Ku Kuma Ntlhantlho Lowu Nga Wona

RITO RA XIKWEMBU, Bibele, ri vulavula hi nkarhi lowu hulumendhe ya Xikwembu ya le tilweni yi nga ta tlhantlha swiphiqo swa vanhu hinkwaswo, leswi sweswi swi katsaka nthyakiso wa mimovha. Xana Mfumo lowu wa Vumesiya, lowu vanhu vo tala va nga dyondzisiwa ku wu khongelela, wu ta swi kota ku tisa ntlhantlho lowu nga wona hi ku hi endlela movha lowu nga hava nthyakiso hilaha ku heleleke? Kumbe ntlhantlho lowu nga wona wu ta fikeleriwa hi ku herisa mimovha hinkwayo emisaveni? Tanihi leswi Bibele yi nga hi nyikiki nhlamulo leyi kongomeke, hi fanele ku rindza hi vona leswaku ku ta endleka yini.—Matewu 6:9, 10.

Kambe hi nga tiyiseka hi leswi: Hulumendhe ya Xikwembu a yi nge pfumeleli leswaku nthyakiso wu onha vuxongi bya ntumbuluko eParadeyisini leyi tshembisiweke leyi Mfumo lowu wu nga ta yi tisa.—Esaya 35:1, 2, 7; 65:17-25.

Tanihi leswi lava namarhelaka Rito ra Xikwembu va leteriwaka ku hanya emisaveni leyi nga hava nthyakiso, xana va fanele va titwisa ku yini hi ku tirhisa mimovha namuntlha? Awake! ya June 22, 1987, a a yi vulavula hi xihloko lexi nge “Ku Endleka Yini Hi Makhwati Ya Hina?” Yi vike leswaku vativi van’wana va sayense va ehleketa leswaku ku ni ku hlangana eka nthyakiso wa moya lowu humaka eka musi wa mimovha ni ku fa ka makhwati. Leswi swi vangele muhlayi un’wana la khumbekeke leswaku a tsalela Sosayiti ya Watchtower a vutisa loko swi fanerile leswaku Vakreste va chayela mimovha hikwalaho ka mhaka leyi. A a vona onge ku endla tano swi ta va swi kombisa ku nga wu xiximi ntumbuluko wa Yehovha.

Papila ra yena ri hlamuriwile, xiphemu xin’wana xa rona, a xi ku: “Timbhoni ta Yehovha ti yi yingisa hi ku tshembeka milawu leyi vekiweke hi valawuri va hulumendhe ya ku hunguta nthyakiso. (Varhoma 13:1, 7; Tito 3:1) Ku lava ku endla leswi tlulaka leswi hulumendhe yi swi lavaka swi siyeriwa munhu hi yexe. Loko munhu a hlawula ku ka a nga ha chayeli movha, yoleyo i mhaka ya yena a ri yexe. Hambiswiritano, xihloko lexi xa Awake! xi kombise ndlela leyi vanhu van’wana va titwaka hi yona, hi ku vula leswi swi nga eka tluka 8: ‘Vanhu vo tala va teka magoza lama kotekaka leswaku va hunguta ku thyakisiwa ka moya ku fikela laha va kotaka kona. Va ehlisa rivilo, va nga endzi ko tala, va khandziya emovheni wun’we ku ri ni ku va un’wana ni un’wana a famba hi movha wa yena, va tirhisa petirolo leyi nga hava ntsopfu naswona va yingisela milawu leyi vekiweke hi hulumendhe yo sivela nthyakiso.’”

Ku Ringanisela Swilo Ka Vukreste

Nhlamulo leyi yi kombise langutelo ra Vukreste. Swi fanele swi tsundzukiwa leswaku a hi mimovha ntsena leyi vangaka nthyakiso. Swihaha-mpfhuka ni switimela—kahle-kahle, vunyingi bya vutleketli bya manguva lawa—byi ni xiphemu na byona. Kambe muxaka lowu wa vutleketli a wu nga endliwanga hi xikongomelo xa ku thyakisa. Nthyakiso lowu i khombo ntsena leri nghenelelaka, leri ri nga kona hikwalaho ka vutivi bya vanhu lebyi ringaniseriweke ni lebyi nga hetisekangiki.

Xihondzo xo Rindza xa January 1, 1993, eka tluka 31 xi hlamusele mhaka leyi, xi ku: “Tanihi Timbhoni ta Yehovha ha khumbeka ngopfu hi swiphiqo swo tala swa ekholoji leswi sweswi swi khumbaka misava leyi yi nga kaya ra hina. Ku tlula vanhu vo tala, ha swi tiva leswaku misava yi tumbuluxeriwe leswaku yi va kaya lero tenga, leri nga ni rihanyo lerinene eka ndyangu wa vanhu lowu hetisekeke. (Genesa 1:31; 2:15-17; Esaya 45:18) . . . Hikwalaho i swa nkoka leswaku hi endla matshalatshala lama ringaniseriweke, lama twisisekaka ya leswaku hi ringeta ku ka hi nga yi emahlweni hi onha misava tanihi hilaha vanhu va endlaka hakona. Kambe xiya rito ‘twisisekaka.’ . . . Vanhu va Xikwembu va fanele va khumbeka hi timhaka ta ekholoji. Yehovha a a lava vanhu va yena va khale leswaku va teka magoza yo lahla thyaka, magoza lama vuyerisaka ekholoji ni rihanyo. (Deteronoma 23:9-14) Naswona tanihi leswi hi tivaka mavonelo ya yena eka lava va onhaka misava, hakunene a hi nge honisi swilo leswi hi nga swi endlaka ku hlayisa mbango wa hina wu tshama wu basile. . . . Hambiswiritano, leswaku Mukreste u ta swi endla ku fikela kwihi leswi i mhaka ya munhu hi xiyexe, handle ka loko a bohiwa hi nawu. . . . Vanhu lava nga hetisekangiki va wela hi ku olova entlhan’wini wa ku hundzeleta swilo. . . . Matshalatshala ya vanhu yo ringeta ku herisa swiphiqo leswikulu swa misava swa ekholoji, ku katsa ni nthyakiso, ma nge humeleli hilaha ku hetisekeke. Ku nga ha endliwa nhluvuko ematikweni man’wana, kambe ntlhantlho wa hilaha ku nga heriki wu lava leswaku Xikwembu xi nghenelela. Hikwalaho ka xivangelo lexi hi endla xin’wana ni xin’wana leswaku hi seketela ntlhantlho lowu humaka eka Xikwembu, ematshan’weni ya ku ringeta ku tintshunxa eka swiphiqo leswi olovaka.”

Vakreste va ringanisela swilo loko va ri karhi va xiya minsinya ya milawu ya Bibele, va ri karhi va tsundzuka xiavelo xa vona lexi humaka eka Xikwembu xa leswaku va fanele va chumayela mahungu ya Mfumo wa Xikwembu emisaveni hinkwayo. (Matewu 24:14) A ku na xilo xin’wana xa nkoka kumbe xa xihatla xo tlula xona! Loko vutleketli bya manguva lawa ni swa mbulavurisano swi pfuna Vakreste leswaku va hetisisa xiboho lexi, va ni swivangelo hinkwaswo swa ku swi tirhisa. Hi nkarhi lowu fanaka, va ringeta ku balekela nthyakiso lowu tlulaka mpimo kumbe lowu endliwaka hi vomu. Hikwalaho va hlayisa ripfalo lerinene emahlweni ka munhu ni Xikwembu.

Hikwalaho, hambileswi hina namuntlha hi nga swi tiviki swinene leswaku xiphiqo xa nthyakiso ni xa mimovha xi ta ntlhantlhiwa njhani eku heteleleni, ha tiyiseka leswaku xona xi ta tlhantlhiwa. Entiyisweni, ntlhantlho lowu nga wona wu le kusuhi swinene.

Ku Lwisana Ni Nthyakiso

• Ku famba hi milenge kumbe ku famba hi xikanyakanya laha swi kotekaka

• Ku khandziya movha wun’we ku ri ni ku va un’wana ni un’wana a famba hi movha wa yena

• Ku hlayisa movha wu ri exiyin’weni lexinene

• Ku tirhisa petirolo leyi baseke nkarhi hinkwawo

• Ku papalata maendzo lama nga riki ya nkoka

• Ku chayela hi rivilo leri ringaniseriweke

• Ku tirhisa vutleketli bya mani na mani loko swi koteka naswona loko byi ri kona

• Ku tima njhini ematshan’wini ya ku tshika movha wu duma loko wu ta yima nkarhinyana wo leha