Chumayela Hi Vutlharhi
1 Leswaku hi va ni vutlharhi ku laveka leswaku hi tiva xanchumu mayelana ni vanhu lava hi va chumayelaka. Ha yini? Hikuva ku humelela ka hina eku fikeleleni timbilu ta vanhu swi titshege hi vuswikoti bya hina byo vula rungula ra Mfumo hi ndlela leyi va tsakisaka. Hi n’hweti ya January, hi ta fambisa buku leyi nge Nghwazi Leyi Tshameke Yi Hanya hi munyikelo wa R10,50. Ku engetela eka swiringanyeto leswi boxiweke eka Vutirheli Bya Hina Bya Mfumo bya December, u nga ha tsakela ku ringeta xin’wana xa swingheniso leswi landzelaka.
2 Endzhaku ko titivisa, u nga ha vula leswi landzelaka hi marito ya wena n’wini:
◼“Vo tala va tivutisa leswi Yesu a a ri xiswona loko a hanya tanihi munhu emisaveni leyi. Xana u anakanya leswaku a a hambane hi tindlela tihi ni vanhu van’wana? [Yimela nhlamulo.] Buku leyi leyi nyanyulaka leyi nge Nghwazi Leyi Tshameke Yi Hanya, yi kandziyisa timhaka ta vutomi ni vutirheli bya yena, naswona yi nyika vutivi bya muxaka wa munhu loyi a a ri yena. Endzhaku ko yi hlaya, van’wana va titwa onge hi loko va ve na nkarhi wo tolovelana na yena hi xiviri, va xaniseka na yena ni ku xiya vutirheli bya yena hi xiviri.” Kombetela exifanisweni xo sungula ebukwini, lexi kombisaka vito ra buku. Kutani u pfula eka masungulo, kutani u hlaya ndzimana ya vumbirhi ehansi ka xihlokwana lexi nge “Pfuneka Hi Ku Dyondza Hi Ta Yena.” Fambisa buku hi munyikelo wa R10,50.
3 U nga ha tsakela ku tirhisa xingheniso xo fana ni lexi:
◼“Avuxeni. A hi ri eku vulavuleni ni van’wana vaakelani mayelana ni timfanelo leti va nga tsakelaka ku ti vona eka munhu loyi a fumaka van’wana. Xana u nga ndzi byela mfanelo yin’we kumbe timbirhi leti u anakanyaka leswaku i ta nkoka? [Yimela nhlamulo. Nkhensa tinhla ta yena. Pfumela loko swi fanerile.] Xana a wu swi tiva leswaku Bibele yi hlamusela timfanelo ta Munhu loyi a hlawuriweke ku va mufumi wa vanhu? Ti kona laha eka Esaya 9:6, 7. [Hlaya.] Xana u anakanya leswaku swi ta va njhani ku hanya ehansi ka mufumi wo tano?” Yimela nhlamulo kutani u yisa nyingiso eka Pisalema 146:3, 4. Pfula eka ndzima 133 ebukwini leyi nge Nghwazi leswaku u ta tlhela u yisa bulo emahlweni.
4Tirhisa Xiphephana Leswaku U Tivisa Nghwazi: Swiphephana swi pfuna ngopfu eku sunguleni bulo. Swi pfuna ku koka nyingiso wa n’wini wa muti, hikuva swiphephana swi na timhaka ta nkoka leti khumbaka munhu hi yexe.
Hi xikombiso, u nga ha vula swo fana ni leswi:
◼“Loko hi vulavula ni vanhu, hi xiye leswaku vo tala va boxa ku karhateka ka vona mayelana ni . . . [hlawula xiendlakalo xa sweswi lexi vuriweke eka mahungu]. Swi vonaka onge swiyimo swa misava swi ya swi nyanya ku biha. Van’wana va tivutisa loko misava leyi yi ta pona. Xana u titwisa ku yini mayelana ni sweswo? [Yimela n’wini wa muti a hlamula. Vanhu vo tala va ni ntshembo.] Ndzi hlaye swin’wana leswi khutazaka leswi ndzi tsakelaka ku avelana swona na wena. Swi le ka xiphephana lexi. [Nyika n’wini wa muti xiphephana lexi nge Xana Misava Leyi Yi Ta Pona? u ri karhi u tamele xiphephana lexi fanaka evokweni ra wena.] Xiya leswi Yesu a swi profetiseke xiswona sweswo . . . ” Hlaya eka ndzimana leyi nga eka tluka 4 na 5 leyi pfumelelanaka ni xiendlakalo xa sweswinyana lexi u xi boxeke eku sunguleni. Komba n’wini wa muti buku leyi nge Nghwazi. Loko swi vonaka swi fanela, pfula eka rungula leri engetelekeke ra vuprofeta bya Yesu lebyi kandziyisiweke eka ndzima 111. Fambisa buku. Nakambe, tiyiseka leswaku u tlakusa xivutiso emhakeni yoleyo leswaku mi ta bula hi xona loko u tlhelela.
5 Vutlharhi lebyinene byi ta hi pfuna ku tiva swilaveko swa vanhu lava hi hlanganaka na vona ni leswi va swi tsakelaka. Swivuriso 16:23 yi hi tiyisekisa hi swona, yi ku: “Mbilu ya l’a tlhariheke yi tlharihisa nomu wa yena, o tiyisa tidyonḍo hi ku v̌ulav̌ula ka yena.”