Ha Yini Timbhoni Ta Yehovha Ti Chumayela Hi Yindlu Ni Yindlu?

▪ EBibeleni, hi kuma xileriso lexi Yesu a xi nyikeke valandzeri vakwe lexi nge: “Hikokwalaho fambani mi ya endla vanhu va matiko hinkwawo va va vadyondzisiwa, . . .mi va dyondzisa.” (Matewu 28:19, 20) Xana xi tirha ni le ka Vakreste hinkwavo? Vadyondzisiwa vo sungula va Yesu a va swi tiva leswaku xi tirha eka Vakreste hinkwavo. Hi xikombiso, muapostola Petro u te: “[Yesu] u hi lerise leswaku hi chumayela evanhwini ni ku nyikela vumbhoni bya rixaladza.” (Mintirho 10:42) Nakambe muapostola Pawulo u tsale a ku: “Ndzi boheka ku swi endla. Kunene ndzi le khombyeni loko ndzi nga ma vuli mahungu lamanene!”—1 Vakorinto 9:16.

A hi Pawulo na Petro ntsena lava yingiseke xileriso lexi kambe ni Vakreste hinkwavo lava hanyeke hi lembe-xidzana ro sungula va xi yingisile. Va rhangise ntirho wo chumayela. (Mintirho 5:28-32, 41, 42) Namuntlha, Timbhoni ta Yehovha ti tikarhatela ku endla leswi fanaka. Ti chumayela rungula leri fanaka ni leri Yesu a a ri chumayela, leri vulavulaka hi “mfumo wa matilo.”—Matewu 10:7.

Xana rungula ra Mfumo ri fanele ri chumayeriwa eka vamani? Yesu u vule leswaku ri fanele ri chumayeriwa eka vanhu hinkwavo. U byele vadyondzisiwa vakwe a ku: “Mi ta va timbhoni ta mina . . . ku ya fika endhawini ya le kule swinene ya misava.” (Mintirho 1:8) U tlhele a profeta leswaku loko makumu ya mafambiselo lawa ya nga si fika, “mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni.” (Matewu 24:14) Hi ndlela yoleyo, Vakreste va lembe-xidzana ro sungula va tikarhatele ku ma chumayela vanhu hinkwavo ku nga ri vanghana va vona ntsena kumbe vanhu lava nga riki eka vukhongeri. (Vakolosa 1:23; 1 Timotiya 2:3, 4) Hilaha ku fanaka, namuntlha Timbhoni ta Yehovha ti tikarhatela ku fikelela vanhu hinkwavo.a

Xana hi yihi ndlela leyi humelelaka ku tlula hinkwato ya ku hangalasa rungula ra Mfumo? Yesu loyi a a tiva ndlela yo fikelela vanhu vo tala hilaha swi nga kotekaka hakona u rhume vadyondzisiwa vakwe emitini, eswimitanini ni le makaya ya vanhu. (Matewu 10:7, 11, 12) Endzhaku ka ku fa ni ku pfuxiwa ka Yesu, vadyondzisiwa vakwe va hambete va chumayela “hi yindlu ni yindlu.” (Mintirho 5:42) Hilaha Yesu a endleke hakona, na vona a va chumayela hinkwako-nkwako lomu a va hlangana ni vanhu kona ni le tindhawini ta mani na mani. (Yohane 4:7-26; 18:20; Mintirho 17:17) Namuntlha, Timbhoni ta Yehovha ti tirhisa tindlela leti fanaka leswaku ti chumayela vanhu hinkwavo.

Yesu u vule leswaku a hi vanhu hinkwavo lava a va ta yingisa. (Matewu 10:14; 24:37-39) Xana sweswo swi fanele swi heta Vakreste matimba yo hambeta va chumayela? Xiya xifananiso lexi: Loko a wu ri eka ntlawa wa xilamulela-mhangu endzhaku ka ku ninginika ka misava loku onheke swinene, xana a wu ta tshika ku lavana ni vanhu hileswi mi kumeke vanhu va nga ri vangani ntsena endzhaku ko heta nkarhi wo leha? A swi tano, a wu ta phikelela ntsena loko ka ha ri ni ntshembo wo ponisa vanhu van’wana. Yesu u lerise vadyondzisiwa vakwe leswaku va phikelela ntsena loko ka ha ri na ntshembo wo kuma vanhu lava nga ta angula kahle eka mahungu lamanene malunghana ni Mfumo wa Xikwembu. (Matewu 10:23; 1 Timotiya 4:16) Hi ku lavisisa vanhu vo tano hi yindlu ni yindlu, Timbhoni ta Yehovha ti kombisa leswaku ti rhandza Xikwembu ni vaakelani va tona lava va nga ha ponaka loko va twa rungula ra Mfumo kutani va angula kahle eka rona.—Matewu 22:37-39; 2 Vatesalonika 1:8.

Magazini lowu u wu hlayaka wu hundzisa rungula rero ra Bibele. Leswaku u kuma rungula leri engetelekeke, hi kombela u burisana ni Timbhoni ta Yehovha loko ti ku endzela nkarhi lowu taka kumbe u tsalela vakandziyisi va magazini lowu.

[Nhlamuselo ya le hansi]