Hi Nyikiwe Ntirho
1 Yesu u lerise valandzeri vakwe leswaku va ya “endla vanhu va matiko hinkwawo va va vadyondzisiwa.” (Mt. 28:19, NW) Ematikweni ya 232 ni le swihlaleni swa misava hinkwayo, vadzunisi va Yehovha Xikwembu vo tlula ntlhanu wa timiliyoni va nyikela vumbhoni bya xiviri bya ku hetiseka ka xileriso xa Yesu. Kambe ku vuriwa yini hi hina hi hexe? Xana ntirho lowu wo chumayela hi wu endla hi ku tiyimisela?
2 Hi Ni Vutihlamuleri: Ntirho lowu hi nyikiweke wona i “xileriso xo endla mintirho leyi lunghiseleriweke.” Hi lerisiwe hi Kreste leswaku hi chumayela. (Mint. 10:42) Muapostola Pawulo u xiye leswaku leswi swi n’wi byarhisa mfanelo, kumbe vutihlamuleri byo twarisa mahungu lamanene. (1 Kor. 9:16) Hi xikombiso: Anakanya u ri un’wana wa ntlawa wa vatluti va xikepe lexi mbombomelaka. Mufambisi u ku lerisa leswaku u tsundzuxa vakhandziyi ni ku va kongomisa eka xikwekwetsu lexi phalalaka. Xana a wu ta xi honisa xileriso xolexo ivi u tiponisa u ri wexe? Nikatsongo. Van’wana va titshege hi wena. Vutomi bya vona byi le khombyeni. U ni vutihlamuleri byo hetisisa ntirho wa wena wo va pfuna.
3 Hi ni ntirho lowu humaka eka Xikwembu wo tsundzuxa vanhu. Ku nga ri khale Yehovha u ta tisa makumu ya fambiselo leri hinkwaro lero homboloka. Vutomi bya vanhu vo tala bya tsekatseka. Xana swi lulamile loko hi honisa khombo leri telaka van’wana ivi hi tikarhatela ku ponisiwa ka hina ntsena? Kavula a swi tano. Hi ni vutihlamuleri byo pfuna eku poniseni ka vutomi bya van’wana.—1 Tim. 4:16.
4 Swikombiso Leswinene Swo Swi Landzela: Muprofeta Ezekiyele u titwe a ri ni vutihlamuleri byo huwelela rungula ra xitsundzuxo eka Vaisrayele lava nga tshembekiki. Hi ku kandziyisa, Yehovha u n’wi tsundzuxe hi vuyelo bya kona loko a tsandzeka ku endla ntirho wakwe: “Loko nḍi ta ku ka lo’wo biha: U ta fa kunene! loko u nga ṅwi ṭunḍuši, . . . munhu lo’wo biha loyi o ta fa e ku hombolokeni ka yena, kambe ngati ya yena nḍi ta yi lav̌a e v̌okweni ra wena.” (Ezek. 3:18) Ezekiyele u endle ntirho wakwe hi ku tshembeka hambiloko a langutane ni nkaneto lowukulu. Hikwalaho, a tsakile loko ku avanyisa ka Yehovha ku endliwa.
5 Endzhakunyana ka malembe-xidzana, muapostola Pawulo u tsale hi ta vutihlamuleri byakwe byo chumayela. U te: “A ndzi nga vi na nandzu loko un’wana wa n’wina a ya eku loveni, hikuva a ndzi mi fihlelanga makungu ya Xikwembu.” Pawulo u chumayele erivaleni ni hi yindlu na yindlu hikuva u swi xiyile leswaku ku tsandzeka ku endla sweswo a swi ta endla leswaku a va ni nandzu wa ngati emahlweni ka Xikwembu.—Mint. 20:20, 26, 27.
6 Xana hi hiseka ku fana na Ezekiyele? Xana hi titwa hi susumeteleka ku chumayela hilaha Pawulo a titweke hakona? Ntirho wa hina wu fana ni lowu a va ri na wona. Hi fanele hi hambeta hi hetisisa vutihlamuleri bya hina bya ku tsundzuxa van’wana, hambiloko va nga tsakeli, niloko va honisa kumbe va kaneta. Ka ha ri ni magidi man’wana lama nga ta angula kahle eka rungula ra Mfumo ivi ma ku: “Hi ta ya na ṅwina, hikuv̌a hi twile leŝaku Yehova o na ṅwina.” (Zak. 8:23) Onge ku rhandza ka hina Xikwembu ni munhu-kulorhi swi nga hi nyika matimba leswaku hi nga karhali. Hi nyikiwe ntirho wo chumayela!