“Ku Pfumela Ku Ta Hi Ku Twa”
1 Loko hi kuma munhu la “hlawuleriweke vutomi lebyi nga heriki,” i swa nkoka leswaku hi tiyisa ripfumelo ra munhu wa kona eka leswi a swi tweke. (Mint. 13:48; Rhom. 10:17) Leswaku hi hetisisisa leswi, hi fanele hi tlhelela laha hi siyeke kona timagazini hi yisa minkandziyiso leyintshwa ni ku bula hi swo tala. Laha ku nga ni ku tsakela lokukulu, ku nga ha fambisiwa swikhokhelo. Hambiswiritano, emianakanyweni ya wena vana na pakani yo dyondza buku leyi nge Vutivi Lebyi Yisaka eVuton’wini Lebyi Nga Heriki. Hi leswi swiringanyeto swin’wana leswi swi nga ha pfunaka:
2 Loko u tlhelela laha u buleke hi xihloko lexi nge “Dzunisa Hosi Ya Minkarhi Ni Minkarhi!,” u nga ha sungula hi ndlela leyi:
◼ “Nkarhi lowu nga hundza loko hi vulavula, hi bule hi byin’wana bya vumbhoni lebyi hlamarisaka lebyi kombisaka leswaku ku na Xikwembu xa matimba hinkwawo. Hambiswiritano, ku tiva ntsena leswaku xi kona a swi enelanga. Hi fanele hi tiva vito ra xona. Xana u xi vitana hi vito rihi Xikwembu? [Yimela nhlamulo.] Timiliyoni ta vanhu ti xi vitana ‘Hosi’ kumbe ‘Xikwembu,’ leswi ku ngo va swithopo ntsena. Ku engetela kwalaho, xi lava leswaku hi xi tiva hi vito. [Hlaya Pisalema 83:18.] Bibele yi hi byela swo tala mayelana na Yehovha Xikwembu, hi laha swi hlamuseriweke ha kona ebukwini leyi.” N’wi kombe xifaniso lexi nga eka tluka 29 ra buku leyi nge Vutivi, kutani u hlaya marito ya xifaniso. Endzhaku ka loko u hlamusele tindzimana tinharhu to sungula eka ndzima 3, u ta va u sungule dyondzo!
3 Eka lava u vulavuleke na vona hi xihloko lexi nge “Lexi Nga Ta Endla Leswaku Vukhongeri Bya Misava Byi Hela,” u nga ha lava ku kurisa ku tsakela hi ku vula leswi:
◼ “Endzhaku ko hlaya xihloko, u nga ha va u tsakisiwe hi ntiyiso wa leswaku a hi nge languti vukhongeri hinkwabyo hi ndlela leyi fanaka. Vukhongeri bya ntiyiso ni vukhongeri bya mavunwa byi kona. Leswi swi tlakusa xivutiso lexi twalaka, I vugandzeri bya vamani lebyi Xikwembu xi byi amukelaka? Nhlamulo yi nyikeriwe hi Yesu, naswona yi kandziyisiwile ebukwini leyi.” Pfula eka ndzima 5 ebukwini leyi nge Vutivi, kutani u hlaya ndzimana 4, ku katsa na Yohane 4:23, 24. Kutani u vutisa, “Xana u nga swi tsakela ku amukela dyondzo ya Bibele ya mahala?” Loko n’wangulo wu ri wunene, pfula eka ndzima 1 kutani u sungula dyondzo.
4 Loko ku tsakela ku kombisiwile eka “Xalamuka!,” ya May 8, loko u tlhelela u nga ha ringeta xingheniso lexi leswaku u sungula dyondzo hi buku leyi nge “Vutivi”:
◼ “U nga ha tsundzuka leswaku hi ve ni bulo ra mayelana ni ku langutela ka leswaku eku heteleleni hi vona misava leyi nga hava nyimpi. Swa tika ku anakanya leswi sweswo swi nga ta va xiswona. Laha ku na xifaniso xa mumpfampfarhuti lexi kombaka leswi yi nga ta va xiswona. [N’wi kombe xifaniso lexi nga eka matluka 188-9 ebukwini leyi nge Vutivi.] Xana a swi nge tsakisi ku kota ku tiphina etindhawini to tano? [Pfula eka matluka 4-5, n’wi kombe xifaniso, kutani u hlaya bokisi.] Vito ra buku leyi ri fana ni marito ya Yesu lama kumekaka eka Yohane 17:3. [Hlaya.] Loko swi koteka, ndzi ta tsakela ku ku kombisa ndlela leyi buku leyi yi nga tirhisiwaka ha yona swin’we ni Bibele leswaku u kuma vutivi byebyo lebyi ponisaka vutomi.” Loko n’wini wa muti a swi tsakela, sungula dyondzo hi ndzima yo sungula.
5 Loko u vulavule ni munhu loyi a a khomekile loko u endza ro sungula, u nga ha vula leswi loko u tlhelela:
◼ “Ndzi ku endzerile ku nga ri khale kutani ndzi ku siyela tikopi ta magazini wa Xihondzo xo Rindza ni Xalamuka! Timagazini leti ti aka ku xixima Bibele ni nkongomiso wa yona wa mahanyelo. Hi laha ndzi swi voneke swi fanerile hakona leswaku un’wana ni un’wana a twisisa Rito ra Xikwembu, ndzi tlhele ndzi vuya leswaku ndzi ta ku komba swin’wana leswi nga ta ku pfuna ku ri twisisa.” N’wi kombe buku leyi nge Vutivi, kutani u kombisa leswi nga endzeni eka tluka 3. N’wi vutise ndzima leyi vonakaka yi tsakisa, yi pfule, kutani u sungula dyondzo.
6 Ntsako wa hina wu ta va wukulu loko hi kota ku ‘pfulela van’wana nyangwa yo nghena eku pfumeleni’ wu va yisa evuton’wini lebyi nga heriki.—Mint. 14:27; Yoh. 17:3.