Bokisi Ra Swivutiso

◼ Xana swa fanela ku hakela eka vutleketli lebyi nyikeriwaka hi van’wana?

Van’wana va hina hi ni swiyimo leswi hi bohaka leswaku hi titshega hi van’wana leswaku hi pfuneka ku ya eminhlanganweni nkarhi na nkarhi ni ku hlanganyela entirhweni wa nsimu. Vamakwerhu vo tala va xinuna ni va xisati va endla matshalatshala lamakulu hi musa, naswona va tirhisa nkarhi wa vona, timovha ta vona ni rifuwo rin’wana hi rirhandzu leswaku va hi lunghiselela swo famba. Hambileswi va bohekaka ku lungheka ka ha ri na nkarhi ku tlula leswi a va ta endlisa xiswona, naswona va hlwela ku tlhelela ekaya, va lunghiselela vutleketli hi moya wa ku tirhandzela.

Emhakeni yin’wana ni yin’wana ya vutirheli bya hina bya Vukreste, nsinya wa nawu lowu kumekaka eka Vagalatiya 6:5 wa tirha: “Un’wana ni un’wana ú ta rhwala mpingu wa yena.” Hikwalaho, loko un’wana a hi tleketla, hi fanele hi kombisa ku tlangela ka hina ku nga ri hi nomu ntsena, nakambe loko hi swi kota, na hi munyikelo lowu faneleke leswaku hi n’wi pfuna ku hakelela swin’wana.—Mt. 7:12; 1 Kor. 10:24.

Hambiloko n’wini wa movha a nga kombeli ku pfuniwa hi mali naswona a nga tikombi a pfumala mali, munyikelo lowu sukaka embilwini wa tlangeriwa nkarhi hinkwawo. Muchayeri a nga ha ala ku teka mali; naswona swoleswo swi ta huma eka yena. Kambe i swinene eka wena ku nyikela. Loko u nga swi koti ku nyikela xanchumu hi nkarhi wolowo, u nga ha tshama u ri karhi u swi tsundzuka; u nga ha swi kota ku nyikela leswi engetelekeke nkarhi lowu taka loko a tlhela a ku khandziyisa.—Lk. 6:38.

Swi kombisa rirhandzu lerikulu loko lava nga ni timovha va khandziyisa van’wana lava nga swi kotiki ku ya eminhlanganweni kumbe ku hlanganyela evutirhelini bya nsimu. (Swiv. 3:27) Hi nkarhi lowu fanaka, nakambe swi ta va swi kombisa rirhandzu eka lava va pfunekaka hi musa wo tano loko va phofula ku nkhensa ka vona hi munyikelo hi ku pfumelelana ni swiyimo swa vona.—Kol. 3:15.