Nsirhelelo Wa Misava Hinkwayo eHansi Ka “Hosana Ya Ku Rhula”

“E ku kurisa ku fuma, ni ku nyika šiluv̌elo ša Davida ni ku fuma ka yena e ku rula lo’ku nga heriki, ni ku ši tiyisa, ni ku ši seketela hi ku av̌anyisa ni ku lulama, ŝeŝi ni laha ku nga heriki; ku hiseka ka Yehova wa tinyimpi ku ta endla ŝeŝo!”—ESAYA 9:7.

1, 2. (a) Ku velekiwa ka Mfumo wa Xikwembu a ku ta va nkarhi wa yini, naswona ku velekiwa loku ku endleke rini? (b) I yini leswi xihlambanyiso xa Nhlangano wa Matiko xi swi nyikelaka eka nhlengeletano yoleyo, kambe xana ntwanano wa Mfumo wu nyike Yesu Kriste yini? (c) Hi swi tivisa ku yini leswaku Yehova handle ko hluleka u ta hlayisa ntwanano wa Mfumo?

TANIHI leswi ku velekiwa ka Yesu, n’wana wa xinuna la hetisekeke a ku ri xiendlakalo xa ntsako lowu khapaka, kutani ku velekiwa ka Mfumo wakwe lowu tshembisiweke khale a ku ta va xiendlakalo xa ntsako lowukulu. (Psalma 96:10-12) Ku ya hi timhaka ta matimu ya manguva lawa, hulumendhe yoleyo yi vekiwe ekhatleni ra Yesu la kwetsimisiweke hi 1914. Vukona bya nhlengeletano ya Nhlangano wa Matiko namuntlha a ku kaneti mhaka yoleyo. Ku hava vafumi va swirho swa 159 swa UN lava nga va yindlu ya Davhida. Hambi swi ri tano, mfungho wa xikhiri xolexo xa misava wu va avela ntirho wo fikelela ku rhula ka misava hinkwayo ni nsirhelelo wa vanhu.

² Kambe ntwanano wa Yehova wa Mfumo a wu suriwanga. Eka Esaya 9:7 marito lama nge “šiluv̌elo ša Davida” ya tiyisa ntwanano lowu Xikwembu xi wu endleke na Davhida wa mfumo lowu nga heriki. Ku tlula kwalaho, Yehova u hlambanyele ku hela ka wona loku humelelaka. Leswaku Yehova u ta namarhela ntwanano lowu swi vekiwe erivaleni eka Psalma 89:3, 4, 35, 36: “Nḍi endlile ntwanano ni muhlawuriwa wa mina; nḍi hlambanyile eka Davida, nanḍa wa mina, nḍi ku: Nḍi ta tiyisa rišaka ra wena hi masiku ni masiku, nḍi ta tiyisa šiluv̌elo ša wena hi laha ku nga heriki. Nḍi hlambanyile kaṅwe hi ku kwetsima ka mina; šana nḍi ta hembela Davida-ke? Rišaka ra yena ri ta v̌a kona hi laha ku nga heriki. Šiluv̌elo ša yena ši ta v̌a kona e mahlweni ka mina tani hi dyambu.” Ntwanano wolowo, kun’we ni vito leri nge “Hosana ya ku Rhula,” wu nyika Yesu Kriste ntirho wo tisa nsirhelelo wa misava hinkwayo.

3. Hikwalaho ka yini nkarhi wa leswaku “Hosana ya ku Rhula” yi sungula ku fuma ka yona a ku nga ri nkarhi wa ku rhula etilweni kumbe emisaveni?

³ Hambi swi ri tano, nkarhi wa Yehova Xikwembu wo veka hulumendhe ekhatleni ra Hosana ya yena leyi Vekiweke eXiluvelweni a ku nga ta va lembe ra ku rhula hambi ematilweni kumbe emisaveni la hansi. Hi ku ya hi Nhlavutelo ndzima 12, ku velekiwa ka Mfumo wakwe a ku ta landzeriwa hi nyimpi ematilweni. Sathana Diyavulosi ni mademona yakwe va lwisane ni hulumendhe leya ha ku tlhomiwaka, naswona Hosi leya ha ku vekiwaka exiluvelweni ni tintsumi ta yona leto kwetsima yi lwe ni mavandla wolawo ya vudemona. Vuyelo ku ve leswaku Sathana ni mademona yakwe va susiwile ematilweni va cukumeteriwa ehansi laha misaveni ya hina. Hikwalaho, rito ri twakarile: “Mi ni khombo, n’wina misava ni lwandle, hikuva Diyavulosi ú xikele ka n’wina a karihile ngopfu, hi ku tiva leswaku nkarhi wa yena wu komile.” (Nhlavutelo 12:12) Ku sukela eku onhakeni ka Diyavulosi, misava ya hina hi laha ku vavisaka yi vile ndhawu ya vukari lebyi nga ringanisiwiki na nyimpi. Vanhu va lava Mfumo wa “Hosana ya ku Rhula” swonghasi, hikuva wu ta tisa nsirhelelo wa misava hinkwayo!

4. Ha yini vito leri nge “Šikwembu ša Matimba” ri nga fanelanga ku pfilunganyiwa ni ku Xikwembu xa matimba hinkwawo?

⁴ Ku ya hi Esaya 9:6, mavito man’wana, ku engetela eka “Hosana ya ku Rhula,” a ma ta engeteriwa eka vito leri kwetsimaka ra Yesu Kriste. Rin’wana ra mavito lawa a ku ta va “Šikwembu ša Matimba.” A a nga ta vuriwa Xikwembu xa matimba hinkwawo, onge hi loko a ri xirho lexi ringanaka xa vunharhu-un’we bya swikwembu. Hambi ku ri esikwini rakwe ra ku pfuxiwa kakwe, u tivisile leswaku a a ha ri ehansi ka Yehova. U tivonakarisile eka Mariya wa Magdala ivi a n’wi rhuma ku ya tivisa vadyondzisiwa vakwe lava kanakanaka leswaku a a tlhelela eka Tata wa vona ni Tata wakwe ni le ka Xikwembu xa vona ni Xikwembu xa yena. (Yohane 20:17) Ku ta fika namuntlha, u ya emahlweni ni ku kongomisa swivumbiwa hinkwaswo evugandzerini bya “Šikwembu ša ŝikwembu,” Yehova. (Daniel 11:36) Aha, ina, Yesu Kriste u ni Xikwembu naswona Xikwembu xexo a hi Yesu hi yexe kambe i Tatana wa le matilweni Yehova. “Hosana ya ku Rhula” yi tirha kahle swonghasi tanihi mutisi wa ku rhula loku nga heriki ni nsirhelelo wa misava hinkwayo!

5. Hikwalaho ka yini Yesu Kriste a ri la fanekelaka swinene ku kongomisa swivumbiwa hinkwaswo leswi tlhariheke eka vugandzeri bya Yehova, Xikwembu xa ntiyiso ni lexi hanyaka?

⁵ Hi laha ku nga heriki, N’wana la kwetsimisiweke wa Xikwembu u ta ya emahlweni no kongomisa swivumbiwa hinkwaswo leswi tlhariheke evugandzerini bya Xikwembu lexi xin’we lexi hanyaka ni xa ntiyiso xi ri xoxe, Yehova. N’wana la kurisiweke wa Xikwembu u swi fanekela kahle leswi. Eka swivumbiwa hinkwaswo etilweni ni le misaveni, N’wana la kwetsimisiweke wa Xikwembu hi yena loyi a tiveke Yehova hi nkarhi wo leha ni ku va ni vuxaka byolebyo bya le kusuhi. Eka 1 Vakorinto 2:11 muapostola Pawulo u ri: “I mani loyi a nga tivaka miehleketo ya munhu, loko wu nga ri moya wa munhu loyi, lowu nge ndzeni ka yena xana?” Swi tano ni le mhakeni ya Yesu Kriste. Hambi leswi a tirhisiweke hi Yehova Xikwembu eku tumbuluxeni ka munhu, a ku ri nchumu wun’wana eka yena ku va kahle-kahle yena hi yexe a va munhu, a rhendzeriwa hi swiyimo hinkwaswo swa la misaveni ni ku tokota matitwelo ya munhu ro sungula. Xisweswo ku tsariwile leswaku “hambi leswi a a ri N’wana wa Xikwembu, ú dyondzile ku yingisa hi mhaka ya ku xaniseka ka yena” tanihi munhu laha misaveni. (Vaheveru 5:8) Hakunene u tikombe a ri la lulamelaka ku nyikiwa ‘vuhosi hinkwabyo etilweni ne misaveni’ hi ku hlayiseka ni ku byarha vito ra “Šikwembu ša Matimba.”—Matewu 28:18; ringanisa Vafilipiya 2:5-11.

‘Mutsundzuxi Wo Hlamarisa’ Ni “Tatana L’a Nga Riki Na Ku Hela”

6. Yesu Kriste a a tirha tanihi ‘Mutsundzuxi wo Hlamarisa’ hi ndlela yihi, naswona “ntshungu lowukulu” wu pfuneke hi ndlela yihi hi xitsundzuxo xakwe xo hlamarisa?

⁶ Hikwalaho ka swivangelo leswi hinkwaswo swa matimba, Hosana ya le tilweni ya Xikwembu yi swi kota hi laha ku heleleke ku tirhela vanhu tanihi ‘Mutsundzuxi wo Hlamarisa.’ (Esaya 9:6) Xitsundzuxo xa yena nkarhi na nkarhi i xa vutlhari, xi hetisekile naswona a xi na xihoxo. Tanihi Muhlanganisi wa Yehova Xikwembu ni lava va tekeriweke eka ntwanano lowuntshwa, hakunene a a tirhe tanihi mutsundzuxi wo hlamarisa hi malembe xidzana lama hundzeke ya 19. Sweswi, ku sukela hi 1935, “ntshungu lowukulu” wa “tinyimpfu tin’wana” ta yena a wu ri karhi wu amukela xitsundzuxo xakwe lexi hlamarisaka naswona wu kuma dyondzo ni xiletelo lexinene. (Nhlavutelo 7:9-17; Yohane 10:16) Tanihi xitirhi xa ntirho lowu wo tsundzuxa, eka ‘makumu lawa ya mafambiselo ya swilo’ u yimise ntlawa wa “nandza lowo tshembeka, lowa vutlhari” la tshembisiweke ivi a n’wi veka muhlayisi wa hinkwaswo leswi a nga na swona swa laha misaveni, kumbe timhaka ta vuhosi. (Matewu 24:3, 45-47; Luka 12:42-44) “Ntshungu lowukulu” sweswi wu amukela xitsundzuxo xa moya lexi hakunene xi hlamarisaka ni ku tshembeka hikuva xi sekeriwe eRitweni ra Xikwembu leri hlavuteriweke.

7. Hikwalaho ka yini Sathana Diyavulosi a nga ri xikwembu xa matimba hinkwawo eka vanhu va Yehova?

⁷ Hikwalaho ka ku amukela ka vona ka xitsundzuxo xolexo, Sathana Diyavulosi, “xikwembu xa misava leyi,” a nga ha ri xikwembu xa matimba eka hina tanihi vanhu va Yehova. (2 Vakorinto 4:4) Hi ku yingisela hi humile eka Babilona Lonkulu, mfumo wa misava wa vukhongeri byo hemba, naswona a ha ha hlanganyeli eka swidyoho swakwe leswi hombolokeke. Hi yime hi tiya etlhelweni ra Loyi Yehova Xikwembu a vekeke hulumendhe Yakwe ekhatleni ra yena.

8. (a) Ha yini vito leri nge “Tatana l’a nga riki na ku hela” ngopfu-ngopfu ri kokela eka “ntshungu lowukulu”? (b) Ku ta humelela yini eka lava va pfumelelaka Sathana Diyavulosi a va tata wa vona wa moya?

⁸ Vito leri nge “Tatana l’a nga riki na ku hela” i ro kombisa ku rhandzeka. “Ntshungu lowukulu” wa “tinyimpfu tin’wana” wu tlangela rito leri hi ndlela yo hlawuleka. Vutswari bya Sathana Diyavulosi a byi va kokanga. Va rhurhumela loko va tsundzuka varhangeri va vukhongeri bya Vayuda lava kaneteke Yesu ni lava a va byeleke a ku: “N’wina mi huma eka tata wa n’wina, a nga Diyavulosi, kutani mi tsakela ku endla ku navela ka tata wa n’wina. A a ri mudlayi ni le ku sunguleni. A nga yimanga entiyisweni, hikuva ku hava ntiyiso eka yena. Loko a vulavula mavunwa, ú tikomba lexi a nga xona, hikuva i muhembi, ni tata wa mavunwa.” (Yohane 8:44) “Ntshungu lowukulu” wu humile exikarhi ka vana volavo va moya va Sathana Diyavulosi, loyi vutswari byakwe ehenhla ka vanhu byi nga ta ka byi nga vi bya hi laha ku nga heriki. Lava va n’wi pfumelelaka ku va tata wa vona wa moya va ta lova na yena. Ndzoviso lowu heleleke, lowu fanekiseriweke hi ‘ndzilo lowu nga timekiki’ wa Matewu 25:41, wu rindzele Diyavulosi ni vanhu hinkwavo lava va nga sukiki ehansi ka vutswari bya yena.—Matewu 25:41-46.

9. “Ntshungu lowukulu” wu nantswa vutswari bya “Tatana l’a nga riki na ku hela” hi ndlela yihi?

⁹ Hi tlhelo rin’wana, “ntshungu lowukulu” wu nantswa vutswari bya “Tatana l’a nga riki na ku hela.”a Hi ndlela yihi? Hi ku yingisa rito rakwe ni ku va “tinyimpfu tin’wana” ta yena ni ku hlanganyela ni masalela ya Israyele wa moya. Vuxaka lebyi bya ndyangu lebyi tsakisaka byi komba ku rhula. Loko a tsala ehansi ko huhuteriwa, muapostola Pawulo u kombetele eka Yehova eka Varhoma 16:20 tanihi “Xikwembu lexi nyikaka ku rhula.” Kutani, swa fanela swonghasi leswi N’wana wakwe la tswariweke a ri swakwe a nga ta vuriwa “Hosana ya ku Rhula”! Hi ku vuyisela ku rhula emisaveni hinkwayo, “Hosana ya ku Rhula” handle ko hluleka yi ta hanya hi ku pfumelelana ni nhlamuselo ya vito ra yona lerikulu.

Hulumendhe Ya Vuhosi Bya “Hosana Ya Ku Rhula”

10, 11. Endzhaku ko vhumba ku velekiwa ka n’wana lokunene, xana Esaya u ye emahlweni a vula yini, naswona marito yakwe ma vula yini?

¹⁰ Endzhaku ka loko Esaya a vhumbe ku velekiwa lokunene ka xihlangi—ina, lokuya ka N’wana wa Xikwembu loyi a a ta xiximiwa ni vito ra “Hosana ya ku Rhula”—muprofeta u susumetiwe hi moya wa Yehova leswaku a ku: “E ku kurisa ku fuma, ni ku fuma ka yena e ku rula loku nga heriki . . . Ku hiseka ka Yehova wa tinyimpi ku ta endla ŝeŝo!”—Esaya 9:7.

¹¹ Loko a ku “e ku kurisa ku fuma,” vuprofeta byi komba leswaku mfumo wa “Hosana ya ku Rhula” wu nga ka wu nga hluleki ku funengeta misava hinkwayo. A ku nga vi na mindzilakana emisaveni leyi nga ta hika ku fuma kakwe. Ku ta funengeta xirhendzevutana hinkwaxo. Nakambe, eka Paradeyisi ya la misaveni leyi nga ta ta, a ku nga vi na ku hela ka ku rhula. A ku nga ha vi na ku pfumaleka ka nawu hinkwako-nkwako. Ku rhula ku ta engeteleka emisaveni hinkwayo naswona nkarhi na nkarhi ku ta tala. (Psalma 72:7) Ku rhula emhakeni leyi swi vula swo tala ku ri na ku pfumaleka ka vukari na nyimpi. Ku katsa ku avanyisa ni ku lulama, hikuva Esaya u vule leswaku ku fuma ku ta seketeriwa hi “ku av̌anyisa ni ku lulama, ŝeŝi ni laha ku nga heriki.” Ku ta va ni ndzalo ni nkateko eka vanhu. Kutani ku hiseka loku nga karhaliki ka Yehova Xikwembu ku ta swi hetisisa enkarhini wa hina.

12. Hulumendhe leyi nga ekhatleni ra “Hosana ya ku Rhula” yi yimeriwe emisaveni hinkwayo hi ndlela yihi?

¹² Hambi sweswi, hulumendhe leyi ekhatleni ra “Hosana ya ku Rhula” yi na vayimeri emisaveni hinkwayo. Ku amukeriwa ka hulumendhe yakwe ya le tilweni ku hangalaka hi ku anghwetla. Masalela ya vadyondzisiwa va Yesu Kriste lava tswariweke hi moya ma hlengeletiwile ma huma exikarhi ka matiko. Nakambe, “ntshungu lowukulu” wa karhi ku hlengeletiwa wu huma eka matiko yo hambana-hambana lama tlulaka 200. Sweswi ku na timbhoni ta Yehova ta 3 229 022, naswona ntirho lowu tsakisaka wa ku hlengeleta a wu si hetiseka. ‘Ntshungu lowu wukulu’ wu dzunisa hulumendhe leyi nga ekhatleni ra “Hosana ya ku Rhula.” Swirho swa yona swi tlangela swinene ku va vafumiwa eka hulumendhe yoleyo ni ku va varhumiwa va yona emisaveni hinkwayo, lava tihlanganisaka ni “vayimeri va Kriste,” masalela lama totiweke.—2 Vakorinto 5:20.

Xikhiri Xa Manguva Lawa Xi Fanele Ku Herisiwa

13. (a) Varhumiwa va Mfumo va ringeta ku endla yini exikarhi ka vona? (b) Xana Xikwembu xi languta Nhlangano wa Matiko hi ndlela yihi?

¹³ Varhumiwa va Mfumo nakambe va hlayisa ku rhula exikarhi ka vona. Va ‘endla hi matimba ku hlayisa vun’we lebyi nyikiwaka hi Moya, eka xiboho lexi hlanganisaka xa ku rhula.’ (Vaefesa 4:3) Va endla leswi ku nga khathariseki minkitsikitsi hinkwayo leyi sweswi yi hlaselaka emisaveni hinkwayo. Mintshunxeko ya matiko endzeni ni le handle ka Nhlangano wa Matiko hakunene yi lwisana ni hulumendhe ya “Hosana ya ku Rhula.” Hi laha Xikwembu xi wu langutaka ha kona, Nhlangano wa Matiko i xikhiri lexikulu xa misava. Ha yini? Hikuva wu vula leswaku wu vekeriwe ku hetisisa swikongomelo leswi Xikwembu xi swi vekeleke ku hetisisiwa hi ‘Hosana ya xona ya ku Rhula’ ntsena. Kutani yi rhamba vanhu va matiko hinkwawo ku yi seketela eku tlhomeni ka nsirhelelo wa misava hinkwayo hi matshalatshala ya vanhu. Kutani yi tivise 1986 tanihi “Lembe ra ku Rhula ka Matiko Hinkwawo.” Xisweswo wu tikombe wu ri xikhiri xa “Hosana ya ku Rhula” ni ku lwisana ni ntwanano wa Yehova wa Mfumo lowu nga heriki na yona.

14. Muprofeta Esaya u tsundzuxe hinkwavo lava kanetaka Yehova ni ntwanano wakwe wa Mfumo hi ndlela yihi?

¹⁴ Hikwalaho ka xivangelo xo tano, muprofeta Esaya u tsundzuxile Hosi Akaz ni vafumiwa vakwe kwale ndzhaku leswaku va nga lavi ku rhula ni nsirhelelo hi ku tirhisana ni Mfumo wa Misava wa Asiriya. Xitsundzuxo xi kumeka eka Esaya 8:9, 10. Hi ndlela yo phata, muprofeta u tsundzuxa hinkwavo lava va kanetaka Yehova ni ntwanano wakwe wa Mfumo: “Hlengeletanani, ṅwina matiko, mi v̌a mi herisiwa! Riyani tindlev̌e, ṅwina hikwenu la’v̌a akeke matikweni la’ma nge kule! Tilungiseleni ku lwa, mi ta herisiwa! Kanelani makungu, ma ta hunḍuka ŝa hav̌a! Lerisani milawu, kambe yi nga ka yi nga humeleri, hikuv̌a Šikwembu ši na hina!”

15. Ku ta humelela yini eka xikhiri xa ntwanano wa Mfumo namuntlha, hi laha swi kombisiweke ha kona hi xikhiri eminkarhini ya Hosi Akaz?

¹⁵ Kutani matiko ehansi ka hosi ya misava leyi, Sathana Diyavulosi, a ma khire ntwanano wa Mfumo ni Mudyandzhaka wa ku fuma ka wona ni Mufumi. Xikhiri xi ta herisiwa, tanihi xikhiri xa le minkarhini ya Hosi Akaz. Hosi Retsin, wa Siriya na Hosi Pekak wa Israyele a va nga n’wi chavi Yehova wa tinyimpi kambe va khire ntwanano wa yena wa Mfumo. Kutani, xikhiri xa vona xi herisiwile. Hi laha ku fanaka, Hosi Akaz wa Yuda a nga n’wi chavanga Yehova, kambe u nghene eka xikhiri ni mfumo wa misava wa Asiriya. Leswi hakunene a swi n’wi pfunanga Akaz ivi swi n’wi tisela ku rhula ni nsirhelelo. Swi tise maxangu ni vuhlonga. Lexi nyanyaka eka hinkwaswo, swi suse Akaz eka tintswalo ta Yehova.

16. Yehova u herise xikhiri xa Asiriya xa ntwanano wa Mfumo hi ndlela yihi, naswona leswi a swi fanekisela yini esikwini ra hina?

¹⁶ Endzhaku ka rifu ra Akaz ni le minkarhini ya n’wana wakwe Ezekias, Yehova wa tinyimpi u herise xikhiri xa Asiriya xo lwisana ni ntwanano wa Mfumo. Hosi ya Asiriya yi boheke ku suka etikweni ra Yuda endzhaku ka loko ntsumi ya Yehova yi lovise 185 000 wa masocha ya yona. Valala a va copanga hambi ku ri nseve wun’we eka muti wa Yerusalema. (Esaya 37:33-36) Ku hluriwa loku fanaka ka xikhiri xa misava xa manguva lawa xa ntwanano wa Mfumo wa Yehova na “Hosana ya ku Rhula” i ntiyiso, hikuva Xikwembu xi na Hosana ya xona Emanuel ni hinkwavo lava n’wi dzunisaka!

Ku Yima U Nga Chavi U Yimela Vuhosi Bya Yehova Bya Misava Hinkwayo

17. (a) Xana switirho swa politiki swi ta endla yini hi ku hatlisa eka Babilona Lonkulu, kutani i yini lexi vanhu va Yehova va nga ta xi lava ni ku xi amukela? (b) Endzhaku ko lovisa Babilona Lonkulu, xana vafumi lava kanetaka vukona bya Xikwembu se va ta endla yini, va hlohlotela Yehova ku teka goza rihi?

¹⁷ Switirho swa politiki hi ku anghwetla swi ta kongomisa matshalatshala ya swona hayi eka Vujagana ntsena kambe eka Babilona Lonkulu, mfumo hinkwawo wa misava wa vukhongeri byo hemba, ku wu susa. Enkarhini wolowo wo nonon’hwa, nsirhelelo wa Xikwembu wa vanhu va Yehova wu ta va kona hi mpimo lowu engetelekeke. Loko va susumetiwa hi ku hluriwa loku halataka ngati ka Babilona Lonkulu, vafumi lava kanetaka vukona bya Xikwembu hi ku kariha va ta hlasela lava va nga etlhelweni ra hulumendhe ya Xikwembu ha Yesu Kriste. Kutani Yehova u ta tirhisa ‘Hosana yakwe ya ku Rhula’ ku lwa ‘nyimpi ya siku lerikulu ra Xikwembu xa Matimba Hinkwawo.’ (Nhlavutelo 16:14) Yesu Kriste u ta tikomba a ri Nhenha leyi nga hluriwiki leyi hulumendhe ya yona yi nga ta ka yi nga tsongahatiwi. U ta tikomba a ri “Šikwembu ša Matimba” ehansi ka Xikwembu xa matimba hinkwawo lexi hlulaka, Yehova. ‘Xikwembu lexi xa Matimba’ xi ta ambexa ntirho wa xona lowo vangama hi ku hlula eArmagedoni loku nga ta pfuma ku nga heli hi laha ku nga heriki. Ku dzuneka hinkwako ku ya eku hluleni koloko loku nga ringanisiwiki!

18. Loko ti langutane ni xikhiri xa manguva lawa xa ntwanano wa Mfumo, Timbhoni ta Yehova ti tiyimisele ku endla yini, naswona ku va ni vuyelo byihi?

¹⁸ Kutani ke, hambetani mi ya eku twakaleni ka misava ku tlula eku sunguleni, n’wina hinkwenu timbhoni ta Yehova, hi ku tshemba loku heleleke eka Xikwembu xa n’wina ni Hosi ya xona leyi fumaka, “Hosana ya ku Rhula”! Kombisani xivindzi lexi faneleke eka xikhiri xa misava xa sweswi. Hi ku twarisa ka n’wina hinkwako ka mahungu ya Mfumo ni ku hlula ka wona loku taka ka xikhiri xa misava eArmagedoni, hinkwenu vanani swikombiso ni masingita eku dzunekeni ka Yehova. Loko Diyavulosi a hundzuluxela vafumi va misava eka hina, tsundzukani, ku hlula ku ta va ni lava va yimelaka ntiyiso kutani va tshembeka eka Mfumo wa Emanuel, “Hosana ya ku Rhula,” hikuva “Xikwembu Xi Na Hina”! (Matewu 1:23; ringanisa Esaya 8:10.) Kutani tintsumi hinkwato ta le tilweni ni vanhu hinkwavo lava hlayisaka vutshembeki emisaveni a va vule va ku “Amen” eku lweleni ka vuhosi bya Yehova eka swilo hinkwaswo leswi vumbiweke etilweni ni le misaveni, ni nsirhelelo lowu nga ta ka wu nga heli!

[Nhlamuselo ya le hansi]

Swivutiso Swa Nkatsakanyo

◻ Xana vito leri nge “Šikwembu ša Matimba” ri tirha hi ndlela yihi eka Yesu Kriste?

◻ Yesu a a tirha tanihi ‘Mutsundzuxi wo Hlamarisa’ hi ndlela yihi?

◻ I vutswari bya mani lebyi hi faneleke ku byi lava, naswona i bya mani hi faneleke ku byi ala?

◻ Kahle-kahle Nhlangano wa Matiko i yini?

◻ Ku ta humelela yini eka xikhiri xa namuntlha xa ntwanano wa Mfumo ni Mudyandzhaka wa wona, “Hosana ya ku Rhula”?

[Xifaniso lexi nga eka tluka 16, 17]

Misava hinkwayo yi ta hlanganisiwa evugandzerini lebyi rhuleke bya Mufumi wa Misava Hinkwayo