“Leswi Swi Vula Vutomi Lebyi Nga Heriki”

¹ Marito ya Yesu lama rhekhodiweke eka Yohane 17:3 (NW) ma fanele ma twisisiwa kahle. A a tiyisile eka leswi a swi vula—ku nghenisa vutivi bya Xikwembu na Kreste swi vula vutomi lebyi nga heriki! Kambe xana hi ta kuma vutomi lebyi nga heriki hi ku va ni vutivi ha Yehovha na Yesu ntsena? E-e. Vaisrayele a va swi tiva leswaku Yehovha a a ri Xikwembu xa vona, kambe ndlela ya vona ya vutomi a yi swi kombisanga sweswo. Hikwalaho ka sweswo, a nga ha va amukelanga. (Hos. 4:1, 2, 6) Namuntlha vanhu va timiliyoni va nga ha va “va hisekela Xikwembu, kambe va hiseka va nga ri na vutivi.” (Rhom. 10:2) Va fanele va tiva Yehovha, “Xikwembu xi ri xin’we xa ntiyiso,” naswona va dyondza ndlela yo n’wi tirhela hi mfanelo. Hikwalaho ka xikongomelo lexi, hi November hi ta va hi fambisa buku leyi nge Vutivi Lebyi Yisaka eVuton’wini Lebyi Nga Heriki. Xana u ta tirhisa xingheniso xihi loko u fambisa buku leyi nge Vutivi? Hi leswi swiringanyeto leswi nga ha ku pfunaka.

² Leswi mianakanyo yo hanya hilaha ku nga heriki emisaveni yi nga yintshwa eka vanhu vo tala, xingheniso lexi xi nga va tsakisa: ◼“Hi vutisa vaakelani va hina xivutiso. Loko wo rhambiwa ku ya hanya emisaveni yo fana ni leyi, xana a wu ta xi amukela xirhambo xa kona? [N’wi kombe xifaniso lexi nga eka matluka 4-5 ebukwini leyi nge Vutivi. Yimela nhlamulo.] Lowu wu nga va ntokoto wa wena lowu tsakisaka evuton’wini. Kambe xana u ehleketa leswaku u fanele u endla yini leswaku leswi swi va swa xiviri eka wena? [Yimela nhlamulo.] Xiya goza leri lavekaka hi ku ya hi Yohane 17:3. [Hlaya.] Buku leyi yi pfuna vo tala leswaku va kuma muxaka lowu wo hlawuleka wa vutivi. Xana u nga tsakela ku va ni kopi ya wena leswaku u ta tihlayela yona? [Yimela nhlamulo.] Leyi yi nga va ya wena hi munyikelo lowutsongo wa R4,00. Eriendzweni ra mina leri landzelaka, hi nga bula hi xivangelo xo va hi pfumela leswaku hi nga byi kuma vutomi lebyi nga heriki kona kwala misaveni.”

³ Loko u tlhelela eka lava u burisaneke na vona hi Yohane 17:3, u nga ha ya emahlweni hi ndlela leyi: ◼“Eriendzweni ra mina leri hundzeke, ndzi ku hlayele marito ya Yesu lama nyanyulaka lama kumekaka eka Yohane 17:3, laha a hi tiyisekiseke leswaku ku nghenisa vutivi bya Xikwembu ni bya yena swi vula vutomi lebyi nga heriki. Kambe vanhu vo tala va pfumela leswaku vutomi lebyinene byi nga kumiwa etilweni ntsena. Xana u titwa njhani hi sweswo? [Yimela nhlamulo.] Loko buku leyi ndzi ku siyeleke yona yi ri kona ekusuhi, ndzi ta tsakela ku ku kombisa tindzimana tin’wana ta Bibele leti kombisaka leswaku Paradeyisi yi ta kondleteriwa emisaveni. [Bula hi tindzimana 11-16 eka matluka 9-10 ya buku leyi nge Vutivi.] Eriendzweni ra mina leri landzelaka, ndzi ta tsakela ku ku kombisa xivangelo xo va u fanele u tshembela eka switshembiso leswi, leswi kumekaka eBibeleni. Enkarhini lowu, kumbexana u nga hlaya ndzima 2 ebukwini ya wena.”

⁴ Hi lexi xingheniso lexi u nga ha xi tirhisaka loko u kuma vanhu lava rhandzaka vukhongeri: ◼“Hi vulavula ni vaakelani va hina malunghana ni xivangelo lexi endlaka ku va ni vukhongeri byo hambana-hambana byo tarisa xileswi emisaveni. Laha Afrika Dzonga ntsena ku ni tikereke leti tiyimeleke to tlula 4000, naswona mintlawa ya vukhongeri yo tlula 10 000 yi kumeka emisaveni hinkwayo. Kambe ku ni Bibele yin’we ntsena. Hi ku vona ka wena, ha yini ku ri ni mpfilumpfilu lowu wa vukhongeri? [Yimela nhlamulo. Pfula buku leyi nge Vutivi eka ndzima 5, ivi u hlaya ndzimana 1.] U ta kuma tinhlamulo leti enerisaka ta swivutiso swoleswo loko u hlaya ndzima leyi. Ndzi tsakela ku ku siyela buku leyi hi munyikelo wa R4,00.” Loko a swi tsakela, endla malunghiselelo lama tiyeke yo tlhelela, kutani u ku: “Loko ndzi vuya, kumbexana hi ta burisana hi mayelana ni loko vukhongeri hinkwabyo byi ri tindlela to hambana-hambana leti yaka endhawini yin’we ntsena.”

⁵ Loko u tlhelela ku ya yisa bulo emahlweni mayelana ni lexi endlaka ku va ni vukhongeri byo tala, u nga ha vula leswi: ◼“Loko ndzi vulavula na wena enkarhini lowu hundzeke, ndzi vutise xivutiso xa loko vukhongeri hinkwabyo byi ri tindlela to hambana-hambana ntsena leti yaka endhawini yin’we. Xana u ehleketa yini hi mhaka leyi? [Yimela nhlamulo.] Ndzi tsakela ku ku komba ebukwini leyi ndzi ku siyeleke yona leswi Yesu a swi vuleke emhakeni leyi. [Pfula eka ndzima 5 ya buku leyi nge Vutivi, kutani u hlaya tindzimana 6-7, ku katsa na Matewu 7:21-23.] U nga ha va u hlamarisiwa hi mhaka leyi ha yona swi nga swa nkoka ku swi tiva kahle leswi ku rhandza ka Xikwembu ku nga swona. U ta kuma leswaku tindzimana leti landzelaka ta dyondzisa swinene. Ndzi kombela u hlaya xiphemu lexi saleke xa ndzima leyi. Loko ndzi tlhela ndzi vuya, ndzi ta tsakela ku ku kombisa nkoka wa ku va ni vutivi lebyi kongomeke bya Bibele.”

⁶ Xingheniso lexi kongomeke hakanyingi xa pfuna eku sunguleni ka tidyondzo ta Bibele. Hi lexi xingheniso lexi ringanyetiwaka lexi kumekaka eka tluka 10 ra buku leyi nge “Ku Hlamulana”: ◼“Ndzi endzela ku ta kombela ku ku fambisela dyondzo ya le kaya ya Bibele ya mahala. Loko swi koteka, ndzi nga tsakela ku tirhisa timinete ti nga ri tingani ndzi ku komba ndlela leyi vanhu va le matikweni ya kwalomu ka 200 va bulaka ha yona hi Bibele tanihi mindyangu. Hi nga tirhisa yihi na yihi ya tinhloko-mhaka leti tanihi xisekelo xa bulo. [N’wi kombe tluka ra leswi nga endzeni ebukwini leyi nge Vutivi.] Hi yihi leyi ku tsakisaka ngopfu?” N’wi yimele a hlawula. Pfula ndzima leyi a yi hlawuleke, kutani u sungula dyondzo eka ndzimana yo sungula.

⁷ Hi lexi xingheniso xin’wana lexi kongomeke lexi u nga xi ringetaka leswaku u sungula tidyondzo: ◼“Ndzi nyikela tidyondzo ta Bibele mahala naswona ndzi amukela swichudeni leswi engetelekeke. Hi lexi xipfuneto xo dyondza Bibele lexi hi xi tirhisaka. [N’wi kombe buku leyi nge Vutivi.] Dyondzo leyi yi teka tin’hweti ti nga ri tingani ntsena naswona yi hlamula swivutiso swo tanihi lexi nge: Ha yini Xikwembu xi pfumelela ku xaniseka? Ha yini hi dyuhala ni ku fa? Ku humelela yini hi varhandziwa va hina lava feke? Naswona xana hi nga tshinela njhani ekusuhi ni Xikwembu?” Kutani u vutisa: “Xana ndzi nga ku kombisa ndlela leyi hi dyondzaka ha yona?” Loko nyiko ya dyondzo yi ariwa, vutisa munhu loyi loko a ta tsakela ku va ni buku leyi nge Vutivi leswaku a ta tihlayela yona.

⁸ Mayana rifuwo leri vutivi lebyi kongomeke bya Xikwembu na Kreste byi nga rona eka un’wana ni un’wana la nga na byona! Ku byi nghenisa hi xiviri swi vula vutomi lebyi nga heriki eswiyin’weni leswi hetisekeke. A hi tirhiseni nkarhi wun’wana ni wun’wana hi November leswaku hi avela van’wana vutivi lebyi yisaka evuton’wini lebyi nga heriki.