Tshama U Ri Karhi U Vulavula Hi Ntiyiso

¹ Vaapostola va te: “Hi nga ka hi nga koti ku tshika ku vula leswi hi swi voneke ni leswi hi swi tweke.” (Mint. 4:20) Namuntlha na hina, hi fanele hi tshama hi ri karhi hi vulavula hi ntiyiso. Hambileswi ku hangalasa Xihondzo xo Rindza ni Xalamuka! ku nga xiendlo xo kuma lava va nga ta yingisela, hi fanele hi tlhelela leswaku hi ta dyondzisa lava tsakelaka leswi engetelekeke hi ntiyiso.

² Loko u tlhelela laha u siyeke magazini wo hlawuleka wa “Xalamuka!” ya May lowu nga ni nhloko-mhaka leyi nge “Nkarhi Lowu Tinyimpi Ti Nga Ta Va Ti Nga Ha Ri Kona,” u nga sungula dyondzo ya Bibele hi ku vutisa u ku:

◼“Nkarhi lowu nga hundza, hi vulavule hi tinyimpi ta matiko ni ku nghenelela ka vukhongeri eka tona. Xana u swi xiyile leswaku swiendlakalo swo tano swi kombisa kahle leswaku hi hanya eminkarhini leyi Bibele yi yi vitanaka masiku ya makumu? [N’wi kombe buku leyi nge Vutivi. Hlaya ndzimana yo sungula ya ndzima 11, kutani u kandziyisa bokisi leri nga eka tluka 102.] Buku leyi yi hlamusela mhaka leyi kun’we ni tin’wana ta 18 leti longoloxiweke eka leswi nga endzeni. [N’wi kombe tluka 3.] Loko swi koteka, ndzi ta tsakela ku ku kombisa ndlela leyi buku leyi yi nga ku pfunaka ha yona leswaku u twisisa timhaka leti ta nkoka ta Bibele.” Loko a pfumela, sungula dyondzo eka tluka 6.

³ Loko u tshembise ku tlhelela u ya hlamusela ndlela leyi swi kotekaka ha yona ku tiphina hi vutomi lebyi sirhelelekeke sweswi, u nga ha vula swo fana ni leswi:

◼“Loko hi hlangana ro sungula, ndzi vulavule na wena hi mhaka leyi humaka eBibeleni leyi hi nyikaka ntshembo mayelana ni vumundzuku bya munhu. Namuntlha ndzi ta tsakela ku yisa nyingiso wa wena eka xin’wana lexi kombisaka loyi a nga hi endlaka hi titwa hi sirhelelekile hambi sweswi.” Hlaya Pisalema 4:8. Pfula eka tluka 168 ra buku leyi nge Vutivi kutani u hlaya ndzimana 19. Kutani u vutisa: “Xana u nga tsakela ku va ni dyondzo ya le kaya ya Bibele ya mahala leyi kombisaka kahle ndlela leyi na wena u nga kumaka ha yona nsirhelelo lowu evuton’wini bya wena?” Loko nhlamulo yi ri ina, pfula eka ndzima 1.

⁴ Leswaku u engetela eka ntila wa wena wa timagazini eka lava u va fambiseleke “Xalamuka!” ya June 8, u nga ha ringeta xingheniso lexi:

◼“U vonake u ri ni mapfundza yo hlaya magazini wa Xalamuka! lowu ndzi ku siyeleke wona lowu vulavulaka hi nhlaselo hi tlhelo ra rimbewu entirhweni. Xana yi ku tsakisile mhaka leyi? [Yimela nhlamulo.] Lava hlayaka Xalamuka! nkarhi hinkwawo, hakanyingi va vula leswaku va tlangela ku vekiwa erivaleni ni ku hlamuserisisiwa ka timhaka to tano ta nkoka. Ndzi anakanya leswaku na wena u ta swi vona swi ri tano loko u hlaya nkandziyiso lowu wa sweswinyana. [Hlamusela mhaka leyi nga exifunengetweni hi ku komisa.] Xana u nga tsakela ku wu hlaya?”

⁵ U nga ha sungula dyondzo hi ku kongoma loko u tlhelela hi ku vula u ku:

◼“Hi hangalasa timagazini ta hina emisaveni hinkwayo leswaku hi tivisa vanhu hinkwako mayelana ni leswi Bibele yi swi dyondzisaka. Loko vanhu va vona nkoka wa leswi va swi dyondzaka, hi va fambisela dyondzo ya le kaya ya Bibele ya mahala. [Kombetela ebokisini leri nge ‘Xana U Nga Ri Amukela Riendzo?’ eka tluka ro hetelela ra Xihondzo xo Rindza.] Hi tirhisa buku leyi nge Vutivi Lebyi Yisaka eVuton’wini Lebyi Nga Heriki, tanihi xiletelo. I nge ndzi ku kombisa ndlela leyi dyondzo yi fambisiwaka ha yona hi ku komisa.”

⁶ Loko hi tshama hi ri karhi hi vulavula ntiyiso, hi nga tiyiseka leswaku va ta va kona lava nga ta yingisela kutani va angula kahle.—Mar. 4:20.