswaku Vakreste va ntiyiso namuntlha a va ta va ni vun’we, va hlanganisiwa eka “tiko” rin’we va va “tiko” rin’we, laha a va ta ‘voninga kukota mavoningo emisaveni.’ (Esaya 66:8; Vafilipiya 2:15) “Tiko” leri ri hlelekeke sweswi ri ni swirho swo tlula ntlhanu wa timiliyoni ni hafu. (Esaya 60:8-10, 22) Hambiswiritano, nhlengeletano ya Xikwembu a yi heleli kwalaho. Ku katseka ni tintsumi.

6. Hi matwisiselo lama naveke, i vamani lava vumbaka nhlengeletano ya Xikwembu?

⁶ Ku ni swikombiso swo tala swa ku va tintsumi ti tirha ni malandza ya Xikwembu lama nga vanhu va nyama. (Genesa 28:12; Daniyele 10:12-14; 12:1; Vaheveru 1:13, 14; Nhlavutelo 14:14-16) Kutani hilaha ku faneleke, nkandziyiso wa Xihondzo xo Rindza (xa Xinghezi) wa May 15, 1925, wu te: “Tintsumi hinkwato leto kwetsima i swirho swa nhlengeletano ya Xikwembu.” Nakambe wu te: “Nhloko ya nhlengeletano ya Xikwembu, leyi nga ni matimba ni vuhosi hinkwabyo, [i] Hosi Yesu Kreste.” (Matewu 28:18) Kutani hi matwisiselo lama naveke, nhlengeletano ya Xikwembu yi vumbiwe hi hinkwavo lava nga etilweni ni le misaveni lava khomisanaka eku endleni ka ku rhandza ka Xikwembu. (Vona bokisi.) I lunghelo ra risima swonghasi ku va xirho xa yona! Naswona swa tsakisa swinene ku anakanya hi nkarhi lowu swivumbiwa hinkwaswo leswi hanyaka, swa le tilweni ni le misaveni, swi nga ta hleriwa hi xikongomelo xo dzunisa Yehovha Xikwembu hi vun’we! (Nhlavutelo 5:13, 14) Kambe nhlengeletano ya Xikwembu yi sirhelela hi ndlela yihi namuntlha?

Ku Sirheleriwa Hi Nhlengeletano Ya Xikwembu—Njhani?

7. Nhlengeletano ya Xikwembu yi hi sirhelela hi ndlela yihi?

⁷ Nhlengeletano ya Xikwembu yi nga hi pfuna hi ku hi sirhelela eka Sathana ni marhengu ya yena. (Vaefesa 6:11) Sathana u tshikelela vagandzeri va Yehovha, a va xanisa ni ku va ringa hi xikongomelo xin’we ntsena: xa ku va hambukisa ‘endleleni leyi va faneleke va famba ha yona.’ (Esaya 48:17; ringanisa Matewu 4:1-11.) Hi nge yi papalati hi ku helela minhlaselo yoleyo eka mafambiselo lawa ya swilo. Hambiswiritano, vuxaka lebyikulu lebyi hi nga na byona na Xikwembu ni nhlengeletano ya xona bya hi tiyisa ni ku hi sirhelela, xisweswo byi hi pfuna ku hambeta hi famba ‘endleleni.’ Hikwalaho, ntshembo lowu hi nga na wona a wu hi lahlekeli.

8. Nhlengeletano ya Yehovha leyi nga vonakiki yi ma seketela njhani malandza ya yena ya laha misaveni?

⁸ Xana nhlengeletano ya Xikwembu yi wu nyikela njhani nsirhelelo lowu? Xo sungula, hi seketeriwa hilaha ku tiyeke hi malandza ya Yehovha ya moya. Loko Yesu a ri enhlomulweni lowukulu, u pfuniwe hi ntsumi. (Luka 22:43) Loko Petro a ri endzhutini wa rifu, ntsumi yi n’wi ponise hi singita. (Mintirho 12:6-11) Hambileswi masingita yo tano ma nga riki kona namuntlha, vanhu va Yehovha va tshembisiwa leswaku tintsumi ti ta va seketela entirhweni wa vona wo chumayela. (Nhlavutelo 14:6, 7) Hakanyingi va kuma matimba lama tlulaka lama tolovelekeke loko va langutane ni swiyimo swo nonon’hwa. (2 Vakorinto 4:7) Ku tlula kwalaho, va swi lemuka leswaku “nṭumi ya Yehova yi renḍela la’v̌a ṅwi tšhav̌aka, kutani yi v̌a kuṭula.”—Pisalema 34:7.

9, 10. Ku nga vuriwa njhani leswaku “v̌ito ra Yehova i khokholo ro tiya,” naswona nsinya lowu wa nawu wu tirha njhani eka nhlengeletano ya Xikwembu hinkwayo?

⁹ Nhlengeletano ya Yehovha leyi vonakaka na yona i xisirhelelo. Njhani? Eka Swivuriso 18:10, ha hlaya: “V̌ito ra Yehova i khokholo ro tiya, l’a lulameke o tšhav̌ela ka rona, [a sirheleriwa, NW].” Leswi a swi vuli swona leswaku ku phindha-phindha vito ra Xikwembu ntsena hi swona swi ku sirhelelaka. Ku ri na sweswo, ku chavela ka hina evitweni ra Xikwembu swi vula leswaku hi fanele hi tshemba Yehovha hi byakwe. (Pisalema 20:1; 122:4) Swi vula ku seketela vuhosi byakwe, milawu ni misinya ya yena ya milawu, ni ku va ni ripfumelo eka switshembiso swakwe. (Pisalema 8:1-9; Esaya 50:10; Vaheveru 11:6) Leswi swi katsa ku gandzela Yehovha ntsena. Hi lava va gandzelaka Yehovha ntsena hi mukhuva lowu, lava va nga vulaka swin’we na mupisalema va ku: ‘Timbilu ta hina ti tsakela Yehovha, hikuva hi tshembile vito ra yena lero kwetsima.’—Pisalema 33:21; 124:8.

¹⁰ Kutani hinkwavo lava nga enhlengeletanweni ya Xikwembu leyi vonakaka va vula swin’we na Mikiya va ku: “Hina, hi famba hi v̌ito ra Yehova, Šikwembu ša hina, hi mikari ni mikari.” (Mikiya 4:5) Nhlengeletano ya Yehovha ya manguva lawa yi hlengeletiwa etlhelo ka “Israyele wa Xikwembu,” loyi eBibeleni a vuriwaka “vanhu va vito ra xona.” (Vagalatiya 6:16; Mintirho 15:14; Esaya 43:6, 7; 1 Petro 2:17) Hikwalaho, ku va xirho xa nhlengeletano ya Yehovha swi vula ku va xirho xa vanhu lava lavaka nsirhelelo wa vito ra Xikwembu kutani va wu kuma.

11. Nhlengeletano ya Yehovha yi sirhelela lava nga swirho swa yona hi tindlela tihi leti kongomeke?

¹¹ Ku tlula kwalaho, nhlengeletano ya Xikwembu leyi vonakaka i vandla ra vanhu va ripfumelo, nhlangano wa vapfumeri-kulobye lava akanaka ni ku khutazana. (Swivuriso 13:20; Varhoma 1:12) I xivandla lexi eka xona varisi lava nga Vakreste va khathalelaka tinyimpfu, va khutaza lava vabyaka ni lava nga ni gome, ni ku lwela ku yimisa lava weke. (Esaya 32:1, 2; 1 Petro 5:2-4) “Hlonga ro tshembeka ni ro tlhariha” ri phamela “swakudya . . . hi nkarhi lowu faneleke” hi ku tirhisa nhlengeletano leyi. (Matewu 24:45) “Hlonga” rero, leri vumbiweke hi Vakreste lava totiweke, ri lunghiselela swilo leswinene ngopfu swa moya—vutivi lebyi kongomeke bya Bibele lebyi nga yisaka evuton’wini lebyi nga heriki. (Yohane 17:3) Hikwalaho ka vukongomisi bya “hlonga” leri, Vakreste va pfuniwa ku hlayisa mimpimanyeto leyi tlakukeke ya mahanyelo ni ku va ni “vuxiyaxiya kukota tinyoka naswona [va] kala nandzu kukota matuva” endhawini ya khombo leyi va nga eka yona. (Matewu 10:16) Naswona minkarhi hinkwayo va pfuniwa leswaku va va ni “swo tala swo swi endla entirhweni wa Hosi,” leswi hi swoxe swi nga xisirhelelo xa matimba.—1 Vakorinto 15:58.

I Vamani Swirho Swa Nhlengeletano Ya Xikwembu?

12. I vamani lava tivekaka va ri swirho swa nhlengeletano ya Xikwembu ya le tilweni?

¹² Tanihi leswi ku sirheleriwaka ntsena lava nga swirho swa nhlengeletano ya Xikwembu, xana swirho swa kona swi katsa vamani? Malunghana ni nhlengeletano ya le tilweni, nhlamulo ya xivutiso lexi yi le rivaleni. Sathana ni tintsumi ta yena a va ha ri kona etilweni. Hi hala tlhelo, tintsumi to tshembeka ta ha ri kona kwalaho, “enhlanganweni wa mani na mani.” Muapostola Yohane u vone leswaku emasikwini yo hetelela, “Xinyimpfana,” tikerubimi (“swivumbiwa swa mune leswi hanyaka”), ni “tintsumi to tala” a swi ta va ekusuhi ni xiluvelo xa Xikwembu. Lava a va ta va swin’we na swona i vakulukumba va 24—lava yimelaka Vakreste lava totiweke lava ana se va kumeke ndzhaka ya vona leyi vangamaka etilweni. (Vaheveru 12:22, 23; Nhlavutelo 5:6, 11; 12:7-12) Entiyisweni hinkwavo ka vona i swirho swa nhlengeletano ya Xikwembu. Kambe exikarhi ka vanhu va nyama mhaka a yi le rivaleni ngopfu.

13. Yesu u va hlamusele njhani lava nga swirho swa nhlengeletano ya Xikwembu ni lava va nga riki swona?

¹³ Yesu u vule leswi landzelaka hi van’wana lava a va ta tivula valandzeri vakwe: “Vo tala va ta ku eka mina hi siku rero, ‘Hosi, Hosi, xana a hi profetanga hi vito ra wena, hi hlongola madimona hi vito ra wena ni ku endla mintirho yo tala ya matimba hi vito ra wena ke?’ Kutani hi nkarhi wolowo ndzi ta va byela ndzi ku: A ndzi kalanga ndzi mi tiva! Sukani eka mina, n’wina vaendli va leswo kala nawu.” (Matewu 7:22, 23) Loko munhu a ri muendli wa leswo kala nawu, entiyisweni a hi xirho xa nhlengeletano ya Xikwembu, ku nga khathariseki leswi a tivulelaka swona, hambi a ya kwihi a ya gandzela kona. Yesu u tlhele a komba ndlela yo lemuka munhu loyi a nga xirho xa nhlengeletano ya Xikwembu. U te: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Matewu 7:21.

14. Hi swihi swilo leswi rhandziwaka hi Xikwembu leswi hlamuseriwaka tanihi leswi bohaka eka lava va nga swirho swa nhlengeletano ya Xikwembu?

¹⁴ Hikwalaho, leswaku munhu a va xirho xa nhlengeletano ya Xikwembu—leyi ‘mfumo wa matilo’ wu nga xitiko xa yona—u fanele a endla ku rhandza ka Xikwembu. Ku rhandza ka xona hi kwihi ke? Pawulo u kombise nchumu wa nkoka emhakeni leyi loko a ku: “Lexi [rhandziwaka hi Xikwembu hi] leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:4) Loko munhu a swi lava hakunene ku kuma vutivi lebyi kongomeke eBibeleni, a byi tirhisa evuton’wini bya yena, naswona a byi hundzisela eka “vanhu va mixaka hinkwayo,” u endla ku rhandza ka Xikwembu. (Matewu 28:19, 20; Varhoma 10:13-15) Nakambe i ku rhandza ka Xikwembu leswaku tinyimpfu ta Yehovha ti wundliwa ni ku khathaleriwa. (Yohane 21:15-17) Minhlangano ya Vukreste i ya nkoka swinene emhakeni leyi. Munhu loyi xiyimo xi n’wi pfumelelaka ku va kona eminhlanganweni yoleyo kambe a nga endli tano a nga xi tlangeli xivandla lexi a nga na xona enhlengeletanweni ya Xikwembu.—Vaheveru 10:23-25.

Ku Va Ni Xinakulobye Ni Misava

15. I xitsundzuxo xihi lexi Yakobo a xi nyikeke mavandlha ya le nkarhini wakwe?

¹⁵ Malembe ya kwalomu ka 30 endzhaku ka ku fa ka Yesu, makwavo wakwe hi manana, Yakobo, u kombise swin’wana leswi nga endlaka leswaku xivandla lexi munhu a nga na xona enhlengeletanweni ya Xikwembu xi va ekhombyeni. U tsarile a ku: “Vavasati va vuoswi, xana a mi swi tivi leswaku ku va ni xinakulobye ni misava i vulala ni Xikwembu ke? Hikokwalaho, mani na mani la lavaka ku va nakulobye wa misava u tiendla nala wa Xikwembu.” (Yakobo 4:4) Handle ko kanakana, nala wa Xikwembu a hi xirho xa nhlengeletano ya xona. Kutani ke, xana ku va ni xinakulobye ni misava swi vula yini? Swi hlamuseriwe tanihi ku va munhu wo hundzuka mavala, tanihi ku hlakulela ku va ni vuxaka ni vanghana vo biha. Tlhandlakambirhi, Yakobo u vulavule hi nchumu lowu kongomeke swinene—malangutelo lama hoxeke emianakanyweni lama yisaka eku tikhomeni loku nga riki kunene.

16. A wu ri wihi mongo wa xitsundzuxo xa Yakobo xa leswaku ku va ni xinakulobye ni misava swi endla leswaku u va nala wa Xikwembu?

¹⁶ Eka Yakobo 4:1-3 ha hlaya: “Tinyimpi ti huma exihlobyeni xihi naswona ku lwa loku nga exikarhi ka n’wina ku huma exihlobyeni xihi? Xana a ku humi eka xona xihlovo lexi, ku nga eku naveleni ka n’wina ntsako wa swa nyama loku kwetlembetanaka eka swirho swa n’wina ke? Ma navela, kambe ke, ma pfumala. Mi hambeta mi dlaya hi vomu ni ku vondzoka, kambe ke, a mi koti ku swi kuma. Mi hambeta mi lwa, mi dodombisana. Ma pfumala hi leswi mi nga komberiki. Ma kombela, kambe ke, a mi nyikiwi, hikuva mi kombela hi xikongomelo lexi hoxeke, leswaku mi ta xi tirhisa eku naveleni ka n’wina ntsako wa swa nyama.” Yakobo u lemukise hi ku papalata ku va ni xinakulobye ni misava endzhaku ko tsala marito wolawo.

17. “Tinyimpi” ni “ku lwisana” a swi ri kona hi ndlela yihi evandlheni ra Vukreste ra lembe-xidzana ro sungula?

¹⁷ Malembe-xidzana yo tala endzhaku ka rifu ra Yakobo, Vakreste va mavunwa va sungule ku lwa ni ku dlayana hi xiviri. Hambiswiritano, Yakobo a a tsalela swirho swa lembe-xidzana ro sungula swa “Israyele wa Xikwembu,” leswi a swi langutele ku va ‘vaprista ni tihosi’ etilweni. (Nhlavutelo 20:6) A swi dlayananga etinyimpini ta xiviri. Kutani ha yini Yakobo a vulavule hi swilo swo tano exikarhi ka Vakreste? Ina, muapostola Yohane u vule leswaku un’wana ni un’wana loyi a vengaka makwavo i mudlayi. Naswona Pawulo u vule leswaku ku himpfilitana ka vanhu kun’we ni timholovo emavandlheni i “ku lwisana” tlhelo “madzolonga.” (Tito 3:9; 2 Timotiya 2:14; 1 Yohane 3:15-17) Emhakeni leyi, handle ko kanakana Yakobo a a vulavula hi ku hluleka ku rhandza Vakreste-kulorhi. Vakreste hi xivona a va khomana hi ndlela leyi lava va nga emisaveni ya Sathana hakanyingi va khomanaka ha yona.

18. I yini lexi nga vangaka swiendlo ni mintlhaveko leyi nga riki ya rirhandzu exikarhi ka Vakreste?

¹⁸ Ha yini ku humelele swilo swo tano emavandlheni ya Vukreste? Hikwalaho ka malangutelo lama hoxeke, yo tanihi makwanga ni ‘ku navela ku titsakisa hi swilo swa nyama.’ Ku tikukumuxa, mavondzo ni ku tilavela ndhuma na swona swi nga hahlula xinakulobye xa rirhandzu xa Vakreste evandlheni. (Yakobo 3:6, 14) Malangutelo yo tano ma endla leswaku munhu a va nakulobye wa misava, xisweswo a va nala wa Xikwembu. A nga kona loyi a nga ni malangutelo yo tano loyi a nga rindzelaka ku tshama a ri xirho xa nhlengeletano ya Xikwembu.

19. (a) I mani loyi a faneleke a voniwa nandzu lowukulu loko Mukreste a kuma leswaku miehleketo leyi hoxeke yi sungula ku akela embilwini yakwe? (b) Mukreste a nga yi hlula njhani miehleketo leyi hoxeke?

¹⁹ Xana hi ta vona mani nandzu loko hi kuma leswaku miehleketo leyi hoxeke yi sungula ku akela etimbilwini ta hina? Xana hi ta sola Sathana ke? Hi ta sola yena hi mpimo wo karhi. Hi yena “mufumi wa vulawuri bya moya” wa misava leyi, laha malangutelo yo tano ma hangalakeke kona. (Vaefesa 2:1, 2; Tito 2:12) Kambe hakanyingi miehleketo leyi hoxeke yi vangiwa hi nyama ya hina leyi nga hetisekangiki. Loko a tsundzuxe hi ta ku papalata ku va ni xinakulobye ni misava, Yakobo u tsarile a ku: “Xana eka n’wina swi vonaka onge tsalwa leri ro vula ntsena loko ri ku: ‘Moya lowu tshameke endzeni ka hina wu tshamela ku navela hikwalaho ka ku taleriwa hi mona’?” (Yakobo 4:5) Hinkwerhu ka hina hi ni mboyamelo lowu hi tswariweke na wona wo endla leswi hoxeke. (Genesa 8:21; Varhoma 7:18-20) Kambe hi nga lwisana ni mboyamelo wolowo loko hi xiya ku tsana ka hina kutani hi titshega hi mpfuno wa Yehovha leswaku hi ku hlula. Yakobo u ri: “Musa lowu nga faneriwiki lowu [Xikwembu] xi wu nyikaka i wukulu [ku tlula mboyamelo lowu hi tswariweke na wona wa mavondzo].” (Yakobo 4:6) Hikwalaho ka mpfuno wa moya lowo kwetsima wa Xikwembu ni nseketelo wa vamakwerhu lava tshembekaka lava nga Vakreste, ni hikwalaho ka ntikelo wa gandzelo ra nkutsulo ra Yesu, Vakreste lava tshembekaka a va hluriwi hi ku tsana ka nyama ya vona. (Varhoma 7:24, 25) Va hlayisekile enhlengeletanweni ya Xikwembu, i vanghana va Xikwembu, hayi va misava.

20. I mikateko yihi leyi fuweke leyi lava va nga swirho swa nhlengeletano ya Xikwembu va nga na yona?

²⁰ Bibele ya tshembisa yi ku: “Yehova o ta nyika tiko ra yena e matimba; Yehova o ta katekisa tiko ra yena hi ku rula.” (Pisalema 29:11) Loko hakunene hi ri swirho swa “tiko” ra Yehova ra manguva lawa, ku nga nhlengeletano yakwe leyi vonakaka, na hina hi ta kuma matimba lawa a ma nyikaka ni ku rhula loku a katekisaka vanhu vakwe ha kona. Kunene, misava ya Sathana i yikulu swinene eka nhlengeletano leyi vonakaka ya Yehovha, naswona Sathana u ni matimba swinene ku tlula hina. Kambe Yehovha u ni Matimba Hinkwawo. Matimba yakwe lama tirhaka a ma nge hluriwi hi nchumu. Tintsumi takwe ta matimba na tona ti na hina eku tirheleni ka Xikwembu. Xisweswo, ku nga khathariseki rivengo leri hi langutaneke na rona, hi nga yima hi tiyile. Ku fana na Yesu, hi nga yi hlula misava.—Yohane 16:33; 1 Yohane 4:4.

U Nga Hlamusela Ke?

◻ Nhlengeletano ya Xikwembu leyi vonakaka i yini?

◻ Nhlengeletano ya Xikwembu yi sirhelela hi tindlela tihi?

◻ I vamani swirho swa nhlengeletano ya Xikwembu?

◻ Hi nga swi papalata njhani ku va vanakulobye va misava?

[Bokisi leri nga eka tluka 9]

Nhlengeletano Ya Xikwembu I Yini?

Etibukwini ta Timbhoni ta Yehovha, xiga lexi nge “nhlengeletano ya Xikwembu” xi tirhisiwa hi tindlela tinharhu.

1 Nhlengeletano ya Yehovha leyi nga vonakiki ya le tilweni leyi vumbiweke hi swivumbiwa swa moya leswi tshembekaka. Yona yi vuriwa “Yerusalema wa le henhla” eBibeleni.—Vagalatiya 4:26.

2 Nhlengeletano ya Yehovha leyi vonakaka ya vanhu va nyama. Namuntlha yi vumbiwe hi masalela lama totiweke lama nga swin’we ni ntshungu lowukulu.

3 Nhlengeletano ya Yehovha ya vuako hinkwabyo. Namuntlha yi vumbiwe hi nhlengeletano ya Yehovha ya le tilweni, kun’we ni vana va yena lava totiweke lava a va amukeleke va laha misaveni, lava nga ni ntshembo wa moya. Hi ku famba ka nkarhi, yi ta tlhela yi katsa vanhu lava endliweke lava hetisekeke laha misaveni.

[Xifaniso lexi nga eka tluka 10]

Swakudya leswinene ngopfu swa moya swi phameriwa hi ku tirhisa nhlengeletano ya Yehovha