Ku Tshinelela Lokunene Ko Lunghiselela Ntirho Wa Nsimu

¹ Xana nkarhi wun’wana wa kanakana ku hlanganyela eka xivumbeko xo karhi xa ntirho wa nsimu hi ku va u nga swi tivi leswi u nga ta swi vula? Loko swi ri tano, ha tiyiseka leswaku u ta tlangela ku tshinelela loku endliwaka hi Vutirheli Bya Hina Bya Mfumo.

² Ku sungula hi nkandziyiso lowu, Vutirheli Bya Hina Bya Mfumo byi ta nyikela swiringanyeto swo hambana-hambana swinene swo nyikela rungula ra Mfumo, hambi ku ri hi yindlu na yindlu, eka riendzo ro vuyela kumbe eka dyondzo ya Bibele. Leswi swi fanele swi pfuxa mianakanyo ya wena ehenhleni ka marito lawa u nga ta lava ku ma tirhisa evutirhelini. Loko u lunghiselela vutirheli, hlawula mhaka leyi fanelaka nsimu ya ka n’wina. Nakambe, vona loko u ta tirhisa marito lama ringanyetiwaka exihlokweni kumbe u ta lulamisa marito leswaku ma fanela swiyimo swa kwalaho kumbe vumunhu bya wena n’wini. Mhaka ya wena yi nga ha twala yi ri yinene ngopfu loko u yi vula kahle hi marito ya wena. Xana u nga swi tsakela ku engetela vutirheli bya wena hi ndlela yo karhi, kumbexana hi ku nghenela xivumbeko xo karhi ro sungula? Swiringanyeto leswi nga ni vuxokoxoko leswi nyikeriwaka swi nga ha va leswi u swi lavaka ntsena leswaku u sungula.

³ Loko u fambisa yin’wana ya minhlangano ya bandlha ya ntirho wa nsimu, u fanele u tolovelana kahle ni mhaka leyi kandziyisiweke eka Vutirheli Bya Hina Bya Mfumo. Hlaya kopi ya wena kahle, ivi u yisa nyingiso eka swiringanyeto leswi talaka ku tirha endhawini yoleyo

⁴ Hinkwerhu ka hina hi tsakela swilo leswi hi swi endlaka kahle. Ha tshemba leswaku ku tshinelela loku lokunene ku ta pfuna vahuweleri lavantshwa ni lava nga ni ntokoto leswaku va humelela ni ku tsaka evutirhelini bya vona bya Mfumo.