Ndlela Yo Fambisa Buku Leyi Nge Leswi Bibele Yi Swi Dyondzisaka

Xiengetelo lexi xi ni swiringanyeto swo hambana-hambana swa swingheniso swo fambisa buku leyi nge Leswi Bibele Yi Swi Dyondzisaka. Leswaku swi va mpfuno, swi veke hi marito ya wena, endla leswaku swi pfumelelana ni swiyimo swa vanhu va nsimu leyi mi yi tirhaka naswona u tolovelana ni tinhla to karhi hi ku kongoma leti nga tirhisiwaka ku sekela bulo ra Bibele. U nga ha tirhisa swingheniso swin’wana leswi tirhaka ensin’wini ya n’wina.—Vona Vutirheli Bya Hina Bya Mfumo bya January 2005, tl. 8.

Armagedoni

◼ “Loko vanhu va twa rito leri nge ‘Armagedoni,’ vo tala va ehleketa hi ndzoviso wo chavisa lowu nga ta yayarhela vanhu. Xana u nga ku yini loko wo twa leswaku kahle-kahle Armagedoni a yi vuli ku yayarheriwa ka vanhu? [Yimela nhlamulo. Kutani u hlaya Nhlavutelo 16:14, 16.] Twana leswaku vutomi byi ta va byi ri njhani endzhaku ka Armagedoni.” Pfula eka matluka 82-4, kutani u hlaya ndzimana 21.

Bibele

◼ “Hakanyingi vanhu va vula leswaku Bibele i Rito ra Xikwembu. Xana u tshama u tivutisa leswaku swi nga kotekisa ku yini leswaku buku leyi tsariweke hi vanhu yi vuriwa Rito ra Xikwembu? [Yimela nhlamulo. Kutani u hlaya 2 Petro 1:21 na ndzimana 5 eka tluka 19.] Buku leyi yi nyika tinhlamulo ta swivutiso sweswo leti humaka eBibeleni.” N’wi kombe swivutiso leswi nga eka tluka 6.

◼ “Masiku lawa vanhu va kota ku kuma rungula ro tala ku tlula khale. Kambe, u ehleketa leswaku hi nga yi kuma kwihi ndzayo leyinene leyi nga hi pfunaka leswaku hi tshama hi tsakile evuton’wini naswona swilo swi hi fambela kahle? [Yimela nhlamulo. Kutani u hlaya 2 Timotiya 3:16, 17 na ndzimana 12 eka matluka 22-3.] Buku leyi yi hlamusela ndlela leyi hi nga hanyaka ha yona leswaku hi tsakisa Xikwembu hi tlhela hi vuyeriwa.” N’wi kombe chati ni swifaniso leswi nga eka matluka 122-3.

Rifu/Ku Pfuxiwa Ka Vafi

◼ “Vanhu vo tala va tivutisa leswaku entiyisweni ku endleka yini loko munhu a fa. Xana u ehleketa leswaku hi nga swi kota ku tiva leswi endlekaka? [Yimela nhlamulo. Kutani u hlaya Eklesiasta 9:5 ni tindzimana 5-6 eka matluka 58-9.] Buku leyi yi tlhela yi hlamusela leswi xitshembiso xa Bibele xa ku pfuxiwa ka vafi xi nga ta vula swona eka lava feke.” N’wi kombe xifaniso lexi nga eka tluka 75.

◼ “Loko munhu loyi hi n’wi rhandzaka a fa, hi navela onge hi nga tlhela hi n’wi vona. Xana a swi tano ke? [Yimela nhlamulo.] Vanhu vo tala va chaveleriwe hi xitshembiso xa Bibele xa ku pfuxiwa ka vafi. [Hlaya Yohane 5:28, 29 na tindzimana 16-17 eka tluka 72.] Ndzima leyi yi tlhela yi hlamula swivutiso leswi.” N’wi kombe swivutiso leswi nga ehansi ka nhloko-mhaka leyi nga eka tluka 66.

Vutomi Lebyi Nga Heriki

◼ “Vanhu vo tala va navela ku va ni rihanyo lerinene naswona va hanya nkarhi wo leha. Loko a swi koteka, xana a wu ta swi navela ku hanya hilaha ku nga heriki? [Yimela nhlamulo. Kutani u hlaya Nhlavutelo 21:3, 4 na ndzimana 17 eka tluka 54.] Buku leyi yi hlamusela ndlela leyi hi nga byi kumaka ha yona vutomi lebyi nga heriki ni ndlela leyi vutomi byi nga ta va xiswona loko xitshembiso xexo xi hetiseka.”

Ndyangu

◼ “Hinkwerhu ha swi navela ku va ni mindyangu leyi tsakeke. A swi tano ke? [Yimela nhlamulo.] Bibele yi vulavula hi nchumu wo karhi lowu un’wana ni un’wana endyangwini a nga wu endlaka leswaku ku va ni ntsako—ku nga ku va ni rirhandzu ku fana ni Xikwembu.” Hlaya Vaefesa 5:1, 2 na ndzimana 4 eka tluka 135.

Ndhawu Yo Tshama

◼ “Ematikweni yo tala swi ya swi tika ngopfu ku kuma ndhawu leyinene yo tshama, leyi munhu a nga kotaka ku yi hakelela. Xana u ehleketa leswaku swi ta kala swi koteka leswaku siku rin’wana vanhu hinkwavo va va ni ndhawu leyinene yo tshama eka yona? [Yimela nhlamulo. Kutani u hlaya Esaya 65:21, 22 na ndzimana 20 eka tluka 34.] Buku leyi yi hlamusela ndlela leyi xitshembiso lexi xa Xikwembu xi nga ta hetiseka ha yona.”

Yehovha Xikwembu

◼ “Vanhu vo tala lava pfumelaka eka Xikwembu va navela ku va ni vuxaka lebyikulu na xona. Xana a wu swi tiva leswaku Bibele yi hi khutaza leswaku hi tshinela eka Xikwembu? [Yimela nhlamulo. Kutani u hlaya Yakobo 4:8a ni ndzimana 20 eka tluka 16.] Buku leyi yi lunghiseleriwe ku pfuna vanhu leswaku va tiva leswi engetelekeke hi Xikwembu, va tirhisa Tibibele ta vona vini.” N’wi kombe swivutiso leswi nga ehansi ka nhloko-mhaka leyi nga eka tluka 8.

◼ “Vanhu vo tala va khongelela leswaku vito ra Xikwembu ri kwetsimisiwa. Xana wa ri tiva vito ra Xikwembu? [Yimela nhlamulo. Kutani u hlaya Pisalema 83:18 ni tindzimana 2-3 eka tluka 195.] Buku leyi yi hlamusela leswi Bibele yi swi dyondzisaka hakunene hi Yehovha Xikwembu ni hi swikongomelo swa yena hi vanhu.”

Yesu Kreste

◼ “Vanhu emisaveni hinkwayo va n’wi tiva Yesu Kreste. Van’wana va vula leswaku a a ri munhu wo fana ni vanhu van’wana. Van’wana va n’wi gandzela tanihi Xikwembu xa Matimba Hinkwawo. Xana u ehleketa leswaku swi na mhaka leswaku hi pfumela yini ha Yesu Kreste?” Yimela nhlamulo. Kutani u hlaya Yohane 17:3 na ndzimana 3 eka matluka 37-8. N’wi kombe swivutiso leswi nga ehansi ka nhloko-mhaka ya ndzimana yoleyo.

Xikhongelo

◼ “Xana u tshama u tivutisa leswaku Xikwembu xi swi hlamula njhani swikhongelo? [Yimela nhlamulo. Kutani u hlaya 1 Yohane 5:14, 15 na tindzimana 16-18 eka matluka 170-2.] Ndzima leyi yi tlhela yi hlamusela leswaku ha yini hi fanele ku khongela Xikwembu ni leswi hi faneleke hi swi endla leswaku xi twa swikhongelo swa hina.”

Vukhongeri

◼ “Vanhu vo tala emisaveni se va sungula ku teka vukhongeri byi ri byona byi vangaka swiphiqo swa vanhu ku ri ni ku swi tlhantlha. Xana u ehleketa leswaku vukhongeri byi kongomisa vanhu kumbe bya va lahla? [Yimela nhlamulo. Kutani u hlaya Matewu 7:13, 14 na ndzimana 5 eka tluka 146.] Ndzima leyi yi hlamusela tinhla ta tsevu leti kombisaka vugandzeri lebyi amukelekaka eka Xikwembu.” N’wi kombe nxaxamelo wa tona eka tluka 147.

Khombo/Ku Xaniseka

◼ “Loko vanhu vo tala va weriwa hi khombo, va tivutisa loko Xikwembu xi ri ni mhaka hakunene ni vanhu niloko xi ma vona maxangu ya vona. Xana na wena u tshama u tivutisa xivutiso xexo? [Yimela nhlamulo. Kutani u hlaya 1 Petro 5:7 na ndzimana 11 eka tluka 11.] Buku leyi yi hlamusela ndlela leyi Xikwembu xi nga ta ma herisa ha yona maxangu ya vanhu hilaha ku nga heriki.” N’wi kombe swivutiso leswi nga ehansi ka nhloko-mhaka leyi nga eka tluka 106.

Nyimpi/Ku Rhula

◼ “Vanhu hinkwako-nkwako va navela ku rhula. Xana u ehleketa leswaku ku rhula ku ta kala ku va kona emisaveni? [Yimela nhlamulo. Kutani u hlaya Pisalema 46:8, 9.] Buku leyi yi hlamusela ndlela leyi Xikwembu xi nga ta xi hetisisa ha yona xikongomelo xa xona xi tlhela xi tisa ku rhula emisaveni hinkwayo.” N’wi kombe xifaniso lexi nga eka tluka 35 u tlhela u hlamusela tindzimana 17-21 eka tluka 34.

[Bokisi leri nga eka tluka 5]

Tindlela To Vulavula Hi Lunghiselelo Ra Munyikelo

“Loko u rhandza ku nyikela hi mali yo karhi entirhweni wa misava hinkwayo, ndzi ta yi amukela hi mandla mambirhi.”

“Hambileswi hi nga va hakerisiki vanhu loko hi va nyika tibuku ta hina, ha yi amukela mali leyi va yi nyikelaka eka ntirho wa misava hinkwayo.”

“Kumbexana wa tivutisa leswaku ntirho lowu wa hina wu endliwa njhani. Wu seketeriwa hi mali ya minyikelo leyi vanhu va yi humesaka hi ku tirhandzela. Loko na wena u tsakela ku yi humesa, ndzi ta yi amukela hi mandla mambirhi.”