Pfuna Van’wana Leswaku Va Kuma Vutivi Lebyi Yisaka Evuton’wini
1 Muapostola Pawulo u vule leswaku i ‘Xikwembu lexi navelaka leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso.’ (1 Tim. 2:4) Hi nga va pfunisa ku yini van’wana leswaku va kuma vutivi byo tano? Ndlela yin’wana i ku endla maendzo yo vuyelo eka vanhu lava ku tsakela ka vona ku pfuxiweke hi buku leyi nge Vutivi Lebyi Yisaka eVuton’wini Lebyi Nga Heriki. Buku leyi yi veka ntiyiso wa Bibele wu va erivaleni, hi ku olova, hi marito lama hlawuriweke kahle. Loko va yi dyondza, vanhu va mixaka hinkwayo va nga kongomisiwa evuton’wini. I yini lexi hi nga xi vulaka lexi nga khutazaka van’wana leswaku va yi dyondza na hina?
2 Eka lava kombiseke ku tsakela nkongomiso lowu twisisekaka wa Bibele, u nga ha vuyela u ya sungula dyondzo, kumbexana u ku:
◼“Nkarhi lowu nga hundza loko ndzi ri kwala, hi bule hi xivangelo xo va hi tshemba Bibele tanihi xihlovo lexi twisisekaka xa nkongomiso. Leswi yi huhuteriweke hi Xikwembu, nakambe Bibele i xihlovo xa ntiyiso xa nchavelelo ni ntshembo, hambi ku ri un’wana wa vaapostola va Kreste u vule sweswo. [Hlaya Varhoma 15:4.] Emakumu ka bulo ra hina leri nga hundza, ndzi vutise xivutiso lexi nge, Hi nga pfuneka njhani hi hexe hi vutivi lebyi nga eBibeleni?” Hlaya ndzimana 18 eka tluka 11 ra buku leyi nge Vutivi. Vula leswaku Timbhoni ta Yehovha ti fambisa kwalomu ka ntlhanu wa timiliyoni wa tidyondzo ta Bibele emisaveni hinkwayo, ti pfuna vanhu hinkwako leswaku va nghenisa vutivi lebyi yisaka evuton’wini lebyi nga heriki. Kombisa hi ku komisa ndlela leyi dyondzo yi fambisiwaka ha yona, hi ku tirhisa tindzimana ta ntlhanu to sungula eka ndzima 1.
3 Loko mi bule hi xikhongelo ro sungula ni munhu wa kona, u nga ha ringeta xingheniso lexi hi xikongomelo xo sungula dyondzo:
◼“Ndza tshemba u tsakerile rungula ra mayelana ni xikhongelo leri hi buleke ha rona ebukwini leyi nge Vutivi Lebyi Yisaka eVuton’wini Lebyi Nga Heriki. Ndzi tshembise ku tlhela ndzi vuya leswaku ndzi ta kambisisa na wena ndlela leyi lava khongelaka eka Xikwembu va faneleke ku tlhela va xi yingisa ha yona. Xiya leswi vuriwaka eka tluka 158. [Hlaya ndzimana 18.] Xisweswo, hi ku dyondza Bibele hi hexe, hi yingisela leswi Xikwembu xi hi byelaka swona. Ku endla tano swi hi tshineta ekusuhi na xona ni ku hi pfuna ku langutana ni swiphiqo swa siku na siku leswi hi khongelelaka swona. Ndzi ta tsakela ku dyondza na wena Bibele.” Loko munhu wa kona a swi tsakela, sungulani hi ndzima yo sungula ya buku leyi nge Vutivi.
4 Loko u tirhise xingheniso lexi kongomeke xo sungula dyondzo, u nga ha vula leswi, leswaku u yisa bulo lero sungula emahlweni:
◼“Ndzi endle matshalatshala yo hlawuleka leswaku ndzi tlhela ndzi ku endzela hikuva ndzi lava ku ku byela swo tala mayelana ni nongonoko wa dyondzo ya hina ya mahala ya Bibele. Ndzi ku siyela kopi ya buku leyi, Vutivi Lebyi Yisaka eVuton’wini Lebyi Nga Heriki, leyi nga buku-mpfuno leyi hi yi tirhisaka. Xiya leswi yi hi khutazisaka xiswona ku kambisisa Rito ra Xikwembu. [Hlaya ndzimana 23 eka tluka 22.] Ndzi kombela u humesa buku ya wena, kumbexana hi nga ya emahlweni hi dyondza laha hi yimeke kona nkarhi lowu hundzeke.” Loko dyondzo yi nga sunguriwanga eriendzweni ro sungula, u nga ha ku: “Kumbexana lowu wu ta va wu ri nkarhi lowunene eka mina wo kombisa ndlela leyi hi dyondzaka ha yona Bibele.” Endzhaku ko kambisisa tindzimana ti nga ri tingani, hlela nkarhi lowu nga wona wo tlhela u vuya wa dyondzo leyi landzelaka.
5 Hi ku tirhisa buku leyi nge Vutivi hi laha ku humelelaka swi nga hi endla hi kota ku hangalasa vutivi lebyi kongomeke leswaku van’wana na vona va kuma mikateko. (Swiv. 15:7) Vutivi byo tano byi ta tsakisa lava timbilu ta vona ti nga tinene, naswona byi ta va nsusumeto wa matimba eka vona wo hanya hi ku twanana ni ku lulama ka Yehovha, eku heteleleni byi va yisa evuton’wini lebyi nga heriki.