Tlhelela U Ya Ponisa Van’wana

¹ I ku rhandza ka Xikwembu “leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso.” (1 Tim. 2:4) Xana hi nga endla yini leswaku hi va pfuna? Endla maendzo yo vuyela hi xikongomelo xo dyondzisa ntiyiso hi ku tirhisa dyondzo ya le kaya ya Bibele. I yini leswi u nga ta swi vula? Swiringanyeto leswi landzelaka swi nga ha ku pfuna.

² Loko u endla riendzo ro vuyela, hambi loko buku leyi nge “Nghwazi” yi fambisiwile kumbe e-e, u nga ha lava ku tirhisa xingheniso lexi xo kongoma leswaku u sungula dyondzo:

◼U nga ha vutisa u ku: “I yini lexi endleke Yesu a va nghwazi?” U nga hlamula hi ku kombetela eka tindzima ti nga ri tingani ta tindzima ta 133 leti hlamuselaka vutomi byakwe, vumunhu byakwe, tidyondzo takwe ni mintirho yakwe. Ndzima 24 yi hlamusela xikongomelo xa ku ta ka yena emisaveni. Ndzima 35 yi hlamusela Dyondzo yakwe ya le Ntshaveni leyi tivekaka ngopfu. Ndzima 133 yi kombisa yin’wana ya mikateko leyi yi nga ta kumiwa hi vanhu loko a hetisa ntirho wakwe. Komba n’wini wa muti ndlela leyi swivutiso ni matsalwa lama nga emakumu ka ndzima yin’wana ni yin’wana ma hi pfunaka ha yona leswaku hi kuma tinhla-nkulu eka ndzima yin’wana ni yin’wana. Hlanganisa tinhla ti nga ri tingani ntsena kutani u endla malunghiselelo lama tiyeke yo tlhela u vuya.

³ Xingheniso xin’wana xi nga ha va lexi:

◼“Ndzi tsakele bulo ra hina vhiki leri nga hundza. Vanhu vo tala va phofule ku karhateka ka vona hi swiyimo swa misava leswi yaka swi biha. Ndzi ehlekete leswaku ndzima 111 ya buku leyi nge Nghwazi Leyi Tshameke Yi Hanya, yi ta ku tsakisa swinene. [Lunghekela ku hlamusela swiyenge leswi u swi hlawuleke eka ndzima 111 leswaku u hlamula xin’we kumbe swimbirhi swa swivutiso swa mpfuxeto emakumu ka ndzima, hi xikombiso: “I swiyimo swihi swa misava leswi funghaka vukona bya Kreste?” kumbe “I xikombiso xihi lexi Yesu a xi nyikaka vadyondzisiwa va yena va nkarhi lowu taka leswaku va ta vona loko makumu ma ri kusuhi?”] Mayelana ni leswi hi swi hlayaka laha, i yini leswi u nga swi vulaka mayelana ni ntshembo wa hina wa vumundzuku bya sweswinyana? [Yimela nhlamulo kutani u bumabumela n’wini wa muti.] Xana hi fanele ku endla yini loko hi tsakela ku pona makumu ya mafambiselo layo biha ya swilo?” Hlaya Yohane 17:3 kutani u hlamusela dyondzo ya le kaya ya Bibele.

⁴Loko munhu loyi hi n’wi endzelaka a khomekile, hi nga ha humelela hi ku vula leswi:

◼“Ndza swi tiva leswaku u na timinete ti nga ri tingani ntsena, kambe hi leswi swin’wana leswi u nga anakanyaka ha swona loko u ri karhi u hetisa ntirho wa wena. [Hlaya Matewu 5:3.]” Kumbe u nga ha ku: “Ndzi ku tsalele matsalwa lawa manharhu. Leswi ku nga riki nkarhi lowunene wo vulavula, i nge ndzi ku siyela wona, kutani loko ndzi vuya, ndzi ta tsakela ku heta timinete ta ntlhanu hi bula ha wona na wena.” Loko swi vonaka onge n’wini wa muti a nga ha lunghiseriwa nkarhi wun’wana, u nga ha vutisa: “Xana u ta tsakela ku tiva swo tala mayelana ni leswaku makumu ya mafambiselo lawa ya swilo ma ta va rini?” Kutani u nga ha lunghiselela ku tlhela u vuya u ta hlamula xivutiso.

⁵ Tsundzuka leswaku pakani ya ku endla maendzo yo vuyela i ku sungula tidyondzo ta Bibele. Hi ta kuma ntsako lowukulu loko lava dyondzaka va tiva ku vitana Yehovha leswaku va ponisiwa.—Mint. 2:21.