Ku Hangalasa Vutivi Lebyi Yisaka Evuton’wini Lebyi Nga Heriki
1 Yehovha hi “yena l’a dyonḍisaka v̌anhu e v̌utlhari.” (Ps. 94:10) U tirhisa hina leswaku hi hangalasa vutivi bya mayelana na yena lebyi ponisaka vutomi eka lava va nga yi lemukiki ndlela leyi amukelekaka yo n’wi tirhela. Buku leyi nge Vutivi Lebyi Yisaka eVuton’wini Lebyi Nga Heriki i xitirho lexinene xo dyondzisa lexi ha xona lava timbilu letinene va nga xi twisisaka kahle Xikwembu hi Rito ra xona leri tsariweke, ku nga Bibele. (1 Tim. 2:3, 4) Ku hlamusela ntiyiso erivaleni na hi ndlela leyi twisisekaka ka buku leyi nge Vutivi ku ta pfuna vanhu leswaku va kuma leswi Yehovha a lavaka ku va dyondzisa swona. N’hweti leyi hi lava ku nghenisa vanhu emabulwini lama nga ta va endla leswaku va lava ku hlaya buku leyi. Hi leswi swiringanyeto swin’wana. Ematshan’wini yo ringeta ku swi nhlokohata, ringetani ku phofula tinhla-nkulu hi marito ya n’wina naswona hi ndlela yo vulavula ya ntumbuluko.
2 Leswi vunyingi bya vanhu byi feriweke hi varhandziwa va byona, u nga vulavula hi ku pfuxiwa ka vafi hi ku rhanga u vula swo fana na leswi:
◼ “Vo tala va hina va fele hi varhandziwa va vona. Xana u tshama u tivutisa loko u ta tlhela u va vona? [Yimela nhlamulo.] Rifu a ri nga ri xiphemu xa xikongomelo xo sungula xa Xikwembu hi munhu. Yesu u kombise leswaku varhandziwa va hina va nga ponisiwa eku feni. [Hlaya Yohane 11:11, 25, 44.] Hambileswi leswi swi humeleleke eka malembe-xidzana yo tala lama hundzeke, swi kombisa leswi Xikwembu xi tshembiseke ku hi endlela swona. [Pfula buku leyi nge Vutivi eka xifaniso lexi nga eka tluka 85 kutani u hlaya marito ya xifaniso. Kutani u n’wi kombisa xifaniso lexi nga eka tluka 86 kutani u xi hlamusela.] Loko u tsakela ku hlaya swo tala mayelana ni ntshembo lowu chavelelaka wa ku pfuxiwa ka vafi, ndzi ta tsakela ku ku siyela buku leyi hi munyikelo wa R3,50.”
3 Endzhaku ka bulo ro sungula ra mayelana ni ntshembo wa ku pfuxiwa ka vafi, u nga sungula bulo leri landzelaka ni munhu yoloye hi ndlela leyi:
◼ “Wa ha tsundzuka loko ndzi vule leswaku rifu a ku nga ri xiphemu xa xikongomelo xo sungula xa Xikwembu hi munhu. Loko sweswo swi ri ntiyiso, ha yini hi dyuhala ni ku fa? Swibodze swin’wana swi hanya ku tlula 100 wa malembe, naswona ku ni mirhi leyi hanyeke magidi ya malembe. Ha yini vanhu va hanya malembe ya 70 kumbe 80 ntsena? [Yimela nhlamulo.] Ha fa hikuva mpatswa wo sungula wa vanhu a wu xi yingisanga Xikwembu.” Hlaya Varhoma 5:12. Pfula eka tluka 53 ebukwini leyi nge Vutivi kutani u hlaya xihloko xa ndzima leyi. Hlamusela tindzimana tinharhu to sungula, u kombisa tinhlamulo ta swivutiso leswi tsariweke. Veka nkarhi lowu u nga ta tlhela u vuya ha wona endzhakunyana leswaku mi ta bula hi ndzima hinkwayo. Khutaza munhu yoloye leswaku a sala a yi hlaya.
4 Loko u vulavula ni munhu la tikombaka a ri wa vukhongeri, u nga ha ku:
◼ “Hi ku kongoma ku ni madzana ya vukhongeri byo hambana-hambana namuntlha. Hinkwabyo byi dyondzisa tinxaka hinkwato ta tidyondzo leti himpfilitanaka. Vanhu van’wana va vula leswaku vukhongeri hinkwabyo i byinene naswona leswi hi swi pfumelaka a swi hambani helo. Xana vonelo ra wena hi rihi emhakeni leyi? [Yimela nhlamulo.] Yesu u dyondzise vukhongeri bya ntiyiso naswona a kombisa leswaku swivumbeko leswin’wana swa vugandzeri a swi amukeleki eka Xikwembu. [Hlaya Matewu 7:21-23.] Loko hi lava ku tsakisa Xikwembu, hi fanele hi xi gandzela hi ku pfumelelana ni ku rhandza ka xona.” Pfula eka ndzima 5 ya buku leyi nge Vutivi, u hlaya xihloko, kutani u hlamusela swin’wana swa swihlokwana. Hlamusela leswaku rungula leri ri ta pfuna munhu ku dyondza ndlela yo tsakisa Xikwembu. N’wi fambisele buku hi munyikelo wa R3,50.
5 Vanhu lava pfilunganyekeke hikwalaho ka leswi ku nga ni vukhongeri byo tala va nga ha tsakela nhlamulo ya xivutiso lexi eka riendzo ra wena ro vuyela:
◼ “Leswi ku nga ni vukhongeri byo hambana-hambana namuntlha, xana hi nga byi tivisa ku yini lebyi nga bya ntiyiso? Xana u nga languta yini eka byona? [Yimela nhlamulo.] Yesu u hi byela ndlela yo tiva valandzeri va yena va ntiyiso.” Hlaya Yohane 13:35. Xiya tindzimana 18 na 19 ta ndzima 5 ya buku leyi nge Vutivi. Hlamusela leswaku hi ku tirhisa nkongomiso wa Matsalwa ni hi endlelo ro kambisisa hinkwaswo, munhu a nga byi kuma vukhongeri bya ntiyiso. Hlamusela ndlela leyi Timbhoni ta Yehovha ti tiviwaka ha yona emisaveni hinkwayo hikwalaho ka rirhandzu ra tona ni mimpimanyeto ya tona ya mahanyelo leyi tlakukeke. Hlamusela ndlela leyi ku dyondza Bibele, hi ku tirhisa buku leyi nge Vutivi swi nga ta byi hlamusela kahle ha yona vugandzeri lebyi amukeriwaka hi Xikwembu.
6 Loko u kuma mutswari, xingheniso lexi xi nga tirha:
◼ “Siku na siku hi twa swiviko swa mayelana ni mahanyelo lama nga lawulekiki ya vantshwa lava vonakaka va nga layiwanga. Vanhu van’wana lavakulu va sola fambiselo ra xikolo ra ku va xi nga dyondzisi vana ku hambanisa exikarhi ka leswinene ni leswo biha. Xana i mani loyi u anakanyaka leswaku hi yena a faneleke a nyikela ndzetelo wa leswi? [Yimela nhlamulo.] Yingisela leswi Bibele yi swi vulaka hi xivutiso lexi. [Hlaya Vaefesa 6:4.] Sweswo swi hi byela leswaku ku dyondzisa milawu ya mahanyelo eka vana i vutihlamuleri bya vatswari.” Pfula eka tluka 145 ra buku leyi nge Vutivi, hlaya ndzimana 16, kutani u hlamusela swifaniso leswi nga eka tluka 147. Hlamusela leswaku buku leyi yi endleriwe ku dyondziwa hi ndyangu hinkwawo. N’wi kombe ndlela leyi dyondzo yo tano yi fambisiwaka ha yona ni mindyangu, u tirhisa tindzimana 17 na 18 leti nga eka tluka 146.
7 Loko u sungule dyondzo ni mutswari la karhatekaka eka riendzo ro sungula, u nga ha ya emahlweni na yona eka riendzo leri landzelaka hi ku vula leswi:
◼ “Namuntlha misava yi nghenisa vana va hina emiringweni yo tala. Leswi swi endla leswaku swi va nonon’hwela swinene ku chava Xikwembu loko va ri karhi va kula. Kumbexana wa tsundzuka leswaku eka bulo ra hina leri nga hundza, hi boxe misinya mimbirhi ya milawu. Tanihi vatswari lava chavaka Xikwembu, hi lava ku veka swikombiso leswinene eka vana va hina, naswona hi fanele ku tshamela ku va byela leswaku ha va rhandza. Ku ni xin’wana lexi Bibele yi vulaka leswaku vana va lava xona eka vatswari va vona.” Hlaya Swivuriso 1:8. Pfula eka tluka 148 ra buku leyi nge Vutivi kutani u ya emahlweni ni dyondzo, u hlanganisa tindzimana 19-23. Vula leswaku u ta tlhela u vuya leswaku mi ta dyondza ni ndyangu hinkwawo, mi sungula eka ndzima 1.